غريبة بين اهلي

[حورالعين666]

دخل سيف وأحمد غرفته وقعدوا على الكنب...
سيف:" خير وش عندك؟"
أحمد يمزح:" وش تحب تشرب."
سيف:" هذا وقتك انت مع ويهك هذا قووول أحمدوو خلني اطلع وراي مشاوير."
أحمد:" اي مشاوير هذي لاتقول بتروح بيت نورة.؟"
سيف:"هااااا ويهك اروح هناك وش قالوا لك، انا محترم نفسي مومثل شباب الحين هااايف وماشي على حلّ شعروا خخخخ."
أحمد:"ههههه حتى بهذا تنكت، أقوول خلنا ندخل بموضعي احسن."
سيف:" اي هذا احسن شي قلته."
أحمد طالعه من طرف عينه ورمى عليه مخده صغيرة من على الكنب:" زين سيف أبي أسألك سؤال، إنت شلون عرفت إن نورة تحبك؟ وشلون قلت لها إنك تحبها؟"
سيف:" لييييييش باالله تبي تعرف خصوصياتي؟ لايكون بديت تحب من ورااااي؟"
أحمد:" أووووووووووه انت قول بعدين بقول لك السالفة."
سيف:" والله مدري وش اقول لك أسلوبها كان غير البنات مؤدبة يعني تعرف بنات هالزمن مايعين واايد وعليهم حركات هذي كانت غييييييير عنهم، لفتت إنتباهي وكانت سمور حبيبتي رفيجتها ومازالت."
أحمد:" زين كمل."
سيف وحاط ريل على الثانية:" إحم، وبعدين ياطويل العمر قلت لأختي سمووورة عن السالفة وهي كانت الوسيط بيني وبينها، وكلمتها جم مرة بالتلفون بس هي كانت خايفة وقالت لي انها ماتبي تسوي شي من ورى أهلها ولازم أتقدم وانت تعرف الباجي طبعاً."
أحمد:" ايه اعرف وهو متى بيخطبها لك؟"
سيف:" انت تشوف الوقت مناسب انطر يرجع محمد وبعدين أفرااااج."
أحمد:"اي اي ."
سيف:" شنو اي اي وش السالفة ماقلت لي شي."
أحمد:" أمممم.. أ..سيف مدري من وين أبتدي..."
قطع كلامه:" ياأخي لاتحتار ولاتتوهق أنت تحب؟"
أحمد:" مدري."
سيف بإستغراب:" شلون ماتدري ياتحب يالا، بس مدري هذي أول مرة أسمعها."
أحمد:"صح إنت أصغر مني بس حنا متقاربين من بعض يعني الحمدلله متفاهمين."
سيف:" لايكون بتخطبني وانا مدري؟ ياأحمد ياحبيبي قووول وش اللي في بالك، تحب منو؟"
أحمد:" مريم."
سيف بدهشة:" مريييييييم؟"
أحمد:" ايه مريم شفيك مستغرب جذي؟"
سيف:"لا بس اهي تحبك؟"
أحمد:"مدري."
سيف ومازال بدهشته وإستغرابه:" شلون؟ اهي تدري انك تحبها؟"
أحمد:" بصراحة لا ماتدري، ولاحد يدري غيرك انت الحين."
سيف:" ياسلاااااام ومن متى ان شاءالله؟"
أحمد:" مدري من زمان بس ماكنت أعرف اني أحبها أفكره مجرد إعجاب بشخصيتها، بس اذا اشوفها أحس ان دقات قلبي غير تسرع اكثر، واتوتر أكثر."
سيف:" ياااااااااااااااااحبيبي يااااعيني ع الحب."
أحمد:" ياشينك."
سيف:" زين والحين وش بتسوي؟ بتقول لها؟"
أحمد:" مدري شلون شرايك انت؟"
سيف:" والله أقول لك انت كلم حمد والا حد من خواتي لكبار طبعاً وشوف وش يسون لك."
أحمد:" وش يعني؟! أنا ابي بالأول اعرف رايها فيني ."
سيف:" وش فيك يعني، وش حلاااااتك وش زينك وماناقصك شي اكيد بتوافق عليك."
أحمد:" ياأخي أحد قال لك ع الموافقة انا ابي اعرف شعورها اتجاهي بالأول بعدين أفكر بالخطوبة والزواج."
سيف:" أنا اقول لك كلم حمد مثلا وقول له باللي في قلبك لااضيييييييع من ايدك."
