غريبة بين اهلي

[حورالعين666]

وصل أبوفيصل البيت وأعصابه تلفاانه.. أول ماقعد على الكرسي نزلت العنود من فوق ، لاحظت التغير على ملامح أبوها وقعدت يمه..
العنود:" الله يعطيك العافية يبه."
ابوفيصل:" ويعافيج يابنيتي."
العنود:" أممممم يبه شفيك؟"
طالعها وعلامات الحيرة على ويه ، موعارف وش يقول لها، لكن كان لازم يقول لأنه بينفجر..
ابوفيصل:" عنود وين أمج؟"
العنود:"مدري كانت هني بس شكلها طلعت يمكن راحت بيت الجيران."
ابوفيصل بضيق:" هذي ماتقعد في بيتها أبداااً." سكت شوي وظل يفكر ويفكر ويفكر ، بعدها رفع راسه وطالع العنود:" عنود زوجة أخوج..."
العنود وموفاهمه شي:" اي وحدة؟"
ابوفيصل:" نجود............ بالمستشفى."
بخوف سألته:" شفيهاااا بالمستشفى؟"
ابوفيصل:" اتصل فيني بومحمد وقال لي انها طاحت عليهم بالبيت ونقلوها المستشفى ، صادتها جلطة بالقلب."
بس سمعت الخبر قعدت تصيح ، كانت تحب زوجة أخوها وايد وتتمنى أن اللي صار ماصار ولهم..! بهاللحظة دخلت امها شافتها تصيح وخافت:" شفييييج تصيحين؟ فيج شي؟ بوفيصل شفيها عنود؟"
ابوفيصل وهو يخزها من فوقها لتحتها:" موهي اللي فيها.."
اطالعه وموفاهمه شيقصد:" شتخربط ، عيل ليش تصيح؟"
طالعتها العنود والقهر مالي قلبها:" نجـود يايمه ، نجــود بتموت يمه."
حست ان راسها افتر يوم سمعت كلام بنتها (( تمـوت؟! شلووون...؟! )) طالعت بوفيصل وسألته:" شقاعدة تخربط بنتك؟ شفيها بنت اختي؟"
ابوفيصل:" الحين صارت بنت اختج؟ البنت بتضيع من يد أهلها والسبب انتي ، نجود في العناية المركزة بالمستشفى جاتها جلطة بالقلب وزين لحقوها.."
نزلت راسها يوم عرفت ، لكن أعمى القلب بيظل أعمى..!! طالعته وقالت:" أكيد هي أهملت نفسها ، وبعدين ولدي ماهو أول ولاآخر واحد يتزوج مرة ثانية..!!!"
ابوفيصل:" انتي ماتحسين؟ ماتفهمين؟ البنت بتموت وانتي بعدج ادافعين عن تصرفاتج وعن ولدج؟ الإحساس شكلة معدوم عندج وقلبج ميت."
ام فيصل بقهر:" انت لاتدخل بيني وبين بيت اختي وولدي."
كلما قالت له لاتتدخل زاد القهر وزادت الحرة بقلبه ، وبعصبيه:" انتي اللي حطيني على بالج ، لاتتوقعين اني سكت عنج ذيج المرة بسكت عنج الحين ، انا ماسكت عنج الاحشيمة لنجود يوم كانت واقفه ، والا انتي الحشيمة مولج ، صبرت عليج سنين وانتي اتحكمين وتصارخين علي كأني أصغر عيالج والاعدوو ماكأني أبوعيالج ولي حق عليج ، لاإحترام ولاغيره عندج ، حتى بناتج احسهم بدوا يحسون اني عديم شخصيه قدامج..!! دايم تحبين تنزلين كلمتي الأرض ، لاااا يبه الأول راح وتحول ، كلمتي من اليوم وطالع هي اللي بتمشي ، وياويلج اذا عارضتيني مرة ثانية..."

سكت وطلع لغرفته فوق يرتاح ، كل اللي بقلبه قاله ، حس نفسه مرتاااح بعد ماطلع اللي بداخلة ، صج انه كان صابر عليها طول لسنين اللي راحت.. كانت أم فيصل قاعدة مكانها ومصدومة من اللي سمعته منه ، ماتوقعته يثور بهالطريقة ، كانت العنود قاعدة يمها وخايفة اطلع حرتها فيها فأنسحبت بكل هدوء وراحت فوق تتصل لبيت خالتها تطمن عليهم.

[جررريح الررروح]

السلام عليكم ورحمة الله وبركاته
امس رديت عليك خيو بس الظاهر كان في مشكلة في المنتدى
نتظر الحلقة
تحياتي

[حورالعين666]

كانت قاعدة على الكنبة مقابل دريشة حجرتها اطالع السماء ، وسرحااااااااانة..!! لكنه كان سرَحان مؤلم موجع قاسي ، وسحر كانت قاعدة يمها وساكته ، تحاول تكلمها وتقنعها بالعلاج لكنها موقادرة..!!
سحر:" ميثة ارجووج ردي عليّ صار لي ساعه قاعدة وانتي ساكته واطالعيني مرة وبره عشر..!!"
طالعتها والدموع غسلت وجهها وجرحت جفونها:" مشكورة تقدرين تروحين بيتكم تريحين عمرج."
سحر بقهر:" انا مابي ارتاح شفيج انتي، اليوم رحت المارينا كان فهد يبيني وسألني عنج."
ميثة بحنق:" وش يبي؟ موكفاية اللي صار من صديقه؟ يلاحقني هو بعد ليش؟ خلووووني بروحي خلوني أموت خلوووني."
سحر كان قلبها يتقطع وهي اطالع صديقتها بهالحالة:" ارجوج ياميثة سمعيني لازم تروحين اتعالجين يمكن المرض في بدايتها ويقدرون يساعدونج ، واذا لا سافري بره صدقيني بتردين احسن من أول."
ميثة بسخرية:" احسن من أول؟ اذا قدرتي انتي تردين مثل قبل أنا برد..!! خلاص تدمرت ودمرتج وياي."
سحر:" لااااياميثة لاتقولين جذي ، احنا لازم نسوي شي لازم تفهمين."
ميثة:" وش تقدرين تسوين؟ اذا فهد يهددج بأشرطة ممكن تذبحج وتذبح أهلج وياج؟ تخليهم يعيشون في ذل.."
سكتت وماعرفت وش تقول ، طالعتها وقالت:" لاااا ، أكيد بشووف حل ، بس انتي لازم تروحين المستشفى مايصير اتمين جذي صدقيني اذا المرض في بدايته بيقدرون يتلحقون عليج ، طاوعيني."
ميثة:" انتي ليش قاعدة؟ ماتخافين مني؟"
سحر بإستغراب:" اخاف؟ وليش اخاف؟ لاااا...انتي صديقتي ومابتخلى عنج ، صج أذيتيني ودمرتي حياتي بتصرفج ، لكن اللي صار صار لابقدر اعاتب ولااسوي شي بس على الأقل نتلحق على الأمل الباقي ، هذا اذا باقي أمل..!!"
طالعتها بإستغراب وإنكسار:" للحين متمسكة فيني ومصرّة تساعديني؟ وانا اللي حطمت حياتج وصرت الشيطان اللي يشوشج ودمرج؟ تحاتيني وانتي اللي عمرج ماحاتيتي احد غير نفسج؟ آآآآآآه ياسحر آآآآآآه والله تذبحيني بتصرفج ، تغيرتي ياسحر ماكنتي جذي أبدااا..!!
إبتسمت لها سحر وقالت:" قلت لج انتي صديقتي ياميثه وراح نلقى حل لمشاكلنا وان شاءالله مابتخلى عنج ويالله خلينا نروح المستشفى نشوف يمكن نلقى حل لمرضج."
حضنتها وحست بإرتياح لوقفة سحر يمها، كانت تتمنى لوالزمن يرجع لورى وتبدأ من جديد..!!

^^^^^^^^^^^^^^^^^^^^^^^^^

أم محمد كانت قاعدة على سريرها وعيالها متجمعين حولها وأبومحمد، كان الصمت صديق كل واحد فيهم ، وكلهم يفكرون بشخص واحد وهو نجود..
ام محمد:" ابومحمد أبي اروح ازور بنيتي."
بومحمد:" بتروحين ان شاءالله بس انتي ارتاحي.."
ام محمد:" لا ابي اروح اشوفها ، مااقدر اصبر اكثر من جذي مااقدر اخليها.."
أحمد:" زين يمه انتي ارتاحي الحين وبعدين يصير خير ، مانقدرنشوفج تعبانة."
ام محمد:" انا برتاح اذا وديتوني والا آخذ تاكسي وأروح."
محمد:" لايمه شو تاكسي واحنا وين رحنا؟ نوديج بس نصلي العصر اول."
سمر:" لاتنسون تودونا موتروحون بروحكم."
احمد:" لاتخافون على اعماركم كلنا بنروح ان شاءالله."
شوق:" محمد ممكن اكلمك شوي."
محمد:" اوكي." وطلعوا بره وراح يقعد وياها بالصالة تحت..

محمد بعد ماقعدو:" خير آمري."
شوق:" مايآمر عليك ظالم.. مدري شقول بس بإختصار ابي اروح اشوف اختي ضروري."
محمد وحاس بالحزن اللي فيها:" شوق شفيج؟"
شوق:" مافيني شي.. ليش؟"
محمد:" تخشين علي؟ ترى صوتج وعيونج يفضحونج أرجوج قولي لي ويمكن اساعدج؟"
شوق:" اختي هديل ماادري شفيها اتصلت لي يوم انت بالمستشفى وكانت تصيح وتقول لي انها مخنوقة وموقادرة تعيش في بيت هدى..!! حسيت من صوتها انها تعبانة وايد ، وعندها مشكلة وموقادرة تقولها."
محمد:" يمكن متضايقة والا زهقانه؟"
شوق:" لاااا اعرفها، هي قالت بموت بهالبيت ، معقولة تقول جذي بس لأنها زهقانه! لالا هي طول عمرها تعرف طباع اختي وخالتي وش معنى جات على الحين؟ اكيد فيها شي."
محمد:" انزين واذا رحتي تتوقعينها تقولج شفيها؟ وشلون بتدخلين بيت انسان مثل بوعمر ، انا بصراحة اخاف عليج."
شوق:" وشلون عيل اشوفها؟ والله احس قلبي بيطلع اذا ماشفتها وعرفت شفيها."
محمد:"لالاا مولهذي الدرجة شوق تصبري شوي ، انزين تروحين بس اذا هو موهناك وخالتج بعد يكون افضل انتي اخذي موعد منها وشوفي."
شوق:" لحظة اتصل فيها."
ودقت على البيت بس محد يرد، طالعت محمد وهي تهز راسها بالنفي :" محد رد عليّ.. مدري وين راحوا ، اكيد هي بالبيت الحين."
يسألها:" تبين تروحين الحين؟"
شوق بحياء:" اذا سمحت؟"
محمد:" ومابتروحين لنجود؟"
شوق:" بلى بروح بس لازم اروح لأختي."
محمد:" انا اقولج قومي نصلي وبعدين نروح لنجود ورجعتنا نمر على هديل زين جذي؟"
شوق:" تسلم لي والله ، الحين اروح اصلي ونمشي."
محمد:" يالله توكلنا على الله."

^^^^^^^^^^^^^^^^^^^^^^^^^

[حورالعين666]

أحمد كان ناسي تلفونه مغلق ويوم فتحه لقى 5 مسجات من مريم...
أحمد وهو يضرب جبهته:" اووووه نسيتهااااااا..!! خلني اتصل فيها ، هذي عاد شقول لها الحين اخاف تقعد تصارخ وتصيح..!!!"
ودق عليها وردت عليه مثل الملهوووفة:" احمد وينننك فيه ماترد عليّ خوفتني خير وش صاير، ليش كانوا يدقون الباب عليك جذي؟"
أحمد:" وووول كل هذلين اسأله اجاوب عليهم؟ حددي اي سؤال اجاوب عليه بالضبط؟"
مريم ومتوترة وتبي تعرف وش صاير:" اووووه يااحمد والله مووقته انا على اعصاابي يالله قوول."
أحمد:" والله يامريم مدري شقول بس ، أمري لله بصراحة أختي نجود مريضة."
مريم:" اوووووووووووووووه شفيهااا؟"
أحمد:" نقلناها المستشفى وقالوا انها جلطة بالقلب."
حست بصدمة يوم سمعت ودمعت عيونها بسرعه:" لاحول الله ماتستاهل ، زين احمد ابيك تمر علي البيت تاخذني المستشفى زين؟"
احمد:" من عيوني ، خبري خالتي بمر عليكم وباخذكم مرة وحدة وقولي لأخوانج زين."
مريم:" ان شاءالله ، يالله حبيبي مع السلامة."
احمد:" اوكي حياتي مع السلامة."
سكر التلفون وراح ياخذ شاور سريع علشان يمر عليها..

