غريبة بين اهلي

[شوق الربيع]

^^^^^^^^^^^^^^^^^^^^^^^^
خلود:" والله تعب اليوم ابي انام."
شيخة:" اي من كثر الشغل اللي تشتغلينه."
خلود:" وش تبيني اسوي يعني أنظف؟ والخدامة وش شغلتها."
شيخة:" شفيها لين تعلمتي ، علشان لاتصيرين خايبة."
خلود وهي راكبه فووق:" اووووه لاتبدين بعوار الراس بروح اانااام موناقصة."
سمر:" شفيج خيووو عليها، بعدها صغيرة."
شيخة:" شو بعدها صغيرة؟ وحضرتج انتي وياها لازم تتعلمون موبعدين لين عرستوا ماتعرفون تسون شي."
سمر:" والله توها الناس علينا."
بدور:" يمممممه خليهم تونا رادين من الخطوبة وانتي بتبدأين لهم بالمحاضرات."
طالعتها:" وانتي ويااااااهم بعد."
بدور:" بل حشى لوأدري ماتكلمت."
شوق:" ههههههههههههههههه محد قال لج."
شيخة:" أحسن وحدة فيكم شووق ماشاءالله عليها تعرف تطبخ بعد."
بدور:" اي شوق ظروفها كانت غير واحنا غير."
شيخة:" لا ماأعتقد ، كان بإمكانج تتعلمين بس انتوا أخيب منكم مافيه ولابحصل كل رقاد وتلفزيون."
شوق:" بدور كلامها صح، ضروفي كانت غير، ماأعتقد اني لوكنت بمكانها راح اسوي شي."
بدور:" شفتي يمه صح كلامي."
شيخة:" يعني انتي تعارضيني بكلامي؟ بدال ماتوقفين وياي تصيرين ضدي."
شوق:" لاموقصدي جذي، بس يعني وجود الخدامة وانتي الله يخليج ان شاءالله هذا يساعد على ان بدور ماتهتم لشغل البيت لأنها في بالها إن الشغل راح يستوي دام فيه خدامة، وأنا قلت بعد لوكانت ظروفي نفس ظروفها كنت مابسوي شي ولابفتكربالشغل أساساً لأن في أحد قاعد يشتغل."
شيخة:" يمكن صح كلامج بس أحنا يوم كنا بالبيت هني دخلنا وياأمي المطبخ علشان نتعلم الطباخ."
شوق:" يمكن زمن أول غير والحين غير رغم التشابه الا ان فيه اختلافات كبيرة صارت، وجود الخادمة ، والمربية ، يغني الكثيرين ويساعدهم على عدم بذل أي جهد. يعني متكلين على وجود الخادمة بشكل كلي حتى بالأكل. وفي ناس لا للخادمة التنظيف وطباخ الأكل لست البيت طبعاً."
بدور وهي تتثائب:" افففف شكلكم بتقلبونها محاضرة اليوم واللي يخليج شووق روحي غيري هدومج علشان اتيين تقعدين ويانا هني."
شوق:" زين أركب دقايق وأرد لكم، عن إذنكم."
شيخة:" أذنج معاج..."
أستأذنت وراحت ركبت فوق ، أول ماطلعت من اللفت ومشت جم خطوة شافت بوجهها محمد قاعد ويافيصل ونجود..!! ماتوقعت انها تشوفهم قاعدين هني إرتبكت وتوترت سلمت عليهم وهي طايفة، كانت وااايد صايرة حلوووة، فيصل إنتبه لنظرات محمد اللي كانت تلاحق شوق بإعجاب..!! حس بذيج اللحظة إن وده يسطر محمد علشان يوعيه، أما نجود فكانت ساكته ولااطالع احد فيهم ماعدا انها ردت السلام على شوق..
فيصل:" محمد، محمد..؟!"
بعد ماإنتبه له:" نعم."
فيصل:" شقلت الحين؟"
محمد:"انا قلت لك اللي عندي ماكو شي ثاني أقوله."
فيصل وهو يطالع نجود:" شفتي أخوووج معند وميبس راسه."
محمد:" فيصل لاأدخل أختي بشي مايخصها خل كلامك وياي."
