غريبة بين اهلي

[حورالعين666]

^^^^^^^^^^^^^^^^^^^^^^^^
الساعه 8 الصبح..
اتصلت على اخوها محمد علشان يجي ياخذها من المستشفى..بعد ماسمح لها الدكتور بإنها تطلع بس بشروط انها ماتجهد نفسها لاجسدياً ولانفسياً.
دخلت البيت والكل كان بإنتظارها ، حتى خطيبة سيف كانت موجودة.. وهديل معاهم..!!
وبصوت واحد:" الحمد الله على السلامة."
إبتسمت لهم وحست بدموعها تتجمع بعيونها وأول ماحضنتها أمها قعدت تصيح ، وخلت الكل والأجمع يصيح وياها << البنات بس..!!
شيخة:" يمه بس خلاص بتذبحون عمركم..!!"
أم محمد:" خليني اشوف بنيتي والله هي هناك وقلبي وياها."
بومحمد:" احم احم....."
خلود:" ابوووي يغااار ههههههههههههع."
ضحكوا عليها ، وقال ابوها:" اي عجل شلون مااغار، زين خلصوني خلوني اسلم عليها."
وحبت راس ابوها بعد ماسلم عليها وحضنها، كان موقف رهيب خصوصاً أن ابوهم تغير وصار يحب يقعد ويسولف وياهم اكثر..!!
قعدت على الكنبة تريح عمرها ، والكل كان من حولها فرحان بوجودها وياهم ، لكن بعض القلوب كانت حزينة ، وبعضها متوترة وخايفة.
نجود وهي تهمس بأذون شيخة:" هديل شجابها هني؟"
شيخة:" سكتي بعدين اقولج."
احمد:" نحــنُ هنا,, اشوف بديتو بمساسركم."
شيخة:"ههههه لابس سوالف حريم."
محمد:" احنا بعد حريم شاركونا وياكم."
ضحكوا عليه وقالت شوق:" الا انت ماينقال لك شي."
محمد:" افااااااا انا تقولين لي جذي؟" بهاللحظة تذكر شي وقال:" شوق ابيج دقيقة بالمطبخ."
شوق وهي تضحك:" اكيد يبي يطمأن على مستقبل معدته."
احمد:" احم ترى انا بعد ابي أطمأن بس مدام محمد بروح خلاص وكلته عن نفسي."
محمد:" زين يااخي خلّ بطنك عندك وانا باكل هناك."
ومشى عنه وهو ساحب شوق بسرعه من ايدها.. قعدوا يضحكون ويسولفون وخصوصاً ان نفسية نجود تغيرت..!! الكل كان مستغرب بس ماحبوا يضايقونها بأسألتهم وخصوصاً إنها توها واصله.

وبالمطبخ... دخل محمد ومازال مجود ايد شوق وبعد ماتطمن ان مافيه احد قال:" شوق حبيبتي ابي اطلب منج طلب اممممم وبصراحة هو رجاء اكثر مماهو طلب."
شوق بإستغراب:" أنت تآمر."
محمد:" تسلمين والله ، اللي صار امس بحجرة سمر مابيه يطلع بره ولاتنسين الخبلة بدور تنبهينا انها ماتجيب طاري اي شي شافته فاهمه؟"
شوق:" لاتحاتي من زمان قلت لها انها ماتتكلم ، بما إنك ماقلت لي وش السالفة فقلت لها انها تسكت ولاتجيب طاري شي."
محمد بإرتياح:" طووول عمرج ذكية ، زين الحين لين طلعنا خلينا نكمل تمثيليتنا على أحمد ، ودي اجننه شوي."
شوق:" ههههههه والله حرام عليك تعرفه ذبحته الأكل."
محمد:" تصدقين ودي اعرف هذا ياكل أكل اسبوع بيوم بس مايمتن ولايتغير شي منه نفسي اعرف وين يودي الأكل."
شوق:" ههههههههههههههههههههههه وووول عليكم حاطين البال على الرجال خله ياكل على كيفه ، ولاتنسى الحب ومايسوي."
محمد:" صادقة والله ومن الحب ماضعّف..!!"
شوق:" اقول مش لاتخبص."
طلعوا من المطبخ وهم يسولفون عن الطبخات والأكل.. احمد أذونه على طووول تحولت لهم:" اسمع طاري أكل."
محمد:" اذاين فار مو بني آدم ، وبعدين انت وش تبي بالأكل هالحزة ماصارت حتى عشر وانت تحاتي بطنك."
احمد:" وش معنى انت تحاتيه وانا لا؟ والا على راسك ريشة؟"
شيخة:" بسكم هواش عندي سالفة بقولها لكم."
هديل حست ان وجودهم وياهم ممكن يضايقهم فقامت:" عن اذنكم اخليكم على راحتكم."
شيخة:" هديل قعدي ترى السالفة تخصج."
بإستغراب:" اناااا؟"
بدور وهي ساحبتها من ايدها:" ايه انتي قعدي الحين."
شيخة:" بما إنكم كلكم متجمعين وطبعاً بعد إذن أبوي واللي وافق على الإقتراح على طول."
محمد:" خلصينا شيخوه من المقدمات قولي الزبدة."
شيخة:" انا شيخوه ياللي ماتستحي ، لكن مابقول شي."
يوم سكتت الكل طالعها بنظرات غضب وانتظار للي بتقوله خافت منهم يقومون ياكلوناها:" يمه شوي وتاكلوني تخوف اشكالكم."
شوق:" ماعليج منهم بس الفضول قاتل."
شيخة:" صادقه والله.. زين بما إن هديل الحين مستحيل ترجع بيت زوج اختها المنكوب ، فأنا اقترحت على ابوي اني آخذها تعيش وياي البيت بما إن ماعندي احد وانتوا هني ماشاءالله عليكم كلكم رجال."
خلود:" واحنا وين رحنا لايكون انا وسمر تشوفين فينا شوارب ولحية."
بومحمد:" حبيبتي هناك عندها بدور ومازن بس ، فتقدر هديل تاخذ راحتها اكثر من هني بالبيت، والا شرايكم."
شوق:" بعد إذنك عمي خلّوا هديل هني وياي لحدّ مانعرف وش بصير بسالفتها، وبعدين نقرر اذا كانت تبقى بالبيت والاعند شيخة. ولاتنسى ياعمي عبدالله اخوي عند أمي هناك ومدري شبصير فيه."
بومحمد:" لاتخافين انا اليوم بروح مركز الشرطة وبشوف وش المستجدات."
ولأول مرة يطلع صوت هديل بعد هالحديث:" انا ماأبي ازيد همكم وأثقل عليكم ، بس كل اللي أبيه ان زوج اختي يبتعد عني ومايقرب صوبي مرة ثانية ، وابي اخوي يكون عندي أنا بربيه، لاأمي ولاأختي فاضين لنا انا واخوي. تكفون رجعوني بيتنا."
شوق حست بأوجاع وآلام أختها، الكل كان ساكت وموعارف وش يقول لها، لأن صوتها رغم هدوءه هزهم وبقوه من داخل..!!
بومحمد:" لاتحاتين يابنيتي وانتي مثلج مثل بناتي ، ومستحيل انخليج واخوج بهالمحنه من غير مانحلها، وان شاءالله مافيه اي كائن بقرب منج بعدما صرتي في بيتي."
محمد وهو يطالع سمر بطرف عيونه:" هذي البنات اللي تبي تحافظ على نفسها."
حست بغصة بحلقها يوم سمعت كلامه ، وشوق لاحظت نظرات محمد لأخته اللي انسحبت من القعدة وياهم بكل هدوء..!!