بسم الله الرحمان الرحيم

السلام عليكم جميعا وصباحكم فل دائما او مشكورين على المرور والمتابعة وخصوصا من الاخ المتميز دائما (القلب المرح ) والاخت العزيزة علينا وهى ايضا من المتابعين لهدا المسلس وهى (My tears) والى الجميع اجمل تحية منى

والان ندخل فى المسلس يا الله تابعونا اخوانى

وصلنا هل بعد زواج سلمان من المرة الثالثة بيرجع البيت وياها والله بيطلع معاها فى شقة
زين نواصل لكم
بعد كل المعاناه التي حصلت الي زوجات سلمان الا ان سلمان اصر على الزواج من الثالثه بحجه انه صبر عليهم بما فيه الكفايه ولم يرزق منهم الثنتين بشئ
وقرر بان ياخد عليهم الثالثه عموما بعد ان تم زواج سلمان من المراه الثالثه ونقوله مبروك وانشاء الله جيب لك ولد او بنت سو لية زواج عادى جدا زواج عادي كان رجال مصالح مرته بعيد عن كل الرسوم الزواج المعتاده يعني مجرد ميلاد داخل بيت الزوجه ومن ثم زواجه ودخوله على زوجته الثالثة
لا صالات ولا مراسيم كل هدا اتفاق بينه وبين الخطابه التي خطبت له هده المره تم الزواج البسيط بينه وبين اهل المره وليله الزواج اعطاه عمه حجره يسكن فيها سلمان وعروسته الجديده
جلس سلمان مع عمه ودار بينهم هدا الحجي
سلمان : شوف يا عمي انت ما قصرت وفرت الي كل شئ ولاكن انا اوعدك ادا حملت بتك راح اطلق الثنتين منهم انا يعمي ما اريد نسوان انا اريد ولاد حالي حال الناس
العم : انت الحين روح الحجره الى زوجتك وترك عنك هدا الكلام بعدن بنتكلم فيه الحين مو وكته
سلمان : لا يا عمي وقته ويش اسوي فيهم اعلف عليهم وانا راتبي على قد حالي
سلمان دخل حجره زوجته الجديده ودار بينهم
سلمان : اسمعي يا بنت الحلال ابوش عطاني مهله اقعد في بيتكم ثلاثه ايام لاكن انا اقول لو تقنعين ابوش اقعد وياش على طول هني ولا اروح ليهم لان قعدتنا في بيتكم احسن لش ولي ترا هناك في بيتنا بتواجهين مشاكل واجد ويا دلاك النسوان هدي نصيحتي لش
المره الجديده اسمها نصره
نصره : والله يا سلمان ادا خليتني في بيت ابوي ما كاني معرسه وصراحه ودني اي مكان الا بيت ابوي
سلمان : وين نروح الشقق غاليه ومعاشي على قد حالي
نصره : لا اني ما علي اطلع اطلع ما اقعد في بيت ابوي على طول
سلمان : اسمعي انا بعطيش عهد مني لش ادا حملتين وجبتين ولد اطلق الثنتين وتاخدين انتين البيت كله بعد ويش تبين
نصره : اكيد هدا الكلام لو بس تبا تسكتني شكلك انت رجال نسوان
سلمان : والله انا رجال وعطيتش كلمه احملي وشوفي اطلقهم لولا
نصره : ليش تزوجت ني يوم ما عندك بيت وعلى قولتك ما عندك حجره فاضيه
سلمان : يلا عاد لاتكبرين السالفه اليله وخلينا نستانس وتونا معرسين بعد فتره يصير خير
عموما وافقت نصره على طلب سلمان العيش في بيت ابوها لحين حملها وترك سلمان نسوانه وامه وصار له ازيد من اسبوع ما شافهم ولا راح سال عنهم وتشتد بهم الغيره وكل وحده تقول والله نسانه ولا هو مفتكر فينا حتى امه والله ما عنده سالفه هدا الا يقول ثلاثه ايام وبيرجع الحين صار ليه اكثر من اسبوع
فاطمه : فاطمه تقول الى حوراء واحنا الحين نسكت عنه ونخليه وهدي الحين تاخده منه بروحها ما يصير هدا ضلم وين العدل الا يعدلونه الرجال بين النسون هدا ضلم يا حوراء حتى امه مو مفتكر فيها ويش فيه هدا