فيصل:" وشو مايخصها؟ خواتك أكيد لهم تأثير عليك وأكيد أحد فيهم مكلمك والاقايل لك شي."
محمد وبعصبيه:" قلت لك محد له دخل من خواتي ولاأخواني ، كلامك وياي أنا واعتقد ان انا اللي رفضت سحر موخواتي."
فيصل:" زين ، أبيك تقول لي السبب الحقيقي لرفضك لأختي لأن السبب اللي قلته مادخل راسي بصراحة."
محمد:" قلت لك السبب."
فيصل:" لاموهذا السبب، اكيد فيه شي ثاني."
محمد:" قلت لك ماتناسبني وماأعتقد ان اختك بتتحملني وانا للحين مامشيت على ريولي."
فيصل:" شدراك انها مابتتحملك هااااا؟ انت سألتها، أخذت رايها شفتها وش بتقول؟ لوبس أخذت قرارك بنفسك وقررت أنك تهينها قدام الكل؟"
محمد مااستحمل كلام فيصل، ولاقدر يمسك أعصابه:" اااااايه عندي سبب ثاني وثالث، تبببببببي تعرف ، ماعندي مانع أقووول لك وش الأسباب ياولد خالتي ياخووووي، أختك المصون ماااااااااتبيني ماتحبني نستني من زمااااان ، لأنها ماتبي شخص معاااااق مايمشي، لأني مابرضي غرورها وكبريائها، عرفت السبب؟؟ والا بعدك مومقتنع؟ اعتقد ان هذا سبب كافي لرفضي لها، وآسف ماعندي كلام ثاني أقوله عن اذنك."
نجود كانت اطالع ومنصدمة من اللي قاعدة تسمعه، مومصدقة ان سحر تقول عنه جذيه..!!
فيصل ظل واقف بمكانه يطالع محمد اللي أخذ عكازه ومشى ، وبنبرة حادة:" محمد.."
وقف محمد وطالعة..
فيصل:" منوومدخل هالحجي براسك؟ " وهو يطالع شوق ويأشر عليها:" هذذذي اللي فرّت مخك؟"
نجود تفاجأت من تصرف فيصل ، أما شووق فجمدت بمكانها وحست بنظرات الغضب والكرة بعيون فيصل اللي لأول مرة يشوفها..!!
محمد:" لاأدخلها بينا يافيصل، شوق مالها أي دخل برفضي لأختك. وأعتقد إن لي أذن أسمع فيها مايحتاج أحد يقول لي."
فيصل:" لييييش إدافع عنها؟ شتحسبنا غشمان مانشوف ولانفهم، نظراتك ودفاعك عنها..."
محمد:" إلزززم حدودك وعن الغلط ، وحتى لوكان صح موشغلك، اللي بيني وبين أختك أنتهى ومالأحد شي عندي، وأعتقد..."
وقاطعته نجود:" بس حرااام عليكم شفيكم كليتوا بعض أنتوا أهل ، مايصير تسوون في بعض جذي، فيصل أرجووك مهماً كان هذا ولد خالتك..."
فيصل:" انتي اللي أرجوج لاتتدخلين..!!!"
محمد:" فيصل ماأعتقد إن لك حق تحاسبني على اللي اسويه ، عن اذنك."
فيصل:" لحظة يامحمد،耠من اللي ماله حق يحاسبك انت أهنت أختي والظاهر على حساب هذي." ومازال يأشر على شوق..!!
محمد:" قلت لك مالها دخل ، اذا تبي تتأكد اسأل أختك وهي بترد عليك ، انا راسي عورني وبروح أرتاح." تركه ومشى عنه لكن المسكين قبل لايكمل مشيه تعرقل وطااااح ، نجود على طوول ركضت لها ومسكت يده بترفعه.. سحب إيده وطالع فيصل وقال بكل حمق:" تتوقع أختك بتتحمل واحد جذي؟ ماأعتقد." سحب عكازة ورفع نفسه بنفسه .
كانت نجود اطالعه ودموع الإنكسار بعيونها..!! ماكان ودها بيوم تشوف أخوها وريلها جذي. أما فيصل فأنسحب بصمت ونزل بسرعه استأذنت نجود علشان تلحقه بعد ماأعتذرت من أخوها على اللي سواه فيصل وقاله..!!
