بسم الله الرحمن الرحيم
اللهم صل على محمد وآل محمد الطيبين الطاهرين
-----------------
نكمل ليكم اليوم من عند أم جسوم أول شي
-----------------
وشوي الا راسها يدور يدور يدور يدور

وطرااااااااااااااااااااااااااااااخ

وقامت تقولب المسيكينه في الحوي وداير راسها ، وهيه تون ون ........
آآآآآآآآآآه يا راسي ، آآآآآآآه يا عمري ، آآآآآآآآه يا بطني
وما هيه قادره تعدل روحها
وقامت تزحف تزحف ليمن وصلت المطبخ
ورشحت وجهها بماي وشربت ليها تبلة ماي
وصحصحت شويه
أم جسوم :- الله يغربلني ، ويش ليي أحط خشب في الراس
ويش فيها يعني لو أخذت فحم من عند جيراننا أكيد
ما بيقواوا شي
وهيه قاعده تسولف ويا روحها جت ليها فكره من الافكار اللي تدور في راسها وقامت ، راحت للقدو وحطته في السطل وخلته ينقع وشالت التتن ونقعته بعد
وحطت راسها وناااااااامت من التعب
ومن غبشة الغباش فزت
وراحت للدياي وشافت تحتهم أربع بيضات قامت شالتهم وحطتهم في خرقه ولفتهم زين ما زين وطلعت من البيت رايحه السوق
شمال جنوب ...شرق غرب
يمين يسار ....
ليمن وصلت السوق
ودشت لبياع الدياي
أم جسوم :-قواك الله حجي
البياع :- الله يقويش
أم جسوم :- حجي عندي بيض تشتريه
البياع :-بيض ، ويش أسوي في البيض ، دكوه عندي في البيت متروس من البيض
أم جسوم :-يعني ما تمباه
البياع :- لا ما أمباه
أم جسوم :- وأني ويش أسوي في هالبض اللي عندي
البياع :- روحي بسطي فيه في العاير ، تلاقي اللي يشتريه منش ، والله يرزقش
أم جسوم :- يالله مشكور
البياع :- فمان الله
وطلعت من الحفيز وراحت العاير اللي يبسطوا فيه النسوان يبيعوا فيه كل شي وقعدت جنب وحده تبيع ليف وحبال وخصاف
أم جسوم :- سلام عليكم
المره :- عليكم السلام ...يا الله صبا خير يا الله نبا خير
أم جسوم :- خير خير ويش فيه حجيه ويش فيه
المره :- ما فيه شي ، بس هالمحل هذا لأم سعود هيه اللي تبسط فيه كل يوم
أم جسوم :-خير خير ، ما أحد قال لي ..أقول أهوووه بس أهوووه قالت ويش قالت لأم سعود
المره :- ويش عليي أني قلت لش وانتين تنجازي وياها
أم جسوم :-إيه أني أنجاز وياها
وشوي الا أم سعود واصلت بأغراضها وشافت أم جسوم قاعده محلها
أم سعود:- هيه انتين ويش قعدش محلتي
أم جسوم:- لا يكون مكتوب عليها إسمش
ولا مكتوب عليها إسمش
أم سعود:- أيه مكتوب عليها إسمي ، أقول لا تزيد هذرتش يالله توزّي من هالمحل توزّي
أم جسوم:- ويش هووووه أتوزّى ، أقول ماني متزحزحه من محلي أبداً
أم سعود:- منتين متباعده له ، بنشوف أجل الحين
وقامت أم سعود تنادي ....سعود ......سعود
وجا سعود .....واحد فحل طوووووووييييييل
ومن شافته أم جسوم .......
أم جسوم:- إسم الله الرحمن الرحيم عليي وعلى عمري
أم سعود:- ويش بتتباعدي ولا ويش
أم جسوم:- الا با أتباعد لاويش ما اتباعد يا وخيتي
وقامت من محلها ووقفت على كتر
وهيه تشوف سعود واقف قبال أمه وهوه يساعدها في تعديل أغراضها وأمه تصارخ عليه وهوه ما يرد عليها لا بخير ولا بشر
وسألت مره من اللي يبسطوا في السوق
أم جسوم :- حجيه ويش فيه سعود ولد أم سعود
المره :- هذا يا غناتي مريض ، ما يعرف في هالدنيا الا أمه
مسيكين ...وأمه هذي سليطة لسان الله يغربلها غربال
أم جسوم:- يعني ما يسمع ولا شي
المره :- يسمع بس ما يفهم
أم جسوم :- آآآآآآها ما يفهم
ووقفت تفكر .....وتفكر..... وتفكر
وجت ليها فكره جهنميه علشان ترجع شوي من اللي صار ليها ، وراحت جمب أم سعود ووقفت
أم سعود:- خير ويش جايبنش بعد ،ما قلنا لش بعيد بعيد
أم جسوم:- داني بعيد عنش ولا سويت لش شي
أم سعود:- ما أمبى أشوف خلقتش قدامي أبداً
أم جسوم:- لا يكون مسويه لش شي ولا مسويه لش شي
أم سعود:- انتين ما تفهمي بالطيب يعني
أم جسوم:- خير وويش بتسوي يعني
أم سعود:- الحين بتشوفي ....
سعود شوف شغلك وياه هالمخرفه
وتحرك سعود جهة أم جسوم ، وفي نفس الوقت تحركت أيد أم جسوم جهة البيض
وما شاف سعود الا بيضه لازقه في وجهه
وبعدها بيضاه فانيه لازقه في جبهته وقام يمسح البيض
ورفع طرف فوبه يمسح البيض
وقامت أم جسوم بحركه سريعه وهااااااات يا رفسه في ظهر سعود ، وما قدر يوقف الا في حضن أمه والبيض مالها في إيدها وانصبغ وجهه بالبيض صباغ
وحضن أمه صار هريسه مريسه
وقامت العفسه عفاس في الاغراض مالتها
وبعد ما إستكفت أم جسوم باللي سوته
وقومي وهدي دياي أم سعود في السوق
كاااااااااااااك كاااااااااااااااك
والناس تلاحق الدياي والعفسه قايمه
وحطي رجولش ولا شافوا الا غبارها ........
ودشت البيت وسكرت الباب على روحها أم جسوم
ودخلت على طول حجرتها ........