^^^^^^^^^^^^^^^^^^^^^^^^^

دخل دكان رفيجة وهو مشغووول البال ويفكر..
بوسعد:" هلا والله عاش من شافك.."
رد عليه من غير حتى مايطالعه:" عاشت ايامك.."
بوسعد بإستغراب:" شفيك؟؟ بالك مشغول بشنوو؟"
بتنهيدة كبيرة وعميقة رد عليه:" اييييــه يابوسعد لوتدري شنواللي شاغل بالي."
بفضول أكبر:" وش اللي شاغل بالك؟ خله يشغل بالنا احنا بعد؟"
رفع راسه وطالعه بعيون تلمع:" اممممم افكر بمُهرة حلوووة وصغيرة ، موقادر احصل عليها مع انها عندي."
بوسعد وموفاهم شي:" مُـهرة وحلوة؟ وموقادر تحصل عليها شتخربط انت شفيك ؟ تحجى عدل يابوعمر ترى مالي خلق الغاز."
بوعمر:" لالغز ولاشي ، بالعربي الفصيح فيه بنت أبيها وموقادر عليها، تقدر تساعدني؟"
بوسعد وهو يضحك:" واناااا اقوول وش اللي قالب كيانك جذي فوق تحت ، أثاريها بنت وانا مدري وان شاءالله من تعيسة الحظ؟"
بوعمر:" على قولتك تعيسة الحظ اخت زوجتي."
بوسعد:" خبري زوجتك ماعندها الا ثلاثة اخوان؟"
بوعمر:" بلا غباااء زايد زوجتي الثانية."
بوسعد:" ايييييييييييييييييه الحين فهمت، بس انت شلون تبيها وانت ماخذ اختها؟"
بوعمر:" مو اقولك موعارف ولاقادر اسوي شي ، البنت حلووة وجميلة وعليها جسم شقووولك غزاااال يابوسعد ، والا عيونها آآآخ تذبح تذبح ."
قاطعه بوسعد وقاام من مكانه وقعد قباله:" اش اش اش ، اشووفك طايح لي بحب وغراميات... كل هذا فيها عيل وش خليت لملكات الجمال..؟"
بوعمر:" ايه مقيوووله شعرف لحمار بـــ...."
وقاطعه:" بس بس لاتكمل ، جزاة الخير سواد الويه."
بوعمر:" روووح زين اللي يشوفك تعرف تزعل عاد ، خلنا من خرابيطك وزعلك وقول لي وش اسوي شلون اوصل لها."
بوسعد:" زين بسامحك هالمرة ، بس خلني افكر واقولك شتسوي."
بوعمر وهو بموووت علشان يوصل لهديل:" الله يخليك بس دلني على طريقة وفالك طيب."
بوسعد:" هههه شكلك متأثر بالليوان خخخخخ."
بوعمر:" اقوول شكلك انت اللي يبي لك طق."
بوسعد:" بل ماينمزح وياك ابد ، قوم قوم خلنا نطلع شوووي."
بوعمر بملل:" يالله مشيناااا."

^^^^^^^^^^^^^^^^^^^^^^^^^

[حورالعين666]

كانوا اثنينهم قاعدين يلعبون بلوت (( بتّه )) ، وضحك وغشمرة وموسيقى ، دق جرس باب الشقة وقام سعود يفتح الباب..تفاجأ يوم شاف عبدالعزيز واقف ورى الباب ، طالع فهد وعلامات التعجب مرسومة على وجهه..
فهد:" شفيك واقف جذي شايف جني؟"
سعود:" لااا ، بس......"
فهد:" اففففف افتح الباب صدعني الجرس."
سعود فتح الباب وتفاجأ اهو الثاني يوم شاف عبدالعزيز، كان متكشخ وجاي لهم...!!!!!!!!!!
فهد بإستغراب:" عبدالعزيز؟؟؟؟"
عبدالعزيز:" شفيكم مستغربين اي عبدالعزيز ، محد غيري..! يعني بتم واقف على الباب؟"
سعود وهو يأشر له علشان يدخل:" تفضل."
قام فهد وبند الستريو والتلفزيون وقعدوا على الكنب..
عبدالعزيز كان حاس انهم مستغربين ومتفاجأين:" انا جاي أعتذر لكم ، أدري الصدمة خلتني افقد عقلي ، وأسوي اللي شفتوه.. بس بصراحة انا قلت لنفسي أيامي اللي بقت مو قد اللي راح فليش أقطع علاقتي فيكم ، وانتوا اللي عشت وياكم كل عمري. أنا آسف ماكان قصدي اقول اللي قلته و..."
قاطعه فهد:" بس ياعبدالعزيز مايحتاج تعتذر ، احنا فاهمين اللي تمر فيه ، صح ياسعود؟"
سعود:" اكيد ، ترى احنا اخوان قبل لانكون ربع."
عبدالعزيز:" اذا جذي انا الحين عازمنكم على العشاء ، يالله مابيكم تردوني."
فهد:" يالله مشينا."
كانت تمثيلية عبدالعزيز ناجحة 100% ، كانت هذي بداية انتقامه منهم ....!!!!!


^^^^^^^^^^^^^^^^^^^^^^^^^

طلعوا كلهم من البيت لكن كل واحد فيهم بسيارته ، أم محمد وبومحمد وسمر وخلود بسيارة ، ومحمد وشوق بسيارتهم ، وأحمد طلع قبلهم راح يمر على مريم ، أما سيف فكان طالع من الظهر رايح لنورة ، كان محمد آخر واحد وأول ماركبوا السيارة شافوا شيخة وعيالها جايين البيت ، محمد أول ماشافها تغير لونه تذكر انه محد قال لها عن اختهم ... طالع شوق ومبينه عليه الحيرة...
شوق:" لاتقووول ماقلتوا لها؟"
هز راسه بالنفي ، شوق نزلت من السيارة تسلم على شيخة..
شيخة:" هلا بيج وين شكلكم طالعين؟"
شوق:" ايه....!!......" وسكتت ماقالت شي
شيخة اطالع محمد بالسيارة وهي تأشر عليه:" هيييي يااخينا شفيك ماتسلم والا موعاجبينك؟"
محمد نزل جامة السيارة وقال:" هلا لا موقصدي ...."
شيخة لاحظت التوتر عليهم ثنينهم:" وشفيكم اطالعون بعض فيكم شي؟ صاير شي؟"
محمد:" هو ماصاير شي بس.."
شيخة:" بس شنووو، شوق صاير شي وانا مدري عنه؟"
شوق:" شيخة ممكن انكلمج بدون انفعال؟"
شيخة:" شفيكم تخوفون الواحد.."
وقبل لايتكلمون نزلت بدور من السيارة وجت سلمت عليهم وظل مازن بالسيارة ينتظرهم..
شيخة:" شفيكم يالله طيحتوا قلبي."
بدور:" يمه شصاير؟"
شيخة:"وانا شدراني وهم راضين يتكلمون..؟"
شوق:" أممممم والله مدري شلون اقولج بس....... اممم نجود مريضة بالمستشفى.."
شيخة اول ماسمعت ضربت بيدها على صدرها وشهقت:" شنووووووو .... شفيها اختي ؟ وليش مرقدة بالمستشفى؟"
بدور:" خااالي صج اللي تقولونه والا تخوفونه."
محمد:" لا نلعب وياكم ، احد يالخبلة يمزح بهالأمور؟"
شيخة والدموع بعينها:" انزين شفيها ماقلتوا لي؟"
محمد:" والله ياشيخة مرضتها ماهي على الحسبان ، جلطة بالقلب."
شيخة ونزلت دموعها على خدها:" ياحبيبتي يانجووود يعل عدوينج ان شاءالله ، انزين وين بتروحون الحين؟"
محمد:" بيتنا كلهم راحوا لها احنا الحين بنروح مشاور ورايحين بعدها المستشفى."
بدور:" يمة يالله خلينا نروح لها."
شيخة:" وليش ماقلتوا لي وخليتوني آخر من يعلم؟ ماني أختكم؟."
محمد:" والله موقصدنا بس انشغلنا وياها والمستشفى وامي تعبت علينا يعني خبرج ماصار وقت نتصل ."
شيخة:" والله لو مو عارفة الربكة اللي صارت كنت عاتبتكم اكثر واكثر."
شوق:" يالله شيخة ماعليه ، انتي عارفة الصدمة تربك الواحد."
شيخة:" اييييييييه صادقة ..أنزين انا بخليكم وبروح لها."
وقبل لايمشون سألتهم:" هي بأي قسم موجودة؟"
محمد:" اقوول شيخة الخبر مأثر عليج اشوف يعني بتكون بقسم الولادة؟ اكيد بقسم أمراض القلب."
شيخة:" تدرون احس ان مخي طاااار من يوم قلتوا لي . يالله اخليكم مع السلامة."
وركبوا السيارة وراحوا بسرعه المستشفى... أما شوق فركبت السيارة ويامحمد..
شوق:" مسكينة شيخة آخر من يعلم ."
محمد:" اقووول موتوج تقولين لها الواحد يرتبك من الصدمة..!!!!"
شوق:" ايه ادري ، بس مدري كان المفروض واحد فينا يتصل لها ويخبرها لأنها كبيرتكم."
محمد:" الجايات أكثر من الرايحات."
طالعته بإستغراب:" وش تقوووول محمد؟"
ضحك وقال:" والله موقصدي شي ،، بس انا اقول يعني ان شاءالله بالافراح ماتكون آخر من يعلم...!!!"
شوق وهي تضحك عليه:" اقوول خلنا نمشي لاتخورها بالحجي ."
محمد:" يالله توكلنا.."

^^^^^^^^^^^^^^^^^^^^^^^^^

[حورالعين666]

دخل البيت ونفسيته كلش تعبانة ، ماكان يتوقع ان يلتقي بعيال عمه ولايصير اللي صار؟ ولا وأول يوم يطلع فيه مع نجلاء يصيده هالموقف ولا توصل للشرطة بعد..!! وش هالحظ... دخلت نجلاء وحاملة بيدها لصقات جروح وكمادات ثلج علشان تحطم على وجه فيصل اللي تشلخ من طق أحمد..!!
نجلاء:" فيصل طالعني خلني انظف جروحك."
فيصل:" خليهم يولون.."
نجلاء تضايقت من اسلوبه وياها وزعلت... طالعها فيصل ولاحظ نظرات الحزن بعيونها وتضايق هو الثاني لأنه قام يعصب عليها حتى من غير مايكون لها دخل باللي هو فيه.
فيصل:" نجلاء حبيبتي آسف موقصدي اضايقج بس تعرفين اللي مريت فيه موشوي."
نجلاء طالعته ومازالت لمحة الضيق والحزن بعيونها:" ولايهمك ماني زعلانة."
فيصل:" اشووووف...موباين انج موزعلانة ، ترى عيونج فاضحتج حبيبتي ارجوج لاتزعلين مني."
نجلاء ابتسمت وقالت:" ان شاءالله علشانك راح انسى ومابزعل ، بس خلني انظف جروحك لايتم اثرهم بعدين."
فيصل:" ان شاءالله حيااتي."
بعد ماضمدت جروحة قعديت يمه وهي تفكر باللي قاعد يصير لها..!!
فيصل انتبه لها وحط يده حول جتفها وقال:" نجلاء حبيبتي ، أتمنى تسامحيني لأني خليتج بموقف محرج ، وكنتي في غنى عنه..!!"
نجلاء إبتسمت وطالعته:" فيصل أنا ماأبيك تعتذر لي لأن الشي صار وانتهى ، بس أبي منك شي واحد ، مممممم تنسى المااااضي كله أو تتناساه ع الأقل لأني مااقدر أبني حياتي معاك وانت بهالحال. لازم تبدأ وياي من جديد هذا اذا تبي تواصل حياتك معاي."
فيصل حس نفسه صغيــر قدامها ليــش؟ مايدري..!! يمكن لأنه ماكان يتوقعها تقول له هالكلام..!!
نزل راسه وظل يفكر، كـان يتمنى لو الزمن يرجع أشهر ويبدأ من جديد بس مو ويانجلاء..!!
قطع حبل أفكاره سؤالها:" شفيك ساكت؟ أنت متردد؟"
بإستغراب:" متردد بشنو؟"
نجلاء:" تقول لي انك ماتبيني؟"
فيصل بإستغراب أكبر:" لييييش تقولين جذي؟"
نجلاء:" لأن واضح عليك هالشي وعيونك فاضحتك."
فيصل إبتسم وحاول يبعد هالشك اليقين من راسها وراسه بنفس الوقت:" لااا ، انا أوعدج إن احنا نبدأ من جديد ، بس ماراح أوعدج إني أتخطى الماضي بسرعة البرق ، أتمنى تصبرين علي شوي."
إبتسمت وقالت:" شووي موو وايد."
وقعدوا يضحكون ، كان نجلاء رغم كلام فيصل خايفة من اللي جاي ، بس ماكانت تبي تحبط روحها وتنهي اللي بدأته ، حلمها كان تاخذ فيصل من يوم كانت بالمدرسة...!!!!!!

