ام محمد:" انت متأكد من اللي قاعد تقولة؟"
سيف:" ايه انا متأكد سمعته يكلم ابوي ويقول انه طلق خالتي."
ام محمد:" لاحول ولاقوة الابالله ، زين ماتدري وش السبب."
سيف:" يقول انها ماتسمع كلامه ، وتخالف أوامره والبارحة كان زواج فيصل ومنعها من الروحة بس عاندت وراحت ، وآخرتها طوولت لسانها عليه لحد مانفذ صبره وطلقها ، ويقول انه مرتاح من هالقرار اللي كان المفروض يتخذه من زمان."
ام محمد:" البارحة كان زواجة؟؟؟ ايييه الله يسامح اللي كان السبب ."
سيف:" سامحيني يمه بس اللي صار لخالتي هي السبب فيه، وهي اللي خربت حياة اختي."
ام محمد بحزن وضيق:" أدري ، أدري ياوليدي انها هي اللي دمرت حياتها وحياة عيالها بأيدها، لكن وش نقول غير الله يسامحها ويهديها."
بعد دقايق دخل محمد وبأيده بعض الأوراق سلم عليهم وقعد على الكرسي وهو مستانس ويقلب بالأوراق..
سيف:" خييييير اشووفك مستانس؟"
محمد:" الخير بوجهك ، وين شوق يمه؟"
ام محمد:" فوق تبيني اناديها؟"
محمد:" لامايحتاج انا بروح لها فوق... والاتدرين بخليها تنزل هي وخواتها ، وخواتي بعد ابيهم ينزلون."
سيف بإستغراب:" وش صاااير؟"
محمد:" الحين بتعرف بس انت روح دق عليهم وخلهم ينزلون."
سيف وهو رايح :" على امرك."
وبعد دقايق تجمعوا كلهم ، حتى هدى نزلت لكن بالغصب بعدما سحبوا فيها خواتها وبنات بومحمد..وقعدوا يم بعضهم البعض ينتظرون محمد يتكلم..
شوق:" خير يامحمد شصاير مجمعنا كلنا؟"
محمد:" الحين بتعرفون ، عبدالله تعاااال صوبي."
وبسرعه قام عبدالله من مكانه وقعد صوب محمد، وفتح الأوراق اللي بيده وعطاهم لعبدالله يقرأ بصوت عالي وش مكتوب:" عقد شراء فيلا .. اسم صاحب الفيلا : محمد ......" وقبل لايكمل رفع عبدالله راسه وسأله:" هذا بيتك انت صح؟"
طالعوه كلهم بإستغراب:" ايه بيتي... وبيت شوق وبيتك وبيت خواتك..!!"
شوق:" مافهمت شلووون؟"
محمد:" يمـه انا قررت اني اتزوج نهاية الشهر هذا ، وأشتريت لي بيت يمكم بالشارع الثاني، يعني مارحت بعيد عنكم ، وباخذ شوق وخواتها وعبدالله يعيشون ويانا بالبيت علشان مايظلون بروحهم في بيتهم القديم.. والبيت هذا بنأجره اذا كانوا راضين علشان يستفيدون من فلوسه."
شوق مومصدقه وخواته فرحانين لقرار اخوهم ، اما هديل وهدى وعبدالله فللحين مومستوعبين اللي قاعد يدور من حولهم..!!
محمد:" ماقلتي لي ياشوق شرايج؟"
شوق:" مدري بصراحة ماني مصدقة اللي قاعد تقوله انا وخواتي بنعيش مرة ثانية ويابعض؟! شفت ياعبدالله ماقلت لك محمد مستحيل يخلف وعده وياك..."
ابتسم عبدالله وحضن محمد.. الكل كانوا سعداء بقرار محمد وأخيراً بينلم شمل العائلة.!!
ام محمد:" قلت لأبوك يامحمد؟"
محمد:" ايه وهو اللي شجعني على اتخاذ هالقرار.. ماقلت لي ياسيف شرايك تعرس وياي مرة وحدة ، وخلنا نقول لأحمد يعرس ويانا بعد."
سيف:" والله مدري اشوووف نورة وارد لك خبر."
خلوود:" ياالله خلوونا نفرح فيكم مرة وحدة."
محمد:" دعواتج الوالدة."
ام محمد:" الله يتمم عليكم بخير يارب."
سيف:" اقوول بودعيج سمعت عن خالتي ام فيصل تطلقت البارحة..!!"
كل اللي قاعدين تفاجأوا يوم سمعوا بالخبر وخصوصاً نجود اللي ماتوقعت ان يصير بخالتها جذي..!!
محمد بصدمه:" اووووووه لاتقوووووول ليش وش صار؟"
سيف:" سمعت بوفيصل يقول انها ماسمعت كلامه يوم منعها من روحة عرس فيصل بس ماطاعت وهذا جزاها."
نجود حست بضيق يوم سمعت ان فيصل تزوج ، استأذنتهم وقامت رجعت لحجرتها تفكر بفيصل وبزواجه..!!
محمد:" يالخبل انت الحين ماتشوف اختك قاعدة.. على طوول توصل وتخبط."
