بسم الله الرحمن الرحيم

الله هم صلى على محمد وال محمد

السلام عليكم جميعا ورحمت الله وبركاتة اسعد الله اوقاتكم جميعا


سبحانة وتعالا نسال الله ان ييسر امورنا واموركم وينور دربنا وياكم على حب محمد وال محمد\\\\


ولان تفضلوا المسلس ترى اليوم الجمعة نسيتون لا انا ما نسيت

وصلنا بان سلمان يسال عمته ام حوراء عن حوراء حامل والله لا
وبعد قليل جاءت حوراء من داخل الحجره وجلست مع سلمان وابوها وامها في المجلس ودار بينهم هدا الحديث
ابو حوراء: ويش اخبارك يا سلمان واخبار العمل وياك الى الحين تشتغل في البلديه
سلمان : نعم يا عمي وين اروح من كثر الاعمال في هالديره
ابو حوراء : زين خلك على عملك احسن ترى ان طلعت وهديت العمل ما حصلت على غيره اعمال يا ولدي هالايام شحيحه والهنود تارسين الديره مو مخلين لينا شغل دخلو روحهم في كلشي اتصدق يا سلمان هندي جايني البيت يبي انتبت النخله مالتنا احنا ما سمعنا الهنود يعرفون ينبتون انخيل لاكن يا ولدي يا سلمان اكلونا هالهنود لاكن ويش نقول مالينا الا الصبر الاول حجي براهيم الله يرحمه هو الا يدور في البيوت ويضرب البيبان ويسال منهو يبا يروس نخلته لاكن اليوم يدورون الهنود على البيوت هدا اخر ما وصلنا اليه يا ولدي والا جاي اكثر
ابو حوراء : حوراء كومي جيبي الى زوجش كدوع وقهوه من زمان مسكين هنيه
سلمان : وين اروح يا عمي الاول عندي مره وحده واليوم عندي نسوان ثنتين اصلا معاش البلديه ما يكفي الله يعيني ادا جابو لي ولاد اروح ابوق احسن لي
ابو حوراء : لا تقول يا سلمان جدي لين جو الولاد الله يرزقهم مو انت
سلمان : وين هالولاد عاد يا عمي انا شايف شي اخدت وحده ولا شفت منها شي واخدت الثانيه واكي لحقتها اظاهر اباخد الثالثه باشوف حضي بعد
ابو حوراء : توك تقول ان معاشك ما يكفي والحين اتقول باخد الثالثه اسكت بس لا تسمعك بتي وتسوي لك مشاكل
جابت حوراء القدوع والقهوه وقامت حوراء تقدع رجلها
ام حوراء : سلمان اسمع ترى حوراء بتقعد كم يوم هني عندك مانع
سلمان : والله انا ابغي راحتها مدام هي حامل خليها عندش احسن
ام حوراء : والله العلم عند الله
سلمان : تقولين حامل وتعبانه وبتخلينها وياش في البيت والحين تقولين العلم عند الله
ام حوراء : يو جيف اني الله اني اقول اعراضها كانها حامل بس مو متاكده
سلمان : جيف ما راحجت اليوم الدختر
ام حوراء : لا ماراحت لانها مريضه
سلمان : اليوم موعدها كايله بتروح الدختر
ام حوراء : لا ياولدي ما راحت تعبانه ما تسمع انته
سلمان : بله اسمع جان رحتين انتين عنها واخدتين النتيجه
ام حوراء : انشاء الله ياسلمان بكره باشوف ادا اني فاضيه ما علي غسال وتنضيف الحمامات مال البيت لان اولاد عمك يعفسوني عفاس ولا تنسا خمام البيت بروحه يبا ليه كتوف واني يا سلمان ما عندي هالايام كتوف واني ايد وحده باسوي ويش وباخلي ويش لاكن ادا فضيت واستوت اغراضي اباروح وباجيب النتيجه
سلمان : ادا رحتين وطلعت النتيجه اتصلي عمتي