أحمد:" برايك جذي؟"
سيف:" أكيد، ع العموم انا طولت وبطلع يالله تبي اتيي وياي والا؟"
أحمد:"لا مابي أطلع بقعد شوي هني."
سيف وهو رايح عند الباب:" الا بسألك شرايك بشوق نسيبتنا؟"
أحمد:" باين عليها بنت حبوبه ومقاسية وايد، وانها كافيه الناس خيرها وشرها."
سيف:" وانا اقول جذي بعد، يالله بااااااااي."
أحمد:" باي."
وطلع سيف من غرفته وظل يفكر باللي شغل نفسه فيه، مريم هي الانسانة الوحيدة اللي لفتت انتباهه لأنها هادئة ومتزنه وهو مايحب الصياعة وبنات هالزمن هذا. يعني ميولة مثل ميولها بس هذا مايمنع انها ماتكن له نفس الشعور.

^^^^^^^^^^^^^^^^^^^^^^^^
في بيت بومحمد باليوم الثاني من وجود شوق في بيتهم، كانت العنود في البيت أما سحر فكانت في بيت ميثة بعااالم ثاني.
أم فيصل:" وينها فيه الحين؟"
أم محمد:" فوق ويا البنات قاعدة."
أم فيصل:" ماتخافين منها؟"
طالعتها بإستغراب:" وليش أخاف؟"
أم فيصل:" يعني تربيتها والبيئة اللي كانت تعيش فيها."
أم محمد:" ياوخيتي البنت وش طيبها وش حلاتها."
أم فيصل:" أنا ماقصدت حلاتها ولاطيبها، انتي ماتدرين يمكن تعلمت سوالف مب زينة من ابوها تعرفينه.. يعني مايحتاج اعلمج."
أم محمد:" استغفرالله، الريال مات وماتيوز عليه الا الرحمة، والبنت مافيها شي ومااعتقد انها شينة لأنها عانت وقاست في بيت ابوها وانتي تعرفين الظروف اللي عاشت فيها."
أم فيصل:" انا احذرج بس لاتقولين بعدين اختي ماقالت لي."
أم محمد:" لاااا ماظني البنت جذي، حرااام لاتظلمينها ماشفنا منها شي."
أم فيصل:" كيفج والله، الا بسألج مااتصلتوا لمحمد؟"
أم محمد:" تصدقين أمس نسينا نتصل، وانتوا فيصل مااتصل لكم؟ وماقالوا متى بردون؟ صار لهم شهر وأكثر والله خاااطري فيهم وحشوني."
أم فيصل:" وانا بعد بس انتي تعرفين العلاج، والله عن جيتهم ماقال."
أم محمد:" الله يردهم بالسلامة ان شاءالله."
أم فيصل:" على سالفة محمد ياوخيتي، والله مدري وش اقول لج."
أم محمد:" انتي قوولي ولاتستحين."
أم فيصل:" أ.. تعرفين لعيال كبروا وأبي أريح نفسي وأشوفهم مستقرين، يعني انتي فاهمه وش اقصد."
أم محمد:"هههههههه الله يقطع سوالفج، ايه فاهمه تقصدين محمد وسحر صح، ادري انه يه الوقت بس انتي تعرفين وش ظروفة اللي مر فيها وان شاءالله اذا رجع بالسلامة بفاتحة بالموضوع ومايصير خاطرج الا طيب."
أم فيصل:" ماتقصرين ياوخيتي."

^^^^^^^^^^^^^^^^^^^^^^^^
في لندن..

فيصل:" يااااااسلااااااام إحساس جميل انك ترد لبلدك بعد هالغيبة."
حمد:" اي والله مشتااااااق لشوفة هلي والحبايب كلهم."
فيصل:" الحمدلله كانت سفره مريحة، انا بصراحة استانست وايد حتى نجود استانست."
حمد:"اي والله ماخلينا مكان مارحنا هذا وجايين لعلاج لو لسياحة شسوينا؟!"
فيصل:" ماأعتقد ان بظل شي صاحي بلندن."
حمد:"ههههههههههههههه والله ناقصنا باقي الشباب."
فيصل:" اي والله."
