اقارن لك مصايبها وهضمها..حزن زينب اشد لو حزن امها
يغايب تدري بيها..شتجاوبني عليها
حزن زينب اشد لو حزن امها
*********
يابقية ال غالب ياحليف الثار
راح ابين لك نوايب تسلب الافكار
ابتدي ابهجمة الغاصب من هجم عالدار
واختتمها بالكتايب والخيم والنار
مصيبه ابتدت بالزهره المها..ومرار الدهر برض الطف ختمها
هضم فاطمه وزينب..انشدك ياهو اصعب
حزن زينب اشد لو حزن امها
***********
اتصوبت امك الزهره والضلع مهشوم
هالضلع جددواكسره بالطفوف القوم
نفس هالموقف تنظره ابجدك المظلوم
داست الخيل اعله صدره وجسمه يجري دموم
الهشم ضلع امك ابجوره وظلمها ...ابخيوله اضلوع ابو اليمه هشمها
مصابين ابحزنهن...قلب زينب حملهن
حزن زينب اشد لو حزن امها
**********
وفاجعة محسن بعيده تحير الاذهان
نفس هالموقف تعيده زمرة الطغيان
صوبوا عبدالله جيده ابرمية الاحزان
باسهم قطعوا وريده وانذبح عطشان
مصيبه محسن اتوضح عملها..هيه الرمت عبدالله ابسهمها
اجت زينب تشمه...وتناشد فيض دمه
حزن زينب اشد لو حزن امها
**********
لمن اعله الزهره هجموا طغمة الظلام
فوق باب الدار شبوا مجمر الالام
وبنفس هالنار حرقوا بالطفوف اخيام
وابهجوم الخيل سحقوا عايله وايتام
حرم من شوفة الوالي حرمها...ويتامه هايمه ابلوعة يتمها
ابهضم هاي المصايب..اشتجاوبني ياغايب
حزن زينب اشد لو حزن امها
***********
الزهره ماضلت وحدها يمها داحي الباب
عايش وياها سندها حيدر الينهاب
لجن زينب منهو عدها ابديرة الاجناب
لازلم توقف ابحدها ولابقت اصحاب
زلم جانت اسود بحد خيمها..صفت لاخيم عدها ولازلمها
تصب دمعة جفنها..وانشدك عن حزنها
حزن زينب اشد لو حزن امها
*********
لو قلت جتفوا حيدر للسقيفه انقاد
هالوضع نفسه بالطفوف انعاد
بالحبل شدوا العسكر رقبه السجاد
باليسر غصبوه يحضر مجلس ابن زياد
رقبته امن السلاسل يجري دمها..ودمعته جالمزن عالخد سجمها
عليل ودمعه يجري..واضن بس هوه يدري
حزن زينب اشد لو حزن امها
**********
الزهره من قصدت عدوهاللحقوق تريد
بالحبل ماجتفوها ولاسرت بالبيد
زينب ابسوط اضربوها وشاجفت بالايد
ابطشت شافت راس اخوها بين ايد ايزيد
يسيره وواجفه ابمجلس خصمها..ومصيبة عمتك قلبك كتمها
ابجمر لوعت مصابك..اريد اسمع جوابك
حزن زينب اشد لو حزن امها
للشاعر الأديب الحاج جابر الكاظمي