^^^^^^^^^^^^^^^^^^^^^^^^^
(( حياة العز وراحة البال كلها ولّت .. مو بس العز بالمال والغنى .. العزّ اللي راح ياسحر عزّ الشرف ، السمعة ، عزّ الكرامة والفرحة .. كل شئ راااح وترك جرح كبــير كبير عمره ماراح ينجبر..!! ))
كانت هذي آخر مرة تسمع سحر صوت ميثة المخنوق بالألم والدموع،انتبهت لصوت تلفونها اللي كان يرن من 10 دقايق..!! طالعته وكتمت صوته ورمته على سريرها وطلعت بره..!!
كان المتصل فهد اللي لايعه جبدة ويبي شي يسليه..!!

فهد:" الحقيرة ماترد قايل لها تمرّ الليلة."
سعود:" شفيك كلّ محروق وأعصابك ع الآخر.."
فهد:" اسكت واللي يرحم والديك لاتعور راسي انت الثاني."
سعود:" افااااااا انا تسكتني.. لكن ماعليه اطوفها لك."
فهد:" اقوول وين عبدالعزيز مااتصل؟ "
سعود:" لاوالله مدري عنه اتصل فيه يمكن يمرنا هني."
فهد:" تدري بتصل فيه وبقول له نبي نطلع اوكي."
سعود:"اممم مدري انا مشغول الحين يمكن ألتقي بسمر بعدين."
فهد:" واللي يسلمك عاااد من زينها ، بروحها لوعت جبدي مااشوفك سويت شي للحين بس على هاللقاءات اللي ماتخلص."
سعود:" صبر علينا شوي قريب ان شاءالله لاتخاف البنت غرقانة...!!"
فهد:" زين عليك ابها بس هالله هالله فينا ، لاتنسانا من النصيب."
سعود:" امممممم افكر يمكن استفرد بالفريسة بروحي ههههع عن اذنك يابطل."
فهد:" أذنك معاك يالحبيب ."
وطلع عنه وخاله بروحه يفكر بسحر وبعبدالعزيز وبحياته اللي منعفسة فوق تحت....!!
(( اووووه نسيت اتصل للخبل هذا خلني ادق عليه واشوفه...))
عبدالعزيز كان قاعد ويا واحد من ربعه ويتفقون على خطة الإنتقام اللي مخطط لها من أول لحظة وعى فيها لنفسة..!!
جاسم:" ردّ على تلفونك شكلها مكاملة ضرورية لأنه موراضي يسكت."
عبدالعزيز طالع التلفون وابتسم:" وانت الصادق الحيوان عند ذكرة..!!!"
جاسم:" قصدك فهد؟"
عبدالعزيز:" ايه وفيه غيره؟"
جاسم:" ردّ عليه زين."
عبدالعزيز:" لاصبر بعدين بخليه يحترق شوووي."
جاسم:"تصدق اكره هالإنسان من كل قلبي وجت الفرصة اللي انتقم فيها منه وأحطمة مثل ماحطمني بيوم من الايام."
عبدالعزيز:" تصدق مدري شلون كنت ماشي وياه واعيش وآكل ويااه أحسه مايستاهل ان يعيش ، مايستاهل كلمة إنسان..!!"
جاسم:" لاتخاف شعورك بالضيق والحسافة على الأيام اللي راحت راح تتغير قريب."
عبدالعزيز:" الله يسمع منك."

^^^^^^^^^^^^^^^^^^^^^^^^

[حورالعين666]

الكل كان متجمع بغرفة نجود ونظرات الحزن ماليه الجو..!!
بومحمد:" انا اقول ياجماعه نمشي أحسن لأن قعدتنا مافيها فايدة نجود الحين راقدة وان شاءالله المغرب كلنا نجتمع.. وتكون هي قعدت وصارت احسن ."
ام محمد:" لاااا ماني متحركة من هني الا اول اشوف بنيتي قعدت وكلمتني."
شيخة:" يمة والله يسلمج بروحج تعبانة ، واللي فيج مكفيج ، ان شاءالله المغرب مثل ماقال ابوي بنرد وتكون هي قعدت. وبتكلمينها وتطمنين عليها ."
ام محمد:" بس هذي بنيتي مااقدر اخليها."
مريم:" خالتي احنا مابنقصر وياها لاتحاتينها راح نكلم الممرضات يهتمون فيها وصديقاتي مداومات هني ان شاءالله بخبرهم عنها."
ابتسم احمد وقال:" وش تبين بعد يالغالية واللي يسلمج يمه لااتعبين عمرج يالله."
ابومحمد:" يالله ياام محمد توكلنا على الله."
وطلعوا كلهم الا شوق ومحمد كانوا قاعدين يمها ويفكرون بحال هالمسكينة اللي محد كان يتوقع يصير لها جذي. شوق كانت حزينة وتفكر بفيصل ومرته الجديدة اللي لهته عن نجود وعن حب قديم كان بيوم من الايام يربط هالاثنين..
محمد:" شفيج..؟"
شوق وبإبتسامة مليانة حزن:" مدري أحس بألم ، بضيق و...." وسكتت ماكملت كانت خايفة ومترددة تكمل كلامها.
بفضول سألها:" وشنوو؟ كملي ليش قطعتي كلامج."
طالعته والحيرة والحزن بيقتلونها:" مدري يامحمد مدري."
محمد:" لاااا تدرين .. انا احس بقلبج شي وخايفة تقولينه ، لاتخشين علي ياشوق ، لاتخليني أضيع بصمتج وحزنج...!!"
شوق:"خلها على الله."
كانت نظراته بتقتلها ، بتذبحها ، كان مثل الطير المكسورة جنحانه ، رفعت راسها وقالت:" محمد أوعدني أنك ماتزعل؟"
محمد بصوت كله حزم وعصبية:" قووولي."
شوق:" مدري ساعات وانا اطالع نجود وأشوف الحال اللي وصلت له ، والوضع اللي تأزم من دخلت بيتكم.. أحس اني السبب فيه..!!"
محمد طالعها بقهر وعتااااااب من غير مايقول ولاكلمة، حست بصمته مثل السهام بصدرها ، كانت تحس بكلمات العتاب من غير مايقووولها لها...!!
قام وقال لها:" خلينا نمشي ، علشان انمرّ على اختج هديل."
شوق:" ان شاءالله."
كانوا اثنينهم يمشون بممرات المستشفى الأكثر من هادئ بصمت ، محمد كان يطالعها من غير ماتحس فيه ويفكر بكلامها (( آآآخ ياااشوق ليش تحطميني فوق ماانا مقهور ومتحطم .. كلامج يزيد جروحي وهمومي.. ليش تفتحين أبواب ماضي قاعد أسكرها .. أدري انج تقصدين فيصل وسحر مو بس تقصدين نجود..!! لكن راح تثبت لج الايام ان كل اللي صار كان بإختيارهم مو بسببج.. ))
انتبه على نفسه قبل لايدعم الباب الزجاجي ويفشل عمره .. أما شوق فكانت تحاول تلهي نفسها بالتفكير بشي ثاني غير نجود..!!

^^^^^^^^^^^^^^^^^^^^^^^^

دخلت سمر غرفتها وراحت لتلفونها ، لأنها مااخذته وياها يوم راحوا لأختها واول ماشافتها كان فيه 12 مسكول و3 مسجات....!!
فتحت المسكولات وكان سعود هو اللي داق عليها ، حست بدقات قلبها تزيد ، وبسرعه قفلت باب حجرتها ورجعت فتحت المسجات.. (( حبيبتي وحشتيني موووت والله خاطري اشوفج ))
ابتسمت وزادت دقات قلبها وفتحت المسج الثاني والثالث (( وينج ياقلبي ماتردين ، تخليني احاتيج جذي؟؟ )) ،، (( شفيج والله طيحتي قلبي سمووره ردي عاااااد ))
قرأتهم أكثر من عشر مرات ومسحتهم بالأخير ، وقعدت على سريرها تفكر فيه .. (إيــــه والله وحشتني ياسعود ، وانا خاطري اشوفك أكثر ، بس اخاف اخاااااف اطلع مرة ثانية وأشوفه ..!! شفيها لكن بيتنا مشغولين ولاهين بسالفة نجود ليش مااقول لهم اني بروح اشتري لها اغراض ومرة وحدة اشوف سعود. والله انها فكرة زينه ، لالالا أخاف يصيدوني شسوي عيل؟ اففففففف خلاص انا بروح واللي فيها فيها ومااعتقد احد بيدري. )
كان هذا آخر قرار اتخذته سمر بعد مادخل الشيطان بقلبها وعقلها..!!

^^^^^^^^^^^^^^^^^^^^^^^^
بعد ماطلع محمد وشوق من المستشفى راحوا بيت بوعمر تشوف اختها كان قلبها يدق بقوه لأنها لأول مرة تروح تزورهم في بيتهم، خايفة من ردة فعل خالتها اذا كانت هناك وهدى..!!
طول الطريق كانوا ساكتين ويوم وصلوا وقف السيارة طالعها وقال:" هذا هو بيتهم ، متأكدة تبين تنزلين؟"
بتردد:" تصدق خايفة من استقبالهم لي.. اتمنى ان محد يكون بالبيت.."
محمد:" بنزل وياج."
شوق:" لالا مايحتاج انت انتظرني بالسيارة عشردقايق وانا راجعه."
محمد بنبرة خوف وقلق عليها:" انتبهي لنفسج حبيبتي."
شوق بإبتسامة خجل:" ان شاءالله، عن اذنك."
ونزلت والتوتر والخوف بياكلونهاااا.. وقفت يم باب البيت ودقت الجرس.. كانت اطالع محمد بالسيارة واطالع الباب وقلبها يدق ويادقات الباب.. فجأة انفتح الباب وحست ان قلبها بوقف..
طلعت لها الخدامة:" نعم؟"
شوق:" هذا بيت هدى؟ "
الخدامة:" يس ماما ، تبي انتَ ماما هدى؟"
شوق:" لا هديل موجودة؟"
الخدامة:" يس بس ماما هديل داكل ."
ارتاحت شوي يوم سمعتها تقول ان بس هديل اللي بالبيت.. دخلت وياها وايدها على قلبها.
ركبت الخدامة بسرعه فوق تنادي هديل..
هديل بإستغراب:" من يبيني؟"
الخدامة:" مايدري ماما بنية واجد هليوه تحت يبي انتَ."
هديل:" زين زين الحين بنزل." وبسرعه لبست شالها ونزلت تحت ، كانت شوق قاعدة على كنبة ومعطيه الدرج ظهرها فكانت هديل ماتشوف من بس قلبها كان ناغزها... واول ماشافتها رمت بنفسها عليها وقعدت تصيح ، وتمت حاضنتها للين ماباعدتها شوق عنها وسألتها:" شفيج تصيحين جذي؟"
هديل وهي تمسح دموعها:" ولاشي.. من شوقي لج ولهفتي لشوفتج."
شوق:" وانا بعد مشتاقة لكم وايد ، وين عبود؟ "
هديل:" طالع بيت الجيران يلعب وياولدهم ، وهدى وامي طالعين كالعادة وانا بروحي."
شوق:" تصدقين كنت ميته من الخوف وارتحت يوم دريت ان محد هني غيرج ، بصراحة هديل انا مااقدر اطول محمد بره ينتظرني ، وانا مريتج ابي اعرف شفيج؟ ليش الحزن اللي بعيونج ونبرة الظيم اللي بصوتج؟ كلامج بالتلفون خلاني اموووت مليون مرة ، ارجوج قولي شفيج لاتخشين عني شي."

نزلت راسها يوم سمعت اختها واحتارت وبالأصح خافت تقول لها وش اللي صار، طالعتها وابتسمت:" مافيني شي بس متضايقة وحاسة بخنقة من الوحدة ، ياليتني اعيش وعبود بروحنا بعيد عن هالعالم كله."
شوق:" هديل ليش ماتصارحيني باللي فيج قلبي يقول لي في شي اكبر من هذا اللي تقولينه."
هديل:" صدقيني مافيني شي ، واذا صار شي بقولج."
شوق بإبتسامة ترجي للمرة الأخيرة:" اتمنى تقولين لي شفيج حتى لو بالتلفون مرة ثانية ، وان شاءالله الايام جاية ونلتقي، الحين انا بمشي لااتأخر اكثر."
هديل:" سلمي عليهم كلهم ، سمر وخلود وااااايد سلمي عليهم وقولي لهم اشتقت للقعدة وياهم."
شوق:" ان شاءالله." سلمت عليها وطلعت بسرعه قبل لايطبون عليهم وتصير لهديل سالفة.
ركبت السيارة وهي سرحانة بأختها، محمد لاحظ شرودها وتفكيرها ، بعد مامشوا شوي سألها:" شخبار اختج؟"
شوق:" هااا..!!"
محمد:" انتي من دخلتي السيارة وسرحانه ، سألتج شخبار اختج؟"
شوق وهي تبتسم له:" تقول زينة بس بصراحة مااصدقها ، فيها شي بس عنيدة ماترضى تقول."
محمد:" يمكن صدق مافيها شي ليش انتي مصرّة على العكس."
طالعته وقالت:" لوسمعت صوتها وشفت شكلها تبصم بالعشر ان فيها شي."
محمد:" يمكن ويمكن صبري عليها يومين يمكن تهدأ وتقول لج بعدين لاتصرّين عليها الحين وخلي نفسيتها تهدأ شوي."
شوق:" ان شااااءالله بخليها ، واتمنى تطلع ظنوني موفي محلها وتكون بخير."
محمد:" ان شاءالله.."

