أم جسوم :-جايتنش يا محفوظة السلامه أمبى أخطب لولدي بنيه مزيونه من بناتش
وقفت أم السعف وهيه تطالع في أم جسوم
ولا في بوزها ولا كلمه بس تطالع في أم جسوم وهيه فاقه بوزها ...........
أم جسوم :- خير يا وخيتي ، عسا ما غلطنا
إسم الله الرحمن الرحيم عليش وعلى عمرش

وقامت أم جسوم بتغرف من الحب قلاص ماي

الا أم السعف تصرخ عليها :- قعدي في محلش قعدي

وقعدت أم جسوم في محلها غصب عليها من الخوف اللي صادها
أم السعف :- وين يتروحي وين ، تمبي تنحاشي هاااه
أم جسوم :- لا ويش أنحاش ، أني باأغرف لش قلاص ماي يبرد على روحش
أم السعف :-أني ما أشرب الا من بغلتي
ورفعت بغله جمبها وقامت تشرب
والماي يتصبب من بوزها ويبلل ملفعها وعباتها
وشوي الا هيه تكح
كح كح كح كح كح كح
أم جسوم :- عليش بالعافيه ،هني هني
أم السعف :-هني على عمري ان شاء الله ويبعد الحساد عني
أم جسوم :-هني على قلبش
أم السعف :-أخاف مهي من قلبش بس
أم جسوم :-لاويش مي من قلبي
وقعدت أم السعف تطالع في أم جسوم وهيه ساكته
وقام العرق يتصبب من أم جسوم من الخوف
أم السعف :- الحين قولي لي منهوه اللي حادنش علينا وويش تمبي منا ولاويش جايه ؟؟
أم جسوم :-قلت لش أني ، أمبى أخطب لولدي بنية حليوه من بناتش
أم السعف :-ومنهيه اللي قايله الش ان عندي بنات للعرس
أم جسوم :-أني رحت لوحده من ربعنا وسألتها أمبى أخطب لولدي ودلتني عليش
أم السعف :-منهيه هذي وويش قالت لش
أم جسوم :-هذي إسمها شروفه بت حجي محمد وقالت لي ما الش الا أم السعف عندها بنيات حليوين

وما شافت أم جسوم الا أم السعف قايمه بطولها وهيه تصارخ

أم السعف :- سعف الا يسعف عمرش ولا تقومي منه أني أم السعف أني ، جعلش وياها الصمرقع
ودود البطن ما تفكوا منه
أم جسوم :-علا ويش يا وخيتي ، أني لا أعرفش ولا أعرف إسمش بعد لاويش الدعاوي
أم السعف :-لاويش الدعاوي هااااه ، بعد في وسطة بيتي وتسميني أم السعف .......
أم جسوم :-أجل ويش إسمش انتين حجيه
أم السعف :-حجت عليش البقر الا حجت عليش
أم جسوم :-انا لله وإنا اليه راجعون ، الله يغربلش يا شرفه ما طيحتيني الا في قشرا
أم السعف :-أني قشرا بعد ، جعل بدنش يتقشر ان شاء الله

وما إستحملت أم جسوم السبيبه وقامت
تصارخ على أم السعف ، وهذي تدعي وهذي تسب
أم جسوم :-أني جعل بدني يتقسر ، أجعلش اليباس
ان شاء الله
أم السعف :-بعد وتتجري عليي .......وقامت تنادي
على بناتها.....
وجوا البنات وحده ورى الفانية
ومن شافتهم أم جسوم طار باقي عقلها
ما شافت قدامها الا فحول مو بنات
اللي في إيدها ملاس واللي في إيدها خشبه واللي في إيدها منجل واللي في إيدها حبال
أم جسوم :-اسم الله الرحمن الرحيم
أم السعف :- هاه بعد ويش بتقولي
أم جسوم :-ما با أقول الا حسبي الله ونعم الوكيل عليش يا شروفه وعلى شورتش ، أجل أني أطيح في هالورطه
أم السعف :-أجل أني أم السعف هاااااه ، ويش تمبيهم يحشوش حش الحين ولا بتتأدبي وتشيلي روحش ولا نشوف رقعة وجهش في هالفريق أبداً
أم جسوم :-الا با أنقلع وما بتشوفي رقعة وجهي أبد

وقامت أم جسوم وتحركو البنات مع قومتها
وأمرتهم أمهم انهم يرجعوا لشغلهم
لكن أم جسوم ما تروح وهيه مكسورة الخاطر أبد
وهيه قايمه شالت وياها البغله
ومرت عدال الحب
وشوي الا الحب على الأرض ومايه مندفق على حصير أم السعف
وتوها أم السعف بتصرخ على بناتها الا البغله فوق راسها
وأم جسوم بشلانها تراكض لامن وصلت للباب
وفتحت الباب وطلعت

وتوها بتحط رجولها الا نص الفريق واقفين على الباب
ومن شافتهم الا هيه تصارخ عليهم :- روحوا لا تطلع ليكم الجنية روحوا
وتفرهدوا الفريق وأم جسوم تراكض وهيه ما تشوف اللي وراها .

