با أسولف وشوفوا سالفتي ...

[واحد فاضي]

وعطاها الربيات وخلى عنده ربيه كامله
وطلع النحيس

وظلت أم جسوم تفكر وين تضم الربيات
وهيه قاعده في الحوي
جت على بالها فكره
وعلى طول وبدون مشاور طلعت
يمين يسير ، شمال جنوب
من زرنوق الى فاني ومن صاباط الى صاباط لامن وصلت السوق ، وراحت لبياع الدياي
أم جسوم:- قواك الله حجي
البياع :-الله يقويك حجيه ، آمري ويش تمبي
أم جسوم:- أمبى فلاف ديايات وديك
البياع :- تمبيهم عربيات عدل
أم جسوم:- أيه أجل بتنطيني عنقريز ولا هنود ما أمبى الا عربيات أصل وفصل
البياع :- شاااااه جايه تشتري دياي ولا تخطبي
أم جسوم:- أقول يا لله بلا هدره
البياع :-زين زين الحين ويش بتشتريه

أم جسوم:- أهوووووه جيب ليي خلني با أروح
البياع :- يالله الديايه بربيتين وفلاف آنات
أم جسوم:- ويشهوووه
البياع :- أقول بربيتين وفلاف آنات
أم جسوم:- شاااااااااه إحنا جايين عفر الصايغ مو جايين عند بياع الدياي
البياع :- تمبي أهلاً وسهلاً ، ما تمبي الدرب يوسع ناقه
أم جسوم:- ناقه اللي تنوقك بلا ، يالله أهووووه ما لك الا ربيتين على الديايه
البياع :- ما يصير حجيه ما يصير
أم جسوم:- صرصر بطنك وما مسكته العرب
هذااللي يقول رضينا بالهم والهم ما رضى بنا
البياع :- يالله بلا كفير هدره جيبي بيزاتش أهوووه
أم جسوم:- خذ خذوك أهل تحت
البياع :- خذي ديايش خذوش أهل فوق
وأخذت أم جسوم الدياي وعلى طووووول على البيت
ومرت قبل ما تروح البيت على أستاد عبود
وقالت له يسوي ليها في الحوي محكر حق الدياي
وراح وياها واشتغل على طول وضرب المرابيع
وحط الشبك وسوى سقف ليهم
وعطته أم جسوم المقسوم وراح
وحطت الدياي في المحكر وهيه تأمل خير من ورى الدياي
وقعدت تحلم بالبيض والطويرات وكيف بتصير بتستغني
وبتشتري ليها قدو لحالها وبتقعد تقند راسها طول اليوم وما أحد بيمن عليها ولا أحد يطردها من بيته
لكن ما دامت أحلامه واااايد

الا بدخلت منصورووووه عليها
منصوروووه :-أماااااااااااااااااااه أماااااااااااااااااه
أم جسووم :- وجعاااااااااااااااااااااااااه ويش تمبى يالخبل ويش تمبى
منصوروووه :- عطيني ربيه
أم جسووم :- هاااااااااااااااااه ربيه تمبى ، حيفك ماخذ ربيه
منصوروووه :- أقول لش أمبى ربيه عندي شغله ولازم أشتريها
أم جسووم :- ويش هيه هالشغله أول
منصوروووه :- هذا أبو سلمان رجل شرفوووه
أم جسووم :- ويش فيه بعد ويش يمبى منك
منصوروووه :- يقول عنده نخله في السنه تطرح مرتين
أم جسووم :-أيه ، ويش دخل الربيه في هالنخله
منصوروووه :- قلت له أنا با أخذ فمرة الصيف وهوه ياخذ فمرة الشتاء
أم جسووم :-فمره الصيف وفمرة الشتاء ، هذا الخراط بعينه واعلمه ، أمش ويايي الحين وأنا أخلي راسه اللي يفمر في الصيف والشتاء
منصوروووه :- لا .....لا تروحي له هذا أقشر
أم جسووم :- أني القشرا ، واللي يتعدى على ولدي غناتي يجني على روحه
همش ، همش ويايي
وطلعت مفلات هواء الشمال اذا هب
وعلى طوووول على بيت أبو سلمان رجل شروفه
وبلا إحم ولا دستور دزت الباب برجولها ودشت
أم جسووم :- وينهوووه وينهوووه اللي ما يستحي ولا ينتخي
شروفه :-تمبي من ، ويش اللي ضايع لش
أم جسووم :-ويش اللي ضايع ليي ، رجلش
شروفه :-يووووووووه رجلي ويش تمبي فيه
أم جسووم :-رجلش يا غناتي يمبى يبوق ولدي
شروفه :- هالله هالله ، ويش هالحجي لمي لسانش أحسن الش
أم جسووم :-انتين اللي لمي رجلش ولا تخليه
ينصب على خلق الله
شروفه :-شاااااااه ويس مسوي عفر
أم جسووم :-أجل فيه أحد عنده نخله تفمر في السنه مرتين يالظالمه انتين ورجلش ويمبى يبيع فمرها على منصوروه ولدي
شروفه :- ويش تقولي نخله تفمر مرتين ، اللي يصدق هوه الخبل
أم جسووم :- الا رجلش نصااااااااااااااااااااااااب
شروفه :- يالله برا البيت يالله ، ولا أشوفش داشه
أم جسوم :- داني با أطلع لكن من أشوف رجلش لأوريه نجوم القايله
شروفه :- روحي عن وجهي انقلعي يا وجه النحس
أم جسوم :- أني وجه النحس يا الجراده اليابسه ، يالقيقانه ، يالخصفة المتقصفه
شروفه :-اني الخصفه يالحِبْ المنبط ، يالبرمه
أم جسووم :- هذاني با أطلع لكن يا ويكم مني
شروفه :-برا يالله برا ، لا ردش الله مره فانيه