سيف:" انا شدراني نسيتها.. وبعدين لي متى بتظل تفكر فيه خلاص خلها تعيش حياتها بعيد عنه وعن ذكريات المُرّ اللي عيشها فيه."
محمد:" على بالك السالفة سهله تنسى بين يوم وليلة ، عموماً لاتنسى تشاور خطيبتك وقول لأحمد يمكن نعرس كلنا ويابعض مرة وحدة."
سيف:" يصير خير."

^^^^^^^^^^^^^^^^^^^^^^^^
وصلها مسج عبدالعزيز بعد ماصلت صلاة العصر (( الساعه 4:30 او 4:45 ابيج تكونين عند البناية ))
مسحت المسج من تلفونها وقامت غيرت ثيابها وراحت تستأذن من ابوها علشان تطلع..وبعد ماسألها وين بتروح وطبعاً جذبت عليه وافق بشرط انها ماتتأخر.. وراحت بسرعه وقالت للسايق ياخذها للمجمع ، وبعدها قالت له يروح واذا خلصت بتتصل فيه.. واخذت تاكسي من هناك وراحت للبناية اللي فيها شقة فهد..
وطبعاً قالت للتاكسي ينتظرها علشان ماتتوهق بعدين وماتلقى احد يرجعها المجمع.. نزلت من السيارة وقلبها يدق مثل الطبل ، وراحت للعمارة ودخلت داخلها وظلت عند الرسبشن تنتظر عبدالعزيز ، كانت الساعه 4:30 بالضبط وللحين ماشافت احد وبعد عشر دقايق سمعت صوت يناديها:" سحر..."
التفتت للصوت وكان عبدالعزيز وبيده شريطين فيديو... كانت خايفة لأقصى درجة.
عبدالعزيز:" شخبارج سحر؟"
سحر بتوتر:" بخير، جبت الاشرطة؟"
عبدالعزيز:" أي اخذتهم من شقته من غير مايدري.. بعد ماحصلت مفتاح الشقة من عنده.."
سحر:" زين وينهم عطني اياهم خلني امشي."
عبدالعزيز:" شفيج مستعجلة ؟"
سحر وبدت تفقد اعصابها:" واللي يرحم والديك ياعبدالعزيز عطني اياهم مابي احد يشوفني هني ."
عبدالعزيز:" اوكي." وعطاها الشريطين بعد ماوعدها بإنه يساعدها..
سحر:" عبدالعزيز انت متأكد ان ماعنده نسخ منهم؟"
عبدالعزيز:" لاماعنده دورت ماكان فيه الا هالشريطين ، وباقي الاشرطه افلام مالج خص فيها."
سحر:" مشكور ياعبدالعزيز ماقصرت، ياالله مع السلامة."
عبدالعزيز:" مع السلامة." ومشى عنها وبعد دقايق طلعت هي علشان لين شافها احد مايشك فيها.. بسرعه راحت للتاكسي اللي كان ينتظرها وقبل لاتركب حست بيد شخص على جتفها..
سحر بدهشة وصدمه:" فيصـــل..!!"
بعصبية:" شتسوين هني؟"
سحر حست ان الدنيا ادووور ابها وموقادرة توقف ، حتى رجايلها صاروا ثقال وموقادرين يشيلونها..
فيصل وبعصبية اكثر:" اسألج شتسووووين هني؟؟"
سحر:" هااا ، انااا جاية ......." وقبل لاتكمل كلامها سأل فيصل راعي التاكسي عن حسابه وخلاه يمشي..
فيصل وهو يسحبها من جتفها لسيارته:" انا ابي اعرف انتي شجابج هالمنطقة هذي؟ وش عندج هنيه؟"
سحر:" كنت جاية حق وحدة من صديقاتي بس الظاهر اني نقلت العنوان غلط."
فيصل واللي حاس انها تجذب عليه:" زين ليش ماجيتي وياالسايق دامج جاية حق وحدة من صديقاتج؟ ليش جاية بتاكسي؟"
سحر حست انها خلاص بتموت بين ايدين اخوها اليوم وخصوصاً ان الاشرطه بشنطتها يعني لويفتحها ويشوفهم راحت عليها..
سحر وتحاول تهرب من الورطة اللي طاحت فيها:" انا رحت المجمع اول وياالسايق وبعدين اتصلت فيني رفيجتي وانا حزتها ماعندي كردت بالتلفون فأخذت تاكسي وخليته يوصلني."
فيصل:" سحر انا مدري ليش مومصدقج حاس انج تجذبين عليّ."
سحر بتوسل:" صدقني يافيصل مافيه شي كنت جاية لوحدة من رفيجاتي."
فيصل:" ركبي السيارة وحسابج عندي بعدين..."
وطووول الطريق وهي خايفة من اللي بصير لها لين رجعت البيت ، والمصيبة لين كان ابوها هناك.. دخلت البيت بعد ماحصلت دفعه قوية منه للداخل خلتها اطيح على الارض وصوته مالي البيت.. طلع ابوها من مكتبه على صوت صراخ فيصل وهومعصب:" شصاااااير؟؟؟"
فيصل:" اسأل بنتك شصاير؟ اسألها وين كانت." كانت على الارض قاعدة وحاضنة شنطتها وتصيح.. وعلى صوت صراخهم طلعت العنود من حجرتها تشوف وش صاير ..
