سمر:" خلاص خلاص اليوم احاول اطلع واشوفك."
سعود ومسوي نفسه بموووت عليها:" سمر والله انتي ماتحسين باللي فيني ، ماتدرين بشوقي ولهفتي لشوفتج."
سمر:" خلاص قلت لك بنلتقي ، وبقعد وياك ساعه وبرد البيت."
سعود ويبي ينهي الموضوع بأسرع وقت لأن سفرهم قرب:" لالا ساعه ماتكفيني ابيج تقعدين وياي اكثر ارجوووج سمر لاتقولين لا، وبعدين انا ابي اشوفج بأسرع وقت واذا قدرتي اتيني العصر المول يكون احسن لأن وراي مشاوير للسفر."
سمر بحزن:" يعني مصمم تسافر؟."
سعود:" موبيدي حبيبتي والله الشغل واصل لراسي ومايصير اخلي ابوي بروحه."
سمر:" عندك اخوانك ليش انت بالذات."
سعود:" شسوي تبيني اخالف اوامره لازم اسمع كلام ابوي."
سمر:" صح لسانك."
سعود:" زين حياتي انا الحين بسكر التلفون واشوفج بعد امممممم ساعتين صح؟"
سمر:" يعني الساعه 4 ، امممممم بشوف."
سعود:" لاحووول وردت قالت بشوف ، اقوولج ياعمري لازم اشوفج اليوم اوكي ياالله باي حياتي."
سمر:" بااااي."

وبعد ساعة ونص جهزت نفسها وراحت المول..
سعود:" واخيراً خليتيني اشوفج."
سمر وبإبتسامة خجل:" شسوي لازم نتغلى."
سعود:ههههههههههههه اتغلين علي انا؟"
سمر:" ههه شسوي ماباليد حيلة."
سعود:" احبـــج..!!!"
سمرتفاجأت لأنها ماتوقعت ان الكلمة هذي تكون رده:" هاااا."
سعود:" شفيييييييج؟ اقولج احبــج."
إبتسمت ونزلت راسها.. كانت بطير من الفرح لأول مرة في حياتها تشوف هالسعادة..
سعود:" يعني مافيه كلمة احبك؟"
طالعته وقالت:" انت تعرف الاجابة مايحتاج اقولها."
سعود:" من قال مولازم بالعكس انا محتاج اسمعها منج والاتبين تحرميني من الكلام الحلو بعد كفايه اني مااشوفج الابالسنة مرة.."
سمر:" مااعرف اقوولها وانت قدامي."
سعود:" تبيني اغمض والا اعطيج ظهري وتقولينها؟"
وهي تضحك:"هههههههه لا بس تبي الصج استحي."
سعود: افااااااااااا تستحين مني؟ وانا سعود حبيبج وحياتج."
سمر:"................!!"
سعود:" زين امممممم غمضي."
سمر خافت يوم قالها غمضي ماتدري وش بسوي فيها فقالت له:" لا مب مغمضة."
سعود:" ليييييييييييش؟"
سمر:" وليش تبيني اغمض؟"
سعود:" لأن..... ليش تحبين تخربين المفاجأت؟ قلت لج غمضي وبس، لاتخافين ماباكلج."
سمر:"اممممممممممم انزين بس بشرط ماتسوي شي."
سعود بقلبه (( والله بلوووة وش هالبنت لمعقدة لكن اليوم انا لازم احصل اللي ابيه يعني لازم لوشيصير. )) طالعها بإبتسامة سحرتها بكل معنى الكلمه:" حيااااتي ارجوج لاتخافين."
سمعت كلامه وغمضت عيونها، وبعد ثواني من غمضتها حست بيده على ايدها وماسكها..
فتحت عيونها والتوتر والخوف واضحين على وجهها ، حاولت تسحبها لكنه ماخلاها...
سمر:" ارجووك هدني."
سعود ورسم على وجهه ملامح الحزن والضيق:" جذي تسحبين يدج من يدي؟ انتي تعنين لي اكثر من اي شي سمر ليش خايفة؟"
سمر: ارجوك هد يدي."
وفعلا تركها وهو متضايق ، وظل منزل راسه وساكت حست انها ضايقته صج ، وكانت موعارفة شلون تراضيه..
سمر:" شفيــك حبيبي."
سعود:" مافيني شي."
سمر:" سعــود شلون تبي تجود ايدي وووو...."
وقاطعها:" وشنو..؟ انتي شكلج مو واثقة فيني وتقضين وقت وياي بس ، انتي ماتعرفين شكثر احبج واموت فيج ، وبسوي اللي تبينه لوتطلبين روحي عطيتج اياها، لاتحسبين اني من هذلين اللي يقصون على البنات ويرمونهم بعدين. اذا كنتي تعتقدين اني من هالنوعيه فأنا آسف كل واحد خليه يمشي بطريقه."
سمر حست كلماته مثل الروح اللي تنسحب منها شوي شوي:..........."
