الساعه 6 ونص المغرب..
خلود:" اوووووووه سيف عطني الرموت."
سيف:" اقول ذلفي مناك ، من الصبح وانتي قابضة عليه وماتخلين احد يطالع على راحته."
خلود:" روح ذاك التلفزيون وطالع اللي تبي ليش تخرب عليّ."
شيخة:" سيف لاتناحسها ولاتخليها تزعجنا بصراخها."
خلود بغيظ:" انا ازعجكم لكن هين اوريكم." وقامت مقهورة وقلعت فيش التلفزيون واخذت الرسيفر وراحت تركض لحجرتها فوق.. والكل يطالعها بدهشة..!!
نورة وهي تهمس لسيف:" ليش سويت فيها جذي."
سيف:" دليعه وايد تستاهل."
باللحظة هذي طلع احمد من المطبخ وبأيده صحن كنافة.. سيف بطل حلجه وعيوونه بنفس الوقت وشوي ويطلع اللعاب من حلجه..!! انتبه له احمد وسوى نفسه موشايفه وراح يقعد صوب مريم..
احمد:" مريوم هاج ؟"
مريم:" لاشكراً مابي."
احمد للمرة الثانية يطالع شيخة ويسألها:" شيوووخي تبين؟"
شيخة وهي تضحك:" لاشكراً شبعااانه وبعدين بنحط العشا ماأبي اخرب على روحي."
كرر السؤال للحاضرين ماعدا سيف اللي ماعطاه وجه ولاسأله وقعد ياكل بالكنافة ويتلذذ فيها قدامه.. وبقهر:" احمدوووو يالمصفع الحين سألت الكل اذا يبون وأنا لا، لايكون اللي قدامك طوف."
احمد يسوي نفسه مايسمع:" تسمعون شي؟؟!!"
سيف:" عن المصاخة وعطني منها."
احمد وهو يرفع حاجبه له ويتبسم:" والله قدامك الطريق روح اشتر لك."
سيف:" لاوالله ابي من اللي عندك."
احمد:" لاااااااااااا."
شيخة وهي تضحك عليه:" شووف سواتك بخلود ماراحت مكان الله انتقم منك."
سيف:" اووووه انتي الثانية شوفي هذا بخلصها ولاعطاني شي."
نورة:" احمد تكفى اعطه لايطيح علينا."
مريم:" هههههههههه والله كأنكم بالحضانة."
احمد يوم سمعها تقول جذي طالعها والشرار يطلع من عيونه:" انا بالحضانة..!!!!"
شيخة:" وهي الصادقة ، بعدين ياسيف في كنافة بالمطبخ قوم خفّ من روحك شوي."
سيف:" انا تعبان..!"
نورة:" عيّــار."
وهو يطالع الجماعه:" عمركم شفتوا وحدة تقول لخطيبها اللي هو انا عيّـار..!!"
محمد وتوه نازل من فوق:" سيفوووه يالعيار....!!!!"
بس قالها انفجروا بالضحك لأن وجه سيف صار قوطي طماط من الفشلة وقدام خطيبته بعد.
محمد:" انا موقايل لك لاتطلع بسيارتي مابيها تتوصخ ماتشوف الغبرة اللي بره."
سيف:" احم احم محمد عن الاحراجات كفاااااايه اهنتوني اليوم وايد، واولهم انتي." وهو يأشر على خطيبته..!!
نورة وهي تضحك:" تستاهل علشان لاتاخذ اغراض غيرك وتتحجج بخواتك."
محمد:" بوطبيع مايجوز عن طبعه ، الا وين نجود؟"
شيخة:" يمكن فوق بحجرتها ليش؟"
محمد:" لابس اسأل مااشوفها وياكم."
شيخة:" زين لاتطلع الحين بعد شوي بنخلي العشا."
محمد:" مابطلع برجع فوق."
شيخة:" شفت شوق؟"
محمد:" لا لأنها قاعدة وخواتها بالحجرة ، الحين بروح اشوفها واشوف أحوال خواتها، عن اذنكم."
مريم:" مساكين يكسرون الخاطر."
نورة:" اي والله قصتهم غريبة كأنها مسلسل أوقصة ، مااقول الا الله يعينهم ان شاءالله على ماابتلاهم.."
سيف:" انا بقوووم اخلي لي كنافة لاتطفر مصارين بطني لبره."
