^^^^^^^^^^^^^^^^^^^^^^^^
في المستشفى..

الضابط يسأل الدكتور:" خير دكتور نقدر نستجوب المريضة..؟"
الدكتور وهو يهز راسه:" الضربة كانت قوية على راسها وسببت نزيف داخلي وبسبب الإختناق والضرب اللي صادها ، للأسف ماقدرنا ننقذها...!!!!!"
الضابط:" لاحول ولاقوة الابالله."
الدكتور:" عفواً حضرة الضابط تآمرني شي؟"
الضابط:" ايه بغيت تقرير المستشفى بحالة الوفاة بسرعه اذا قدرت."
الدكتور:" ان شاءالله بعد ربع ساعه بتجهز، عن اذنك."

وبعد ماأخذ ضابط الشرطة التقرير توجه وياالعساكر للمركز وكان بوعمر محتجز عندهم.. وطبعاً استرجع وعيه بعد ماحصل ضرب من الزين بالمركز..!
بوعمر:" هدوووني انا ماسويت شي."
الضابط ( راشد ) :" ماسويت شي؟ انت تدري انك متهم بمحاولة اعتداء على بنت ، وجريمة قتل..!! وغير هذا شرب وخمر وبالبيت..!!"
بوعمر مومستوعب اللي يسمعه:" قتل؟ اعتداء؟ انتوا تلعبون عليّ والاشنو، انا بجيب اكبر محامي بالبلد وبوريكم."
راشد:" انت قضيتك لابستك من فوقك لتحتك ومافيه اي محامي بدافع عنك، ياعسكري تعال دخله الزنزانة."
بوعمر وهي يحاول يهرب ويضربهم:" هدووني انا ماسويت شي هدوووووني..!!"
لكن تلاشى صوته شوي شوي عن مسامع الضابط راشد ، اللي موعارف شلون يبلغ اطفال صغار بموت امهم. انتبه على صوت دق على الباب:" تفضل."
بومحمد:" السلام عليكم."
راشد:" هلا هلا بومحمد ، تفضل استريح."
بومحمد:" والله ياحضرة الضابط انا جاي اشوف وش آخر الأخبار لأن البيت مقلوب فوق تحت بعد ماسمعوا خبر اعتداء بوعمر على أم عبدالله."
راشد:" والله مدري وش اقولك يابومحمد بس الوضع مايسرّ أبد."
بومحمد:" ليش عسى ماشر، صار فيها شي ام عبدالله؟"
راشد:" عطتك عمرها."
بومحمد وهو يهز راسه:" لاحول ولاقوة الابالله العلي العظيم ، انا لله وانا اليه راجعون ، وش هالمصيبة اللي طاحت على روس هالصغار."
راشد:" بصراحة انا كنت محتار شلون اخبر عيال المرحومة، واتمنى انك تنوب عني."
بومحمد:" ان شاءالله، بس ماقلت لي بوعمر وش قضيته الحين؟"
راشد:" لاتخاف أكثر من قضية لابسته ، شرب وسكر غير محاولتين اعتداء على ماقالت البنت، وجريمة قتل ، وبصراحة كنا ننتظرة على غلطة وحدة أعماله كلها مشبوهه والله طيحه بيدنا هالمرة لكن للأسف موبالشكل اللي كنا نتمناه."
بومحمد:" هذي المكتوب ياحضرة الضابط."
راشد:" زين عندي طلب ثاني يابومحمد، البيت اللي فيه زوجته الثانية بنت المرحومة لازم يطلعون منه حالياً لحدّ ماتخلص المحاكمة ونشوف وين بتروح أملاكه وخصوصاً إن عليه ديووون بالملايين وبالأصح هو حرامي سرق الملايين وجه الوقت اللي يرجعهم."
بومحمد:" ولايهمك انا اتصرف، ياالله تآمرني شي ثاني."
راشد:" مشكور وماقصرت واي اخبار او متطلبات جديدة راح اخبركم."
بومحمد:" الله يعطيك العافية ، عن اذنك."
طلع بومحمد والحيرة راكبته من فوقه لتحته وموعارف شلون يخبر البنات بهالخبر..!!

^^^^^^^^^^^^^^^^^^^^^^^^
طول الليل كانت سهرانة تفكر بحياتها اللي تغيرت بخطبتها لفيصل.. ودها تغير البرود والجفا اللي بينهم بالزواج بأسرع وقت ، مستحيل تتنازل عن فيصل وهي اللي كتمت حبها واعجابها فيه فترة طويلة.. التفتت لصوت مسج واصلها، سحبت التلفون وفتحت المسج وأول ماقرأته قعدت بسرعه.. (( معقوووولة؟؟؟ )) كان المسج من فيصل.. وكاتب فيه (( جهزي نفسج زواجنا يوم الاربعاء )) يعني بعد ثلاثة أيام بالضبط..!!
قامت غسلت وجهها وقالت للخدامة تجهز لها الريوق ، وقبل لاتنزل اتصلت بفيصل..
فيصل:" الوو."
نجلاء:" هلا حبيبي صباح الخير."
فيصل وهو يطالع الساعه كانت 1الظهر ويقول في باله((الناس الظهر وهذي صباح الخير)) :"هلا حبيبتي مساء الخير."
انتبهت نجلاء للساعه يوم قال لها مساء الخير وحست بإحراج لكنها مااهتمت، لأن اللي شاغل بالها تغير فيصل بهالسرعه:" حبيبي أبيك اليوم تمر البيت علشان تتغدى عندنا شرايك؟"
فيصل:" مااقدر اليوم مشغول ، وبعدين انتي ماقرأتي المسج؟"
نجلاء:" بلى قرأته ويعني؟"
فيصل:" جهزي اغراضج بعد شنو، مابقى الاثلاثة ايام وانا خلاص بحجز اليوم للسفر مرة وحدة."
نجلاء:" والله..!! وين بتوديني؟"
فيصل:" اي مكان تبيني اوديج؟"
نجلاء:" بصراحة اي مكان يجمعني انا وانت بستانس فيه."
إبتسم وقال:" يعني حتى لوماسافرنا عادي؟"
نجلاء:" عادي بس ودي نغير جو وخصوصاً إن احنا عرسان جدد."
سكت لأن باله كان مشوش وموعارف اذا كان زواجه من نجلاء صح او خطأ، لكن وش الفايدة دام نجود خلاص طلبت الطلاق منه وعافته للأبد.
نجلاء:" فيصل شفيك ساكت؟"
فيصل بشرود:" مافيني شي."
نجلاء:" حبيبي ابيك تجاوبني بصراحة، وش اللي غير رايك بهالسرعه وانت كنت رافض فكرة زواجنا خلال هالايام."
فيصل:" ابداً ولاشي ، كلامج كان صح احنا مبتعدين عن بعض وايد ولازم نقرب من بعض بزواجنا."
نجلاء واللي حست انها بدت تملك فيصل من جدّ:" زين وزوجتك الأولية؟"
فيصل:" قصدج طليقتي؟"
حست بصدمة يوم سمعته يقول طليقتي لكن بنفس الوقت ارتاحت وانزاح هم كبير من قلبها وعقلها.. واستدركته بسؤال:" يعني طلقتها؟"
فيصل:"أي..... واليوم بتوصلها ورقتها."
كانت تحس بأنفاسه المتقطعه، وشروده لكنها قدرت ترجعه لها بدلعها وكلمات الحب والغزل اللي ماتوقف من قولها له.

^^^^^^^^^^^^^^^^^^^^^^^^