هلا والله اخوي أمير
عاد لا تزعل من أولها ولا تعصب
انا وحدة من الي شافوا الموضوع أمس
بس قلت خليني أأجل الرد لبكرا عشان يطلع على رواقة
نرجع لمحور حديثنا
" استخدام الضرب في المدارس"
هل المعلم بهالاسلوب يفرض شخصيته على الطلاب ؟
في رايي لا
لان المدرس الي يستخدم اسلوب الضرب شخص ضعيف الشخصية واختار اسهل الطرق لفرض شخصيتة
وعمره اسلوب الترهيب ما وصلنا لشيء
بالعكس ممكن يتراجع مستوى الطلاب الدراسي وتتربى عندهم عقد نفسية
هو صحيح فيه طلاب يرفعوا الضغط وودك لو تخنقهم بايدك وكأنهم مو جايين المدرسة للعلم جيتهم بس للمشاكل بس هل الضرب حل؟؟
المدرسة مكان للعلم والتربية مو مكان للضرب
وللتربية نقدر نسلك طريقين
الاول الترهيب
والثاني الترغيب
الطريق الأول سهل بس نتائجه مو دائما في صالح الطالب
الطريق الثاني يخلي الطالب يحب الدراسة والمدرسة عن جد ...يخليه يصحى من حاله ويذاكر بدون محد يوقف على راسه كل هذا رغبة في التفوق ورغبه في اسعاد معلمه الي هو بدوره يحاول اسعادهم بشتى الوسائل
ردا على سؤالك
ماشعورك وابنك ينضرب في المدرسة ؟
انا ما اقول اني ما اضرب اولادي وادعي المثالية
ساعات اسويها بس ضرب تأديب مو تعذيب ويومها ما انام ولا اسامح نفسي
ووالله لو ابوهم يمد ايده عليهم احس بقهر وودي اكسر الدنيا ساعتها
فمابالك لو المدرس هو الي يضربهم ... ممكن اكلم ابوه يكلم المدرس واذا كانت بنت انا اروح لها واكلم المديرة اذا ماشفت حل مع المدرسة
واذا مانفع انقل اكتب في الجرايد واذكر اسمائهم وافضحهم
اولادنا مو وسيلة لتفريغ كبتهم وعقدهم
اسمح لي خيي
طولت في الهدرة
مشكور لتطرقك لهالموضوع