أما شوق فكانت واقفة بمكانها تفكر بفيصل ومحمد وسحر والكلام اللي انقال، هي وش ذنبها تتهم بهالتهمة الباطلة..!! محمد مشى ووقف بعد ماطاف شوق بشوي وقال لها:" أنا آسف، خليتج بموقف إنتي في غنى عنه."
شوق وكأنها مختنقة بدموعها وبصوتها المبحوح:" اللي صار صار، والظاهر مقدر لي أني القى المشاكل بكل مكان..!!"
محمد:" أنا أكرر إعتذاري ماكان لازم أخليه يتجاوز حدودة ويسبب لج الإحراج."
شوق:" قلت لك اللي صار صار، بس حبيت أقول لك إن عمر الخلافات ماتنحل بالصراخ، وكان المفروض تاخذ فيصل وتتفاهم وياه بالهداوه وتقول له اللي تبي تقوله ، أنا أعتذر لك عن كلامي، بس يمكن سحر لها ظروف خلتها تقول هالحجي، بالرغم اني عارفة ان مافيه وحدة تحب إنسان من قلب وتتركه بهالسهولة هذي."
محمد ظل ساكت ويفكر بكلامها وطالعها:" انتي اللي تقولين جذي؟ ادافعين عنها وانتي اللي سمعتيها بإذنج تقول انها.."
شوق:" أنا عشت حياه يمكن محد عاشها وقليل اللي عاشها، وهذا خلاني غير عن الناس يمكن طيبتي زايدة عن حدها، بس صدقني عمر الكره والإنتقام مايحرق الا صاحبه آسفة مرة ثانية أستأذنك."
محمد:" أذنج معاااج." وقبل لاتمشي قال لها:" أتمنى لين أحد سألج شصاير تقولين مدري."
ماردت عليه وكملت مسيرها، تركته وتركت كلامها حيرة بقلبه..!! شلون وحدة مثلها تتكلم جذي، غيرها ينملي قلبه حقد على اللي أذااه..!! لكن صدق المثل اللي قال أصابيع إيدك مو سوى.
شيخة وباقي البنات كانوا قاعدين ويضحكون ويسولفون إستغربوا نزول فيصل وراه نجود اللي حتى ماإنتبهت لوجودهم..!! وبعد مانزلت شوق من فوق قعدت ولاحظت علامات التعجب والإستفسار على وجوهم..
شيخة:" شووق شصاير فوق؟"
شوق ماكانت حابة تجذب عليهم بس وعد الحر دين عليه:" كأن فيصل ونجود وأخوج محمد كانوا يسولفون عن سحر وسبب..."
وقاطعتها شيخة:"انتي من صدقج جاي فيصل هني علشان هالسبب؟"
شوق:" ايه."
سمر:"الظاهر انه صاير شي خلاه ايي ويتكلم بهالموضوع؟."
بدور:" يمه ليش ماتروحين تسألين خالي؟"
شيخة:" شوق هو محمد بعده قاعد بالصالة؟"
شوق:" لاشكله كان متضايق ودخل الحجرة."
سمر:" خيتوو شيخة لاتروحين له ماراح يفتح لج الباب الحين."
شيخة:" شفيكم من قال بروح له الحين ، انا افكر بشي ثاني."
بدور وهي اطالع شوق:" انتي متأكدة ماسمعتي شي ماشيات؟"
شوق:" ووول عليج ، قلت لج اللي اعرفه."
بدور:" زييييييين لاتاكلينا."
كانت هذي آخر مرة يدخل فيها فيصل بيت بومحمد بعد اللي صار..!!

بالسيارة كانوا اثنيتهم ساكتين، نجود كانت خايفة تفتح الموضوع مرة ثانية ويقعد يصارخ عليها ويسوي حادث..!! ففضلت إنها تسكت ولما تروح البيت تتفاهم وياه بالهداوة..!! وبس وصلوا البيت وسكرت وراها الباب:" فيصل...!!"
فيصل:" خيييييير شتبين تقولين بعد في شي ماانقال وتبين تكملينه هني."
نجود:" فيصل شفيك تعاملني كأني أنا اللي مسوية كل هذا."