^^^^^^^^^^^^^^^^^^^^^^^^

[حورالعين666]

دخل دكان بوسعد رفيج التعاسة والسوء وقعد يسولف وياه..
بوسعد:" حياالله من زارنا."
بوعمر:" الله يحييك ويسلمك."
بوسعد:" هااااا بشّر شخبارك؟ وشخبار اللي خبري خبرك؟"
طالعه بقهر:" مااقول غير مالت عليك موقال انت بتفكر لي بطريقة تخليني اوصل لها، اشوفك نسيت."
بوسعد:" لامانسيت شفتك مامريت قلت اكيد نسيت السالفة."
بوعمر:"شلووون انساها مااقدر خلااااص البنت سيطرت على كل تفكيري ، والله لومااختها القشرة اخذتها وعيشتها عندي احلى عيشة بس آآآخ آآآخ على حظي اللي رماني على اختها."
بوسعد وهو يضحك عليه:" ولاتحسف ولاشي ، كل شي بالعقل والقوة والفلوس تقدر تحصله ، واذا ماقدرت بفلوسك عندك عقلك وقوتك ."
بوعمر:" مايهمها شي من املاكي تصدق..!!!!"
بوسعد:" عادي بنات وايد جذي أنت بس حاول تستفرد فيها بالبيت بروحها وبتقدر عليها حاول تخلي اختها وامها على طول بره يطلعون ، حتى الخدم لاتخليهم يحسون بشي."
بوعمر:" واخوها اللي لاصق لي عندها."
بوسعد:" عندها اخو؟ وش هالبلوة بعد وجم عمره هذا؟"
بوعمر:" صغير بالابتدائي بس بولسان شكله لكن مقدور عليه هاللعين."
بوسعد:" بس خلاص عجل الموضوع منتهي مايبي له غير قوتك وياها والشدّه وينتهي اللي تبيه ، واعتقد انت تقدر على هالشي."
بوعمر:" شورك وهداية ابليس ههههههههههههههههههههه."
بوسعد:" محد ابليس الاانت يابوعمر هههههههههههههههههه..!!"
وقعدوا يضحكون ويسولفون وابوعمر عنده الامل والاصرار بإنه ياخذ هديل ويحصل اللي يبيه بقوته مثل ماقاله بوسعد.

^^^^^^^^^^^^^^^^^^^^^^^^
ضحكه كان واصل لآخر الدنيا بالشقه ، فهد كان مستمتع بلحظات اللذة المحرمة ، البنت اللي جايبها ولاعب على عقلها منسيته كل شي ، حتى نسى ان باب شقته مفتوح ماقفله ودخل عبدالعزيز وقعد بالصالة يفكر بنتيجة قراره بالانتقام. كان قاعد يطالع التلفزيون ومقهور من فهد.. ودّه يروح له ويضربه لين يذبحه لكن لذة الانتقام بقلبه وعقله خلته يتراجع عن هالخطوة اللي ممكن تخرب كل شي خططه وياجاسم..

بعد ساعه تقريباً سمع صوت الجرس ، راح فتحه وكان سعود داخل ومستانس لآخر درجة..
سعود:" هااا الا هنيه؟ "
عبدالعزيز:" شسوي تمللت قلت اجي هني ، ولما وصلت لقيت باب الشقة مفتوح ودخلت."
بإستغراب:" مفتوح؟"
عبدالعزيز:" ايه الله يسلمك الأفندي فهد......"
وماكمل كلامه لأن سمعوا صوت ضحك فهد وياالبنت اللي وياه داخل.
عبدالعزيز:" اعتقد مايحتاج اشرح لك الباقي."
سعود:"آآآخ الملعون داخل مستانس وناسي عمره وربعه هههههههه."
عبدالعزيز:" شتبي فيها عندك اللي احسن."
سعود:" وانت الصادق ، تصدق اليوم رحت شفتها بالمول حسيت انها بدت توثق فيني أكثر قعدت وياي بكوفي يمكن ساعه وربع ، وبعدين طلعت تاخذ أغراض لأختها المريضة المسكينة كسرت قلبي ههههههههههههع."
عبدالعزيز وهو يضحك عليه:" ذيب وذيب كبير انت. بس اهم شي مااطووول وياها لأن العين حولكم بتكبر وبعدين تفشل خطتك."
سعود:" افااااا عليك اخوك ماينخاف عليه وجريب بحصل اللي أبيه منها وارميها رمية لكلاب."
عبدالعزيز بقلبه (( والله انا اللي بدمركم كلكم وبخليكم تلهثون مثل لكلاب ....!!!!))

بعد ساعه ثانية من قعدتهم طلع فهد من حجرته بشورت قصير بدون تي شيرت ، وانصدم يوم شاف ربعه قاعدين بالصالة..
سعود بخبث:" حياالله العاشق الولهان."
عبدالعزيز:" ههههههه شفيك مصدوم جذي لاتخاف ماشفنا شي."
فهد :" وانتوا من متى هني؟ وشلووون دخلتوووا؟"
عبدالعزيز:" اوووووه احنا هني من ساعتين تقريبا اذا مواكثر ، اما شلون دخلنا فأنا يوم وصلت كان باب الشقة مفتوح حضرتك ناسنه."
ضرب على جبينه وقعد على الكنبه وهو مفهي...!!
سعود:" هههههههه والله شكلك يضحك ، اقووول اكيد الفرس اللي داخل نستك تصك الباب."
فهد وهو يضحك :" والله انها عسل نستني الدنيا ومافيها."
عبدالعزيز وهو يطالعه والنار تحرق قلبه (( وان شاءالله قريب تنساها عن جدّ....!! ))

^^^^^^^^^^^^^^^^^^^^^^^^

[حورالعين666]

الساعات تمرّ بطيئة بالمستشفى وميثة تنتظر سحر تطلع من عند الدكتور بأسرع وقت ، وبس طلعت قالت لها:" شقال لج؟ لاتخشين عليّ ادري مالي علاج صح؟"
سحر:" لاتقولين جذي ، يقول كل شي بيد الله والمرض في بدايته وبإمكانج تتخطين المرض اذا كانت عندج اراده."
ميثة حست بسعادة وبنفس الوقت بضيق كبير بصدرها ونزلت دمعة من عيونها ثقيلة ومليانه حسرة...
سحر:" لاتصيحين ، تراج بتخليني اصيح وياج الحين والمكان مايصلح ياالله خلينا نمشي."
ميثة بإبتسامة دافئة:" يالله..." ((( توكلنا عليك ياالله ، يارب لاتخيب أملي بالتوبة والرجوع اليك ، يااااااااارب. )))
وهم راكبين السيارة وارجعين البيت ، كانت سحر سرحانه بالبلاوي اللي تنتظرها ، سمعت صوت ميثه الكأيب:" سحر ممكن اقول لج شي؟"
سحر:" قولي."
ميثة:" ادري مرينا بأيام وسنين ارتكبنا فيها محرمات وذنوب كبيرة ، وماندري اذا ربنا بيغفر لنا اولا، مع اني واثقة من رحمة رب العالمين ، سحر حبيبتي ابتعدي عن فهد وربعه حاولي تنهين كل شي بينج وبينه. أدري السالفة صعبه بس لازم نلقى لها حل قبل لايفضحونا. ارجعي لربج ياسحر قبل لايفوت الفوت ، ذيج الحزة مابتنفعج الندامة والحسرة ، إحمدي ربج ان المرض ماصار فيج... " وسكتت شوي وكملت كلامها:" سحر بطلب منج طلب ارجوووووج اذا الله أخذ أمانته ترحمي لي عسى الله يغفر لي واطلبي منه يغفر ذنبج اللي خليتج انا فيه."
سحر تمت ساكته تفكر بكلام ميثة اللي تغير 180 درجة ، كل شي تبدل فيها حتى طريقة تفكيرها (( اييييييييه اتوب؟! وياترى اللي سويته من مُنكر ينغفر..؟! وانا لوتبت فهد عنده اشرطه تفضحني وادمر حياتي الباقية ، آآآآه ياحسرتي على نفسي ، صدقتي ياميثة انا لين متّ اقابل ربي بأي وجه..؟! زين وبعدين اذا قدرت اتخلص من فهد وتهديداته شسوي بروحي؟ من بيرضى ياخذ انسانه.........!!!!!! )) وطاحت دموعها على خدها وتمت تفكر بطريقه تنجيها من البلا اللي هي فيه..!!


^^^^^^^^^^^^^^^^^^^^^^^^
اول ماوصل البيت قعد يسب ويلعن وبنفس الوقت كان قاعد يغني ، طلّت هدى من الدريشة وانبطت جبدها يوم شافته جذي..
هدى بدلع:" يممممممه تعالي شوفيه شلون راد البيت ، سكران وحالته حالة."
ام عبدالله:" لعنة تلعنه الله ياخذه هالنذل ، افتكينا من ابوج جينا للي ألعن منه."
هدى:" بقفل الباب قبل لايوصل للصالة ، بخليه يتأدب."
ام عبدالله وهي ساحبتها:" تعالي يالمجنونة بتزيدين الطين بله ، خليه يولي وتعالي قعدي وسكتي عنه فااااهمه."
هدى بقهر:" زيييييين زززززين."
دخل بعد دقايق من مشيته العدله ، وهو يغني ويخربط :" للحـ ـين احبها ولاني قادر انساها اذا مااخذت اللي ابيه يابنت الكلب.....!!!! " وكان يمشي ويخربط من هالحجي ، لين وصل لنهاية الدرج فوق ولاانتبه لهدى وامها اللي كانوا قاعدين بالصالة..!!!
ولما وصل فوق قعد يطالع يمين ويسار محتار وين حجرته:" اناااا وووين حجرررتي..؟ هني لالاهني اوووه انا متأكد مني كانت بس وين راح الباب << وهو يأشر على لجدار..!!
وأخيراً رسى على برّ وقرر انه يتجه يمين صوب حجرته ، ولما وصل وعيووونه شوي وتطلع من وجه حاول يفتح باب الحجرة لكنه مافتح ، رفسه وبعد نفسي الشي ، كان السكران يحاول يفتح باب حجرة هديل اللي كانت قافلة باب الحجرة من خوفها ومتكورة على نفسها على السرير... (( الله ياخذك روح حسبي الله عليك ..... ))
اما بوعمر بره كان شوي ويستخف يبي يفتح الباب:" شفيه هالباب الملعون موراضي يفتح ، افتح ياسمسم...!! بعد مافتح؟ غريبة افتح يالله مافيني شدة مزاح الحين ياالله افتح..!!!! "
هدى تحت مستغربة تسأل امها:" يمه شفيه الغبي يصارخ...؟"
ام عبدالله:" مدري قومي نشوف شفيه."
ولما وصلوا فوق وشافوه عند باب هديل ، شهقوا ثنتينهم مرة وحدة.....
ام عبدالله:" يالملعون وين جاااي هناك حجرتك الله ياخذك وياهالسمّ اللي تبلللللعه."
هدى وهي إدز فيه:" يمه شتحاجين فيه موداري بعمره خلاص شكله منتهي."
ام عبدالله:" حسبي الله عليه ، وماجه الا لحجرته هديل اكيد انها ميته من الخوف داخل."
هدى:" خليها تووولي تستاهل اللي يسويه فيها وعساها أردى من جذي."
ام عبدالله:" عن خرابيطج الحين ساااعديني عليه بيرقد لنا بالممر..."
هدى:" اففففف ريحته مااقدر اتحملها تقولين خمام متحرك..!!!"
دخل عبدالله البيت وشاف امه وهدى يدزون في بوعمر ويحاولون يدخلونه حجرته ، قعد مسكين مكانه وكان خايف يسوي بوعمر شي فيهم...وبعد مادخلوه حجرته وسكروا عليه الباب نزلوا تحت..
هدى وهي تقرض بأظافر يدها:" قهر قهر هالمعفن هذا مايجيني الا وهو سكران."
ام عبدالله:" لاتنقهرين وخليه يولي ، اهم شي الحين نضمن مستقبلنا من هالخير وبعدين نرمي هالحيوان بره..!!!"
هدى:" تتوقعين نقدر نخليه يكتب البيت بأسمي؟"
ام عبدالله:" ليش لا ، بس لازم نصبر شوي."
هدى:" اكثر من هالصبر؟ بصراحة عيشة طفش ، صج اخذ منه فلوس وايد بس بعد ماتكفي ودّي بأكثر وأكثر ، مابيه يتحكم فيني على كيفه هالشايب."
ام عبدالله:"ماعليج تحملي كلها شهر والا اكثر ونكوووووش على كل شي."
هدى بإبتسامة خبيثة:" ياااااااااااااااااارب....!!"
كان عبدالله قاعد يطالعهم ويسمع خططهم وأحلامهم السودة ، الأحلام اللي دمرت حياته وحياة هديل..!!

