قام حجي علوان بوزاره وطلع عند الباب
الا جارتهم أم عبدالله تسوحب في جاهل عندها وبتها لاحقتنها ورجل بتها يصارخ عليهم
وصايره الدنيا عفيسه في مريسه

وطلع الحجي علوان بوزاره وراح على طول لرجل
بت أم عبود ومسكه من إيده
وسحبه لبيتهم

حجي علوان :-خير يا حجي ويش فيكم
الرجال :-ويش اللي ما فينا
حجي علوان :-خير خير قول لينا ويش فيك يمكن نقدر نسوي لك شي
الرجال :-قاعدين في حالنا لا علينا ولا الينا شوي الا عمتي داشه علينا وإحنا على السفره
قلت ليها تفضلي عمه ، قالت فيه العافيه
وقعدت على الكرفايه وتطالع فينا وإحنا نتغدى
وقامت تقول وتغمّز وتلمّز

هداويش هالاكل ، الحمد لله ...كنه أكل فقارا
ما فيه لا دهنه ولا شي
ويش هالسمش اللي جايبنه لبتي ،
قلت ليها هيه اللي مشتهيتنه يا عمتي
قالت ليي أيه الا قول مستبخل مو هيه اللي مشتهيتنه
وسكتت عنها
قامت تقول ...يعني غداء لا وياه رويده ولا جرجيره ولا شي ياااااااااااااابس مرررررررره
وكل شوي تتحجج وكل شوي قايله حاجه
لامن زاغت روحي منهالحجي وقمت من على السفره
ورحت المطبخ وشغلت الدافور با أسوي ليي شاي
شان انشغل عن حجيها
بس ما خلتني ...جت ورايي المطبخ
قامت تقول ليي ..يعني بتسوي لك شاي قول تفضلوا ولا يعني ما نستاهل يعني ولا ويش
قلت ليها مو كده يا عمّه ..انتين من زمان ما تشربي شاي وتقولي يجيب لش عوار البطن وما أدري ويش
قالت لي ..ايه قول مستبخل موه
سكت عنها ولا رديت لا بخير ولا بشر
وعودت الليوان وقعت على الكرفايه
راحت لمرتي ووسوست فيها وسوست فيها لامن خلتها تنقلب فوق تحت
ما شفتها الا جايه ليي تقول ليي
انته من زمان ما جبت ليي ذهب وبصراحه أني أمبى قلاده ذهب ولا با أروح بيت أمي
ومن سمعت أمها هالكلمه ما شفتها الا ماخذه زبيل لفياب وساحبه ولدي وماسكه عباة مرتي وسحبتنها وياها لبرا البيت ، ودانا مفل ما تشوف

وقام الحجي علوان يهدي بال الرجال ويصبره
وقام راح لمرته خدوج

علوان :- شفتي ويش مسويه هالنحيسه ، طايحة السنجه
خدوج :-ويش مسويه بعد ، أكيد رجل بتها مسوي بليه
علوان :-ايه هيه خرابة بيوت ما تهون عن فعايلها
خدوج :-داني با أروح ليها وبا أشوف السالفه
علوان :-روحي ليها وخليش واسطة خير
خدوج :-اللي يكتبه الله يصير

وطلعت خدوج وراحت لأم عبود ودشت عليها
بيتهم وشافتها قاعده ويا بتها
وقامت أم عبود لخدوج ورحبت فيها ومسّت
أم عبود :- شفتي الرجال ويش يسووا في حريمهم
خدوج :- خير خير يا وخيتي ويش صاير في البنيه
أم عبود :- ويش صاير فيها ، مكسورة خاطر ولا حدا جايب خبرها
خدوج :-الله لا يكسر ليها خاطر أبد بجاه
النبي وآل النبي يا رب
أم عبود :-الله يسلمش يا وخيتي
خدوج :- ويش صايرالحين
أم عبود :- لبنيه تمبى من عند رجلها صوغه
ماهوه جايب ليها
خدوج :-شااااااااه رجلها مسافر يعني
أم عبود :-لا مو مسافر ولا شي ، شانز البيزات على قلبه شناز ، ولا يطلع منهم ولا آنه ولا ربيه
خدوج :- ويش عرفش يا وخيتي انه ما يطلع شي
أم عبود :- أجل قاعدين يتغدوا سمش وياف ويا عيش أبيض ما عليه ولا تشة دهنه ولا فيه رويده ولا حتى جرجيره
خدوج :- يمكن بتش اللي مشتهيه هالأكل
أم عبود :-لا لا ويش تقولي ، بتي تمبى تاكل وياف
ما فيه صافيه ولا قرقفانه
خدوج :- يالله يا وخيتي لا تكسري بخاطرها وخليها تعود بيت رجلها
أم عبود :-ما تعود الا بصلحه والله
خدوج :-على ويش هالصلحه
أم عبود :- ايه تطلع من البيت وتعود بلا صلحه ما يصير
خدوج :-براحتش ، زين ويش تمبي صلحتها
أم عبود :-ما فيه الا قلاده ذهب
خدوج :- خلاص با أروح أقول لرجلي
وان شاء الله يصير خير
وطلعت خدوج من عند أم عبود وراحت للحجي علوان وقالت له شرط أم عبود لرجلها
خدوج :-وتقول لك يا حجي ما بتخليها
تعود الا بقلاده ذهب
الرجال :- أجل قولي ليها خليها تخيس عندش
خدوج :-منهيه اللي تخيس عندها
الرجال :- منهيه بعد بتها
خدوج :- لا لا ، مايصير تقول هالشكل يا حجي
الرجال :-يعين يصير اللي تسويه عمتي ، لا يرضي
الله ولا خلقه
خدوج :-ما عليه تحمل يا حجي
الرجال :- قولي ليها كده وبتشوفي
خدوج :- خلاص أني با أقول ليها ويصير خير

وردت خدوج لبيت أم عبود
خدوج :- يقول الرجال خلي بتش تخيس عندش
أم عبود :- ويش يقول ، زين با أخليها عندي وقولي له لا يحلم يشوفها
وطلعت خدوج من عند أم عبود وراحت لرجل بتها وقالت له باللي صار
فقام وطلع من البيت وراح في حال سبيله

علوان :-ما قلت لش ان أم الخضر والليف خرابت بيوت له
خدوج :- انا لله وانااليه راجعون ، وإحنا ويش علينا منهم
علوان :-ويش علينا منهم وانتين رايحه راده من عندها
خدوج :-هذي في صلاحهم مو لفتنتهم

وشوي ما سمعوا الا صوت صراخ ونواح بعد


من هيه الا تصارخ وتناوح ؟؟؟

نشوف بعدين !!!

فمان الله