سلام عليكم احبتي..

من زماااان ما كتبت شي بهالقسم...
هالدنيا اجاركم الله مهي مخليه فيني مخيخ ,,
وصاير الواحد هاليومين اذا شاف شي مو زين يكتفي بقولة انا لله,, ويبلع الجرح وينشب وينطم ويخرس..

اليوم قلت اتكلم شوي واعور راسكم بهدرتي .. ما عليه ما عليه.. تحملوني خوب من زمان ساكته...

الأسعار نار مو.. << ندري ما جبتي شي جديد ما جبت شي جديد.
البنزين ورخصة القياده غلو اسعارهم..
خيشة العيش ويا غلاة العيش على قلوبنا وسعرها غلى..
لول الناس تشتري فاكهه بالكراتين الحين بالأكياس..
مواد التنظيف بدت تدخل السلك الغلوي ..
ثياب عفر الناس كم سنه وبتستغني ..ما تبغى تلبس عييييييب ...

والرواتب اااه من الرواتب ... زياده زياده وتلحف ونام نومك يا مسكين افاده
مو اذا نمت حضرتك.. ما بتطلع ولا بتاكل ولا بتسبح فخلك نايم تووفر..

اخاف بكره الهوا بعد يصير بحساب واذا الواحد جى بيطلع من بيته يقطع تذاكر دخول وخروج من مدينه لمدينه...

ما معور قلبي في هالغلا الا الشباب ... بدت موضة العنوسه تغزو حياتهم والشيب يكسو رؤوسهم..

وين اعرس يا ولد الحلال قادر أأكل روحي واعيش روحي حق احط وحده بذمتي وما يندرى كم واحد راح نفرخه ..
ويللا عاد بعض البنات مايقبلو بهالواقع ويتحمقو و ويش نسوي مو ذنبنا ما يقدر يعرس لا يعرس و و ...
الا من رحم ربي من العاقلات اللي يفهمو وضع الدنيا والتدهور الإقتصادي اللي كاسر ظهر الشعوب...

اخاف كم سنه ونرجع نعيش عيشة الإنسان البدائي .. العالم كلما تطورت تقدمت وارتقت وازدهرت وحنا نتخلف ونرجع للورا.. مو فالحين الا بترويج المعتقدات والموضات الدخيله علينا من الغرب...

الله يدوم النعمه علي وعليكم وعلى جميع المؤمنين
راااسي مصدع .. واذا صدع هالمخيخ وعصبت ما يروقني الا الحلا

البونتي << الله يخلف قلت بقاااطعه على قولتهم الماستر فودز بتخلي فيه انفحه حيوانيه وبيدخل ضمن المشتبهات...
بس هيهات ابليس يوزني عليه ما اقدر على فرقاه الصراحه
افااا بس صار بـ 3 ريال.. العلبه مدري بكم...!!
بكره بـ 5... وبيزيد ويزيد.. وشي طبيعي مني كإنسانه عاقله وواعيه ومتفهمه للوضع بهالدنيا اني اضحي لأجل اولويات اخرى...

واااه على حبيبي ...






حبيبي حتى انت صرت بريـــــــــــــال,,..!!!

مو تقولو اميروه عاد همي دبتي << خافت..
هذا فيض من غيض من اللي ابتلينا به بس على شان توصل فكرتي
واكيد وصلت...
مالينا الا التمر .. اخاف بعد كم سنه حتى هو يرتفع سعره هذا اذا ما ارتفع...
ساعتها زي النمل على السكر .. وهو مرتفع بعد
ليش تحلي حياتك.. خليك هيك واكل هوااا .. بس هوااا..

دمتم بحفظ الرحمن