^^^^^^^^^^^^^^^^^^^^^^^^

[حورالعين666]

مرّت الأيام تعيسة وكأيبة على السرير الأبيض بالمستشفى ، نجود استعادت وعيها بعد الغيبوبة اللي دامت اربعة ايام.. كان محمد وأخوانه وبنات عمه ملتمين حولها يتشكرون لها بالسلامة.. أما حمد وناصر وأبوهم قاعدين بحجرة الزوار التابعه لحجرة نجود..!
وبعد دقاااايق طلعوا الأخوان وراحوا يقعدون وياعيال عمهم.. الكل تغيرت نفسيته شوي يوم رجعت لوعيها وخصوصاً أمها اللي ماذاقت النوم من يوم طاحت نجود.

حمد:" ها بشروا شخبارها؟"
احمد:" الحمدالله زينة بس تعرف توها موتعيه لنفسها وتعبانة شوي."
ابوحمد:" اكيد اهم شي ماطولت غيبوبتها والا كانت مشكلة."
ابومحمد:" الحمدالله."
ابوحمد وهو يسأل بومحمد:" ماقلت لنا شبتسوي الحين ويافيصل؟"
ابومحمد وهو يطالع أرض الحجرة:" والله مدري محتار أخاف اطلقها منه وتتعب نفسيتها ، واخاف اخليها على ذمته ويهملها ويعذبها وياااه."
أحمد:" يبه طلقها منه احسن ، اذا ظلت على ذمته بتنهار اكثر مما هي منهارة ، وحرااام اضيع عمرها وياه وهو مايستاهلها."
بس خلص كلامه سمعوا صوت دق على الباب ، وقام ناصر يفتحه كانت مفاجأة لهم كلهم ، ابوفيصل والعنود جايين يزورون نجود..!!
ابومحمد بدون مايحسس بوفيصل بأشي:" هلا هلا حياااك بوفيصل تفضل ياخوي."
ابوفيصل كان متفشل منهم ومتضايق لأن ولده سبب لهم مشاكل هم في غنى عنها، وبصوت حزين وخافت:" الله يحي أصلك ياخوي ، والسلام عليكم جميعاً."
ردوا عليه بصوت واحد:" وعليكم السلام والرحمة."
قعد ويا الرجال أما العنود فدخلت للحريم تقعد وياهم.. لما دخلت العنود نفس اللي صار ويالرجال صار وياالحريم الكل قعد يطالعها يوم دخلت وكانوا يتوقعون امها بتدخل وراها لكن خاب ظنهم...!!!
العنود:" السلام عليكم ."
ردوا عليها:" وعليكم السلام والرحمة."
خلود:" هلا هلا تعالي قعدي صوبي عنود."
ام محمد:" شخبارج يمه ان شاءالله بخير؟"
العنود والتوتر والخوف بياكلونها:" بخير الحمدالله ، يسلم عليكم ابوي."
ام محمد:" الله يسلمج."
كانت نجود ساكته اطالع السقف وتفكر بفيصل وبقراره الظالم اللي اتخذه بحقها...!!
سمعت صوت العنود وزاد من ألمها ووجعها، تمنت الكل يطلعون من الحجرة ويتركونها بروحها تفكر بمصيرها اللي مشى عكس التيار تماماً..!!
شوق واللي قطعت حبل تفكيرها:" نجود حبيبتي العنود تسلم عليج.."
ومن غير مااطالعها وبنبرة إدل على عصبية وقهر:" خلوني بروحي انا ماابي أشوف احد طلعوووا بره بره بره....!!"
المسكينة عنود حست بإحراج يوم شافت نجود تطردهم ، ماعرفت شتسوي وحست انها السبب بتصرف نجود..
ام محمد بخوف:" بسم الله عليج يابنيتي شفيج تطردينا؟ يمه لاتسوين بروحج جذي." وقعدت تصيح يوم شافت بنتها تقول هالحجي.
شيخة وهي تمسح دموع امها وتحبها فوق راسها:" يمه هدي نفسج اللي فيج مكفيج ، نجود موقصدها اكيد هي تعبانة وتبي ترتاح."
سمر:" خلونا نطلع يمكن تبي ترتاح وباجر ان شاءالله نرجع لها."
خلود وحست لعنود وسرحانها:" عنود تعالي نطلع بره." ولحقوهم البقية..
من غير ماتتكلم قامت وياها وطلعوا بره ، كانوا لرجال قاعدين ويسولفون استغربوا يوم شافوا الحريم وحدة ورى الثانية...
ابومحمد:" هااااا وين على الله تووو الناس؟"
سمر:" لامافي شي بس نبي نخلي نجود ترتاح ومانثـقل عليها."
احمد:" زين عيل بوصلكم وبوصل مريم البيت."
بومحمد:" زين ماتسوي انا بقعد وياعمك وبوفيصل هني وبعدين بنرجع."
حمد:" عجل احنا خلونا نطلع شباب شرايكم."
محمد وهو يطالع شوق من غير محد ينتبه له وكأنه يشاورها، وبادلته بإبتسامة فهم منها انها تقول له (( اطلع بس انتبه لنفسك، ولاتسهر وااااايد )) قلبه كان يقوله هالكلام...!!!
اما ناصر فكان رايه من راي حمد ، وسيف طبعاً كان بياخذ نورة وبيرجعها بيتهم وبيطلع وياالشباب لأن طلعاتهم ماتتفوت...!!!!!

^^^^^^^^^^^^^^^^^^^^^^^^
قعدت من النوم قبل صلاة العصر، حست بضيق بصدرها. قامت غسلت وجهها ورجعت عند طاولتها وقعدت تقلب بصفحات مفكرتها.. كانت قاعدة تتأمل الصفحات الأولى فيه اللي كانت تخصها ومحمد..!!! (( أحلى لحظات حياتي يوم شفته اليوم يم بيتنا ويااخوي فيصل ، وعطاني هدية، هدية عمري ماأستحقيتها..!! قلـــبه.....))
طاحت من عيونها دمعة على كلمة { قلبه} وشوهتها.. فعلاً كانت سحر الإنسانه اللي شوهت قلب محمد بحبها المبـتور..!!
قلبت الصفحات بسرعه وقعدت تكتب أشياء تدور بداخلها أشبه بالخواطر..!!
(( على أنقاض حياتي بدأتُ أستيقظ مرةً وأغفو أخرى.. كأيبة هي الأيام التي تمرُّ بي، تعيسة هي اللحظات التي أنظرُ فيها إلى سوداويةِ السجنِ المحيطِ بي..! وأيُّ سجن هو سجني؟ أن أسجن على قارعةِ الموتِ المؤبد، وأتجرعُ ماإكتسبته نفسي. مؤلمة / قاتلة كل الثواني التي أتنفسُ فيها. أوااااه ياوجعي المقيمِ بي ، أوااااه ياأوراقي المحترقة بذكرياتٍ مهشمة تحت أقدامِ الزمنِ المُرّ..!! ليتني ماكنتُ أو كــان هو بين شريانِ القلب ننبض بألم ، بقسوة ، بشجن..! آآآآه ياقلبي الحزين ، آآآه يادمعي المُثكل بجراح الأيام ، آآآه ياجرحاً لن تـُدمِله السنين إلا على جثةٍ تنهشها عقاربٌ وأفاعي ، ذنوبٌ ومعاصي..!! آآآآه ياااااربـــي أدركني...!! ))
أنهت كتابتها بتوسل لله سبحانه بإدراكها قبل فوات الأوان نهائياً، مسحت دموعها اللي غسلت وجهها من فتحت عيونها من النوم..!!! قامت ورمت بنفسها كرسيها الهزاز وهي تفكر بميثة وطريقة تقدر تخلصها من فهد والأشرطة..!!
وفجأة قطع حبل أفكارها صوت تلفونها، قامت تسحب برجولها تشوف المتصل ، كانت رقم موغريب عليها بس موذاكرته ، خلته مكانة وماردت (( يمكن فهد متصل من رقم غير رقمه ويوهقني بطلباته..!! )) وقف صوت التلفون وارتاح قلبها شوي ، لكن ماصارت دقيقتين والا ورنّ مرة ثانية ، (( ماني رادة عليك خلك تولي )) وسكت مرة ثانية وردّ اتصل للمرة الثالثة، طالعت تلفونها بعصبية (( اففففففف من هذا؟ خلني اردّ واشوف من ، يمكن ميثة صج متصلة تبيني بشي وهذا رقمها الجديد.!!! )) وردت بسرعه بآخر لحظة قبل لاينقطع:" الووو."
الطرف الثاني:" الوو مرحبااا سحر..!!!! "
سحر بإستغراب وإندهاش:" من...؟"
رد عليها الصوت بهدوء:" عبدالعزيز ماعرفتيني؟"
سحر هدأ بالها شوي يوم عرفت انه عبدالعزيز لكن بنفس الوقت انقبض قلبها وبخوف سألته:" شتبي؟"
عبدالعزيز:" مرة وحدة شتبي؟ مافيه شخبارك؟"
سحر بغيظ:" وانتوا خليتوا فيها أخباااار؟ قول خلصني ياعبدالعزيز شتبي؟"
عبدالعزيز:" ماعلينا أبيج بموضوع يهمنا احنا الأثنين..!!"
بفضول وإستغراب سألته:" مافهمت؟ هو في مواضيع خصنا احنا الاثنين غير البلاوي اللي سويتوها فينا..!!"
عبدالعزيز:" سمعيني انا مالي خص باللي صار، كل شي كان تحت يد فهد ، عموماً موهذا موضوعي ، أبي أكلمج بأقرب وقت ممكن وبمكان عام."
سحر:" قول اللي عندك هني."
عبدالعزيز:" مااقدر لازم أشوفج."
سحر وبإصرار:" آسفة مااقدر تبي تقول اللي عندك أهلا وسهلا ماتبي مع السلامة."
عبدالعزيز:" افاااا انا تقولين لي جذي؟ وانا اللي أبي مصلحتج وياي ومتصل فيج!"
سحر:" مصلحتي انكم تحرقون الأشرطة اللي عندكم ، اللي صورتونا فيها انا وميثة، وتبعدون عن حياتنا للأبد."
عبدالعزيز:" قربتي وااااايد من اللي أبي اقوله لج ، وبصراحة وفرتي علي وقت كبير، وراح اقولج بالتلفون مع اني كنت اتمنى أشوفج واشرح لج كل شي بالتفصيل."
سحر:" مافهمت شتقصد بكلامك؟"
عبدالعزيز:" بإختصار بعد مادمر فهد حياتي ابي أنتقم منه، وانا ورفيجي جاسم خططنا وبنفذ الخطة وأبي مساعدتج وراح تكون لج فرصة الانتقام من فهد وبنفسج تتخصلين من الاشرطة وتنهين هالماضي من حياتج."
سحر:"........!!!!"
عبدالعزيز:" مايحتاج تفكرين وايد ، الوقت يمر وفهد وسعود بسافرون لازم ننتقم منه بأسرع وقت ممكن والا بضييييع كل شي من يدج."
سحر:" مدري موعارفة شقول، بصراحة مابي أدخل روحي بمشاكل انا في غنى عنها كفاية اللي فيني ، وش تبي تسوي فيني اكثر من اللي فيني، عبدالعزيز روح دور لك على شخص غيري يساعدك بمإنتقامك."
عبدالعزيز:" ماتبين الأشرطة ترجع لج وتتخلصين منها بنفسج؟ ارجوووج سحر لااطولينها وهي قصيرة ساعديني وبتنتهي كل مشاكلج ويافهد اوعدج بهالشي."
سحر:" اخاااااف اتورط بمسأله أكبر من اللي انا فيها، وبعدين انا وش دراني انت وش ناوي تسوي له، اخاف تقتله وادمر حياتي اذا ساعدتك."
عبدالعزيز:"ههههههههههههههههههههههه اقتله مره وحده ، بصراحة فكرت فيها بس لقيته حل سريع وانا أبي اخليه يحس بالذل قبل لاأدمر حياته مثل مادمر حياتي وحياة غيري."
سحر حست بحرقة بقلبها وهي تسمع كلامه تذكرت كل اللحظات المُـرّة اللي عاشتها بذل ويافهد.. تمنت لوبيدها سجين تقتله وتتخلص منه للأبد..
عبدالعزيز:" اشوفج ساكته؟ اعتبره موافقة والا بعدج رافضة؟"
سحر بتردد:" اوكي بس مابي مقابلات بيني وبينك او حتى اي شخص ، خل اللي بينا بس مجرد اتصالات لاأكثر، واتمنى كل شي تخطط له تبلغني عنه حتى اكون بالصورة وعارفة كل شي فاهم."
عبدالعزيز وبطير من الفرحة:" حاااااضر وعلى امرج اكيد ، وأبشري قريب بننتهي من مشاكل فهد وربعه للأبد ، بااااي."
وصك التلفون من غير مايعطيها مجال انها تقول اي شي ، صكاه وخلاها بحيرة كبيرة من أمرها، محتااااارة وش تسوي (( آآآآآه آآآآآآه ياراسي شسوي؟ انفذ الانتقام وياه ، اقبل فيه؟ لالا مااقدر اخاف يصير شي كبير واتورط وأورط أهلي، زين والأشرطة هذي فرصة اتخلص منهم، اكيد عبدالعزيز الحقد مالي قلبه والا ماكان فكر انه ينتقم من اعزّ اصدقائه ، لازم لازم اتخلص من كل دليل ممكن يقلب حياتي فوق ماهي مقلوبه...!! ))
كان هذا آخر قرار تتخذه سحر ، وراح تنفذه وان شاءالله تقدر تتخلص من وصمة عار ممكن تلاحقها للأبد.