محمد كان ساكت ولايشاركهم سوالفهم، كان باله مشغول بشي واحد بس، مافي شي شاغل باله غير سحر اللي من آخر مكالمة ماتعبت نفسها واتصلت اعتذرت فيها له، والا سألت عنه:" آآآآآآآه ياسحر، صبري علي بس أرجع." وانتبه على ايد فيصل يهز جتفه:" محمد، ياهوووو شفيك وين رحت؟"
محمد بإبتسامة مصطنعه:" هني مارحت مكان."
فيصل:" طل وين هني؟ قول لي وش كنا نقول؟"
محمد وبدون مايحس على عصبيته الزايدة:" اوووووه شفيكم انتوا خلوني بروحي."
حمد وفيصل ظلوا يطالعون بعض بإستغراب، حمد:" محمد شفيك تصارخ جذي؟"
محمد:" آسف، بس خلوني بروحي."
فيصل:" أوكي براحتك، حمد قوم خلنا نطلع شوي."
حمد:" اوكي."
وطلعوا اثنينهم من الغرفة، وخلوه بروحه يرتاح كان حمد يعرف اللي فيه بس ماحب يقول لفيصل لأنه أخو سحر..
حمد:" لاتزعل منه، هاليومين مدري شفيه."
فيصل:" انا،لاااا مب زعلان بس متضايق من الحاله اللي هو فيها."
حمد:"الله يهديه بس، لوتدري شكثر تحملت عصبيته."
فيصل:" غريبة محمد ماكان جذي!!"
حمد:"إيييييه خلها على الله ولاتنسى الجهد اللي يبذله في العلاج، أكيد ماخذ كل طاقته."
فيصل:" ماااعليه مافي داعي تشرح لي، عارف محمد زين."
وطلعوا من الفندق بعد مامروا على نجود وأخذوها معاهم.. أما محمد فكان قاعد وأعصابه تلفاااااانه ع الآخر:" وش هالقهر هذا، وش اللي سويته حتى يصير فيني جذي؟ علاقتنا كانت ماشيه على احسن مايكون، يعني معقوولة انج اتغيرين علي ياسحر بهالسهولة؟آآآآآه ياسحر لوتدرين شكثر أتعذب بسبتج، ليش ماادقين وتسألين عني؟ مابي شي غير اني اسمع صوتج واتطمن عليج."
هذا الشي اللي كان شاغل باله، عمره مافكر الا براحتها وسعادتها، حب محمد كان غريب، يقولون الحب أعمى بس مب معناته ان يغض النظر عن الجوانب السيئة. وهذا كان عيب محمد اللي مستحيل يتنازل عنه، غريبببة مع انه انسان واعي وفاهم..؟!

^^^^^^^^^^^^^^^^^^^^^^^^
دخلت الصالة وعطت عباتها الخدامة توديها غرفتها، كانت العنود تقرأ كتاب تعليمي وأبوها يطالع التلفزيون.
أم فيصل:" سمعت باللي صارفي بيت أختي."
أبوفيصل:"لااا شصاير بعد اللهم ياكافي."
أم فيصل:" تعرف بوعبدالله الخلفان اللي توفى؟"
بوفيصل:" ايه أعرفه شفيه؟!"
أم فيصل:" بنته شوق أخذها ريل أختي ويابها يسكنها في بيتهم."
بوفيصل بدهشة:" شنوووو؟"
أم فيصل:" اللي سمعته."
بوفيصل:"ياالله زين يسوي يكسب أجر فيها وحراام اتظل ويامرة ابوها يكفي اللي شافته منهم."
أم فيصل:" يعني انت تشوف اللي سواه زين."
بوفيصل:" عين العقل، وانا لوكنت مكانه راح اسوي نفس الشي."
أم فيصل:" والله مدري وش اقول أخاف انها تسوي شي لهم، البنت تعرف مكان تربيتها و.."
وقطع عليهم الكلام صوت سحر اللي كانت نازلة من فوق:" مرحباااا ياأحلى أم وأبو بالدنيا."
بوفيصل:"هلا وغلا ببنيتي."
أم فيصل:" متى رديتي من بيت ميثة؟"
سحر:" من زمان صار لي نص ساعة، الا منو هذي اللي اتكلمون عنها يمة؟"
طالعت أم فيصل أبوها وماعرفت وش تقول لها، ابوفيصل دار لسحر وقال لها:" وحده تصير لأهل ريل خالتج."
سحر وهي قاعدة على الكنب مجابل امها:" اي شفيها؟"
أم فيصل:"والله مدري وش اقول لج."
