^^^^^^^^^^^^^^^^^^^^^^^^
كلهم كانوا متجمعين حواليها يواسونها ويسلونها، حست بأمان يوم أنها قدرت توصل لبيت اختها.
شوق:" تحسين انج احسن؟"
هديل بإبتسامة حزنية:" الحمدالله."
ام محمد:" خلونا نجهز العشا ونتعشى كلنا مرة وحدة."
شوق:" انا بجهز العشا خالتي خلج قاعدة."
خلود:" وانا بعد بساعدج."
ام محمد:" عيل انا بقوم شوي وبرد لكم بعدين ، تبون شي؟"
ردواعليها جميع:" سلامتج." وطلعت عنهم وخلتهم بروحهم..اما سمر فكانت قاعدة مكانها وساكته ، جسدها كان وياهم لكن عقلها كان بمكان ثاني..
شوق:" سمر تبين اتيين؟ والا تعبانة؟"
سمر:" لا موتعبانة بس بقعد وياهديل اذا رحنا كلنا بتظل بروحها."
بدور:" اشوفكم نسيتوني..؟"
شوق:" محد نساج انتي ساكته ومنطمة مدري وش تفكرين فيه ، قومي اذا تبين."
بدور:" لاماني قايمة خلاص بقعد وياالجماعه هني."
خلود:" ايه تخافين تعورج ايدج لوساعدتينا."
بدور:" انتي من حشرج الحين."
شوق:" بتتهاوشون بمشي مانبي نتأخر مب زين ناكل متأخر وايد."
بدور:" زين زين روحوا الحين وبعدين بييكم خلوني شوي وياهدووول حبيبتي."
ابتسمت هديل يوم سمعتها تقول جذي ، واول ماطلعت شوق من المجلس وياخلود غمضت عيونها شوي لكنها اول ماغمضتها شافت النذل بوعمر بويهها، وعلى طول فتحتها من الخوف.
وبعد ماجهز العشا وتعشوا رجع بومحمد وعياله البيت ، واول شخص يستقبلهم كانت ام محمد اللي ظلت بعد العشا بالصالة تنتظر وصولهم:" هاااا بشروووا مسكوه؟"
بومحمد:"لا والله للأسف هرب من البيت."
ام محمد:" لاحول ولاقوة الا بالله ، والحين وش بتسون؟"
بومحمد:" الشرطة بتظل تراقب البيت ، وان شاءالله يمسكونه."
ام محمد:" وأمها واخوانها دروا باللي صار؟"
محمد:" لااا لأنهم موبالبيت للحين ماردوا تخيلي ، مافيه الا الخدامة كانت راجعه من السوق الظاهر."
احمد:" خدم آخر زمن ، يطلعون يتسوقون."
محمد:" يالخبل انت ماسمعتها شتقول للضابط ، ان بوعمر عطاها فلوس وطلعها من البيت وقال لها لاتردين الحين."
ام محمد:" المجرم كان مخطط لكل شي من قبل."
بومحمد:" ولاتنسين استغل طلعات زوجته وامها وخدّر عبدالله وبعدين استفرد بالبنت."
محمد:" حقييير ودي اقتله بيدي."
ام محمد:" لاتقووول جذي ، خله الله ينتقم منه دنيا وآخرة."
احمد:" انزين انا جوعان مافيه عشا؟"
محمد:" همّك بطنك."
احمد:" لاتسوي نفسك البطل الصامد."
بومحمد:"هههههه ماتجوزون ، زين خلي الخدامة تجهز العشا."
ام محمد:" ان شاءالله ." وقامت عنهم علشان تساعد الخدامة بتجهيز عشاهم.
بعد خمس دقايق تقريباً كانت سمر طالعه من المجلس واول شخص طاحت عيونها عليه كان محمد اللي خزاااهااا بنظرات تمنت لوان الارض تنشق وتبلعها ولاتشوف اخوها يطالعها بهالنظرات. سلمت ومشت بسرعه فوق واول جم عتبه ركبتهم بالدرج سمعت أبوها يناديها..
بومحمد:" سمـر."
ارتبكت وتعرقلت ، كانت خايفة مووووت ودرات تشوف وش يبي منها:" خير يبه؟"
بومحمد:" هديل زينه؟"
بتوتر:" إيـه..."
بومحمد بإستغراب:" فيج شي؟ احسج موعلى بعضج؟"
طالعته وطالعت محمد وبعد ثواني قالت:" لاسلامتك يبه مافيني شي تعبانة شوي ، عن اذنك."
وراحت قبل لاتحرقها نظرات محمد اللي كان يشتعل بداخله ووده يرميها بره البيت..