[جررريح الررروح]

يعطيك الف عافية خيو
جاري الانتظار الاجزاء المتبقية
تحياتي

[حورالعين666]

صحى على صوت عبدالله يلعب ويارفيجة بالصالة اللي فوق.. كان وجه متنفخ من كثر لرقاد..!! تقلب يمين ويسار على السرير وهو يفكر بالكابوس اللي يبي يعيشه لهديل! قام وهو يتأفف من زود التفكير، دخل الحمام وقف يطالع بشكله بالمنظرة (( ااااي وانا اقوول ليش البنت متخرعة مني ، شكلي معفوس فوق تحت كأني والله متخانق وياقطو بالشارع..!! والله الريحة اللي لازقة فيني لازم اغيرها )) وهو يمسح على راسه (( انزين من وين اجيب لي شعر هههه نص راسي اقرع ، يخلف الله ماورثنا من ابوي الا القرع وخفة الدم ..!!))
غسل وجه وأخذ شاور طووويل يعدل فيه شكله ، ويضبط فيه روحه..!! وبعد ماخلص ولبس له ثياب نظيفة طلع من الحجرة ، كان عبود للحين يلعب وياولد الجيران ، وهدى وأمها كالمعتااااد بره البيت بالسوق..!! أما هديل فكانت حابسة روحها بالحجرة خايفة تطلع بعد ماحاول يهجم عليها بوعمر. وقف يطالع حجرة هديل ويطالع عبود ورفيجة يلعبون.. كان وده يروح لها بس وجود اخوها خرب عليه. نزل تحت وقام يدوور بالبيت شوي تملل وطلع ، وهو بيركب سيارته بره شاف هدى وأمها موصلهم السايق..
بوعمر:" تو مانور المكان..!!"
هدى طالعت بإحتقار ومشت عنه بدون ماترد، اما عبدالله طالعته وقالت:" والله منور بوجودنا من زمان..!!"
بوعمر وهو يهز راسه ويستهزأ فيها:" والله مصدقة عمرج انتي ويابنت القشرة ، الحمدالله والشكر."
ام عبدالله:" والله طاااالع روحك بالاول بعدين تعال تكلم." وخلته ومشت قبل لايرد عليها.
ركب سيارته وهو مقهور منهم (( والله اذا ماخليتج تندمين على كل لحظة عكرتي فيها مزاجي ماأكون بوعمر ، لكن هين ياأم عبدالله ، وانتي ياهدوووو بوريكم الووويل. ))

^^^^^^^^^^^^^^^^^^^^^^^^
((الناس في بسمتي بالحيل منخدعه..
ياكم وراها طفيت النار بانفاسي..
بعض المواجع لها ماتنفع الفزعه..
كلما جرعت الحزن رد امتلا كاسي..
عودت نفسي اساير هزة الفجعه..
وان دست جمر الزمن ماينحني راسي..))
أول مافتح تلفونه لقى المسج ،كانت شوق راسلته إستغرب الرسالة قرأها فوق العشرمرات حس انها متضايقة من شي بس خاشته عنه..!! فتح قائمة المسجات المحفوظة وأرسل لها مسج يرد عليها فيها ((ليت كلماتي تخفف عن غيابك
ليتني دايم معك وانتي تضحكين
ليت كلماتي تجفف كل همك
وامسح دموعك وابدلها بحنين
لو تقولي الآه اشعرها معك
تكتـئب دنياي ولا اشوفك حزين
انا أغليك وسط قلبي موقعك
حتى روحي تحت امرك لو تبين ))
أول ماوصلها السمج حست بدقات قلبها تتسارع ، وبس قرأته زادت دقاته كانت خايفة ان مايرد عليها او يفهم وش فيها من خوف وضيق..!!
وردت عليه بمسج ثاني ((تــدري كــان ودي أقولــهـا وأنت قريـب لكــن مجــبور أقولهـا وأنـت بعيــد* أشتقتــلك *)).
حس بإضطراب وتقلصات بمعدته وقلبه لأول مرة شوق تصرّح له بشوقها له ، إبتسم ابتساااامة عريضة مليئة بالسعاااادة واللهفة ، قلبه كان يدق عند كل حرف يقرأه من مسجاتها.ورد عليها
(( * تصدق عاد *
تغيب الدنيا بغيابك ، وأوعد حظي لوجابك ألون دنيتي وردي .. وأخلي موعدي بابك..
* تصدق عاد * أحس الكل يحسدني على الحب اللي مسعدني.. وأدعي ربي ياأغلى الناس عسى عنك مايبعدني..
* تصدق عاد * من جودك صار للدنيا وجود.. في الحياة اللي معاك والا لقاك ، زايد فيك الغلا فوق الحدود مايساويك بغلا شخص سواك.. أكتبه شعري عسى شعري يجود، بالحروف اللي حلاها من حلاك..كل حرف مابلغ وصفك حسود..!!
* تصدق عاد * لعنبو قافٍ عجز يلحق مداك كل ماتذكرت عمري ماذكرت الاوفاك.. ولوأدون ذكرياتي ماانطبع فيها سواك.. انت اوفى من لقيته زدت عن هذا وذاك ، لاتقول اني نسيتك او افكر في جفاك.. لوتمنيت الاماني ماطلبت الالقاك..!!
* تصدق عاد * قلبي المجروح من بعدك عطيب ومن عقب فرقاك قلبي ماقوا، الجروح اليوم ماظني تطيب، غير لاصرنا انا وانت سوا ، مايطيب الجرح لوجبت الطبيب صار شوفك هو حياتي والدوا. كل همي ماابيك عني تغيب ، كن شوفك صار للخافق دوا..!!
* تصدق عاد * من حزني ابكي وتبكي ريشة اقلامي ، مغير ريشة قلم عقبك تسليني، مشتاق اشوفك وعيت تسمح ايامي ، حسبي على الوقت ظالمني ومشقيني ، امشي بصحراء غرامك حافية اقدامي رحلة عذاب وعطش واحزان تكويني..!! ))
كان المسج له أثـر كبيـــر بقلب شوق اللي عمره ماسمع وحس بمثل هالكلام..تأملت كل كلمة مكتوبة بالمسج وحست فيها، كانت بثواني خايفة تكون المشاعر المكتوبة مولها لشخص كان يملك قلب محمد لكنها تأكدت ان كل شي محمد مرسله من مسجات يعنيها هي موأي احد ثاني...!! تجمعت دموووع غزيرة بعيونها من الفرحة ، والحزن بنفس الوقت تذكرت ماضي كان بيقضي عليها وتذكرت أختها هديل وعبود..!! مسحت دموعها وارسلت له ((هـــــلآ من مرهف آحســآسي ..هلآ من خــآفي آلآعمـــآق ..
هــلآ من كل قلبـي ؛؛من عــروقي ؛؛من شرآييني ؛؛
هـــلآ من كل شيفي حيــآتي ينتثـر آشـوآق ..هــــلآ من كل دمع
لجــــل آشـــوفك .. تنثـــــرهـ عيــــــني .. !!
هــــلا من صدري اللي دآم حبـــكـ دآخلـه .. مآ ضــآق ..
هـــلآ من خآطر يرسـمـ غلآكـ بدفــتر سنيـــني ))
استلم المسج والسعااادة ماتنوصف بداخله ، قام من فوق السرير بسرعه وغير بجامة النوم وغسل وجهه وطلع من حجرته كانت الساعه 8:15 وهو يطالع الساعه (( ماشاءالله توها الناس )) واول وصل تحت كانوا خواته قاعدين :" صباح الخير، اشوفكم قاعدين من الصبح؟"
سمر:" شنسوي مافينا رقاد ، والبارحة نايمين من وقت، بس انت قول لنا وش مقعدك من الصبح؟"
محمد بإبتسامة عريضة:" العصفورة قعدتني وسمعت تغريدها فطااارت النومة من عيوني."
كانت بهذي اللحظة شوق نازلة وسمعته، حست بوجهها يحترق اول ماشافته ولاحظوا عليها الخجل اللي حلّ عليها فجأة.. وعرفت سمر وش قصد محمد بالعصفورة!!
سمر وهي تغمزلمحمد:" الله والعصافير بس ياليتهم يقعدونا احنا بعد."
شوق بهبل بعد ماسلمت وصبحت عليهم:" سمورة عندكم عصافير داخل البيت؟"
سمر:" اي بس كل متعلقين فووووق خخخخخ."
ضربها محمد على حلجها وهو يضحك:" ماتجوزين عن سوالفج ، انزين وين امي؟"
خلود بعد ماخلصت ريوقها:" طلعت راحت المستشفى واخذت شيخة بطريقها."
محمد:" اوووه نطق الحجر، صبااح الخير ياوجه الخير ، هااا خلصتي ريوقج؟"
خلود بقهر:" افففف يعني ماتبون الواحد ياكل بهدوء لازم سوالف طول الوقت."
شوق وهي اطالع محمد بنظرات فهم معناها:" ماعليج اكلي وعلى راحتج بعد ماعليج من اخوج."
محمد:" زين اشوفج توقفين وياها بعد ماكأني ريلج."
بإبتسامة حلوة وفيها شطااانة!!:" ماعليك خلّ العصافير اللي فوق يوقفون وياك."
وهو يضحك:" ماعليه باخذ لي جم عصفور وبسولف وياهم يمكن يحنون عليّ."
سمر:" يااااامسكين والله كسرت خاطري ههههههع."
محمد:" عن التطنز لاكفختج."
سمر:" ماقلنا شي يااخي ، ماعليه الحين تريقوا وخلصونا علشان ورانا مشوار للمستشفى اليوم بيت عمي وبيزورونا بالبيت ونورة بعد."
محمد:" والمعنى؟ تبيني اقعد وياهم؟"
سمر:" يالذكي نبيك تودينا المستشفى علشان نرجع بسرعه وشيخة بتطبخ اليوم الغدى عندنا وبنسوي حلويات علشانكم يادب."
شوق سمعتها تقول يادب وانفجرت من الضحك ، يطالعها محمد بعيون بريئة وكلها تهديد.
محمد:" الحين انا دبّ يافيلــه..!!"
سمر وهي تضحك:" والله ماني بأمتن منك ، وبعدين دبّ يعني دبّ مابتراجع عنها."
وطالع شوق اللي انقلب وجهها احمر من الضحك:" وانتي عاجبج اللي تسويه فيني؟ الظاهر بعلن عليكم الحرب من اليوم ، وعقابكم بعد 6 دقايق اذا ماجهزتوا بسرعه بمشي عنكم."
سمر:" ماتقدر تهدنا شيخة بتحرمك من الاكل اليوم."
محمد:" بنشووف." وخلاهم وقام بيطلع وقبل لايفتح الباب:" انا قلت لكم 6 دقايق ماشفتكم بره مشيت عنكم."
شوق وهي اطالع خواته:" من صدقه يتكلم؟"
سمر:" مدري بصراحة بس شكله صادق قومواا خلونا نمشي لايورطنا ومانلقى احد يودينا."
خلود قايمه بتثاقل:" انا بروح فوق موجايه وياكم احس اني بسخن جسمي متكسر."
سمر لمست جبينها وفعلاً كان حار:" لالا انتي لازم ماتطلعين روحي ريحي روحج ، وقبل لاتنامين اخذي دش سريع بمااي بارد علشان الحرارة تخف عنج شوي."
خلود هزت راسها ومشت عنهم ، اماشوق فظلت اطالع سمر اللي نست سالفة اخوها..
شوق:" هيييي سمووورة شكلج نسيتي محمد ترى السالفة شكلها جد خلينا نلبس بأسرع وقت لايشرد."
وبسرعه راحوا جهزوا روحهم وطلعوا بره لكن الست دقايق خلصت ومحمد ماكان موجود بره ، تموا يطالعون مواقف سياراتهم بس مافيها الاسيارة احمد..!!
سمر:" هذا من صدقه راح وخلانا ، والحين شنسوي؟"
شوق بإستغراب وبنفس الوقت كانت قاعدة تضحك على الموقف اللي خلاه فيهم:" ههههههههه والله مدري."
سمر:" تضحكين انتي وياويهج ، الحين امي بتعصب اكيد تنتظرنا هناك عند نجود علشان ترجع ويانا لأن السايق راح يشتري اغراض لليوم."
شوق:" خلينا ندخل ونتصل بدال وقفتنا بالشارع جذي."
وتوهم راجعين وبدخلون البيت والاصوت سيارة موقفة وراهم وصوت هرنَ السيارة مفزع المكان.. التفتوا عليه والاهو محمد داخل السيارة وفاطس عليهم من الضحك ويأشر لهم علشان يركبون.
ركبوا السيارة وهم يضحكون ، سمر:" يعني سويتها وخليتنا."
محمد بعد ماهدأ شوي عن الضحك:" والله لوشفتوا اشكالكم وانتوا ادورون السيارة والله كنتوا تفطسون من الضحك."
شوق:" لكن ماعليه نردها لك ان شاءالله ."
محمد:" افااااا انا تسوين فيني مقلب؟"
شوق:" ليش وش فيك غير عنا حتى مايستوي فيك مقلب."
سمر:" اكيد بقولج انا ريلج تسوين فيني مقلب؟"
وقعد يضحك يوم سمعها وقال:" وش دراج اني بقولها؟"
سمر:" حفظناها يااخي."
ومشوا بالسيارة بسرعه قبل لايضيع الوقت بالسوالف والضحك وينسون الأشغال اللي وراهم.