وطلعت أم جسوم ووقفت على راس العاير تحارس أبو سلمان

ويش تتوقعوا تسوي ؟؟؟؟؟

[شذى الزهراء]

وعطاها الربيات وخلى عنده ربيه كامله

وطلع النحيس
ليش نحيس بعد الا الله رزقه خير يعني بعده حاله نحيس

وعلى طول وبدون مشاور طلعت يمين يسير ، شمال جنوب
حشا ضاايعه ماتعرف وين تروح الا هي مبهدله مصرقعه.
من زرنوق الى فاني ومن صاباط الى صاباط
ياعلي ماتدل الطريق امشي عدل شكلها خربت الفريق من دوارتها.
لامن وصلت السوق ، وراحت لبياع الدياي
اخيرا وصلت ساااالمه ..
البياع :- تمبيهم عربيات عدل
لا نص ونص ههههه عجبتني عربيات لا اجنبيات
البياع :- شاااااه جايه تشتري دياي ولا تخطبي
هههههههههه موقااادره عليهم

أم جسوم:- شاااااااااه إحنا جايين عفر الصايغ مو جايين عند بياع الدياي
اي مفلات الحين الذهب غالي والاكل غالي
البياع :- تمبي أهلاً وسهلاً ، ما تمبي الدرب يوسع ناقه
الناس تقول جمل هو قال ناقه يناسب الانثى بالانثى الظاهر شاطر في النحو ايام زماااااان
أم جسوم:- صرصر بطنك وما مسكته العرب
ويش معنى صرصر مااعرف
هذااللي يقول رضينا بالهم والهم ما رضى بنا
اي والله صاادقه
البياع :- يالله بلا كفير هدره جيبي بيزاتش أهوووه
ليش هندي بلا كفير عجايب هالبياع.
أم جسوم:- خذ خذوك أهل تحت
اللهم ياكاااافي سكنهم في مساكنهم
البياع :- خذي ديايش خذوش أهل فوق
ههههههه يبغى يسوي مفلاتها..
وقعدت تحلم بالبيض والطويرات وكيف بتصير بتستغني
احلامها وااجد هالمراه مايندرى بتتحقق والا
وبتشتري ليها قدو لحالها وبتقعد تقند راسها طول اليوم وما أحد بيمن عليها ولا أحد يطردها من بيته
هذا كلامها عدل ماراح بلا حشيمه بات بلا فراش
أم جسووم :- هاااااااااااااااااه ربيه تمبى ، حيفك ماخذ ربيه
فلوسه وتحاسبه يحلو هالمراه.
منصوروووه :- أقول لش أمبى ربيه عندي شغله ولازم أشتريها
شوي وبيعطيها كف
منصوروووه :- قلت له أنا با أخذ فمرة الصيف وهوه ياخذ فمرة الشتاء
معقوله يلعب عليها وياخذ فلووسه, سمع بالسااالفه وطمع
أم جسووم :-فمره الصيف وفمرة الشتاء ، هذا الخراط بعينه واعلمه ، أمش ويايي الحين وأنا أخلي راسه اللي يفمر في الصيف والشتاء
هههههههههه . كيف يفمر الراس..
أم جسووم :- أني القشرا ، واللي يتعدى على ولدي غناتي يجني على روحه
همش ، همش ويايي
اي هالله هالله بها الولد يا ام جسوووم قويه وقادره
وطلعت مفلات هواء الشمال اذا هب
حلو هواء الشمال
وعلى طوووول على بيت أبو سلمان رجل شروفه
وبلا إحم ولا دستور دزت الباب برجولها ودشت
يما الواحد ينخااف منها اباضيه
أم جسووم :- وينهوووه وينهوووه اللي ما يستحي ولا ينتخي
يويو في بيته وتسبه كيف يصير
شروفه :- هالله هالله ، ويش هالحجي لمي لسانش أحسن الش
اي تدافع عن الحبيب والزوج بعد شنو
شروفه :- ويش تقولي نخله تفمر مرتين ، اللي يصدق هوه الخبل
اي الله يهدي منصور متى يستعقل مايندرى
أم جسوم :- داني با أطلع لكن من أشوف رجلش لأوريه نجوم القايله
اي جزاء لعبه على خلق الله بعد هذاا
أم جسوم :- أني وجه النحس يا الجراده اليابسه ، يالقيقانه ، يالخصفة المتقصفه
هههههههههههههههه خصفه حلوووو
شروفه :-اني الخصفه يالحِبْ المنبط ، يالبرمه
ويش الحب المنبط
وطلعت أم جسوم ووقفت على راس العاير تحارس أبو سلمان
ويش تتوقعوا تسوي ؟؟؟؟؟
اني ماادري ننتظر ونشووف

تسلم الاياااااااادي يا ابوزين
والله تسلينا بسوااالفك الحلوووووه لاخلا منك...
الله يعطيك الف عااافيه..
وجاااااااااري الانتظار وتكملة الحكااايه..
دمت بخير...
تحيااتي..