كان قاعد بحجرته ويكسر كل شي يشوفه قدااامه كان مقهوور ويتحسر ، دخل عليه سعود وفهد وحاولوااا يهدووونه بكل قوتهم...
سعود:" امسكه من يده ماراح يهدأ وانت تحاجيه بهالطريقة ." ومامداه يكمل كلامه والا تحفة طايره فوق راسه زين ماصادته..!!
عبدالعزيز وهو يصااارخ عليهم:" طلعووووا بررره مابي اشوف احد طلعوووا بره."
فهد:" الله يهداك انت اهدأ."
عبدالعزيز وبعصبية أكثر واكثر واكثر:" اهدأ تقووولي اهدأ، وحياااتي وعمري اللي ضااع ، انا انتهيت وتدمرت خلاص ، لكن انتوووا السبب."
بإستغراب طالعوه :" احنااااا؟"
وهو يهز راسه والعرق يتصبب من ويهه وآثار التعب والأرق باديه عليه:" ايه انتوا حطمتوا حياتي انا كنت بأحسن حال من غير شوفتكم ،طلعوووا بره ولاأبي اشوف وجوهكم."
فهد طالع سعود وأشر له انهم يطلعون ..!!
سعود بعد ماطلعوا من شقة عبدالعزيز:" شفيه هذا قام يخرف..!!"
فهد:" لاماخرف بس اللي فيه موشوي مسكين الله يعينه."
سعود:" غريبة انت تقول جذي؟"
فهد:" ليش شايفني بدون قلب؟ وبعدين عبدالعزيز رفيجي لازم احزن واتضايق لأي شي يصيده. زين خلنا منه شسويت وياالحبيبه؟"
سعود:" أبداً صار لي يمكن يومين مااتصلت فيها بس تدري ودي أشووفها..!"
فهد وهويضحك:" هااااا شصار فيك اشوووفك بديت تحبها؟؟ وين الخطط وين الإنتقام اللي ناوي تسويه."
سعود وبكل ثقة:" لاتخاف الذيب مايطيح بسهاله مثل ماتتوقع."
فهد:" زين حرك نفسك الوقت يمشي بسرعه ولاتنسى ورانا سفر طووويل."
سعود:" اي والله تصدق نسيت ان احنا بنفارق هالديرة."
فهد:" تعاااااااااال بسألك تتوقع ميثوو تدري باللي صار في عبدالعزيز؟"
سعود:" اكيييييد اتوقع انها تدري والا وينها عنه طووول هالايام الا اذا......"
فهد:" اووووووه لاتقوول تتوقع إنه صاااادها؟"
سعود:" اذا كان اللي خبري خبرك اكيد صادها تدري ليش ماتتصل في سحر وتسألها عن ميثة."
فهد:" اتصل؟ لاااا اجيبها احسن."
سعود:" يكون افضل."

