^^^^^^^^^^^^^^^^^^^^^^^^
فيصل وصوته واصل لآخر الدنيا:" يمه زواج الحين لا انتي تشوفين الوضع اللي انا فيه مناسب للزواج؟"
ام فيصل:" اي لازم تتزوج انت ماتدري وش سوى ابوك فيني ، لأول مرة في حياته يمد يده عليّ ويضربني. وبعدين مايصير تخلي البنت معلقة جذي لازم تتزوج وبأسرع وقت."
فيصل بقهر:" مابتزوج وخلها تسوي اللي بتسويه."
بعصبية ردت عليه:" تبي تسود بوجهي قدام الناس ، نجلاء اتصلت اليوم وكانت تصيح حرام تسوي فيها جذي البنت زين منها موافقة تقعد على ذمة رجال عنده حرمة."
بإبتسامة سخرية:" هه يمــه خلااااص اللي تقولين عنها بتروح مني."
وهي تهز راسها موفاهمه كلامه:" شتقصد؟ شلون بتروح منك؟"
فيصل:" اتصلت نجود وطلبت الطلاق."
ام فيصل حست بغصة يوم سمعته يقول جذي ، تذكرت تهديدات زوجها اذا ساءت الأوضاع اكثر من جذي بين فيصل ونجود:" لالااااا اكيد لين كلمتها وحاولت تقنعها بتتراجع عن قرارها."
فيصل:" يمه تضحكين على نفسج انتي؟ نجود هذا قرارها النهائي وقالت لي انها تنتظر ورقة طلاقها بأقرب وقت."
بهاللحظة دخل بوفيصل البيت وأول ماشاف فيصل اتضايق :" ام فيصل انا موقلت لج ولدج هذا ماأبي اشوفه بهالبيت مرة ثانية؟"
ام فيصل:" صلّ على النبي هذا ولدك مايصير تطرده من البيت."
بوفيصل:" ولدي يسمع كلامي مايطلع من شوري ويركض ورى كلام الحريم. ياالله انا طالع فوق اغير ثيابي وابي انزل ومااشوفه هني."
فيصل حس بإن ابوه فعلاً كرهه ومايبي يشوفه:" يمه لااتعبين نفسج انا طاالع."
وركضت وراه تبي تلحق عليه لكن مافيه فايدة، ورجعت لأبوفيصل ودموعها بعيونها:" حرام عليك تطرد ولدك حراام كفايه اللي فيه."
بوفيصل:" هو جاب البلا لنفسه وانتي ساعدتيه."
ام فيصل:" بدال ماتوقف وياي تلومني."
بوفيصل:" ايييييه الومج لأنج اساس خراب اولادج اللي هم اولادي ، غفلت عنكم وخربتي كل شي. والله يستر مدري بناتج شسويتي فيهم بعد سحر من صوب والعنود بصوب ثاني."
وماعطاها فرصه ترد عليه وتركها وركب فوق لحجرته.