^^^^^^^^^^^^^^^^^^^^^^^^

[حورالعين666]

سحر:" بس خلاااص تعبت تعبت مااقدر افكر اكثر من جذي ، لي متى بنظل تحت رحمة فهد؟ لمتى بنظل نخاف انه يفضحنا ويدمر حياتنا فوق الدمااار اللي هي فيه، لازم ياميثة اسوي اللي يبيه عبدالعزيز مني ، اكيد برتاح وبترتاحين وياي بالأخير."
ميثة وهي تترجاها:" تكفين ياسحر انتي اللي اصحي وشوفي روحج لوين وصلتي ، عبدالعزيز مستحيل يتغلب على فهد لو قلب الدنيا فوق تحت ، فهد اقوى منه ومنج ارجوج لاتمشين وياه بطريج يمكن يوديج لهلاكج وهلاك عيلتج."
سحر ودموعها متشبثة بآخر أمل ممكن يساعدها بالورطة اللي هي فيها:" لاياميثة لا، فهد فيه اللي اقوى منه ولازم نكسر راسه ونحطم غرورة واخليه ينذل مثل ماذلاني وهدم كل أمنية لي بالحياة سعيدة..!!"
ميثة:" ربج هو اللي ينتقم مو انتي ياسحر ، لاتخلين الحقد والغضب يعمون قلبج وعينج."
سحر:" انا قبل كان قلبي وعيوني معميين ياميثة بس الحين انا فتحت وفتحت عدل ، انا الحين عرفت طريقي اللي راح امشي فيه ويانهايته تكون مثل ماانرسم لي ، واعيش بحزن وضيق باقي عمري أو أغير هالرسم والخطة للأبد وأعيش حياة ثانية..!! "
ميثة:" والله اني خايفة عليج انتي بضيعين عمرج بهالانتقام، صدقيني لوكان انتقامج هذا بفيدج كنت وقفت وياج، بس لا ياسحر بدمرج هالقرار ارجوج تراجعي عنه ولاتوقفين وياعبدالعزيز وأشكاله ، وأحمدي ربج صار لفهد جم يوم غافل عنج يمكن نساج ونسى الأشرطة وياج. عيشي حياتج بعيد عنهم الله يخليج سمعيني." وقعدت تصيح وهي تترجاها تتراجع لكن سحر كان مصممة على الانتقام:" شلون اعيش حياتي وهي بين ايد انسان نذل وحقير مايعرف معنى للأنسانية أبداً، شلون اعيش واضحك وافرح وضحكتي مخنوقة بيد انسان شلّ الفرح بقلبي وشفاتي ، شلون ياميثة انسى اني خنت بيوم ثقة بيتنا ، أمي وأبوي وأخوي وحتى العنود الصغيرة كانت اعقل مني ، شلون تبين انسى الجذب اللي كنت اعيشه وعيشته محمد بيوم من الايام..؟! انسى اهانات وجهتها لناس بريئة وتـُهم لفقتها لـ........ ، لفقتها لشوق وهدمت حياة اخوي وساعدته انا وأمي على هالشي ، شلون انسى الأنانية والعجرفة اللي إنبنت بداخلي وصارت مثل الجبل ماينهد. لكنّه انهدم بطغيان حيوان هدم حياتي وحياتج ، انهدم بلحظات غفلة آآآآه آآآآآه ياميثة اتمنى لوترجع لسنين واصلح كل اغلاطي ، واعيش حياة غير عن اللي عشتها، لكن وش تنفع الحسرة والآه ؟ وش تنفع وكل شي ضاااع بغمضة قلب..؟! شلون تتوقعيني اعيش وانا بهالقذارة والحقارة؟ شلون اطالع بعيون الناس الطيبة بعد اللي سويته؟ بعيون اهـلي اللي مااستحق اعيش وياهم لحظة وحدة ، أتمنى أمــوت ولااا....."
قاطعتها ميثة اللي ذحبها لصياااح بعد كلام سحر:" اششششششش خلاص ياسحر خلاص كفاية ذبحتيني وبذبحين عمرج ، لاتدعين على نفسج بالموت ، استغفري ربج ورجعي له ، توبي ياسحر توبة نصوح ، أغتسلي من الذنوب اللي ارتكبتيها وحاولي تفتحين صفحة جديدة بحياتج تعيشين فيها بعيدة عن ذكريات سودة ، افتحي صفحة جديدة بينج وبين ربج ، لين تمنيتي الموت شلون تبين تقابلين ربج ولاعمل ولاأحد عندج يدعي لج بالرحمة ، لأنج ماخليتي احد يحبج كل الناس بعدتيهم عن دربج ، كل الناس اللي تعرفينهم أذيتيهم بغرورج وغطرستج وكبريائج اللامحدود..!! ياسحر اذا كنتي تبين تموتين علشان ترتاحين فأنتي غلطانة وراح يزيد عذابج عذااااب أكبر."
سكتت لكن عذاب القلب والضمير ماسكت بداخل سحر ، صرااع مشاعرها والماضي بداخلها يذبحون كل نبضة من نبضات قلبها الضعيف..!! كانت في حيرة كبيـرة بين انقاذ نفسها بعيد عن فهد او انها تخلص نفسها بالأول من يد فهد وتدمير الأشرطة اللي صورها اياها.

^^^^^^^^^^^^^^^^^^^^^^^^
اتصلت على فيصل بعد قرار اتخذته ، بعد تفكـير طووويل..
فيصل:" هلا...!!"
نجلاء وحست بصوته المتضايق:" اهلين شكلك متضايق من اتصالي؟"
فيصل:" لالا ابداً بس انا متضايق من البيت شوي."
نجلاء:" ممكن اعرف من شنو والامايحق لي؟"
فيصل:" لاعادي اختي سحر صار لها جم يوم متغيرة ومتقلب حالها مدري شفيها ولما نسألها تقول مافيني شي."
نجلاء:" يمكن مريضة وديتوها للطبيب؟"
فيصل:" تقول ماتبي ، المهم آمري في شي؟"
نجلاء:" يعني مااتصل لك الافيه شي؟ وانت يافيصل اشوفك وايد مبتعد عني؟"
فيصل:" والله مشاغل يابنت الحلال واذا تبين امرج الحين بمرج."
نجلاء:" بصراحة فيصل ابي اقول لك قرار اتخذته.."
فيصل وقلبه يدق بقوه:" شنوووووو...؟"
نجلاء:" ابي نتزوج هالأسبوع."
فيصل ماكان يتوقع يسمع هالجملة ابداً كان يتوقع انها تطلب الطلاق منه بعد الجفا اللي قابلها فيه خلال الايام اللي راحت..!!!!
نجلاء:" اشوفك ساكت؟ وش قلت؟"
فيصل:" وليش مستعجلة بالزواج؟"
نجلاء:" فيصل الوضع اللي احنا فيه موعاجبني ، مااشوفك الامرة بالاسبوع اومرتين بالكثير وفيه ايام مااشوفك فيها بالمرة، بصراحة انا مابي اعيش خطوبتي بهالتعاسة والكآبة اللي معيشني فيها."
فيصل:" شسوي...."
قاطعته:" ادري بتلقي اللوم على الاشغال والبيت ، لا مواعذار هذي انا ابي خلال هالاسبوع نتزوج سامعني."
فيصل:"زواج الحين لااااا ، تعرفين ظروفي يانجلاء."
بقهر ردت عليه:" اي ظروف اللي تتعذر فيها ، شكلك للحين تفكر بزوجتك الأولى ، اسمعني يافيصل انا لي حق عليك ومابي اعيش مشتته مني ومناااك ، الزواج لازم يتم هالاسبووع."
فيصل:" لاااا يعني لاااا ، انتي ماتحسين نجود زوجتي من سنين مو من يوم واحد ، لازم تفهمين وتقدرين على الاقل."
نجلاء:" مثل ماهي لها حق انا لي حق ، وانت وينك عنها كل الايام اللي راحت والابس يوم سمعت انها بالمستشفى حنّ قلبك لها؟ فيصل آخر مرة اقول لك الزواج هالاسبوع ."
فيصل انقهر منها ومن اسلوبها وقال لها:" لاتخلين اضطر اسوي شي مايعجبج ولايرضيج يالله مع السلامة." وسكرالتلفون قبل لايسمع اي كلمة منها تخليه يفقد اعصابه فيها.

^^^^^^^^^^^^^^^^^^^^^^^^

[حورالعين666]

بشقة فهد بالبلكـونة..

سعود:" خلاااااااااااص زهقت طفشت تعبت مليت مافيني صبر اكثر من جذي..!!"
فهد:" انت اللي مصختها وطولتها وياها صار لك اكثر من شهرين ونص وانت على هالحال يامسج ياتلفون ياطلة على الماشي بالمجمع والله لوعت جبدي وياها، وين كلامك قبل بتقضي عليها بسرعه ، وخصوصاً لما عرفت انها اخت اللي مايتسمى ، اشوفها صارت تمشيك مثل ماتبي هي موالعكس..!!"
سعود:" تخسي هي اللي تمشيني بس لاتنسى البنت مالها سوالف قبل مثل اللي عندك، وأأكد لك قريب وقريب وايد بعد بخلص مهمتي وياها وبنسافر."
فهد:" اقووول اخلص بسرعه تراني مليت القعدة طفشت ."
سعود:" انا اكثر منك يالحبيب."
فهد:" اقووول بعدين بتمرني حبيبة من الحبايب هني شرايك تقعد وياي؟"
سعود:" لامالي خلق بطلع شووووي."
فهد:"اقووول لك اقعد تقول بطلع بعدين وش عندك تسويه غير لدوارة بالشوارع والاتتكلم بالتلفون ويافرسك."
سعود:" مدري اخااااف اللي جايبها ماترضى بقسمة اثنين..؟!"
فهد:" ومن متى تهتم انت لهم ترضى والاماترضى ، وبعدين بتسوي اللي نبيه غصبااااا عنها والانسيت اخووووك ثعلب مكّــار!"
سعود:" مانسيت ياثعلب."
وهو يضحك ويطبطب على جتفة:" عفيه عليك خلك قدها وقدود."
وبعد سوالف بإنتظار الخبلة اللي بتسهر وياهم وقبل لاتوصل بربع ساعه...
سعود:" بسألك فهد وش سويت وياسحر؟"
فهد:" شلون يعني؟"
سعود:" اشوفك ساكت عن سالفتها، يعني ماسويت شي بالاشرطة اللي عندك؟"
فهد:"لاللحين قبل لااسأفر بسوي فيها مقلب حلوووو بتحبه واااايد بخليها تعيش احسن عيشة."
سعود:" شكلك ناوي على فضيحة كبيرة."
فهد:" موبس فضيحة بخليها تتمنى انها مانولدت ابد."
سعود:" تدري خاطري اشوف وجه اخوانهم بعد مانسوي فيهم سواتنا هههههههههههه."
فهد:" وانا اكثر ، سحر انسانة متعجرفة زين ماسوت ميثة يوم عرفتها علينا ، كان ودي احطم غرور انسان وكبرياءه ، هي وايد كانت شايفه نفسها وكأن مافيه ناس اعلى منها مستوى ومقام. استمتعت واااايد وانا احطمها ، وبستمتع اكثر لين اكمل اللي بديته."
سعود:" شد همتك وانا ويااااك."
وقطع عليهم صوت تلفون فهد اللي كان اتصاله من الحبيبة المنتظرة واقفه بره يم الباب..!!