بوفيصل:" كانت بالمجمع هي مستأذنه مني وسمحت لها تطلع.. وبعدين انت من سمح لك تدخل البيت هذا.."
فيصل:" اصحى يايبه اصحى ، بنتك شفتها عند عمارات مشبوهه بالدعاااااارة..!! وانت تقول لي مجمع.."
حس بوفيصل الدنيا ادور فيه ومن زود الصدمة طاح على طول على الأرض حتى من قبل لايسمع أي كلمه من سحر اونفي للأتهام الموجه لها... وركض فيصل لأبوه وسحر قامت لأبوها وهي تصارخ وتصيح:" يبـــه .. يبه لاتسمع الكلام اللي يقوله .. يبه اصحى يبه.."
فيصل حسّ انه ذبح ابوه بهاللحظة ، رفعه بعد ماساعدته سحر والعنود وخلوه على الكنبه وبسرعه اتصل للأسعاف لأنهم حولوا يوعونه مااوتعى..!!
سحر وهي اطالع فيصل:" انت ذبحت ابوي ، انت السبب يافيصل ماكان المفروض تقول لأبوي هالكلام وانت تدري ان قلبه تعبان ، ذبحت ابوي بعد مادمرت حياتنا كلنا ، حتى امي تطلقت بسببك انت يافيصل...!!"
ظل يطالعها بعيووون مصدومة ، ماكان مصدق الكلام اللي تقوله ، امه وابوه يطلقون؟؟!!

وصل الاسعاف واخذوا بوفيصل ، ولحقهم فيصل بسيارته وسحر والعنود وياه..طول الطريق كان كل واحد فيهم يفكر باللي بصير في ابوهم .. وبالمستشفى دخلوا بوفيصل غرفة العناية ، نظرات فيصل وسحر كل واحد فيهم كانت اتهام للثاني ، بأنه هو السبب في اللي هم فيه..!!
طلع الدكتور من غرفة العناية وتراكضوا حوله بسرعه يسألونه عن ابوهم..
فيصل:" بشر دكتور."
الكتور:" الحمدالله لوتأخرتوا شوي كان جته جلطة بالقلب ، بس عدت على خير والأكيد انها من أخبار سيئة فأتمنى انكم تبعدون عنه أي اخبار او مشاكل سيئة حتى يطلع بالسلامة..!!"
فيصل:" ان شاءالله دكتور.. ممكن نشوفه الحين؟"
الدكتور:" الحين لا بس بعد مايرتاح ممكن ، بس لاتنسون اللي وصيتكم عليه."
فيصل:" مشكور يادكتور.."
ورجع فيصل خواته البيت بعد ماتطمنوا على حال ابوهم ، وقبل لايمشي سألهم:" وين أمي الحين؟"
العنود:" في بيت جدي."
ومن غير مايرد عليها مشى عنهم ، كانت سحر قاعدة على الكنبه تفكر بأبوها وبفيصل ، فجأة قطعت عليها العنود حبل افكارها بسؤالها:" سحر وش كنتي تسوين بالمكان اللي قال عنه فيصل."
سحر:" انتي بعد...؟!"
العنود:" فيصل كان خايف عليج جذي سوى اللي سواه ، بس ماقلتي لي وش كنتي تسوين هناك؟؟ وخصوصاً انج قلتي لأبوي انج بتروحين المجمع."
سحر والدمعه بعيونها:" كنت رايحة آخذ غرض من وحدة رفيجتي."
العنود:" سحر ومادورتي الاهالمكان تلتقين وياها فيه؟ الحين لوابوي راح فيها بتكونين انتي السبب موفيصل بس..!"
سحر:" صدقيني ماكان فيه مكان التقي وياها فيه الاهناك ، وصدقيني ماسويت شي بمجرد اني اخذت الغرض من عندها مشيت ، وشفت فيصل والباقي تعرفينه.."
العنود:" انا مابي أتدخل بحياتج ، بس الحمدالله انها جت على جذي والاكنتي انتي بدنيا ثانية."
سحر:" حاسة نفسي بختنق بهالبيت ، صار بيتنا موحش وكأيب ماعادت فيه الضحكة الأولية ولاالطيبة والحنيّة كل شي ضاااع بهالبيت.."
العنود:" لاتقولين جذي ياسحر ، لازم انظل ويابعض ونبقى ايد وحدة ، ولاتنسين الصدق هو اساس كل حياة سعيدة بأي بيت..!!"
ابتسمت لها ابتسامة حزينة وقامت من مكانها:" اييييه ياعنود كل شي ضااااع بحياتي ومابقى مني الا جسد والله يعلم بهالجسد وين برووح اذا الله اخذ امانته.."
وماانتظرت منها أي رد لأنها مشت عنها وراحت لحجرتها تقضي على سبب تعاستها بهالدنيا.