فديت اللي اذا ما جيت انا اساله عن حاله

يبان الشوق في عينه ويسالني وش اللي فيك

واذا ما جا على بالي اكيد اني على باله

واذا ما جيتني تسال انا اللي ارتمي واجيك

زعل مره واحرمني وانا المشتاق لوصاله

سهرت بليلة الفرقا وكنّي من الوله اشكيك

يروح الليل ويركني ويفعل فيني افعاله

وانا في دفتري حاير ادوّر كيف انا ارضيك

هجير الشوق والخاطر يساءلني عن احواله

انا وش حيلتي ياللّي غرامي ما يأثر فيك

اخاف الحين اشرح لك عذاب الليل واهواله

ويصير الهم في قلبك عيوني يالغلا تفديك

لو انك فارس العشاق وكل الكون خيّاله

انا درب الليالي اللي اذا ما جيتني اطويك

انا ذاك الغرام اللي عظيم الشوق هو خاله

وفيك الخوف لو يطري انا يا منيتي اغطيك

سكنت الروح والخافق غديتي داره وماله

ولك في غيبتك طاري ينازعني على طاريك

دخلت دنيتي لما نسيت القهر واظلاله

ملكت مهجتي والروح كل ما تطلب تعطيك

يبان الشوق في عيني وانا اساله عن حاله

وخوف الكون يملكني قبل يسأل (وش اللي فيك)؟