ام حوراء : انشاء الله اني اول من يبشرك
رجع سلمان بيتهم
رملوه : ثلمان ويث اخبار حوراء
سلمان : تعبانه
رملوه : راحت الدختر
سلمان : لا ما راحت مريضه لاكن عمتي بتروح باجر
رملوه : عجل لازم اني اروح ازورها ويا فاطمه باجر
سلمان : زين يمه لازم تروحين وخدي وياش فاطمه بعد هدا واجب عليكم
رملوه : انثاء الله يا ولدي لاكن فاطمه صايره عنوده
سلمان : انتين قولي ليها سلمان قايل روحي زوري حوراء
رملوه : ما عليه باثوف باجر
وفي اليوم الثاني دهبو رملوه مع فاطمه الى بيت حوراء وزاروها وطمنو على صحتها وبعد رجعتهم من بيت حوراء
رملوه : فاطمه اني باروح اتسمع في الماتم وانتين روحي البيت وطلعي الودام وسوي الغده اني بتسمع
وباجي
راحت رملوه الماتم تتسمع وفاطمه رجعت البيت تسوي الغده قعدت رملوه في الماتم صوب الحاجيه صفيوه
صفيوه : رملوه شخبار نسوان ولادش
رملوه : زينين
صفيوه : حملو لو بعدهم
رملوه : لا ما حملو الى الحين
صفيوه : يو يو يو ويش فيهم الى الحين ما حملو
رملوه : والله يختي ما ادري كله مرضه وبث
صفيوه : جان فحصتون عليهم
رملوه : فحصنا ما فيهم فايده هدولين ما ادري ويث فيهم صايبتنهم عيون
صفيوه : يو اكي بت حجي علي ما شاء الله عليها ما دخلت على زوجها الا هي حامل والله الدنيا حضوض ناس مي طايقه وناس مي لايقه
رملوه : حضنا يا بت الحلال ويث نثوي
صفيوه : كولي الى سلمان يروح يفحص
رملوه : ثلمان يروح هدا عنود اني كايله ليه لاكن هو ما يسمع الكلام وثاني شي اني يابوي ولدي ثليم ما في ثي الي ما فيهم ولاد هم نسوانه وام يا صفيوه ولدي واني متاكده منه صاحي
صفيوه : يو لا تخضين روحش اني ما كلت لش شي ولا تحطين في دمتش وتتهمين نسوان ولادش كل هدا الحجي دار بينهم صفيوه ورملوه وهم يتسمعون في الماتم سمعتهم وحده وقالت ليهم يعنب انتون جاين تتسمعون لو جايين تسولفون احنا ما شفنا بعد خلونا نتسمع
رملوه : يالله يالله ما عليث منه اتثمعي وخلينا بروحنا المره اسمها ام محمد
ام محمد : هدا الحجي يا رملوه جايه تكولينه وتكصين قصه حيات ولدش داخل الماتم
رملوه : اسمعي يا ام محمد ترى اني ما تهميني انتين وادا مو عاجبنش طقي راسش في الارض
ام محمد : ما تقدرين يالله باشوف اني يابوي انسانه متعلمه واحترم ماتم الحسين مو مثلش ادا جيت الماتم اقعد اهدر واسولف وهي تلوح بداك التيلفون الا في ايدها شافت التيلفون رملوه
رملوه : لو فيش خير جان ما جبتين التيلفون الماتم
ام محمد : والله عاد شوفي مو عاجبنش طقي راسش في الطوف
رملوه : طقي راسش انتين يالمفوشريه
ام محمد : اني مفوشريه على ويش
رملوه : على هالتيلفون الا في ايدش تراوينا اياه وجايبتنه الماتم لاويه حطي في شنطتش لا كن ما تثتحون
ام محمد : خلي الادب اليش با عجوز النار واني بعدي صغيره وادا فيش حرت نسوان ولدش لا تحطينها في غيرش روحي شوفي ولدش ما يستحي ما خد ليه نسوان فنتين كانه ولد البارحه
الى هنا ويخلص المسلسل اليوم والى اللقاء يوم الجمعه القادم تابعوني
__________________