سعود:" اشوفج سكتي؟ الظاهر ان اللي قلته صح."
سمر وخايفه من انه يتركها وهو الانسان اللي حبته بكل روحها وقلبها، مدت يدها بخوف وارتباك وخلتها على ايده. سعود يوم شاف هالتطوور الكبير منها عرف ان خطته نجحت وانها خلاص طاحت في شباكه.
سعود:" اعتبر هذي اجابة بعكس ماقلته؟"
سمر هزت راسها وابتسمت له، كانت خايفة لكنها حست براحة يوم رجعت الابتسامة والسعادة لوجه سعود.. اللي خدعها بكلمتين وصدقتهم..!!
طالعت الساعه وكانت الساعه 5:15 :" سعود لازم امشي الحين."
سعود:" لااااا اذا تبيني ازعل امشي عني."
سمر:" بس تأخرت ولازم ارجع."
سعود:" لايعني لا، ارجوووج سمر لاتضايقيني خليني مستانس."
سمر:" زين بس ربع ساعه وخلاص."
سعود:" اوكي بس مابي هالربع ساعه نقعدها بالمجمع."
بإستغراب:" وين عجل؟"
سعود:" ابيج اطلعين وياي."
سمر:" لااااااااا مستحيل."
سعود:" شنو مستحيل؟ لاتخااافين ياعمري ردينا على حجينا الأولي يعني انتي تراضيني بس علشان بس تكملين وقتج وياي؟ امممممم الظاهر مافيه فايدة."
سمر:" شلون تبيني اطلع وياك ياسعود ومابينا اي علاقة شرعيه؟ مايكفيك اني قعدت وياك هني؟"
سعود:" وليش ترفضين طلعتج وياي؟ باكلج بسوي فيج شي؟ تتوقعين اني باخذج وبوديج مكان مجهول وبسوي فيج شي وبرميج هناك والابقتلج ، هاااا ماجاوبتيني؟ شفيج ساكته؟"
سمر:" مااقدر اخااااف."
سعود:" تخافين من شنو ؟ انا احبج ومستحيل اضرج ، اذا انا ضريتج يعني اضر نفسي ، روحي انتي شلون أأذي روحي؟"
سمر:" وافرض احد شافنا."
سعود:" لاتخافين محد بشوفنا وبسرعه بطلعج وياي وبرجعج المول مرة ثانية."
سمر:"....................!!!"
سعود:" لاتسكتين ياعمري قولي لي وش ردج؟"
سمر:" مدري مدري."
سعود:" لاتقولين مدري ، صدقيني مابنتأخر وبسرعه برجعج."
سمر:" انزيـ ـ ـن."
سعود:" يعني موافقة؟"
هزت راسها بالإيجاب وقامت وياه كان بطير من الفرحة ، وظل طول الوقت يبتسم لها ويحاول يكسبها في كل ابتسامة ونظره كلمة حب تطلع منه.
وعند الباركات بره كانت سيارته موقفة بثاني موقف بالصفّة الثالثة ، جيب أسود ودرايشها كلها سووود..!!
وهم يمشون للسيارة سألته:" ليش سيارتك درايشها سود؟"
ضحك يوم سمع سؤالها:" حبيبتي احنا الشباب على طول نلصق شغله على الدرايش تخليهم يصيرون جذي."
سمر:" عليكم سوالف."
سعود:" ههههههه لاوالله بس يمكن انتي ماتنتبهين لسياراتكم."
تذكرت سيارات اخوانها وقالت:" اي صج لونهم موطبيعي بس افتح من اللون الأسود."
سعود:" اي صح فيه درجات فاتح وغامج يـاالله وصلنا."

وعلى بعد جم سيارة بس كان فيه شباب نازلين من السيارة..
حمد:" طالع ناصر موهذي سمر بنت عمي..؟"
ناصر:" ووووين؟"
حمد:" اللي بتركب السيارة الجيب."
طالعوها وكانت توها بتركب السيارة.. وركضوا لها وقبل لاتسكر باب السيارة ماشافت نفسها الا وهي مرمية بالشارع..
ناصر:" آآآخ ياالكلب يالحقيـــر..." ومسك سعود من حلقة وقعد يضرب فيه ، وكان يضربه بكل قوته وسعود يحاول يدافع عن نفسه وموقادر ، لأنه حمد بعد نفس الشي هجم عليه وقعد يضرب فيه ، وبعد 10 دقايق او اكثر من الضرب ولهواش قدر يهرب من اياديهم.. وحاول يركض ناصر وراه ويلحقه بالسيارة لكن سرعة سعود كانت أكبر منه بوااايد.
ناصر وهو يضرب ايد بأيد:" الحيــوان هرب لكن وين بروح من ايدي."
سمر كانت واقفة ودموعها تسيل على خدها... التفت لها حمد والشر يطلع من عيونه وقبل لاتنطق بأي كلمه ماشافت الا كفّ على ويهها..