وتغطت بالكمبل .....
............

ونعود الى منصوروووه الحين
وعطى أبو محمود منصوروه فلافين ربيه وطلع من الحفيز
وطلع وراه منصوروه حق يتطمن إنه ما فيه أحد شاف أبو محمود وهوه طالع
وعود الحفيز وقام يكمل السكولا ويا الشاي ويا النامليت
وهوه يفكر ويش بيقول للحجي عباس ؟؟؟؟؟

شوي الا الحجي عباس داش الحفيز ........
حجي عباس :- هاه ويش منصوروووه ما أشوف
أبو محمود وياك
منصوروووه :- من هوه أبو محمود هذا
حجي عباس :- يعني ما جاك ولا طب عندك
منصوروووه :- ما أحد جاني الى الحين من طلعتك حجي
حجي عباس :- ويش نسوي الحين بعد ويش نسوي
منصوروووه :- خير حجي ، ويش صاير
حجي عباس :-ما فيه شي ما فيه شي ، انته ويش يفهمك
(وكتم منصورووه الضحكه )
منصوروووه :- انته قول ليي بس ولا عليك ، فهمت ولا
حجي عباس :- أقول بس روح شوف ليي أبو سعيد الخوصه ما جاب لفلوس
منصوروووه :- يجيبهم يعني يجيبهم لا تخاف ، بس مو تنسى العشرين ربيه حجي
حجي عباس :- عشرين ربيه ، أنا قلت لك خمس ربيات
منصوروووه :- يووووه حجي عباس ، نسيت
حجي عباس :- لا ما نسيت بس أنا قلت لك با أخليهم عشرين ربيه اذا خليت أبو محمود يقعد
منصوروووه :- وويش ذنبي أنا اذا هوه ما جا الحفيز
حجي عباس :- وأنا ويش عليي ، خلنا على
اتفاقنا الأولي أحسن
منصوروووه :- خلاص حجي خلهم عشر على أبو سعيد الخوصه وأنا أجيب لك فلوسك اليوم
حجي عباس :- ما من مشكله منصوروووه ، روح الحين واذا جبتهم اليوم الى عشر ربيات كامه
منصوروووه :- يالله أجل با أروح وبا أجيب
فلوسك ان شاء الله
وطلع منصورووه من الحفيز وقعد حجي عباس يفكر ويفكر
حجي عباس :- ويش بيسوي يعني هالمنصوروووه
ويا أبو سعيد هذا واحد نصاب ما يقدر عيه أحد
......وراح منصوروووه الى أبو سعيدالخوصه ودق باب بيتهم
وطلع اله أبو سعيد ...
أبو سعيد :- خير خير ويش تمبى بعد يالخبل مو كفايه اللي سويته فيي يا الله انقلع
ودخل وصفق الباب في وجه منصورووه
ودق منصوروووه الباب مره فانيه
وطلع أبو سعيد اله بعد
أبو سعيد :- قلنا له خير
منصوروووه :- الخير بوجهك يا أبو سعيد ، بصراحه أنا ندمان على اللي سويته فيك اليوم ، وجاي شان انفعك
أبو سعيد :- تنفعني ، انته تنفعني أنا
منصوروووه :- أيه وزي ما قلت لك ما جيت هنه الا لمنفعتك يا حجي
أبو سعيد :- ويش تمبى الحين
منصوروووه :-يعني تمبانا نتحجي في الطريق
أبو سعيد :- يا الله بنسمع خريدك ...تفضل دش أهوووه
منصوروووه :- بسم الله ...يا الله يا الله
ودخل منصورووه ويا أبو سعيد وقعدوا