فيصل:" لاأبد سلامتج ، موأخوج اللي مسوي سواته."
نجود:" هذا انت قلتها اخوي موانا."
فيصل:" الظاهر كلام أمي طلع صح ، وجود نسيبتكم بالبيت خرب كل شي ، وغيركم واحد واحد."
نجود:" حرااام عليك لاتظلم البنت، وثانيا محد يقدر يأثر علينا ولايتحكم فينا اذا كان هذا اللي تقصدة ، فيصل محمد على ماأظن وضحك لك سبب رفضة لسحر وأعتقد إن هذا من حقه."
فيصل:" أتوقع أي شي منج ، إلا إنج تشكين بأختي وتوقفين بصفهم."
نجود:" هي حرب والا حرب؟؟ وشو اللي اوقف بصفهم والابصفك ، سحر الكلام اللي قالته ماينقال وأي واحد بمكان محمد كان ممكن يسوي جذي وأكثر."
فيصل:" خلااااااااص حكمتي عليها انها قالت هالحجي ، ماصبرتي لين نسألها والا بس مدام اخوج قال جذي يعني صج."
نجود:" أنا ماقلت جذي، بس ماأعتقد إنه بجيب كلام من عنده."
فيصل:" وليش مايكون صح ، شوق اهي اللي وازته ومخربة بينهم."
نجود:" ردييييييينا على شووق البنت ماصار لها جم شهر من دخلت البيت وخلاص لبستوها هالتهمه..!! هي وين وانتوا وين مااعتقد انها تسوي جذي."
فيصل:" اللي مثلها تربى في بيئة سيئة ماأعتقد إن الشر مايشمي بعروقة، وأهي تربية أبوها وخالتها اللي على قولتكم أذتها أذية."
نجود كانت اطالعه بإستغراب وتسمع كلامه وهو مومصدقة إن فيصل الإنسان الطيب إنعمت بصيرته وتحول بغمضة عين إلى إنسان شكاك وظنون بالناس..!! ماتحملت كلامه تركته وراحت لغرفتها تنام.. وتركته وأوهامه..!!

^^^^^^^^^^^^^^^^^^^^^^^^
قعدت الصبح وغسلت وجهها بسرعه وطرشت مسج لبنت خالتها، طبعاً تنفذ وصية أمها..!!
في بيت بومحمد إستلمت سمر المسج اللي أرسلته لها سحر وتقول فيه ( سلام شخبارج سمر أدري مستغربة إرسالي للمسج بس بغيتج بسالفة ضروري ، ممكن أتيين بيتنا؟ بخلي السايق يمرج اذا تبين؟ )
سمر ظلت تعيد قراءة المسج مرة ومرتين وثلاث ( غريبه شتبي من الصبح؟ وضروري بعد؟ الله يستر) وبعد ماخلصت من الريوق راحت لأمها المطبخ علشان تستأذن منها..
أم محمد:" إيـه ماعليه روحي لها، وسلمي عليها وأبيج تشوفين أخبار خالتج."
سمر:" ان شاءالله ، ماراح اتأخر كلها نص ساعه وانا يايه."
أم محمد:" سلمي على خالتج زين."
سمر:" يوصل يمه."
وتركتها بسرعه وفعلا كلها عشردقايق وكانت سمر قاعدة عند سحر بغرفتها..
سحر:" سمر جذي أهون عليج ماتسألين عني ولاحتى إتصال أو مسج ع الاقل والاماأستاهل."
سمر:" لامن قال جذي."
سحر:" موباااين من ذيج الليلة وانتي ماكلفتي عمرج وسألتي عني."
سمر:" والله انشغلنا وصارت خطوبة أخت شوق و......"
وقاطعتها:" الظاهر هالبنت شغلتكم وااايد وغيرتكم حتى علينا."
سمر بنظرات إستنكار وإستغراب:" شنوو وش اللي غيرنا؟"
سحر:" ايه تغيرتوا ، وانا أبيج بهالخصوص.."
سمر واللي موفاهمة وش تبي منها:" سحر، صاااير شي؟ خوفتيني."
سحر وهي تعدل قعدتها وقابلتها:" شووق."
سمر:" شفيها شووق؟"
سحر:" مالاحظتي إنها من دخلت بيتكم وانتوا متغيرين حالكم ماعاد مثل قبل."
