اتصل لها لكنها ماترد ، كان معصب حده يبي يغير مكان موعدهم بس الحقيرة موراضية ترد عليه...!!
سعود:" شفيك معصب يمكن نايمة والا تلفونها بمكان وهي بمكان."
بعصبيه رد عليه:" لاااا الحقيرة ماتترك تلفونها ، أكيد ماتبي ترد علي، لكن انا برااويها وبخليها تعرف منو فهد."
سعود:" دق عليها مرة ثانية يمكن ترد عليك."
فهد:" ادق وأشووف."

كانت سحر راقدة وتلفونها سايلنت ولاتدري فيه ،قعدت على صوت أمها تصرخ على الشغالة.. تمت مغمضة عيونها لين تذكرت ميثة وقامت بتتصل فيها، وأول مارفعت التلفون شافت فهد يتصل (( أففف وش يبي هذا بعد لووع جبدي ))
ردت عليه بآخر لحظة قبل لاينقطع:" ألوو."
فهد بقهر وعصبيه:" جان لارديتي وينج فيه؟"
سحر برود:" والله كنت راقدة والاماتبيني ارقد بعد؟"
فهد:" لارقدي ، سمعيني زين لاتعورين راسي زود ، أبيج اتيين المارينا أبي اشوفج هناك لاتمريني البيت اوكي."
سحر:" بسسس."
فهد:" لابس ولاشي نفذي اللي اقوله لج."
سحر:" زين."
كانت مقهورة ومتضايقة منه ، حتى بالنوم يلاحقها..!!!

بسرعه قامت أخذت شآور سريع ولبست ثيابها ، حطت ميك آب خفيف على ويهها وطلعت ، شافت أمها وهي بتطلع من باب البيت..
أم فيصل:" وين رايحة؟"
سحر بإرتباك:" هااااا ، بروح المجمع وبمر على صديقتي مريضة شوي."
ام فيصل:" اليوم نجلاء كانت بالبيت ليش مانزلتي؟"
سحر:" كنت نايمة يمه مدري ، يالله لااتأخر مع السلامة."
أم فيصل:" الله يحفظج ان شاءالله."
طلعت وركبت السيارة وخلت السايق يوصلها المول ، دخلت المجمع وكان هدووء مافيه الاقليل من الناس ، وأغلبهم هنود..!!
تمت تنتظر الزفت فهد ، تذكرت انها كانت تبي تتصل لميثة تشوف أخبارها ودقت عليها لكن تلفونها كان مغلق..!! دقايق والافهد واقف قبالها..
سحر بقلبها (( اعوذبالله ))..
فهد وإبتسامة عريضة مليئة بالخبث:" هلا والله يعني بس لين نبيج اتيين وين قبل تمرين عليّ من غير مااقولج."
سحر:" ماعندي وقت الجامعه جريب بتفتح واجهز لها."
فهد:" ايييه زين زين ." سكت شوي بعدها كمل كلامه:" سحر تدرين وين ميثة؟"
سحر:" ليش هي مو وياعبدالعزيز؟"
وهو يطالع يمين ويسار:" انتي دريتي باللي صار؟"
سحر:" ليش انت مادريت باللي صار؟"
فهد انقهر لأنها تجاوب على اسألته بسؤال:" سحر شفيج تجاوبيني بأسأله ، انتي دريتي اولا؟"
سحر:" اذا انت تدري فأنا أدري."
فهد:" زين ، تقدرين تتصلين فيها؟"
سحر:" ليش ماتتصل انت والا خايف على عمرك يعدونك؟"
فهد وبتنبط جبده منها:" عن السخافة ياسحر، مو انا اللي اخاف ، سمعيني أبيج تمريني الليلة الشقة."
سحر:" اذا كنت ناوي تسوي اللي سويته ذيج المرة فأنت غلطان، فااهم..!!"
فهد ويضحك بسخرية:" هههه شوفي انا اللي ابيه بصير، بس انا هالمرة مابيج الا انا وبرووحي يارووحي."
سحر ((( آآآآآآخ آآآخ ياليتني أقتلك وأستريح )))
فهد:" زين يالله انا بروح وراي شغل لاتنسين ، باااااااااي."
سحر (( باللي مايحفظك ان شاءالله ، الله ينتقم منك مثل ماسويت فيني .))
تركها وطلعت هي من المول بعد مااتصلت على السايق وراحت بيت ميثة علشان تشوفها..