وهم يضحكون عليه:" الله يعينك."
احمد:" اقووول لاتنسى تخلي لي وياااك."
ضربته مريم:" بسك بتصير دب.."
احمد:" انا بسكت عنج هالمرّة بس احتراماً لنورة."
مريم:" ههههههههه وانت تقدرتسوي شي."
شيخة:" لاتنسى يااحمد النسااااء ماكرات وماتقدر عليهم."
احمد:" بهذي صدقتي ، وين بسألج سؤال وش بتسون وياخوات شوق؟"
شيخة:" والله مابيدي شي الحين الأول كانت وحدة والحين ثلاث ، جذي السالفة صارت بيد ابوي الله يخليه."
نورة:" هم ماعندهم بيت؟"
شيخة:" بلى عندهم بس مدري اذا مازال لهم او باعوه."
مريم:" انا مومتخيلة شلون بعيشون في بيت بروحهم."
شيخة:" ان شاءالله نلقى حلّ لهم."
سكتوا شوي ولهى احمد ويامريم بالسوالف ، أما سيف رجع الصالة بعد ماشبع بطنه من الكنافة..
نورة:" شيخة وينها سمر ماشفتها نزلت."
شيخة:" اي صج ذكرتيني فيها، بصراحة صار لها جم يوم حابسة روحها بحجرتها وماتطلع منها الاقليل، احسها مهمومة او متضايقة من شي بس شنو مدري."
نورة:" ماسألتيها؟"
شيخة:" لاوالله ، شرايج تروحين لها وتشوفينها."
نورة:" اوكي."
سيف:" قومي بدليج حجرتها وانا بطلع شوي وبرجع."
نورة:" انزين بس لاتتأخر."
سيف:" اوووكي."
وبعد ماوصلها لباب حجرتها دقت على سمر الباب وهو نزل..
سمر:" لحظة." قامت بسرعه مسحت دموع كانت على خدها وتفاجأت يوم شافتها:" نورة..!!"
نورة:" اي هذي انا ياللي ماتسألين حية انا والا ميته."
سمر ابتسمت لها:" تفضلي."
دخلت حجرتها لأول مرة وقعدت على كنبه كانت مقابلتها كنبة كبيرة قعدت عليها سمر..
نورة:" يقولون الحلووو متضايق هاليومين ممكن اعرف من شنو؟"
سمر:" من قالج اني متضايقة؟"
نورة:" سألت سمر عنج قالت لي ان حالج متغيرة هاليومين."
سمر بشرود:" ابداً مافيني شي بس متمللة شوي."
نورة:" واللي يتملل يحبس نفسه بحجرته؟"
سمر:" صدقيني مافيني شي."
حست انها صج متضايقة لكن ماتبي تقول اللي فيها، وماحبت تضغط عليها اكثر من جذي..
نورة:" دريتي عن خوات شوق انهم هني؟"
بإستغراب:" خواتها؟"
نورة:" شكلج نايمة بالعسل.. ايه خواتها واخوهم الصغير بعد جابوه البيت."
بفضوول واستغراب اكبر:" ليش؟"
نورة:" أم عبدالله ماتت ذبحها ريل بنتها ، وهدى وعبدالله هني بالبيت ، وبوعمر محبوس بالسجن."
سمر:" لاتقووووووولين...!!! معقوووولة؟"
نورة:" اقووول قومي غسلي ويهج شكلج مفهيه."
سمر:" هههه صدقيني مدري بشي ماطلعت من حجرتي اليوم بالمرة.."
نورة:" سمر اذا فيج شي قولي لاتخشين عني."
سمر بهمسة حزن:" مافيني شي."
رفعت راسها وقالت:" واللي مافيه شي ينكّس راسه بحزن وتدمع عيونه؟"
سمر:" ارجوووج نورة مابي افتح ابواب انا في غنى عنها."
إبتسمت لها وقالت:" فاهمتج حبيبتي ، مابي أغصب عليج ولاأبي اضايقج."
سمر:" موقصدي تضايقني بس اللي صار صار خلاص ، مابي اعيد الذكرى من جديد خليني انسى اللي راح.."
نورة:" براحتج.. انزين انا بنزل ماتبين تنزلين؟"
سمر:" لا....."
نورة:" زين عن اذنج ."