سحربإستغراب:" ليش شفيها هذي اللي اتكلمون عنها؟"
بوفيصل:" مافيها شي." ودار يطالع التلفزيون وخلى أمها تقول لها السالفة..
سحر بعد ماسمعت سالفة شوق:" ووووي وان شاءالله بخلونها معاهم؟مايخافون على عمرهم منها؟"
طالعها بوفيصل:" ليش يابنيتي يخافون منها؟ وش بتسوي فيهم؟"
سحر:" شنوو يبه هذي ابوها راعي بلاوي يعني اكيد هي.."
وقطع كلامها:" فيها شنو؟ حرام عليج تتبلين على البنت وانتي لاشفتيها ولاتعرفينها، يمكن البنت غير مب لازم تطلع مثل ابوها."
سحر:" مدري يبه بس ينخاف منها، بس تدرين يمه ودي اشوفها انتي وش قلتي لي اسمها؟"
أم فيصل:" شوق."

^^^^^^^^^^^^^^^^^^^^^^^^
تجمعوا في بيت بومحمد يوم الخميس مثل العادة يتغذون هناك، ماكان ينقصهم غير محمد وحمد ونجود وريلها فيصل، الكل كان موجود بيت بوحمد وبيت بوفيصل كلهم كانوا متجمعين. شوق كانت خايفة من هالتجمع ومستحية وااااااااااايد لأنها لأول مرة راح تجتمع معاهم ولأول مرة راح تشوفهم ناس غرب بالنسبة لها.
سحر كانت متشوقه انها تشوف هالبنت اللي يتكلمون عنها، شوق كانت بعدها قاعدة بغرفتها ويابدور مستحية تنزل. والحريم كلهم كانوا متيمعين بصوب واحد والبنات بصوب.. وطبعاً الشباب كلهم كانوا بره بالحديقة قاعدين ويا الريايل.
سحر:" اقول سمورة حبيبتي وينها هذي نسيبتكم."
سمر:"فوق ويابدور."
سحر:" الا وش فيها مانزلت للحين؟ اكيد متفشلة تنزل؟"
سمر بإستغراب:" ليش متفشلة تنزل؟"
سحر:"لا بس يعني تعرفين ماضيها يفشل."
سمر واللي ماتوقعت يكون تفكير سحر بهالطريقة هذي:" على ماأعتقد ان موبيدها اللي صار لها، والبنت الحمدالله محترمة ومافيها شي."
سحر:"هههه شفيج أكلتيني جذي، انا مااقصد شي بس يعني اللي يعيش حياتها ماأعتقد ايي من وراه خير."
سمر:" بليييز سحر لاتحكمين على البنت وانتي ماشفتيها." وسكتت عنها لأنها فضلت انها ماتثير هالموضوع لأنه ماراح يتسكر بسرعه.
كانت خلود وبنت عمها وخالتها يسولفون مع بعض عن شوق كانت حديث الساعه بالنسبة لهم لأن قصتها كانت مثل قصص الأفلام والمسلسلات. ومريم كانت قاعدة تسمعهم وبس.
وبعد دقايق دق تلفون سحر وكان المتصل فهد، ماتوقعت انه يتصل لها بهالوقت هذا تغيرت الوانها وحاولت تمسك نفسها وماتبين لهم أي شي، وقامت من مكانها وراحت ترد عليه.
سحر:" الوووو."
فهد:" هلا حبيبتي شخبارج."
سحر وبدون مقدمات:" بخير ليش متصل بهالوقت والله عفستني."
فهد:" يه ليش؟ وينج فيه؟"
سحر:" في بيت خالتي نتجمع كل خميس ابيتهم، خير شتبي الحين؟"
فهد:"لاسلامتج مابي شي أسأل عنج وحشتيني."
سحر وخايفة ان حد يسمعها:" زين ياعمري بروح الحين وبالليل اكلمك بااي."
فهد وبقهر:" اوكي باي."
وبعد ماسكر التلفون:" صج حماارة انسانه حقيرة ومغرورة."
عبدالعزيز:"ههههههههه موتوك تقول لها حبيبتي وحشتيني."
فهد:" وانت من صجك احب لي وحدة جذي؟ انا من تكلمت عن الخبلة ميثووه صار خاطري اكسر غرورها، لكن تصبر علي شوي."
عبدالعزيز:" وووووواااوو راحت عليها يعني."
فهد:" وأهلها بعد ههههههههههههههههههههههه."
عبدالعزيز:" ليش وش بتسوي؟"
فهد:"لااااا خله كل شي بوقته حلوووو ياحلووو."
