اليوم رجعنا الى أم جسوم وولدها منصوروه يوم قالت له.....
أم جسوم :- زين يالله قوم ، روح لشغلك اللي ما أدري من وين طلع لك وخلني أحرفس الشمك ولاتتأخر وخذ هاك هذي فلاف آنات جيب لينا بهم شوية هولندا
منصور:- انزين أماه ههههه
وطلع ولد أم جسوم .....؟؟؟
وين راح .....راح لبياع الدهن
منصوروه :- هاك يا حجي هذي آنتين وعطنا هولندا
بياع الدهن :- آنتين في عيونك ،ويش تجيب لك آنتين
منصوروه :- يعين ويش بتبعني قص ليي هولندا أحسن لك لا أفلت عليك رمل وأخلي هولندتك تخترب
بياع الدهن :- إنا لله وإنا اليه راجعون ، هاك هاك ويالله انقلع عني يالله
وراح منصوروه عن بياع الدهن ، وهوه راجع مر بياعة الصبعبلي وإشترى له صبعبلي بآنه
ويمشي ويقول
صبعبلي على لبن
ومرينا على حسن
حسن يا أبو عطيه
عطاني محيمديه

وهوه يمشي الا شف صبيان قاعدين له عند راس العاير وما لحق يطوف الا خاطفين من عنده الصبعبلي ومنحاشين وهوه وراهم يلاحقهم ويصرخ ، وهم يركضوا وهوه وراهم لامن راحوا عند النخيل وهوه وراهم

وتوحدوا به المسيكين
صبي :- أقول منصوروه ويش بتسوي الحين
منصوروه :- جيبوا الصبعبلي وما باأعلم عليكم
صبي فاني :- ههههههه قال صبعبلي قال ...شاااااا إحنا تهنينا به ، انته ما خليتنا
منصوروه :- مسوا مو اليكم هذا ليي
صبي فالف :- الحين ويش ، جيب البيزات اللي عندك لا نتيبنك دست ما شفته ولا سمعت به
منصوروه :- كفوا انتون تضربوني
صبي :- يالله عليه
ومنصوروه المسيكين ما شاف الا الظلمه
هذا بعصاه وهذا بنعاله وهذا كفوف وواحد منهم أخذ الدهنه - الهولندا - وعفسها في راس منصوروه
وخلّوه وانحاشوا عنّه
وعود المسيكين لبيتهم وهوه حالته حاله
ويم شافته أمّه الا تقوم النوايب والصقايع
ويش سووا فيك اللي ما يخافوا ربهم اللي ما يختشوا ولا ينتخوا
وخلت ولدها وطلعت تصارخ في الفريق
وتلايمو عليها الرجال والنسوان ويش صاير يا أم جسوم
وقامت ودخلت لولدها وجرجرت به لبرا البيت وهيه تقول شوفوا شوفوا بعيونكم ويش سووا في ولدي شوفوا
اللي ما يخافوا ربهم
ويوم شافوا الناس اللي صاير في منصوروه تجمعوا وقاموا يدوروا على الصبيان وكل ما جابوا صبي لمنصوروه يقول ليهم هذا وياهم وهذا مو وياهم
لامن تجمعوا اللي دقوه وقاموا ربطوهم وما فيه الا خيازرين تشتغل على أراجلهم وفي ظهورهم
وصارت لمه وضحكه في ذاك اليوم
ومنصوروه يرقص ويتضحك والناس ما تدري هيه تضحك على الصبيان ولا على منصوروه وشكله مدهون بالدهن
-------
ونعود الى وكالة الأخبار ك.ز ليميتد
زكاي :- شفتي ويش سووا في منصوروه اليوم
كظام :- أي يا وخيتي شفت ، بس يقولوا واللي يسمع غير اللي يشوف
زكاي :-ويش يقولوا يا وخيتي
كظام :- يقولوا ان منصوروه هوه اللي لحق الصبيان ويمبى ياخذ فلوسهم
زكاي :- يعني ويش مساكين هالصبيان ، ضربوهم على الفاضي
كظام :-أيه والله على الفاضي ، أني سمعت بس
زكاي :-ويش سمعتي ؟
كظام :-يقولوا لحقهم منصوروه من عند حفيز حجي محمد الى الرسته ، ويوم قريب بيوصل ليهم عرقلوا له وطاح وانكتت الهولندا عليه قام يصايح وتجمعوا عليه الناس وقال اللي قاله وجودوا الصبيان وضربوهم
زكاي :- الله يستر علينا من خبالته
كظام :- ومن خبالة أمّه بعد
وما لحقت تقول شي الا أم جسوم داخله عليهم مفلات البرق
منهيه الخبله اللي تتحشوا عنها

زكاي :-لا لا لا هذي وحده من فريق الغربي
أم جسوم :- إيييييه حسبت بعد
زكاي :- وينش أم جسوم ما شفناش من زمان ؟
كظام :- أي والله وينه متغبيه ، فجيتي علينا .
أم جسوم :- فجيت عليكم ، انتون ما تمبوني أصلاً
زكاي :-يوووووه ما نمباشه ....دحنا نسأل عنّش وعن أخبارش
كظام :-الا بنسألش بس لا تستحرقي علينا
أم جسوم :- على ويش أستحرق عليكم ، إسئلوا يا غناتي إسئلوا
كظام :- با أسئلش ...كيفه مات رجلش ؟؟؟؟

ليلة بكره ان شاء الله بنعرف كيفه مات رجل أم جسوم
وسؤال كظام عن رجل أم جسوم ويش الا وراه ؟؟؟؟؟