حوراء : طلعت من طورها وقالت : والله اروح الى ابوي واعلمه بكل شئ ما اخلي هدا يلعب علي جيف ما عندي اهل ترده كل يوم راح تزوج من وحده غيري واني اقعد اطالعه وانتين يا فاطمه ما تردين منكر اني دابحه روحي من القهر وانتين كل ساكته
فاطمه : ويش اسوي يا حوراء سلمان بعد معورخاطري ويش يسوي يبغي ولاد وحنا ما قدرنا نجيب له لاكن خليها على الله والله يسهل لازم بفكر وبيندم على فعايله فينا الله مو غافل عن عبيده والصبر زين وكل تاخيره فيها خيره وسلمان اخيرته بمل من هديك نصروه وبيرجع لينا اني متاكده
حوراء : هدا الا عندش والله باطه جبدي هدا بدل ما تقولين خلنا نطلب الطلاق تقولين عنه مسكين اشوفه مفتكر فيش مشكل ما ينام الليل عليش اكو صار ليه ازيد من اسبوعين ما جاء قال ويش تبون ولا ويش محتاجين هدا رجال عندش والله امه الا نساها مره وحده والله لو اصيده جان ادبحه وانتفه تنتيف قعد هناك ونسانه
قاطمه : سكتي زين و تعدبين روحش الحين الرجال تزوج وهو مستانس ويا مرته واحنا دابحين روحنا خليه يولي مرده بيرجع ادا مو على شانا على شان امه
حوراء : محد بيجيب لي الضغط والسكري غيرش يا فاطمه
فاطمه : انتين الحين قاعده تحاسبيني روحي حاسبيه روحي ليه بيت مرته الجديده وسوي الا بتسوين اني بروحي مريضه والله روحى اشتكي عليه عند ابوش والله روحي المحكمه عجل حاطين الشيوخ لاويه لاكن اني اقول الدنيه دواره ومثل ما تدين تدان
حوراء : راحت بيت ابوها من القهر الا اخدها من سلمان واخبرت امها وابوها بما فعل سلمان فيها وفي فاطمه
ابو حوراء : بعد ما سمع الكلام من حوراء طبعا هدي بته ما بيرضى عليها قال لبته اسمعي خلاص خله يطلقش انا باروح ليه وبتفاهم معاه جيف هو من ما يوقفونه عند حده والله انه ما يستحي كل يوم وتسمع عنه تزوج بلا ولاد وبلا خرابيط
حوراء : خلاص ابوي سلمان اخترب حتى البيت ما يجي ولا يدري عنا عايشين لو ميتين واحنا صابرين
ابو حوراء : وفاطمه ويش تقول
حوراء : يو فاطمه هدي الي قاتلتني من برودها
ابو حوراء : لهدرجه تحبه وهدا الا سواه فيها بعد عادي عندها والله عندها قلب لاكن انتون يالنسوان ادا حبيتون ما يزحزحكم احد وادا كرهتون الله يعين الرجال
ام حوراء تسمع كلام ابو حوراء الى بته غارت من حجي ابوها
ام حوراء : ويش فينا احنا النسوان احسن منكم يا الرجال على الاقل مو كل يوم انقول بنعرس مثلكم احنا ادا حبينا انحب بصدق مو مثل الرجال لو تسوي ليه مرته ويش وتعطيه كل غالي ورخيص عندها بعد ما يقتنع لازم عيونه تكون كل زايغه اني اعرفكم يالرجال جم سنه اني وياك غير الي اسمعه من النسوان مال الفريق كل وحده دابحه روحها على زوجها وهو ما يستاهل عسى ما يمر على وحده في الطريق شوف عيونه والله ادا طلعت وحده حليوه في التلفزيون شوف الرجال ويش يسوي لاكن خل المره تسوي جدي الا انتون تسونه جان قلت ما تبيها وبطلقها هدا انتون يالرجال من صوبكم غفور رحيم وصوب نسوانكن شديد العقاب
حوراء : الحين انتون خليتون سالفتي وتهاوشتون خوش الحين اني جايه ليكم تساعدوني مو تتهاوشون