وفي بيت بومحمد... ردت سحر لمكانها وقعدت يم سمر..
سمر:" هذي منو؟"
سحر:" لا هذي ميثوووه تعرفينها ومشاكلها."
سمر:"اهاااا، تدرين اقوووم اروح اشوف بدور وشوق شفيهم للحين مانزلوا."
وبسرعه راحت فوق ودقت باب الغرفة..
بدور:" منووو؟"
سمر:" هذا أنا."
بدور:" دخلي الباب مفتوووح."
فتحت الباب:" شفيكم للحين اهني؟"
بدور:" سألي الآنسة، مب راضية تنزل."
سمر:" ليش؟؟؟؟؟؟؟؟؟"
شوق:" والله مدري أستحي منهم ماعرفهم، ويمكن أضايقهم بوجودي."
سمر:" وش هالحجي اللي تقولينه، يالله بلا دلع علي ونزلي، واذا انتي مستحية من أخواني تراهم بره وياالشباب ومافيه الا البنات والحريم تحت يعني ماله داعي تستحين وتضايقين."
بدور:"ياااالله عااااااد لاتسوينها سالفة كل مرة بتنزلين تحت نقعد انجرجر فيج."
شوق:"هههه اوكي خلاص الحين بنزل."
سمر وهي طالعة:" يالله بسرعه انا بتقدمكم." وطلعت وصكت وراها الباب.
شوق:" بدووور طالعي شكلي اوكي؟"
بدور:" واااااااالله قمممممر واتيننييييييين بلد."
شوق:"ههههههههههههه لاتكفين مابي احد اين بسبتي كفاية انتي."
بدور:"شقصدج؟"
شوق:" سلاااااااااااامتج يالله ننزل لاأغير رايي."
بدور:"لالالالالا يالله توكلنا على الله."

ونزلوا ثنتينهم وكان الكل تحت يبي يشوووف هالبنت اللي كانت محووور حديثهم. كانت أول وحدة تشوفها سحر اللي ماتوقعت انها تكون بهالجماااااااال هذا وهالحلاااوة.
شوق:" السلام عليكم."
ردوا عليها السلااام كلهم وكانوا يطالعونها وكأنهم يتفحصونها..!! >> كائن غريب..!!
سحر:" سمر ماقلتي لي انها حلووة جذي."
سمر:" وهذا اللي يهمج ؟!"
سحر:"لاااا.."
قعدت يم بدور سمر ومريوم اللي كانت اطالع شوق وتفكر بحياتها اللي عاشتها وقاست فيها.
سمروهي تعرفها على بنات عمها وخالتها:" هذي سحر بنت خالتي وهذي أختها العنود،، وهذي مريوم بنت عمي وهذي اختها نوف، وهذي خالتي أم فيصل وهذي مرة عمي أم حمد، وخلصنا."
شوق:"الله يخليكم لبعض ان شاءالله."
سمر:" ويخليج."
كانوا يسولفون وهي قاعدة تسمعهم وبس كانت مستحيييية وااااااااايد منهم ومب عارفة تتأقلم معاهم..وظلت سحر اطالعها ومقهورة منها ليش؟ لآنها حلووووة وأحلى منها..!!
سحر كان سم ضروها انها تشوف حد أحلى منها، كانت ماتبي تشوف حد غيرها يمدحونه لجماله لأنها أنانية!
مريوم:" شوق انتي خلصتي دراسة الثانوية؟"
شوق:" ايه خلصت."
مريوم:" وش تفكرين تدرسين بالجامعه والاالكلية؟"
شوق:"لا بالجامعه، ودري أكون مدرسة."
سمر:" ماشاءالله مدرسة شنو؟"
شوق:" أحب العربي وايد."
مريوم:" ان شاءالله تحققين رغبتج."
سحر واللي كانت تبي تعرف نسبتها هذي:" وانتي جم نسبتج يعني؟"
شوق واللي استغربت من اسلوبها:" 97.88 "
مريوم:" مااااشاااءالله."
سحر سكتت ولاتكلمت ماتوقعت ان تكون نسبتها أعلى منها أيام الثانوية. خلود كانت اطالع سحر المقهورة ومستانسة من براءة شوق بالرد."
خلود:"شوق انتي شاااطرة بالتدريس؟"
شوق:" يعني، كنت أدرس أخوي الصغير."