فنتين من بنات أم السعف وراها
وهيه تركض من محل لمحل وهم وراها
ووصلت لفريقهم وهم وراها ماهم مخليينها
ودخلت ف يزرنوق اللي يوصل لبيتهم وخافت تروح للبيت على طول تالي يندلوا البيت قالت مالي الا بيت شروفه
أروح له وأبلشها
وهب وصلت لبيت شروفه وفتحت بابهم ودخلت وصكت الباب وركبت الصدح وعبرت من الجسر بينهم وبين جيرانهم من الدار الفوقيه ودخلت على الجيران وهم قاعدين توهم بيركبوا غداهم
الا أم جسوم مفلات الخبابوة تمر عليهم وهيه تصارخ
ومن خلعتهم اتنفرت المواعين وصارت حالتهم حاله
وبس دقيقه الا أم جسوم طالع من الباب الوراني وتروح لبيتهم وتسكر الباب و....
تعب تعب تعب تعب الماي من الحب مالههم عب

من الخلعه منصور قعد من نومته وقام يزوحف لامن طلع وشاف أمه قاعده وعيونها بارزه من راسها

منصورووه :- قواش الله يماه ، ويش فيش
كأنه السعلو لاحقنش
أم جسوم :-أي سعلو يا منصور ، لو السعلو كان أهون عليي شوي
منصورووه :-سلامتش يماه سلامتش ما تشوفي شر
أم جسوم :-الشر ما يجيك يا وليدي
منصورووه :-الا أقول أماه
أم جسوم :-خير ويش تمبى
منصورووه :-متى بتروحي تخطبي لي
أم جسوم :-خطبوا لك الجنانوه ، ماظلت خطبه
منصورووه :-ويش فيه أما ه مصخنه توش تقولي
لي بتخطبي ليي
أم جسوم :- بعدين أقول لك بعدين
وشوي الا باب أم جسوم يدق
وما تشوفوا أم جسوم الا تتنافض مفلات لطوير
أم جسوم :-شوف منصورووه اذا فيه أحد يسال عني قول له أمي مريضه
منصورووه :-لاويش يماه
أم جسوم :-قول له انته أول شي وقول ليهم بعد أمي مي قادره تحرك روحها من البارحه زين يا ولدي
منصورووه :-بس قول لي لاويش
أم جسوم :-قول ليهم انته كده ، اذا تمبى تبقى لك أم في هالدنيا زين
منصورووه :-ما يهمش أماه كل شي ولا أمي