^^^^^^^^^^^^^^^^^^^^^^^^

قعد على الكنبه اللي بالصالة فوق وقعد يفكر بكل اللي صار. تذكر شوق بلحظة من اللحظات صار له جم يوم مايدري عنها ولايسأل عنها (( والله اني مقصر بحق هالمسكينه، لازم اعوضها ولاكأن خطوبتنا من شهر بس..!! مدري هي قاعدة والا لا، اممم اقوم اشوفها الصدق انها وحشتني وااايد..!! ))
وقام راح لحجرتها ودق الباب..وسمع صوتها يرد على دقات الباب:" لحظة."
واول مافتحته تفاجأت بمحمد واقف، نزلت راسها وقالت له:" هلا تفضل."
دخل وهو يطالعها ، لأول مرة يدخل غرفتها ، كانت مرتبه وريحتها عطور وبخور ، وألوانها كانت هادئة ومريحة تريح الواحد (( فعلاً غرفة ولاكل الغرف ))
قعد على كنبة كانت تحب تسترخي شوق عليها..!! كانت قاعدة والشيلة مازالت على راسها ومستحية منه موووت..!!
محمد:" شفيج جذي قاعدة بعيد وخايفة..!!"
شوق بإبتسامة خجل:" مافيني شي."
محمد:" وااااضح ، بس موهذا المهم تعالي شوي قريب مااعرف اتكلم وانتي بآخر الحجرة."
قامت وتقربت شوي بس عن المكان اللي كانت فيه، ضحك عليها وقال:" وااايد عليج تعاااالي يمي هنيه على الكرسي هذا."
شوق:" بس انا...."
قاطعها:" لابس ولاشي تعالي وبعدين انا موغريب عليج انتي زوجتي والا ناسية هالشي."
شوق:" مانسيت."
محمد:" بس عيل تعالي وقعدي هنيه وخليني اتكلم وياج شوي."
وتقربت وقعدت بالمكان اللي يبيه محمد ، وكانت بكل خطوة تتقرب فيها يدق قلبهامثل الطبل..
محمد:" ماقلتي لي شخبارج؟"
شوق:" بخير الحمدالله..!!"
محمد بدون مقدمات:" ادري اني مقصر بحقج وايد واكيد تقولين هذا خطبني ونساني والا قعدني بالبيت ولايهتم فيني. بس صدقيني اللي صار طير عقلي كان آخرشي نتوقعه من فيصل."
شوق رفعت راسها وطالعته:" حقك هذا ، وبعدين نجود اختك ولازم توقف وياها واخوانك وعمي ، أما انا فلا تحاتيني مرتاحة الحمدالله ماعليّ قصور ، واذا عن السؤال فيكفيني انك بخير."
محمد يوم سمعها تقول هالكلام حس بلحظة انه ظلمها يوم قال عنها بنت واحد سكير وشك بتربيتها، ظلمها يوم فكر انها ماراح تكون بنت يعتمد عليها ولابشي..!!
شوق سكتت وتمت تفكر ، وقاطع تفكيرها محمد:" بصراحة مدري شلون أرد لج هالطيبة اللي بقلبج ، بس ممكن أعرف وش تفكرين فيه؟ والا مو من حقي؟"
شوق:" مابيك ترد لي شي ، اهم شي نعيش حياتنا بعيد عن المشاكل ونودّ بعض ونحترم بعض. أما وش افكر فيه ، فأنا أفكر بأختي هديل مدري قلبي ناغزني عليها صار لي جم يوم وقلبي مقبوض حاسة ان فيها شي."
محمد:" اتصلتي فيها؟"
شوق:" لاوالله مااتصلت ، بس مدري قلبي حاس ان صاير شي لها."
محمد:" لاااا يمكن لأنج من زمان ماشفتيها تقولين جذي ان شاءالله هي بخير ومافيها الاالعافية. وبعدين ليش ماتزورج هي هني؟"
شوق:" انت تدري ان مُرة ابوي ماتخليها تطلع وخصوصاً لوبتطلع تزورني انا."
محمد:" أمممممم تكرهين مرة ابوج؟"
شوق:" مااكرهها بس اكره تصرفاتها، حتى اختي هدى ماتحبني بس بعد مااكرهها واحبهاواتمنى لها الخير."
محمد:"لكن عانيتي منهم وروج الويل، وبعد تحبينهم؟"
شوق:" اهلي مالي بُد منهم ولابيدي امنعهم من كرههم لي ، اللي يهمني ان قلبي مايشيل عليهم اي حقد او كره ، الحمدالله ان الله عطاني ناس يحبوني واختي هديل وعبدالله يحبوني ويحترموني."
محمد:" والله انج طيبه واااايد ياشوق ترى الطيبه وايد موزينه احيانا."
شوق:" تدري اني احيان افكر اغير من طباعي لكن مااقدر ، حتى لوتجرأت ورديت على احد اهانّي والا غلط علي بشي ، بس بعد مااقدر اواصل على هالمنوال لأن مو طبعي."
محمد:" ممكن اسألج سؤال؟"
شوق:" اسأل.."
محمد:" انتي وافقتي علي لأنج مقتنعه فيني والا كنايةً في احد والا لأنج تعبتي من حياة الظلم؟"
سكتت شوي وردت عليه:" هالأحد هذا قصدك سحر صح؟"
إبتسم وهز راسه، ردت عليه:" انا ماوافقت لأني أبي اهرب من الظلم اللي عشته اوذكريات الشقا اللي مازالت تمر على بالي في بعض الاوقات، ولاوافقت كناااية في سحر مثل ماتقول بالعكس انا كنت رافضتك ولاأبي أرتبط فيك علشان مااسبب مشاكل لك ولا لأهلك."
محمد:" يعني ماكنتي راضية فيني؟"
شوق:" هههه والله موعلشان شي ، بس بصراحة انا اخاف اسبب مشاكل انا في غنى عنها ، وانا موقد سحر ومشاكلها، لسانها وايد طووويل."
محمد وهو يضحك:" شدراااج ان لسانها طويل."
شوق:" قعدت وياها مرة هني بالبيت ، ومرة بخطوبة سيف شفتها.."
محمد:" وان شاءالله غلطت عليج؟"
شوق:" لاتخاف تصرفت ورديت عليها، وصاياك ماراحت بلاش."
محمد:"ههههههههههههههه ايه خلج قوووية جبل مايهزج ريح."
شوق:" اممممم محمد ممكن اطلب طلب."
محمد:" انتي تآمرين."
استحت ونزلت راسها:" مايآمر عليك عدو ، بس ودي اشوف اختي هديل."
محمد:" والمطلوب؟"
شوق:" ودني لها."
محمد:" ان شاءالله انتي بس شوفي الوقت المناسب وانا اوديج."
شوق:" تسلم والله ."
محمد:" ويسلمج، يالله انا الحين بنزل تحت بمرني حمد بعد شوي بنطلع."
شوق:" انتبه لنفسك ولاتسوق بسرعه."
محمد:" ان شاااااءالله جدتي."
وقعدوااا يضحكووون ، كانت العلاقة بينهم تقوى رغم اللحظات القليلة اللي تجمعهم بسبب الظروف اللي قاعدين يمرون فيها. محمد كان مستانس لأنه ارتبط بإنسانة تقدرة وتقدر ظروفة وكل شي فيه...!! كان مستانس لأنها طيبة وتحترمه وقلبها أبيض ومتواضعه لآخر درجه..!! وشوق مشاعرها كانت متبادله ، بدت تحب محمد يمكن لطيبته واخلاقه وحتى عصبيته تجذبها له..!!

^^^^^^^^^^^^^^^^^^^^^^^^