احمد كان لاهي بتلفونه وبمسجاته وياحبيبة قلبه مريوم.. (( هلا حبيبتي شخبارج ؟ انتي راقدة؟ )) ردت عليه بمسج ثاني (( لاياعمري قاعدة انتظرك ، وينك مااتصلت من شوي؟ ))
احمد (( خلاص بتعشا وبتصل فيج ياقلبي.. بس موتنامين )) ضحكت يوم جاب طاري العشا لأنها تدري فيه همّه بطنه..!! (( خلاص انتظرك ))
وبعد العشا استأذن منهم ودخل حجرته علشان يكلم حبيبته مريوم..
مريم:" هلا عمري."
احمد:" اللـــه قوليها مرة ثانية."
مريم:" اوووووه استحي."
احمد:" لا تكفين قوليها ، تبين تحرميني حتى من كلام الغزل."
مريم:" لاياقلبي بس استحي هي تطع عفويه مني ، مااعرف اعيدها."
احمد:" عيل مابقولج ياقلبي ولاياعمري ولاشي بناديج مريمووه شرايج."
وهي تضحك:" وووول عليك مريمووه مرة وحدة ، بنت جيرانكم وانا مدري."
أحمد:" عيل قوليها وريحيني والا ترى ابيج تقولين لي أحبــك وأعشقك موت."
مريم:".............."
احمد:" شفيها الحلوة ساكته؟ تستحين بعد؟ ترى بتخليني أقسم اني مااكلمج الا اذا قلتيها لي."
مريم:" بس بس خلاص بقولك يااااااعمري وياااروحي بعد."
احمد:" الله الله اموووت فيج يابعد روحي."
مريم:" وانا بعد احبك ، والله يخليك لي ولايحرمني منك."
احمد:" ان شاءالله أجمعين."
سكتوا ثواني وسألته:" ماقلتي لي وش فيك مااتصلت من ساعه؟"
احمد:" اييييه ذكرتيني نسيت اقولج صايرة سالفة كبيرة."
بخوف:" شصــاير؟"
احمد:" تعرفين هديل اخت شوق خطيبة محمد؟"
مريم:" شفتها مرة وحدة اعتقد يوم خطوبتهم ، شفيها؟"
احمد:" شفناها عند باب بيتنا مغمى عليها وحالتها حالة ، ابوعمر زوج اختها حاول يعتدي عليها ، لكن المسكينة الله كاتب لها النجاة وقدرت تهرب من ايده."
مريم:" يااااحراااام المسكينه وهو شسويتوا فيه حبسوه الشرطه؟"
احمد:" للأسف رحنا بيتهم وياالشرطة هرب النذل ومحد بالبيت هناك الحين غير الخدامة."
مريم:" والخدامة وين كانت ليش ماساعدتها وامها واختها وين كانوا راقدين على عمرهم؟"
احمد:" كلهم كانوا طالعين ، تصدقين خدّر عبود اخوها ، وطلع الخدامة السوق علشان ماحد يقدر يساعدها ، وخبرج اختها وامها طالعين."
مريم:" انا مدري شلون شوق كانت عايشة وياناس بهالأخلاق ، والاهديل المسكينة اكيد تعاني من بعد سواة زوج اختها فيها."
احمد:" الحمدالله انها قدرت تهرب بس سمعت امي تقول انها من تغمض عيونها تقعد مفزوعة تقول انه يلاحقها."
مريم:" اكيد بتصيدها كوابيس الحين الله يعينها على ماتصحى وتسترجع قوتها."
احمد:" الله يساعدهم ان شاءالله."
مريم:" زين ياقلبي انا الحين بتأخر باجر عليّ دوام بالمستشفى ولازم اقعد من وقت."
احمد:" يعني مابتسولفين وياي؟"
مريم:" واحنا شسوينا الحين؟"
احمد:" سولفنا بس سوالفنا صارت عن قضية الحدث..!!"
مريم:" ههههههههه ماعليه باجر ياقلبي اسولف وياك لين تشبع ، لاتنسى تمرني العصر علشان تجيبني بيتكم واسلم على خالتي وهديل مرة وحدة."
احمد:" ان شاءالله من عيووووني ياعيوني."
مريم:" تسلم لي عيونك... امممممم ابيك بموضوع باجر اوكي."
احمد:" وليش موالحين؟"
مريم:" لاباجر احسن ، ياالله حبيبي تصبح على خير."
احمد:" وانتي من اهل الخير عمري."
وصك التلفون وراح ينام وهو حاضن مخدته ويحلم بحبيبته وشريكة عمره مريوم..!!

^^^^^^^^^^^^^^^^^^^^^^^^