>>>>>>نتابع
وطلعت أم جسوم من بيت شروفه بسرعه وراحت لبيتهم
ومن دخلت شافت ولدها واقف في الحوي
أم جسوم :- إسم الله عليك يا غناتي ، هاه ويش ابري بطنك
منصورووه :-آه يا أمااااه ، داهوه شويه خف عليي
أم جسوم :-ما تشوف شر يا غناتي ما تشوف شر
منصورووه :-الشر ما يجيش ولا يقرب نواحيش
أم جسوم :- تعال أمباك في سالفه تعال
منصورووه :- أول شي أمبى آكل ليي لقمه
أم جسوم :-وبعد اللي صار فيك بعد تمبى تاكل
منصورووه :-وقليل اللي طلع مني بعد يماه
أم جسوم :-خلاص خلاص ، با أسوي لك بيضتين شان يسدوا بطنك
منصورووه :- أمباهم مقليين مو مفيوحين
أم جسوم :-بعد أقرع ويتشيرط بعد
منصورووه :- خلاص أجل با أروح أشتري ليي لوبا ولا تمني علينا بهالبيض
أم جسوم :- هذا وأني أمك بعد تقول ليي كده وحيفي مداويتنك
منصورووه :-السموحه يا يمه السموحه ، بس انتين تخليني أطيش ، يعني على بيضتين بتسوي سالفه علينا
أم جسوم :- أقول روح أقعد على الكرفايه ودتني با أجيب لك البيض
منصورووه :- ان شاء الله
وراح منصورووه الحجره وقعد يحارس
وسوت أمه البيض وحطته في تراي وياه خبزة وكاس شاي
وجابتهم وقعدت وياه
وهجم منصورووه على التراي وفي دقيقه لهم اللي فيه لهام
وقام يشرب الشاي شوي شوي
أم جسوم :- بالعافيه عليك يا وليدي بالعافيه
منصورووه :-الله يعافيش يمه ، صدق ما شبعت بس يالله شي ولا ما ميش
أم جسوم :-المهم يا منصور ، سالفتي عنك اليوم
منصورووه :- خير ويش فيه ، الله يجعله خير
أم جسوم :-كل خير ان شاء الله ، يا ولدي انته صرت رجال ويمبا لك تعرس يا يمه أمبى أشوف ولادك قبل ما أموت
منصورووه :-يوووووه أعرس قبل أخويي جسوم ، ما يصير .
أم جسوم :- جسوم ما ندري عنه هوه حي ولا ميت يا ولدي ، وفاني حاجه ما فيها شي
منصورووه :-لا لا لا تمبي الناس يتحجوا علينا
أم جسوم :-اللي يتحجى علينا نقص لسانه يا يمه
منصورووه :- ونعم في أمي ، مو بس تقصي لسانه الا تقصي راسه بعد
أم جسوم :-الحين ويش قلت ؟
منصورووه :-خلاص أجل اللي تشوفيه يا يمه
أم جسوم :- على بركة الله
منصورووه :-بس تعالي منهيه اللي بتخطبيها ليي
أم جسوم :-ما عليك يا منصورووه أني أبخص بهالشي
منصورووه :- بأمرش يا يمه
وطلعت أم جسوم من عنده وهيه الفرحه مو سايعتنها
ونامت ذيك الليلة بعيون فقيله بعد
ومن غبشة الغباش فزت
وصلت وياكم على محمد وآل محمد
وراحت لديايها وشالت نص البيض بس
وخلت النص الفاني عشان يفقشوا
ومن ضحضحت الدنيا لبست عباتها وطلعت
وراحت جهة الفريق الشمالي
ومن وصلت سألت هناك عن بيت أم السعف ودلوها عليه وهم مستغربين ويش تمبى منها
ودقت الباب ....مره .....مرتين .....فلاف
ويم ما جاها جواب قررت انها تمشي
الا الباب ينفتح وتطل منه حرمه
أم السعف :-خير تدقي بيبان الناس وتمبي تروحي
أم جسوم :-لا يا حجيه ، أني دقيت مره وفنتين وفلاف وتالي يوم شفتكم ما فتحتوا قلت يمكن طالعين
ولا مشغولين يعني
أم السعف :- تفضل يا غناتي تفضلي
أم جسوم :-زاد فضلش يا غناتي
ودخلت أم جسوم للبيت وشافت البيت واللي فيه
وصار في مخها ان البيت اللي يشوفه من برا يقول خرابه
ومن يدخل تقول جنه ، خضره وزراعه وخوش بيت
أم السعف :- هنه تفضلي في الليوان أحسن ...أهوى للنَفَس
أم جسوم :-أي والله ...ما على الليوان والقعده فيه
أم السعف :- تفضلي تقهوي
أم جسوم :- الله يسلمش ويسلم حبايبش قهوتش مشروبه يا غناتي
وبعد ما ضيفت أم السعف أم جسوم قعدت لا كلمه ولا خبر ، فنتينهم ساكتين
أم السعف :- أي صحيح ما عرفتش انتين من وينه
أم جسوم :- أيه عدل ما قلت لش أني من وينه ولاويش جايه ليكم ، الله يقطع النسيان
أم السعف :- تفضلي يالطيبه
أم جسوم :-تسلمي يا غناتي ، أني أم جسوم من فريق الشرقي جايتنش أمباش في طلب وما ترديني
أم السعف :-آمري وتدللي ، اذا نقدر عليه تآمري إحنا نعين ونعاون ان شاء الله
أم جسوم :-جايتنش يا محفوظة السلامه أمبى أخطب لولدي بنيه مزيونه من بناتش
وقفت أم السعف وهيه تطالع في أم جسوم
ولا في بوزها ولا كلمه بس تطالع في أم جسوم وهيه فاقه بوزها ...........
..........لاويش ؟؟؟
نعرف اذا تعبت أم السعف ههههه
فمان الله
رد مع اقتباس
المشاركة الأصلية كتبت بواسطة للدموع إحساس
المفضلات