بسم الله الرحمن الرحيم
اللهم صل على محمد وآل محمد الطيبين الطاهرين

وطلعت أم جسوم ووقفت على راس العاير تحارس أبو سلمان
وطول أبو سلمان ما مر
وأم جسووووم ما تقدر تحارس ، ما تقدر تقعد
في محل واحد كفير وقررت تدور من زرنوق الى زرنوق
لامن شافت أبو سلمان مقبل من بعيد

وتجهزت ........وفجأة ما شاف أبو سلمان الا أم جسوووووم نااااااطه عليه
أم جسوووم :- هااااااااه يا اللعاااااب يا الخراااااااااط يا قليل الحيا يا قليل الأدب
أبو سلمان :- خير خير خير حجيه ويش فيش
أم جسوووم :- حجة عليك أم الديفان الا حجت عليك
أبو سلمان :- يالله ياكريم ، من انتين
أم جسوووم :- أني منهيه ، أيه تمبى تلعب على ولدي وتسوي روحك ما تعرفني يالسراق
أبو سلمان :- لمي لسانش يا مره لمي لسانش
وتجمعوا عليهم الناس وهذا يقول صلوا على النبي
وهذا يقول استهدوا بالله
أم جسوووم :- ما أحد له شغل فيني ، أني با أخلي يومه أسود هالأبوسلمان هذا ..رجل شروفه
أبو سلمان :-انا لله وانا اليه راجعون
أم جسوووم :- ايه سوي روحك ما تدري عن شي
أبو سلمان :- ويش اللي صاير
أم جسوووم :- يعني ما تدري ، تمبى تبوق فلوس ولدي منصور ، وتسوي روحك ما تدري عن شي
أبو سلمان :- أييييييييييييييه انتين أم جسووووم خرابة لبيوت
أم جسوووم :- إخترب أفادك الا أخترب أفادك
أني خرّابت لبيوت يالحرامي
أبو سلمان :-أقول لمي لسانش لا تشوفي شي ما شفتيه
أم جسوووم :- أيه تمبى تعمّي على السالفه هاااااااااه
لكن الا أفضحك في كل مكان
أبو سلمان :- أم جسووووووم ترانا ما نسينا نارجيلتنا الى الحين هااااااااه
أم جسوووم :- ويش فيها نارجيلتك ، دكوه تشرب غليونك عليها وشنها البخت
أبو سلمان :- وطبتش على المطبخ وشربش النارجيله ما نسيناه
أم جسوووم :- أني ما سويت شي أني ما سويت شي
أبو سلمان :- وولدش منصوروووه هذا اذا ما يعرف في شغل النخيل خليه لا يدخل روحه
أم جسوووم :- انته تقول فيه نخله تفمر في الشتاء مره وفي الصيف مره فانيه ولعبت عليه تمبى تبيعه فمرة الشتاء
أبو سلمان :- هههههههههههه
هههههههههههههههههههه
هههههههههههههههههههههههه
هههههههههههههههههههههههه
(استغر بوا اللي متلايمين وياهم أم جسوم
وياهم مندوبة ك.ز ليميتد بعد )
أم جسوم :- يووووه ويش فيه هذا يضحك ، الظاهر استجن رجلش يا شروفه
أبو سلمان :- الله يغربل ابليسك يا منصوروووه ، الله يغربل ابليسك
أم جسوم :- شااااااااه ويش صاير الحين
أبو سلمان :- شان على هالسالفه أنا أحجي لش ويش صاير
أم جسوم :-تفضل وقدام الجماعه ، واذا طلعت تخرررط ما تشوف خير
أبو سلمان :- مانا قادر على ولدش ، هذا إحنا قاعدين في القهوه ونسولف عن فمرة لكنار ونقول عن فمرة الصيف وفمرة الشتاء ، وعن النخله وكيفه ما تفمر الا مره وحده
وما شفنا لا منصوروووه واقف ويقول أنا با أشتري فمرة الشتاء قلنا اله خلاص روح جيب بيزاتك وتعال
وإحنا ندري ان منصوروووه ما عنده فلوووس
بس قلنا اله عشان يروح عنا
شاي وشربناه ...نامليت وشربناه
دراسين وشربناه
ما ضل شي الا خلطه في ذاك البطن حشا مو بطن هذا
خلاطة يمانيه
أم جسوم :- الله يفشلك يا منصوووروووه مفل ما فشلتني ، الله يفشلك
وحطت رجولها وما شافوا الا غبارها
يعني طردت روحها بروحها
أبو سلمان :- يالله يا جماعه استروا على ما واجهتوا يالله
وتفرق الجماعة وكل واحد يقول لا حول ولا قوة الا بالله العلي العظيم
وردت أم جسووووم الى البت تحارس ولدها منصوروووه
بس منصوروووه ما رجع البيت ونام في النخيل ذيك الليله
ومن صباح الله خير راح القهوه وشرب له استكانة شاي
وقعد
وشوي الا أقبل أبو سلمان وشافه على الكرفايه
أبو سلمان :- منصوروه ، الله يدمر حالك ويش هاللي قلته لأمك
منصوروووه :- ايه انته قلت ليي بتبيعني فمرة الشتاء وأنا اشتريتها وبا أجيب الك فلوس
أم جسوم :- عودنا لهالسالفه مره فانيه ، قوم روح لأمك قوم
داكيه حالتك حاله روح اتسبح روح
منصوروووه :- ان شاء الله عمي ان شاء الله
وراح منصوروه الى البيت ومن دخل من الباب الا شاف أمه نايمه في الحوي وقام يتخطى خطوه خطوه
خطوه خطوه ...بالآسته
شوي شوي
وشوياااات الا أم جسووووم مفلات الأسد تنط على ولدها
أم جسووووم:- هااااه يالخبل ، تحسبني ما أشوفك يا طايح السنجه ...تتخطى بعد شوي شوي هاااااه
منصوروووه :-خلاص أمااااه خلاص والله ماأعيدها والله
أم جسوم :- ويش ما تعيدها ، بعد ما فشلتني قدام اللي يسوى واللي ما يسوى
منصوروووه :-والله خلاص ...خلاااااااااااااص
أم جسوم :- يالله ويش أسوي لك ولدي وما أقدر أسوي فيك شي ، ما عندي سند في هالدنيا الا انته وجسوم
وهذاك ما حن قلبه على أمه الى الحين
منصورووه :- خلاص أماااااه والله خلااااص ،
ما با أعيدها مره فانيه أبد
أم جسوم :- يا أجل قوم تسبح وروح لحفيز حجي عباس لا يستفقدك من الصبح
منصوروووه :- ان شاء الله أماه ان شاء الله
أم جسوم :- يالله غناتي روح
وتسبح
وخرج منصوروووه بعد ما تسبح ولبسته أمه فياب نظيفه
وراح لحجي عباس في الحفيز ،

ومن دخل استقبله الحجي عباس وهوه مبتسم لاويش ؟؟؟؟؟

نشوف ...

-----------
نرفع أسمى آيات العزاء والمواساة إلى أمير المؤمنين عليه السلام وإلى الأئمة الطاهرين عليهم السلام وإلى صاحب العصر والزمان أرواحنا لتراب مقدمة الفداء
بمناسبة إرتحال الرسول الأعظم صلى الله عليه وآله وسلم
عظم الله أجوركم