مريوم:" اخوج؟"
شوق:" أقصد أخوي من مرة ابوي، انا عندي خوات ثنتين واخو واحد."
مريم:" الله يخليهم."
شوق:" وياج يارب."
شوق حبت مريم لأنها كانت طيبة وأسلوبها وااايد حلووو بالكلام ، أما سحر اللي كانت رافعة راسها وتكلمها من طرف خشمها فمامالت لها بالمرة وحست انهم ماراح يكونون أصحاب بيوم. وبعد ربع ساعة نادتهم الخدامة يقومون يتغذون لأنه جهز. وراحوا يتغذون والريايل حطوا لهم الغذاء بره بالحديقة لأن الجووو كان واااااايد حلووو وحبوا يغيرون جوو عن داخل البيت.
وبعد ماتغذوا..قعدوا البنات بالصالة اللي فوق علشان ياخذون راحتهم عن سوالف الحريم..
كانت سحر اطالع شوق بإحتقار لهيئتها وملابسها:" والله تلووع الجبد."
سمر:" سحر شفيج ساكته؟"
سحر:"لامافيني شي كاني اسمعكم."
سمر:"اقوول بدور وين السنة بتسافرون؟"
بدور:" ووووي ماقلت لج السنة بنصيف بالبيت."
مريوم:"هههههههه ليش؟"
بدور:" كل من حضرت الأفندي المحترم مازن."
سمر:" سكتي لايسمعج هذا أذاينه مثل الفار، يسمع من بعيد."
شوق:"هههههههههههههه."
بدور:" اي والله خرب علي اجازتي السنة، بس تدرون توقعتها بتكون مملة وكأيبة، لكن وجود شوق بيخليها أحلى وأسعد إجازة."
سحر بقلبها:" طلّ أحلى إجازة، مدري وش عاجبج فيها يابدور!!"
مريوم:"انا الحمدلله إجازتي مب طويلة يعني سفر ماكو، الا اذا نوف حبت تسافر وياأمي وابوي."
نوف:" لاااا سفر من غيرج مايسوى ماحب بروحي."
مريوم:"يالله ماعليه قعدي معاي احسن."
سمر:"هههههههههههههه اي والله أحسن."
بدور:" تدرون من ناقصنا بهالقعدة الحلووة؟"
خلود:" منووو؟"
بدور:" خالتي نجوووود وخالي محمد." بدور كانت متعمدة انها اتييب طاري محمد جدام سحر اللي تنرفزت من سمعت إسم محمد.
خلود:" صااااادقة بهذي والله وحشونا، مدري متى بردون هذلين طوولووو وااايد."
مريوم:"العلاااااج ياخذ له وقت وحمد البارحة يقوم انه محمد وايد يتعب من العلاج لأنه يستهلك كل طاقته."
سحر رغم كل شي سوته من خيانتها لمحمد، ونسيانها أو تناسيها له الا انها تغااار عليه ولاتحب حد يتكلم عنه وخصوصااااا مريووم.
سمر:"ان شااااءالله يردون بالسلامة."
شوق واللي كانت مستحية تسأل:" ليش هم وش فيهم مسافرين؟"
سمر:"الله يسلمج هذا أخوي محمد كان مسوي حادث من السرعه، وصارت حالته خطيرة لكن الله كتبه له عمر يديد بس كانت عنده إعاقة بريايله الثنتين وراح لندن يتعالج، وصار له شهر وشوي هناك هو وولد عمي حمد وأختي نجود وولد خالتي فيصل ريلها."
شوق بحزن:" مايشووووف شر ان شاءالله، ويرده لكم سالم."
بدور:"خخخخ سالم ابوووي."
سمر:"هههههههههههههه ياخفة دمج."
سحر:"سمر هو ماقالج متى برد؟"
سمر:"لاااا مدري متى بردون."
خلود:" شوق شرايج اتين معانا المول اليوم؟"
شوق:" خييير؟"
بدور:" شفيج تدودهتي؟ قالت لج اتييييييين معانا المووول؟"
شوق:"لاااا ماله داعي."
سحر:" شوق انتي من وين تشترين هدموج؟" كانت سحر متعمدة تسألها هالسؤال وتحرجها جدام البنات. شوق نزلت راسها لأنها ماتوقعت هالسؤال أبداً وحست بسخرية سحرلها.
بدور طالعتها بنظرات قهر وغضب، ولاعرفت ترد عليها جدام شوق..