ام حوراء : عجل ما تسمعين كلام ابوش يقول ان النسوان ما منهم فايده
ابو حوراء : انا قلت ان فاطمه صدق مره ومضحيه بكل حياتها على شان سعاده زوجها بس كلامي فيه شي
حوراء : اي في شي هدا تجريح لي يعني اني الغلطانه الحين مو سلمان
ابو حوراء : محد قال انش غلطانه انشاء الله صبري خليني اول اشوف سلمان وبعدين بنطلقش منة مو هدا طلبش حاضر ولا يصير خاطرش الا طيب
حوراء : اني ما ابغاه ولا ابغي ارجع ليه روح قول ليه
فاطمه من الصبح راحت حجرت عمتها رملوه
فاطمه : عمه صبح الخير
رملوه : هلا حياش الله يا بتي دشي
فاطمه : ما تدرين عن سلمان شي طول يا عمه علينا ونسانه
رملوه : ويش بيدي يا بتي لو ادري عنه في وينه ومن اي ديره ما خد جان رحت ليه ولعبت به لاكن يابتي هالمره ما خبرني لاكن اني باشوف ام عيسى في الماتم وبسالها عن ديره اهل سلمان
فاطمه : اي عمه اساليها واني بعد باروح وياش اباشوف هالمره الجديده الا مفضلنها علينا اكو بعد حوراء ترى راحت بيت ابوها تقول ما تبا سلمان
رملوه : والله يا بتي الا بيقعد هدا البيت والا بيروح الباب مفتوح اني ما ني زوجكم بس لازم ادا بتطلع على الاقل تستادن مو جدي
فاطمه : والله اني ما يخصني الا فيني مكفيني وادا هي راحت اريح لي لانها مطالعيه وكل تبا تعصبني على سلمان
رملوه : هدا كل من الغيره يبتي صيري انتين احسن منها بس خليني اشوف ام عيسى وباروح اني وياش الى سلمان اباشوف يرجع البيت لو ما يرجع
وفي اليوم الثاني دهبت رملوه الماتم تتسمع والتقت بام عيسى
رملوه : تعالي انتين وين وديتين ولدي
ام عيسى : ولدش اكو في بيتنا خاشتنه ولدش عنده مرتة الجديده تبينه يجي لش خله يشبع الرجال اولا من المرة او بعدين بيجى البيت يعنى انتين الحين ما تعرفين لرجال لو تغاورين عن ولدش ها قولى لى
رملوه : اني ولدي مو مثل الي في بالش ولدي ما تزوج الايبغا عيال مو نسوان فهمتين ولا تشوهين سمعه ولدي والحين خبريني من اي ديره اخد
ام عيسى : اخد من ديره تعرفين مرت سيد محمد نفس الديره
رملوه : اي اعرف بيت منهو عاد ابغي اروح اشوف ولدي تصدقين من عرس ما شفناه هدي حاله
ام عيسى : تبيني اني اروح باروح ليه ويش تبيني اقول
رملوه : عجل مري علي وباروح وياش لان فاطمه بعد تبي تروح لية ام عيسى : انا باوديكم بس مو تسون الي مشاكل في بيت الناس سمعتون والله ترى تعرفون شغلكم ادا عندش شي ويا ولدش وتبين تهاوشينه خلي لين رجع لش البيت اما ادا كان نيتش تشوفينه بس با مر عليش
رملوه : لا بس با جوفه اني ادري ما تبين تشوهين سمعتش انتين خطابه الفريق
الى هنا اخوانى واخواتى الكرام بنصبر لين اجى اسبوع الجاى وتمر ام عيسى على رملوة ومرت ولدها ويروحون الى سلمان بيت مرتة الجديدة ونشوف ويش بيصير بعد ما يتلاقون وبعد راح انشوف ردة الفعل مال فاطمة الحنونة المسكينة الطيبة النادرة مثلها فى هدا الزمن وراح ايضا نعرف من حوراء بعد ما يلتقى ابوها مع سلمان ويطلب بطلاق بتة حوراء من سلمان كل هدة الاحداث راح نتابعها الاسبوع القادم وشكر على المتابعة
اشوف ارئكم وردوكم وحكمكم على هدة العائلة
وشكررررررررا للجميع تابعونى