وراح منصورووه يفتح الباب وهوه يصارخ
زين زين شويه قلعتوا الباب الله يقلع اياديكم ان شاء الله
ومن فتح الباب الا قدامه أبو سلمان
وبنيتين ومرته شروفه
منصورووه :-خير خير يا حجي ويش تمبى
أبو سلمان :-ويش أمبى ، شوف هالخطار اللي
جايين ويش يمبوا
وسألهم منصورووه :- خير ويش تمبوا
بت أم السعف :- نمبى أمك
منصورووه :- أمي مريضه وما تقدر تتحرك
من البارحه نايمه
أبو سلمان :-من البارحه نايمه شااااااه واللي دشت بيتنا منهيه جنيه يعني
منصورووه :-ما أدري منهيه يا حجي
أبو سلمان :-أقول خلها تطلع للناس أحسن ليها
منصورووه :-أقول لك أمي مريضه تقول ليي
خلها تطلع للناس
أبو سلمان :-أنا مالي شغل ، اذا ما طلعت الحين بيطلعوها غصب عنها ترى
منصورووه :-وانتون ويش تمبوا في أمي
بت أم السعف :- نمبى نأدبها اللي ما تستحي، تضب أمنا وتنحاش عمبالها الدنيا مهدوده يعني
منصورووه :-تضرب امكم من وينه وهيه من البارحه نايمه في البيت
أبو سلمان :-أقول لك خلها تطلع
منصورووه :-تمباها تطلع لاويش انته بعد ، تأدب أحسن الك يا حجي ياللي ما تستحي تمبى ويش تطالع
أبو سلمان :-مالي شغل أنا
منصورووه :-دام مالك شغل انقلع من قدام بيتنا وروح
أبو سلمان :- هاااااه ويش تقول تأدب يا صبي
منصورووه :- أنا رجال مو صبي ويالله انقلعوا من قدام باب بيتنا يالله
وصفق الباب في وجههم ودخل وهوه يفكر في اللي صاير
منصورووه :- ويش هالبليه اللي طاحت علينا ما أدري من وينه ، لاويش يا أماه تسوي كده ما أدري ، بس هذي أمي ولازم أحامي عنها
وجته فكره جهنمية وقرر ينفذها على طول
وراح أخذ السطل وعباه من الخمايم وركب فوق الصدح
وهب على روسهم من فوق
وتفرهدوا من قدام بابهم وهو يلعنوا ويسبوا في منصورووه وأمه ، ونزل منصورووه لأمه
منصوروووه :- ما عليش أماه خليش في البيت ولا تطلعي داكوه فرهدتهم ، رميت عليهم الخمايم من فوق الصدح
أم جسوم :-وراحوا يا ولدي
منصوروووه :-ولا بقى منهم أحد ، وهذا اللي ما يستحي رجل شروفه جاي وياه بنتين يمباش تطلعي خليته بيزه ما يسوى
أم جسوم :-كفوا عليك يا ولدي ، سبع وما ينخاف عليك
منصوروووه :- الحين أنا با أروح للحجي عباس أكيد تأخرت عليه
أم جسوم :-أي حجي عباس اليوم طلعه من هالبيت ما فيه
-----------
( ونخليهم الحين يتكلموا ويا بعض ونروح لـــكظام وزكاي ليمتد)
كظام :-سمعتي يا وخيتي اللي صاير
زكاي:-أيه سمعت عن قليلة الحيا أم جسوم
كظام :-يقول لش فقعت راس المره يمنجل وطلعت دمامينها كررررررررررررررررر
زكاي:- ما ينشره عليها هذي المره
كرررررررررررر
كظام :- لا ويقول لش المره قاعده ومضيفه أم جسوم وما قصرت وياها بعد كرررررررررر
زكاي:-أي والله ما تنعطى وجه هالأم جسوم كررررررررر
كظام :- يقولوا ما شافت المره أم جسوم الا وهيه واقفه وماخذه المنجل من العريش وضاربتنها على راسها من غير شي ولا شيات
زكاي:- ما تستحي في بيت المره وتسوي فيها كده
كظام :-وهذاكيه المره في سبيتار ومو عارفين يوقفوا الدم من راسها
زكاي:- لا ويقول لش يوم يشيولها ودوا وياها طشت دم طالع من راسها كررررررر كرررررررررر كرررررر
كظام :- داكم يمبوا يعودوه في راسها الدخاتر ماهم عرافين
زكاي:- ويش بعد يعودوه ، ماليهم الا أبر يدقوها كل شوي يترسوا براه ويضربوها شان بس الدم يعود
كظام :- الله يعينها والله ، داكم نسوان فريقهم ماخذين ليها عصير طماط
زكاي:- ان شاء الله يفيد ويعود دمها في بدنها
كظام :-ان شاء الله ما تموت وتبتلش أم جسوم بدمها بس
زكاي:- ان شاء الله ما تموت الخير والبركة في الدخاتر
وكررررررررررر
قال
كرررررررررررررر
وكملوا قعدتهم
----------
ونعود الحين لأم جسوم ويا منصورووه
أم جسوم :-الحين يا ولدي ويش أسوي ويش أفعل
منصورووه :-انتين اللي جبتيه لروحش وأنا ما ليي خص
أم جسوم :-الحين يا طايح السنجه أني مو
رايحه أخطب لك له
منصورووه :-عاد تخطبي لي تضربي المره فوق راسها
أم جسوم :-أجل تسبني وتطردني وتمباني أسكت
منصورووه :- هذا اللي قلناه ، ودام سويتي اللي
سويتيه تحملي
وشوي الا الباب يندق

طق طق طق

منهو اللي يدق الباب ؟؟؟؟

نعرف في الحلقه الجايه

حتى ذلك الوقت
عساكم في صحة وعافيه

فمان الله