بدون تفاهم دشت أم عبدالله بيت حجي علوان
ومن شافت بتها عند خدوج قامت تصارخ

أم عبدالله :- ويلي عليش يا بتي ويلي
قاعده هنه وأني ما خليت سادي ولا وادي الا وأدور عليش
وهذا حجي علوان يقول لي ما شافها

خدوج :- ويش فيش ويش فيش ، غسلتينا
أخذتينا بشراع وميداف شوي شوي لا يطيح بوزش له
أم عبدالله:- ويش اللي ما فيني ، هذا رجلش أسأله شفت بتي يقول لي لا ما شافها
خدوج :-وهوه الصادق ما شافها

أم عبدالله:-هذاهيه قاعده عندش كيفه ما شافها
خدوج :-أيه ما شافها هوه ما كذب ، يعني بيشوف بتش لاويه

أم عبدالله:- وانتين قاعده هنيه ولا تفتحي بوزش لاويه
خدوج :-لاويش تفتح بوزها بعد ، طردتيها من بيتها وخربتيه ، وتالي طردتيها من بيتش وين بتروح يعني

أم عبدالله:-ما سويت شي أني ، أجل رجلها هالبخيل هالدعله ...
خدوج :-بسش حرام عليش خليهم في حالهم لاويش تخربي بيوتهم وتالي تصارخي

أم عبدالله:-دكوه تمبى رجلها تروح إله ماني قايله له شي
خدوج :-الحين يوم قال لش خليها تخيس عندش تقولي كده ، خايفه من مصروفها ومصروف ولدها له

أم عبدالله:- أهوووووه خلينا من هالسالفه قومي جيبي قهوتش يا وخيتي قومي
( ولا كأنها مسويه شي )
خدوج :-الحين تمبي القهوه هاااه
وقامت خدوج وجابت ليها جدوع ويا القهوه وحطته وقامت أم عبدالله تقصف في الموجود ولا بقت لا تمره ولا ميوه ولا شي في ذاك الصحن وولد بتها حسين يطالع فيها
وبعد ما خلصت ما سمعته الا ...
حسين :- ول عليش ويش هالبطن يدتي ، هذا خلاطه مو بطن مابقى شي في الماعون
أم عبدالله:- ول عليك ول ، هذا ما تشوفه في بيتكم ولا عمرك أكلته ، صل على النبي
خدوج :-صادق عليش ، هذا ولا النمل يسوو مفلات اللي سويتيه ، ما يحتاج نغسل المواعين بعد أكلتش
حسين :- هذا أبويي يجيبه لينا ولا ناكله
أم عبدالله:-يجيبه ليكم ما أدري من وينه يجيبه
خدوج :-بسش عن الياهل بسش ، لا تخربي هالياهل على أبوه بعد
أم عبدالله:-لا ويش أخربه وهوه خربان وبارز
خدوج :- انا لله وانا اليه راجعون عليش
حسين :- أصلاً أنا ما أمباش ولا أمبى أقعد في بيتش بعد
أم عبدالله:-وأني خلاص ما أمباكم روحوا بيتكم أهوووه وأني اللي ما خليت مكان الا دورتكم أمباكم تجوا البيت ويايي
خدوج :-ما عرفنا لش ، من شوي تقول كلام والحين خولفتي

أم عبدالله:-ما شفتي هالنحيس ويش يقول له
خدوج :-أقول قومي ويا بتش وستري على روحش

وكل هالوقت بتها تطالع فيم وهيه ساكته ولا قالت ولا حاجه ، وشوي الا هيه منفجره
أم حسين :- وآخرتها يعني آخرتها ويش أسوي أني ، لا رجل خليتيني وياه ، ولا شي ويش أسوي يا ربي

أم عبدالله:- ويش سويت الش أني ويش سويت ، داني أمبى الش الخير بعد
خدوج :-أي خير الا تمبيه ، خربتي الرجل وطلبتي عليه ذهب وصوغه وما أدري ويش

أم عبدالله:- يعني بتي ما تستاهل له
خدوج :-تستاهل كل خير بس خليهم هم يعيشوا وفي حالهم

أم عبدالله:-خلاص خلاص حتى الروحه ليهم ما باروح زين
خدوج :-مو ما تروحي الا تروحي معززه مكرمه
أم حسين :- تجي لينا أماه معززه مكرمه ، خلينا نحبش ومو كل شي تتدخلي فيه

أم عبدالله:-هه داني با أنطم ولا با أتحجي بشي بعد

وشوي الا ما أدري منهوه يدق باب بيت حجي علوان ؟؟

منهوه دا ؟؟؟؟

قريباً نكمل

فمان الله