^^^^^^^^^^^^^^^^^^^^^^^^
كان قاعد يدور بالشوارع من غير هدف ، هذي كانت حالة من شاف سمر تخون نفسها واهلها بذاك اليوم.. حمد حسّ انه حبه ضاع وانتهى ، كان متشتت ومشغول البال ، رغم كل اللي صار كان يفكر بسمر.. حتى تلفونه بنده وماكان يفتحه الا للضرورة. باللحظة هذي كان توه راجع البيت..واول مادخل استقبله ناصر اللي كان يحاتيه.
ناصر:" وينك يااخي؟"
حمد من غير خلق:" شتبي فيني؟"
ناصر:" أمي تحاتيك وأبوي بعد انتبه لتصرفاتك آخر الايام، انت الحين ماتقولي وش اللي يخليك مهموم لهذي الدرجة؟"
حمد:" مسوي نفسك غشيم ماتفهم."
ناصر:" خلاص ياحمد انسى اللي صار البنت غلطت والحمدالله ان احنا لحقنا عليها."
حمد:" ناصر ارجوك هني مومكان مناسب للنقاش."
ناصر:" اوكي مومشكلة تعال غرفتي اوغرفتك نتناقش."
بعصبية:" ومن قال اني ابي اتناقش والااقول شي."
ناصر:" اسمع كلامي وتعال فوق."
وركبوا حجرة حمد ، وكل واحد فيهم ساكت..
ناصر:" وبعدين معاك."
حمد:" وبعدين شنو، انت اللي جايبني الحجرة وتبي تتكلم."
ناصر:" حمد أنت اخوي ومايهون عليّ اشوفك جذي مضيع عمرك بالتفكير وشايل هموم الدنيا فوق راسك. اذا كانت سمر هي نفسها اختارت هالطريق وغلطت انت ليش تشيل همها، لاتقولي تحبها الحب بصراحة مابينفعك ايامنا موايام حب ورومانسيات."
حمد:" لأنك ماجربت تحب."
ناصر:" مولازم اجرب علشان اقدر احكم واقرر والا اتناقش ، حمد شيلها من بالك اذا هي ماتدري عنك ولاعن حبك الا بذاك اليوم وش تبي فيها ، صج هي بنت عمي بس انت اخوي ويضايقني اشوفك بهالحال."
حمد:" صدقني موقادر انسى اللي سوته ، موقادر انسى شكلها وهي بتركب السيارة وبتضيع عمرها بأيد انسان مايعرف معنى الانسانية."
ناصر:" الظاهر رب العالمين خلانا نروح هناك وننقذها قبل لاتروح من ايدنا."
حمد:" أحبها ياناصر احبها، كنت صابر على حبي وماقلت لها علشان مااخرب براءتها ولاأنوثتها بالتفكير فيني ، كنت ابي أحافظ عليها من الحب لكنها فضلت دخان الحب..!!"
ناصر:" شيلها من بالك وانساها ، عيش حياتك بتلقى مثلها واحسن منها."
حمد:" شلون انساها وهي الحب الوحيد اللي دخل قلبي وعاش بأحلامي، مااقدر انت ماتفهم."
ناصر:" وبعدين وياك بتعيش لمتى وانت تتذكرها وتندب حظك على اليوم الاسود اللي شفتها فيه وياسعود ، خلاص يااخي اللي صار مانقدر نغيره ، بس انت تقدر تغير حياتك الباقية ، وهي بعد تقدر تعيش حياتها ياانها تستمر بالغلط ويا أي شخص غير سعود أو انها تعقل وتعيش حياتها طبيعية مثلها مثل اي بنت ثانية."
حمد:" واذا عاشتها مثلها مثل اي بنت ، وتزوجت وراحت مني أنا وش بستفيد بعدين؟"
ناصر:"مدري مدري ياحمد الظاهر انك بتجنن عمرك وبتجنني ويااااك ، اقول اصحى وخلّ خرابيطك تووولي وأمي وأبوي ترى يحاتونك لاتخليهم يشكون بالسالفة وننفضح بعدين."
حمد:" خلني بروحي شووي."
ناصر:" اوكي اخليك ، عن اذنك."
خلاه بروحه وياقصة حب من طرف واحد ، وياقصة بطلها هو وحبيبة عمرها ماعرفت بحبه لها الا مؤخراً..وياأحلام تعيسة بذكراها ، وأماني مخنوقة بتحقيقها..!!
^^^^^^^^^^^^^^^^^^^^^^^^
المفضلات