حمد وبحرقة في قلبه:" شلووون.......، شلون قدرتي تسوين جذي؟"
ناصر:" الحقير، لازم يطيح في ايدي."
حمد:"اشششششش ناصر اسكت شوي." طالع سمر وكمل كلامه:" شلون قدرتي تخونين اهلج تخونين حبهم لج وثقتهم فيج؟"
سمر:" ماكنت بسوي شي والله انه يحبني وهو انسان....."
ناصر:" انسااااااااان؟ ومابتسوين شي؟ سمر الشخص اللي كنتي بتركبين وياه كان ناوي يدمرج ويحطم حياتج."
سمر:" مستحيـــل."
ناصر:" اللي تقولين عنه انسان كان ناوي يدخلني السجن ، اللي كنتي ناوية تركبين وياه سيارة وحدة شرّاب خمر وزاني ويلعب في اعراض الناس.. تبين تعرفين عنه اكثر؟ حاضر ، سعود كان صديقي وصديق اخوج بيوم من الايام. وش تبين تعرفين اكثر عنه، ان كان ناوي يلعب عليج ويرميج بالشارع مثل الكلب..!!"
حست الدنيا ادووور فيها وموقادرة تستوعب اللي تسمعه.. كل لحظة كانت فيها وياسعود تجسدت قدامها مثل الضباع اللي تنهش في لحمها. انتبهت على صوت حمد المخنوق:" إنتي آخر شخص توقعته يسوي اللي سويتيه ، إنتي مو سمر الخلوقة اللي اعرفها، وين الأدب والخجل اللي كانوا فيج؟ سمر انتي كنتي حلم وتبخر..!!!!!"
كانت تسمع كلامه ومومستوعبه شقاعد يقول رفعت راسها على آخر جملة قالها لها (( حلم وتبخر، شيقصد؟ ))
لااطالعيني بإستغراب:" إنتي حلم جميل كنت أحلم فيه كل يوم وكل لحظة ، كنتي أملي في الحياة ، الدافع اللي يخليني مستمر في المرح والتفاؤل وكفاحي كله كان علشان إييج في يوم من الايام وآخذج لحلمي اللي حولتيه لمجرد سراب ، آآآخ آآخ ياسمر ياليته كان سراب وبس ، الا انتي خليتيه دخاااان أسـود بظل يلوث الحلم ويقتل كل مسامات السعادة بداخلي..!!"
حست سمر بصدمة كبيرة يوم سمعت حمد اللي كان آخر سكوته دمعة مسحها قبل لاتنزل الأرض..!! تمنت الأرض تنشق وتبلعها باللحظة هذي ، تمنت انها ترجع لورى وتواصل حياتها مثل ماكانت..!! لكن صوت العتاب مازال مستمر بداخلها ومن حمد..
حمد:" انتي كنتي فرحانه باللي تسوينه من ورى اهلج؟ وينج عن رب العالمين والا نسيتي انه يشوفج ويسجل عليج كل خطوة خطيتيها وكل كلمة قلتيها، اذا كنتي غافلة عن طل هذا فاالله يعلم وش سويتي ويااااه من ورانا...!!"
سمر بإستدارك لإستفسارة وعتابه وبصوت مبحوح:" لاياحمد لا.. مو انا اللي تخلي واحد يلمسها بهالسهولة هذي."
بغيظ وقهر وضحكة سخرية:" هه دامج سمحتي لنفسج تطلعين وياه بتسمحين له يسوي اي شي."
ناصر:" بسك على البنت ، الحمدالله ان احنا شفناها والا كان فات الفوت ، وبعدين لمتى بنظل بالشارع نتحاسب ، خلنا نرد البيت."
حمد:" خلني أقول اللي عندي ياناصر، سمر خلاص من اللحظة هذي انتهت من حياتي ، حلم وانتهى..!!"
سمر بحسرة وهي قاعدة تضرب بيدها على الأرض وبألم:" بس يااااااحمد بـــس ، ذبحتني ياحمد ذبحتني ."
كانت كل كلمة يقولها مثل السجين اللي تنغرز في جسمها بدون رحمة ، دموعها كانت قاعدة تسيل على خدها مثل سيلان المطر..!!
ناصر:" يـاالله خلنا نمشي ، ياالله ياسمر قومي عن الأرض قومي خلينا نرد البيت."
حمد:" انا داخل السيارة."
ومشى عنهم وخلاها بحسرتها وألمها ، لأن الوجع اللي سببته له سمر ماكان شويه.
ناصر:" ياالله قومي لااحد يمرّ ويشوفج جذي."
قامت وهي منزله راسها بإنكسار ، ركبت السيارة وهي تتحسس مكان صفعة حمد على وجهها، كانت مشتته موعارفة شتسوي ، حياتها كانت حلوة وطبيعية ، وش اللي رماها هالرمية هذي؟!

^^^^^^^^^^^^^^^^^^^^^^^^