سمر:" بالعكس عادي ماشوف فيها أي شي ، بالعكس."
سحر:" غلطااااانة ونص، تقدرين تقولين لي ليش أخوج سوى جذي بذيك الليلة؟ أكيد ماتعرفين الاجابة وكلكم نفس الشي."
سمر وحاسة إنها تبي تلعب بعقلها:" لاتقولين لي ان شوق لها دخل."
سحر:" علييييييييج نور يابنت الخالة ، الحين انتي تتخيلين بعد سنين الحب اللي بيني وبين محمد يرفضني وبكل هالسهولة؟ وبدووون أسباب؟ مايدخل العقل ، صح والاانا غلطانة؟"
سمر:" صح كلامج."
سحر:" زين إنتي مالاحظتي تغيرة علي من يوم رجع من السفر يعني بنفس الوقت اللي هي دخلت فيه البيت، تعرفين شغله أمي تقول إنها يمكن تسوي سحور مدري شنوو وترشه بالبيت."
سمر:" لالالالا ياسحر حرااام عليج لاتظنين بالناس وانتي ماشفتيها، وثانياً هي وش خصها وليش تخرب بينكم وهي عمرها ماشافتكم ولاتعرفكم."
سحر:" حبيبتي هذا يسمونه لعانه، غيييره انتي نسيتي الحياة اللي عاشتها انتي ادرى فيها، ماأعتقد إنها راح تكون مختلفة عنهم أبدااااا."
سمر ظلت ساكته وتفكر، بس كلام سحر ماأقنعها، بس الشيطان شاطر قدرت سحرت تخلل الشك داخلها وتخليها تفكر بشوق..!!
سحر:" صدقيني أنا لوماشفت أسلوبها وتصرفاتها ماتكلمت حتى امي وياي بهالشي وماأعتقد إن أنا بييب حجي من عندي."
سمر:" بس شوق قلبها طيب وموممكن تأذي أحد."
سحر:" حبيبتي التمثيل شي موصعب على أمثالها، ممكن إنها تمثل دور البنت الطيبة المغلوب على أمرها وتتمسكن لحد ماتسيطر على الأكو والماكو..!!"
سمربنظرات حيرة:" الأكو والماكو...!!!"
سحر:" اييييييه وش تتوقعين منها يعني، اكيد بتسوي جذي لحد ماتجذبكم وتسيطر عليكم وتوهمكم بطيبها وغيرها لحد ماتلهف كل شي وانتوا ياغافلين لكم الله. سمر عمري انتي ماتلاحظين انكم تعلقتوا فيها بصورة سرريعه مع إن معرفتكم فيها كانت سطحية جداااا."
سمر:" سحر موكأنج تبالغين وااايد يعني معقولة إنها بتسوي كل هذا وهي ماكانت تعرفنا وحتى جيتها لبيتنا ماكان مخطط لها."
سحر:" افففففففف ياسمر إنتي يعني ماتفهميني أبدااا ، حتى لو ماكان مخطط لها مثل ماتقولين، بعد ماشافات إن الوضع استحلالها خططت وقامت تنفذ اللي براسها، وموبعيدة حتى انها ترسم على محمد علشان تاااخذه وتتزوجه وبتشوفين."
سمر:"مستحييييييل، سحر ليش حاطة عليها هالكثر، شسوت لج؟ لخبطتي مخي حتى موعارفة شقولج."
سحر:" عمري مايحتاج تقولين أأأأأي شي إنتي فكري بكلامي وشوفيها راقبيها وبتتأكدين بنفسج إن كلامي صح أميه بالمية..!!!!"
وبعد ماغيروا الموضوع وسوالف دامت يمكن ساعه، وهي كانت ماتبي تبقى أكثر من نص ساعة..!! تركتها وهي في حيرة وشك بالكلام اللي قالته سحر ( معقوولة ياسحر تظنين بالناس وتشكين فيهم جذي؟ بس جزء من كلامها صح..!! لكن حرام أشك بالبنت وانا ماقط شفتها سوت شي ولاأذت أحد فينا، أوووووه ياسحر الله ياخذ ابليسج صدعتيني بكلامج، لكن....لكن شنوو؟ اففففففف انا وش لي اروح لها أكيد هي تبي اطلع ألف حجة علشان ترد محمد لها بأي طريقة، لالا ماأظن سحر تسوي جذي هي صح تحبه وماتبي الاهو بس مومعقولة انها تتهم شوق مني والدرب، يعني في شي..؟! لالالا أعوذ بالله من ابليسج ياسحر، ماراح أظن ولاأشك فيها الا اذا شفت شي بعيني."
