بسم الله الرحمن الرحيم
اللهم صل على محمد وآل محمد

من شافوا شلايل أم جسوم وهيه تصادم في البيبان منحاشه من البيت وهيه تقول ....خبز خبزتيه إكليه يا أم جسوم

ما شفوا الا غبارها ....بس هيه وين دلفت ؟؟؟؟
أم جسوم دلفت لبيتها

ومن وصلت البيت خربطت المفاتيح وقامت تدق الباب دق لين فتح ليها ولدها
أم جسوم :- ويش فيك يا الخبل ما فتحت الباب بسرعه
ولدها :- ويش أسوي قاعد العب هههه
أم جسوم :-تلعب لعبوا على ظهرك الشحاحيط
ولدها :-ويش فيش أماه هههه ويش فيش هههه ، تراكضي منهوه اللي لاحقنس بعصاة هههه
أم جسوم :-ويش فيني ما فيني الا العافيه
ولدها :- دكوه مبلله هههه وحالتش حاله
أم جسوم :- انطم طموك في بير ان شاء الله الا طموط في بير وأرتاح منك
ولدها :-ويش مسوي لش أنا ههههه
أم جسوم :-منته مسوي شي بس لا شغله ولا مشغله نايبه تصقعك وأفتك من بلاويك
ولدها :-ما أحد مشغلني عنده ويش أسوي بعد أنا
أم جسوم :- شوف الليله با أروح لريل كظام وبا أقول ليها تحاشي ريلها عشان يشغلك في حفيزه
ولدها :-ريل كظام بخيل ، ما بيعطيني لا روبيه
ولا حتى آنه بعد ههههه
ودخلت أم جسوم حجرتها وصكت الباب
,,,,,,,,,,,,,,,,,
وبنروح الحين لظام وزكاي في بيت زكاي

فنتينهم قاعدين يقربعوا في القدو وياكلوا حب ويسولفوا

زكاي :- ما سمعتي ويش صاير في بيت شروفه له
كظام :- ويش صاير بعد
زكاي :- يقول لش أم جسوم الخبله دشت عليهم البيت ولعبت فيهم
كظام :- نايبه تشيلها ما تخلي أحد في حله
زكاي :- لا ويقول لش بعد كسرت مطبخهم تكسير
كظام :- هالنحيسه
زكاي :- يقولوا يعني أني ما أدري بس سمعت انها تختنت لامن دخلت مطبخهم على غفله وأكلت غداهم ويوم صادوها سوت روحها غمرانه وقاموا كتوا عليها ماي بارد
كظام :-الله يغربلها غربال
زكاي :-وما دريتي يا وخيتي ويش سوى ريل شرّوفه فيها
كظام :- ويش سوى له قولي ليي بسرعه ترى أفادي قام يدق
زكاي :- يقول لش قام يفلت عليها المشاكيب والغضاير لامن رضيت تطلع من البيت
كظام :-لزقة ريح ما تفش يوم اللي تلزق بعد ويش
زكاي :-لا بعد قام لحقها ومن زرنوق لزرنوق ومن صاباط لصاباط ، لامن حلفت له بالدين والعظيم ما ترد تعود بيتهم وتالي خلاها في حال سبيلها ، ولا هوه ناوي ونيته قشرا يكسر عظامتها تكسير
كظام :-شان زين كسرها وفك الديره من شرها
زكاي :-وي وي وي ، مسكينه ما تستاهل هي بس شويه خبلا غير
كظام :-خبلا ولسانها سليط ، ما يسلم منّه أحد
زكاي :-صدق لسانها ما أحد يسلم منّه بس ما أحد يشره عليها
كظام :-اي والله ما ينشره عليها .
--------
والحين بنعود لبيت أم جسوم شوي
ولدها :- أماااااااااااااااااااااااااااااااه ههههه أمااااااااااااااااااااااااه
أم جسوم:-ويعيه ...ويش تمبى
ولدها :- ما سمعتي أماه ، أبو محمد اللي من
الفريق الغربي مات هههههه
أم جسوم:-الله يرحمه ، من ويش مات
ولدها :-يقولوا مرض وودوه سبيتار وما طاب وما شافوه الا ميت يوم فاني
أم جسوم:-ما عرفت ويش مرضه له
ولدها :-يقولوا أذونه تعوره
أم جسوم:-أيه ما عورته أذونه الا من هالريدو ، ما يسمع الا وشواش اللي يحطوه على ايران
ولدها :-يعني من صواية ايران مات
أم جسوم:- أجل من ويش ، هذولا يحطوا الصوايه عشان يمرضوا الناس ، وسبيتار ما يعرف ليهم
وما شافت الا ولدها ما خذ الريدو وطالع به ........
وقامت تصارخ عليه أم جسوم .......تعاااااااااااااااااااااااال يالنحيس تعااااااااااااااااااااال
وهوه داق الطبلون هههههه

وسلام عليكم