سمر:" سحــــر..؟!"
مريوم واللي حبت تغير الموضوع:" شرايج نطلع الحديقة بره؟"
خلود:" شوووق ياهووووو."
شوق واللي حاولت تمسك الدمعه اللي تجمعت بعينها:" ماااعليه."
ونزلوا معاها تحت بعد ماكل وحدة لبست شيلتها، لأن أكيد الشباب قاعدين بره. وظلت سمر وسحر قاعدين فوق..
سمر:" وش اللي سويتيه للبنت؟"
سحر ولاكأنها مسوية شي:" وش سويت؟"
سمر:" يعني سؤالج المحرج هذا ماتعتبرينه شي؟"
سحر:" سؤال عادي شفيها؟ سمر حبيبتي احسج وايد متحيزة لها وادافعين عنها."
سمر:"السالفة مب سالفة تحيز والا دفاع انتي تعرفين ظروفها ماله داعي تحرجينها عن اذنج."
وقامت عنها وماعطتها اي فرصه إنها ترد عليها، وهذا اللي زود قهرها فوق ماهي مقهورة.

^^^^^^^^^^^^^^^^^^^^^^^^
كانوا الشباب قاعدين يسولفون عن المباريات ومسابقات الفورملا وغير.. وكان هذا شاغلهم الوحيد بهالقعدة هذي.. والبنات كانوا يتمشون بالجانب الثاني من الحديقة.
بدور:" لاتزعلين من سحر، هذي طبعها جذي مغرورة وشايفة نفسها."
شوق وبإبتسامتها المرحة:" لااااعادي، تعودت على كل شي."
العنود:"اقوول شوق ماعليه مسحيها فيني أختي وأعرف طبايعها."
شوق:" حبيبتي تسلمين لكن ماعليه، مازعلت خلااااص نسيت اللي صار."
خلود:"سمحي لي عنودوو بس ماتحمل اختج."
العنود:" وانا يعني اللي اتحملها، تدرين انا مااقول الا الله يعين اخوج عليها."
خلود:"افففففففف لااتذكريني."
مريوم واللي انتبهت لعلامات الاستفهام اللي انرسمت على ويهها:" ادري اكيد مب فاهمه شي من اللي يقولونه، الله يسلمج سحر ومحمد يحبون بعض من زمااان وهم محيرين لبعض وبيخطبها."
شوق:"اهااا الله يسعدهم ان شاءالله."
بدور:"ماااااااااااعتقد ."
شوق:"ليش يعني قولي ان شاءالله."
خلود:" انا اقول خطوبتهم ماراح ادوم اكثر من اسبوع."
نوف اخت مريوم:" ليش يعني مب اكثر من اسبوع؟"
خلود:" لأنه مستحيل بيتحملها بيشقق هدووومة."
العنود:"هههههههههههه والله تدرين صج هي اختي بس بصراحة ماتناسب محمد."
مريوم:"اقووول انتوا وش لكم بهالسوالف يناسبها ومايناسبها اللي الله كاتبه لهم بصير."
شوق:" صح كلامها، انتوا ليش معترضين مدامهم يحبون بعض اكيد متفاهمين والمفروض تدعون لهم بالسعادة والتوفيق."
بدور:"ياااااعيني ع الحكم."
شوق:"هههههههههه اي حكم الله يهديج هذا الصج."

وبالطرف الثاني من الحديقة كانت سوالفهم ماتخلص الرياييل عن الشركة والمعاملات ومناقصات والشباب بسوالفهم. وبين ماهم يسولفون تفاجأوا في البوابة اللي انفتحت وطلع ودخلت سيارة نزل منها حمد ونجود وفيصل، ونزل بالطرف الثاني من السيارة محمد اللي كان واقف على ريايله بعكازين يساعدونه ع الوقفه. كانت مفاجأة لهم، لأن حمد ماخبرهم إنهم بيون بهاليوم ولافيصل.

مفاجأة سعيدة بالنسبة للعائلة كلها، الا لشخص واحد وهو سحر اللي مدري شنو راح تكون ردة فعلها لما تشوف محمد؟؟؟ وشوق وسحر شلون راح تكون علاقتهم مع بعض؟؟ وليش سحر تتصرف بهالطريقة المتعجرفة هذي؟ وفهد لوين راح يوصل وياها؟؟ وأحمد متى راح يقول لمريوم عن حبه لها؟ومازالت الاحدااااث في تطووور مستمر....