^^^^^^^^^^^^^^^^^^^^^^^^
دخلوا الكوفي شوب وقعدوا اثنينهم ويفكرون بالطريقة اللي راح ينتقمون فيها من فهد..
جاسم:" زين ماقلت لي وش ردت عليك؟ وافقت اولا؟"
عبدالعزيز:" وافقت بس شكلها مترددة وااايد ."
جاسم:" اخاف تخرب علينا ، وش تبي فيها انت خلها تولي مكلّف انت بمشكلتها."
عبدالعزيز:" لابس ودي يكبر الانتقام واذا كان اكثر من شخص يبون ينتقمون يكون احلى وألذ."
جاسم:" عارف هالشي بس اخاف تخرب علينا وتفضح خطتنا بدال ماتساعدنا."
عبدالعزيز:" مااعتقد وانت لوتدري وش مسوي فيها فهد ماقلت هالشي ، واناعارف حجم الحقد اللي بقلبها وبداخلها."
جاسم:" شكلها عانت وايد منهز"
عبدالعزيز:" فوق ماتتصور ، بصراحة انا ماعمري ساعدت احد بحل مشاكله بس هي راح اساعدها بس موعلشان سواد عيونها لاااا ، علشان انتقم من النذل."
جاسم:" زين وش قررت بتسوي الخطة اللي قلت لك عليها؟"
عبدالعزيز:" اسمعني البنت تعرفني زين وش رايك نعرفها على سعود لأنها ماقط شافته واكيد سعود بينجر بسرعه بمجرد يسمع كلمة فرس حلووة وصعبة."
جاسم:" يعني تبيني اعرفهم على بعض؟"
عبدالعزيز:" انت خبل شلون تبي تدخل بالصورة وسعود يعرفك ، بنخلي تعارفهم يجي صدفه وبأسرع وقت واذا تقدر من الليلة ادبرّ لهم لقااااء حميم..!!"
جاسم:" هههههههههههه حميم مرة وحدة ، اممممم الليلة يمكن بس مواكيد خلني اخلي حبيبتي تكلمها واكيد بتتصرف هي بمعرفتها."
عبدالعزيز:" الابسألك حبيبتك هذي موثوق فيها؟"
جاسم:"لو موواثق فيها ماقلت لها بالخطة ، وبعدين لاتقعد تحاتي وااايد خلّ كل شي علي الحين وبعدين الباقي عليك وسحر."
عبدالعزيز:" انا بكلم سحر بعدين."
جاسم:" اذا مالها لازم اتركها توولي."
عبدالعزيز:" ماعليك انت ، يالله اطلب لنا شي نشربه نشف حلقي من الكلام."
جاسم:" على امرك يابوالدواهي."

^^^^^^^^^^^^^^^^^^^^^^^^

[حورالعين666]

بالمستشفى..

شيخة:" نجود حبيبتي مايصير اتمين جذي لازم تاكلين والابتمرضين اكثر."
نجود بعصبية:" مااابي..."
باللحظة هذي دخل محمد وشوق وسمر الحجرة:" السلام عليكم."
ردوا عليهم كلهم:" وعليكم السلام."
محمد:" شخبارج نجود؟"
طالعته بنظرات كلها حزن وألم:" اللي تشوفه."
حس من طريقة ردها انها معصبة وايد.. سلموا عليها البنات وقعدوا التفتت عليه امه وقالت ودموعها بعيونها:" شوف هذي حالها من جينا لها موراضية تاكل شي ابداً ، الدكتوريقول المغذي مابيكفيها ولايشفيها اذا مااكلت."
محمد بعد ماوقف عند راسها:" نجود كل شي صار خلاص مابيدنا نغيره اونرجعه ، لكن بيدج انتي تغيرين حياتج الأوليه واذا بقيتي على عنادج ومااكلتي شي ماراح تضرين غير نفسج ، واذا على بالج ان اللي تسوينه بيرجع لج فيصل مثل ماكان وبتشوفينه يركض وراج فأنتي غلطانه وانتي اكثر وحده فينا تعرف هالشي ، وزواجه صار وانتهى ومااعتقد انه بيطلقها علشانج لأن ماعنده الجرأه ان يسويها، وبعدين بنات الناس مولعبه يتزوجهم بيوم ويطلقهم يوم ثاني. الكل متضايق ومقهور من اللي سواه فيج بس لوبتنظرين لها من ناحية الشرع ، الشرع بيوقف بصفه وزواجه من وحدة ثانية من حقه,, رغم كل الظروف اللي مرينا فيها ومريتي فيها انتي. ارجوج يانجود تخلين عنج عناد الصغاريه وتفكرين بحياتج زين مازين وتقررين القرار الصح اللي لازم تتخذينه اليوم قبل باجر ، حياتج اهم من حياة انسان تخلى عنج في أبسط الأمور. لاتخلينا نحاتيج ونخاف عليج فوق الخوف اللي احنا خايفينه ، ماتدرين وش حال البيت بعد طيحتج هذي ، شوفي امي المسكينه قلبها بمووت عليج وانتي تكابرين وتعاندين خلج اقوى من جذي ومثل ماقلت لج حياتج بيدج الحين انتي اللي تقررين شلون تكملينها."

كان لكل كلمة قالها محمد أثر كبير بقلبها ، خلاها تصيح بلحظة وبلحظة ثانية مسحت دموعها ورجعت لشفاتها ابتسامة صغيرة ولوانها حزينة..!! حست بروحها ردت لها يوم سمعت كلامه يمكن كانت تبي فعلاً تجذب فيصل لها بمرضها، لكن محد راح ينفعها اذا ماتت..!!

^^^^^^^^^^^^^^^^^^^^^^^^
في بيت بوفيصل..

بوفيصل:" ام فيصل مااشوفج رحتي تزورين بنت اختج بالمستشفى ولارحتي بيتهم تسلمين على اختج وتشكرين لها بسلامة بنتها."
طالعته بطرف عيونها ونفخت ويهها وقالت:" موشغلك."
بوفيصل:" الاشغلي ونص ، وبعدين ياام فيصل خلي عنج لعناد وكبر الراس وروحي زوريهم عيب مهماً كان هذي بنت اختج من لحمج ودمج والاخلاص تبريتي منهم."
ام فيصل:" اوووه صدعتني روحي وروحي ، قلت لك مب رايحه خلاص وبعدين شلون تبيني اروح وهم....."
قاطعها وبحدة في كلامه:" وهم شنوو؟ ماسوو لج شي ولاضروج بشي كل اللي صار لبنتج ولولدج بسببج انتي ودلعج لهم. الحمدالله ان عندي بنت ماطالتها افكارج واحقادج وخربتها."
بقهر ردت عليه:" ياسلام مسوني الساحرة بهالبيت ومخربة الأول والتالي، بوفيصل اشوفك قمت تخورها."
ماتحمل يسمعها اطوول لسانها اكثر من جذي وعطاها طراااق على ويهها خلاها تحس بالألم والقهر اللي يشتعل داخل صدره.. بنفس اللحظة كانت سحر نازلة من فوق وشافت امها حاطه ايدها على خدها وابوها واقف يطالع فيها والشرار يطلع من عيونه..!! عرفت ان صاير هواش بينهم فرجعت لفوق لايقول لها شي وتصير لها سالفة.

دخلت حجرتها وصكت الباب كان متضايقة ومتمللة بنفس الوقت خاطرها تطلع تشتم هواء نقي وتريح بالها ، بس وين الراحة وراها همّ كبير للحين ماانزاح من على جتفها. قعدت دور بحجرتها مرة عند الدريشة اطالع بره ، ومرة قاعدة على الكنبة تفكر ومرة قامت وراحت تقرأ بمذكراتها، ضاق خلقها من العقدة قامت وطلعت بره الحجرة وقفت محتارة موعارفة شتسوي طالعت المكان بعيون حزينة ، تذكرت اختها العنود وراحت لها.. وقبل لاادق الباب ترددت موعارفة ليش التردد هذا اوليش الخوف كان بقلبها، لكن الوحدة والضيق اللي فيها خلاها ادق الباب..
العنود:" تفضل...
فتحت الباب بهدوء كانت العنود منسدحة على السرير وتقرأ كتاب، اول ماشافت سحر صكت لكتاب وعدلت قعدتها وفركت عيونها وهي اطالع اختها بإستغراب.
سحر:" اقدر ادخل؟"
العنود وكأنها مبرمجة:" اي."
قعدت على كنبه كانت يم سرير عنود ، قعدت تتأمل الحجرة كانت دافئة وفيها ريحة لاهي ريحة عطور ولابخور ، كانت ريحة الودّ والدفا ، ريحة الحب والطيبة الصدق والخير الموجودين بقلب اختها الصغيرة.
العنود:" سحر فيج شي؟"
طالعتها بإنكسار:" لامافيني شي."
حست بإختها متضايقة ومكسورة ، لكن ماكانت حابه تضايقها وتضغط عليها.
سحر بتردد:" امممممممممم عنود أبي اسألج سؤال.."
عنود:" سألي."
سحر:" شخبار بيت خالتي؟"
العنود آخر شي كانت تتوقعه ان سحر تسألهاعن بيت خالتها، سكتت شوي وقالت:" بخير الحمدالله."
سحر:" ونجود شخبارها؟ رحتي لها؟"
عنود:" اي رحنا زرناها انا وابوي المسكينة تعبانة ، احس تغيرت وايد بعد الجلطة اللي صادتها..."
سحر بإستنكار واستغراب:" جلطــة..؟"
عنود:" اي ليش انتي ماتدرين؟"
سحر نزلت راسها وقالت:" لااا مدري كل اللي ادري فيه انها مريضة بس ماسمعت شفيها، هي للحين بالمستشفى؟"
عنود:" اي للحين ويمكن اطول لأني سمعت خلود تقول انها ماتاكل وحالتها كلش تعبانه."
سحر:" الله يشفيها ان شاءالله ، عنود بسألج بعد بنات خالتي سمر وخلود شخبارهم؟"
عنود:" كلهم بخير بس تعرفين بعد طيحة نجود كلهم متضايقين."
سحر:" بلى.. تدرين خاطري اشوفهم صار لي اكثر من ثلاث شهور ماشفتهم.."
عنود:" شرايج اتيين وياي بيت خالتي؟"
سحر:" لااا مااقدر."
عنود:" ليش تعالي وياي صدقيني احسن من حبستج بالبيت."
سحر:" عنود انتي صاحية شلون تبيني اروح بعد اللي صار بينا."
عنود:" إبدأي بالصلح انتي، تنتظرين احد فيهم اييج يعني ويقولج تعالي بيتنا الله يخليج؟ تراهم عايشين حياتهم معاج وبدونج ، بس انتي الخسرانة لأن محد عندج كل صديقاتج راحوا ، سحر ردي لأهلج ترى مالج غنى عنهم."
سحر ماقدرت تحبس لدموع اللي نزلت على خدها، رفعت راسها وقالت بصوت مبحوح وعبرة مخنوقة بصدرها:"شلون اروح ومحمد وشوق هناك شلون اروح وانا اللي اذيت محمد وانا كنت اقرب الناس له.. شلون تبيني اروح قولي لي؟"
عنود بحزن:" مدري كل اللي تفكرين فيه صح ، تدرين ودّي نرجع مثل اول نجود وانتي وبيت خالتي كلنا ويابعض لكن للأسف..!!"
سحر:" أكيد بتلوميني على اللي صار صح؟"
ابتسمت لها وقالت:" كلنا نغلط بس اهم شي الواحد يتعلم من غلطه مويكرره."
حست كلام اختها مثل العِبر والعظات رغم صغر سنها كانت اعقل وأفضل منها مليون مرة. انتبهت على الكتاب الموجود على السرير وسرحت بعنوانه (( كيفية التقرب الى الله ))
التفتت لها العنود وهي سرحانه بالكتاب ، سحبته وعطتها ايها وقالت:" كلش حلو الكتاب اخذيه اقرأيه اذا حبيتي."
سحر اطالع لكتاب وداخلها مثل النار المشتعله، صراااع ذاتي موقادرة تمد ايدها وتاخذ لكتاب.. اخذته بعد تردد كبير فتحت الفهرس وقعدت تقرأ تقسيمات الكتاب وكان اول جزء فيه يتكلم عن (( الذنوب وكيفية التطهرمنها )). تابعت قراءة الفهرس لحد ماقطع حبل افكارها صوت العنود:" شكل الكتاب عاجبج؟"
سحر بإبتسامة هادئة:" ايه باخذه اذا ماتحتاجين له."
عنود:"لا مااحتاجه واذا تبين كتب غيره عندي بالمكتبه الصغيره هني." واشرت لها بأي مكان حتى لوبغت اي كتاب اتيي وتاخذ بنفسها.
سحر انتبهت لساعتها وتذكرت ميثة:" اقول عنود مشكورة انا استأذنج الحين بروح حجرتي."
وطلعت من عندها وابتسامة عريضة على وجه اختها (( ايييه الله يهديج ياسحر واللي آخر شي توقعته انج اتيين حجرتي وفوقها تاخذين كتاب ديني من عندي..!! )) كانت علامات الاستفهام كبيرة بداخل عنود لكن الشي الوحيد اللي كانت تعرفه ان اختها بدت تتغيرعن اول.

^^^^^^^^^^^^^^^^^^^^^^^^