أبو سعيد :- خير آمر ويش عندك الحين دحنا في البيت
منصوروووه :-شوف يا أبو سعيد ،بلا حجي زايد
الحجي عباس صار رجال غني الحين واذا تمبى تستفيد منه هذي فرصتك
أبو سعيد :- ويش تقول ويش تقول الحجي عباس هالمتحتح صار غني ، من وينه اله يا حسره ...لو يبيعوه في السوق ما جاب له الف ربيه
منصوروووه :- دانا أقول لك ، الحجي عباس صار غني
واذا منته مصدقني با أراويك ويش عطاني
بس شوف انته ويش بتعطيني
أبو سعيد :- اذا صدق اللي قلته الحين ، با أعطيك عشر ربيات كامله
منصوروووه :- بس عشر ربيات ، وأنا أقول أبو سعيد كريم وما بيقصر ويايي وأنا فقير مسكين
أبو سعيد :- خلاص خلاص بنخليها عشرين ربيه ولا فيه زياده
منصوروووه :- خلاص خلاص وافقت يا أبو سعيد
أبو سعيد :- يالله كيفه صار الحجي عباس غني
منصوروووه :- هذا يا محفوظ السلامه ....الا ما عندك لا شاي ولا ماي ولا شي
أبو سعيد :- انا لله وإنا اليه راجعون ، بعد بتتشرط الله يجيبك يا طولت البال
منصوروووه :- يالله يالله ما تمبى من عندك شي ، شوف هذا اليوم جاء الى الحجي عباس مكتوب من برا وراح للمطوع وقال له ويش هالمكتوب
وقراه المطوع طلع من ود عمه اللي في الهند ومخلي اله ذيك لفلوس وذاك الذهب وذيك الأراضي واللي ما أحد عنده في الديره نصها ومن شاف الخير اللي جاه ما شفته الا منادي عليي وماد ايده في مخباه ومطلع ليي من مخباه فلافين ربيه كامله وقال ليي :- يا ولدي هذا اللي عندي الحين وبس تجي ورفتي من ود عمي ما با أنساك
شوف شوف هذي الفلافين ربيه
وراواه البيزات حق يصدق ( ومنصوروه فيه ضحكه بس مو قادر يطلعها وهوه يشوف وجه أبو سعيد وهوه متغير ومتبدل )
وما شاف منصوروووه الا أبو سعيد الخوصه مطلع له خمسه وعشرين ربيه وهوه يقول له :- يا ولدي هذا اللي طلع من مخبايي الحين وبس ينتابني من حجي عباس شي ما با أقصر وياك
وكتم منصوروه الضحكه وقال
منصوروووه :- أجل الحين أنا با أروح أقول لأبو سعيد انك انته بتمر عليه
أبو سعيد :- لا لا تروح وتقول له شي تالي تخرب كل شي
منصوروووه :- أيييييه أووووووه نسيت ما عليه خلاص انته متى بتمر عليه
أبو سعيد :- بكره با أروح اله
منصوروووه :- على بركة الله
وطلع منصوروه من بيت أبو سعيد وهوه ميت من الضحك
ويقول ...لعبنا عليك ...لعبنا عليك

ودخل بيتهم .....وراح للحجره وشاف أمه نايمه
قام حط لفلوس في مكان في الكبت ما تعرفه أمه

بس أم جسوووم حتى وهيه مريضه ما تنام الا نومة الذيب

تعرفوا ويش هيه نومة الذيب ؟؟؟

نشوف ويش هيه نومة الذيب قريباً ........

فمان الله