انعزل عن الدنيا ومافيها ، كل شي من حولة فيه ملامح الموت ، كل شي يصرخ له بالموت..!! كانت تتهيأ له أشياء وأشياء.. بعد مااكتشف المرض كره نفسه ، كره ربعه وكل شي بالدنيا ، زادت حالته سوء ، ماانردع لكنه زاد بالشرب والسهر بالفنادق ، رغم كرهه للناس الا انه كان حاط حرته بالشرب والسكر..!! كان يبي ينسى مرضه ينسى كل شي ، بغوا يحجزون عليه بمستشفى أمراض الايدز لكنه هرب مارضى يقعد ، كان يحس روحه بيستخف لوقعد هناك يوم واحد..!!
بيوم من الايام كان قاعد بروحه على البحر يفكر بالأيام القليلة اللي باقيه له ، كان البحر قدامة هايج وثاير نفس حالته صراااع داخلي بيذبحة ، ظل يفكر بفهد اللي وده لويقتله بيده..!! (( آآآآآآآآه آآآآه ، أنا شلون طاوعته؟ شلووون؟! أكرهه أكرهه أكرهه ، لازم انتقم منه لاااازم ماراح ارتاح الالما أسبب له ألم يذبحه ، هو سبب كل اللي أنا فيه ، لولا مشورته الزفت ماصار اللي صار ، كنت عايش بسلام صج كنت أسهر وأروح فنادق بس.....!! أففففففففف )) أخذ حصاة صغيرة كانت موجودة عند ريله ورماها بالبحر بكل قهر وغضب. فجأة تراودت لذهنه فكره تنهي حياته وتنهي العذاب اللي هو فيه (( لالالااا مااقدر مااقدر اسوي جذي الا هذا ، لكن العذاب اللي انا فيه بيذبحني ، بينهيني بآلام كبيرة ، بس... ، لالااا أنا لازم أول شي أسويه أأذي فهد مثل أذاني ، لاااازم. )) قالها وهو مصمم على هالشي. وش اللي كان يدور في باله محد يدري..؟! ملامح انتقام بدت ترتسم قدامه لوين راح توصله..؟!

^^^^^^^^^^^^^^^^^^^^^^^^^

بالمستشفى..

أحمد وهو رايح جااي بالممر:" محمد احنا بنتم قاعدين جذي؟ الدكتور للحين ماطلع ، انا خايف ان فيها شي خطير."
محمد كان ساكت وفي عالم ثاني ، كان الحقد مالي قلبه...!! أحمد موقادر يتحمل أكثر:" محمـــد..شفيك ساكت أقووولك الدكتوور لحين ماطلع."
محمد:" وش اسوي؟ هذا انا قاعد وصابر، أنت بعد أقعد أكيد الدكتور بيطلع الحين."
أحمد:" افففف مااقدر على برودك ، ما كأن اللي داخل اختك."
محمد:" الله يخليك بروحه الضغط عندي واصل حده."
أحمد:" ياااارب يردها لنا بالسلامة، أنا افديها بروحي يامحمد ، بس لايصير فيها شي."
محمد حس بأخوه يتألم ، كان يحب نجود واايد وكان أقرب واحد لها، بالرغم انه ماكان يحب بين لهم هالشي...
طلع الدكتور وباين عليه التعب...
نط له احمد بسرعه ومحمد:" خير دكتور شفيها؟"
الدكتور:" من فيكم زوجها؟"
محمد:" احنا اخوانها."
الدكتور:" والله مدري شقول لكم بس ادعوا لها بالشفاء."
أحمد ودموعه على عينه:" ليييييش شفيهااا دكتور؟؟"
الدكتور:"اممممم...... جلطة بالقلب.."
حسوا نفسهم بدوووامة كبيرة وان الدنيا ادوور فيهم ، جلطة؟؟!! هذا آخر شي كانوا يتوقعونه يصير لأختهم؟ والسبب، فيصل..!!
الدكتور:" احنا الحين بنخليها تحت الملاحظة ، الجلطة ماكانت شديدة بس لأن نسبة دمها كانت نازلة وايد جذي تأثرت وايد ، والدم ماقاعد يوصل لقلبها بشكل سليم وصادتها حالة إغماء وان شاءالله بتصحى منها جريب"
محمد ويحاول يمسك نفسه:" بـ ..... ، بتعيش دكتور؟"
الدكتور:" ان شاءالله احنا سوينا اللي علينا ، هي الحين تحت تأثير المخدر وان شاءالله بالليل اذا الله كتب تشوفونها."
أحمد كان متسند على الجدار ويفكر بأخته اللي ماكان يتوقع نهايتها بهالطريقة.. قرب منه محمد وهو يشد على جتف أحمد:" خلك قووي ياأحمد."
أحمد:" ليتني انا ولاهي ، ليتني اناااا يامحمد."
محمد وهو حاط ايده على حلج احمد:" اششششش عن هالحجي ياأحمد وصل على النبي ، ان شاءالله بتقوم لنا بالسلامة."
أحمد:" هو السبب يامحمد، فيصل اللي ذبحها لازم اراااويه لازم."
محمد:" احمد خلنا نمشي الحين نروح البيت احنا نسينا أمي اللي طاحت عليهم ، ولاتنسى خواتي وشوق هناك يحاتون."
وطلعوا من المستشفى وكل واحد فيهم يفكر بفيصل وشنو راح يسون فيه..!!

^^^^^^^^^^^^^^^^^^^^^^^^^