^^^^^^^^^^^^^^^^^^^^^^^^^

فيصل كان مارّ على نجلاء وأخذها علشان يتغذون بره بأحد المطاعم ، كان قاعد يمها ويسولف ويضحك ، مستانس لأنها قدرت تدخل قلبه بسرعه..!! وبنفس الوقت كان محمد وأحمد كل واحد بسيارته مارين بنفس الشارع من الجهه الثانية ، انتبه محمد لفيصل اللي كان مشغوول بزوجته الجديدة.. وأحمد بعد نفس الشي انتبه لمحمد اللي غير اتجاه سيارته ولحق ورى سيارة فيصل..
أحمد بسرعه دق على محمد:" شفيك وين رااايح؟"
محمد:" ماتشوف اللي اشوفه؟ فيصل طالع يستانس وزوجته واختنا بين الحيا والموت بالمستشفى.."
أحمد:" زين انا لاحقك الحين.."
فيصل بعد دقايق انتبه على سيارتين يلاحقونه ، ماكان قادر يركز من بالسيارتين..
نجلاء:" شفيهم هذلين يلاحقونا؟ مجانين؟"
فيصل:" مدري صبري خليني اشووف من هذلين." طالع رقم السيارة وعرف انه محمد (( هذا شجابه الحين؟ وش يبي؟ لاااا وراه احمد بعد؟ متقصدينها هذلين؟ ))
نجلاء:" فيصل ليش وقفت؟"
فيصل:" هذلين عيال خالتي صبري بشوف شيبون."
ونزل من السيارة بعد ماوقف على جنب ، ونزل محمد وأحمد والشر يطاير من عيونهم...
فيصل بعصبيه:" شفيكم تلاحقوني انتوا مجانين؟"
محمد بصرااخ وعصبيه:" المجانين احنا اللي وثقنا فيك وعطيناك أختي المجانين احنا اللي عديناك مثل واحد من اخوانا."
أحمد كان موقادر يتحمل فهجم عليه وقام يضربه:" ياالحقير ، بسبتك أختي بين الحيا والموت بسبتك ذبحت اختي." وتم يضرب فيه ومحمد يحاول يهدأه وموقادر ، وفيصل بعد قام يضرب أحمد ويتهاوش وياه ، أما نجلاء فكانت خايفة واطالع اللي قاعد يصير بره ، بهاللحظة مرّت عليهم دورية شرطة وشلتهم كلهم المركز...

بالمركز..
الضابط:" الحين انتوا كبار ومتربين تشوفون الشارع مكان مناسب لحل الخلافات العائلية؟ والا متى كان الضرب الحل الأنسب؟"
ثلاثتهم كانوا واقفين ومنزلين روسهم للأرض.. ويسمعون الضابط اللي قاعد يعطيهم محاضرة..!!!
فيصل:" حضرة الضابط هم اللي بدأو الضرب ، انا كنت طالع وزوجتي و,,,"
أحمد:" تستاهل وأردى."
الضابط بعصبيه:" خلااااص اسكت، اذا تكلمت مرة ثانية أحبسك ثلاثة ايام يمكن تتعدل وتتسنع."
محمد:" آسفين حضرة الضابط ، الغضب والقهر سيطر علينا انا واخوي ، واوعدك ان شاءالله ماتتكرر."
الضابط:" انا باخذ عليكم تعهد على انكم ماتتعرضون لبعض بأي سوء ، فاهمين انا عارف انتوا عيال من.. وعيب عليكم ادخلون آبائكم مراكز شرطة على توافه وخلافات ممكن تنحل بالهدوء. يالله تعالوا وقعوا وكل واحد يتيسر لبيتهم."
ردوا عليه بصوت واحد:" ان شاءالله."
وقبل لايطلعون، الضابط :" أحمد أمسك نفسك مرة ثانية وعن التهور."
أحمد وهو منزل راسه:" ان شاءالله."
وطلعوا من المركزوبسرعه ركبوا سياراتهم وردوا لبيوتهم...!!!

^^^^^^^^^^^^^^^^^^^^^^^^^