ردت سمر البيت، وبنفس الوقت طلعت سحر من بيتهم علشان تلحق على فهد اللي وعدته إنها تروح له البيت الساعه عشر، طبعاااا طاف ع الوقت ربع ساعه تقريباً لكنها سرعت بالرووحة..!! وفي المجمع إلتقت كالعادة بالشيطان ميثة وأخذتها لشقة فهد، وإتفقت إيها إنها تلتقي فيها بعد ماإدق عليها كالمعتاد علشان تمر عليها وتاخذها..!!
وركبت اللفت بسرعه ودقت على الطابق الثالث، وكلها ثواني وهي داقة باب الشقة.. فتح لها فهد الباب كانت متلهفة وااايد لمعرفة المفاجأة اللي محضرها لها حبيبها.. بس مابينت له هالشي أبداا.
فهد:" هلا حياتي تفضلي."
دخلت وقبل لاتفصخ شيلتها إنتبهت لوجود عبدالعزيز قاعد على الكنبة، إرتبكت وإبتسمت له:" هلا عبدالعزيز شخبارك؟"
عبدالعزيز وبإبتسامة كلها خبث ومكر:" هلا بيج بخير دامج بخير."
فهد:" تفضلي داخل الحجرة.."
وطالعته وكأنها متضايقه لوجود عبدالعزيز بالشقة ، لأنها ماكانت تتوقع وجوده.. وبس دخلت الحجرة:" فهد ليش عبدالعزيز هني؟"
فهد:" بس جاي يزورني، ماعلينا منه انتي مويايه علشاني انا خلااااص تركيه بره يصطفل."
سحر:" شخبااارك إنت؟"
فهد:" بخير بشوووفتج ياحياتي ، زين أبيج اتقعدين هني." وأشر لها على الكرسي اللي مقابل التلفزيون. قعدت وهي تفكر بالمفاجأة أو الهدية اللي يبي يعطيها اياها. شغل التلفزيون وركب وجهز الفيديو.. وطلع من صندق صغير عنده شريط فيديو وقبل لايخليه سألته:" حبيبي شصاير؟ وش قاعد تسوي ، جايبني هني علشان أطالع شريط فيديو؟!"
فهد واللي حس إنها غبيييية لآخر درجة:" عمري صبري شوي الحين بتشوفين الهدية."
ودخل الشريط وأخذ جهاز التحكم وقعد على الطرف الثاني من الغرفة على طرف السرير.. وقال لها:" يالله طالعي."
وشغل الشريط في لحظة سحر حست نفسها بحلم موعلم ، حست إن الدم بجسمها كله توقف وقلبها ماعاد ينبض..!! جمددددت بمكااانها اطالع روحها ويافهد، كانت أكبر صدمة ممكن تلقتها بحياتها. كان الشريط صوووت وصووورة واااضحين كل الوضوح يعني موممكن أحد يشكك بإنها موهي اللي بالشريط هذا.. حست نفسها بألم وحيرة طالعت فهد وصرخت فيه:" ياالحقيييييييييير، ياحيووان..!! "
لكن إنعدام الضمير وضعف البصيرة مازحزحته شعره وحده ، بالعكس كان قاعد يضحك عليها ويستأهزأ فيها..!! قربت صووبه وهي مازالت تصارخ وتسب فيه وتلعنه وضربته على صدره وويهه ، لكنه كان أقوى منها وجود يدها ورماها على الأرض بكل قوته..!!
فهد واللي خلاص طلع على حقيقته:" ههههههههههههه وانتي على بالج إني صج بحب لي وحدة مثلج..!! أنا عمري ماشفت وحدة غبية وغشيمة مثلج."
سحر كانت مصدوومة حست إن كل الكلمات والحروف إختفت من راسها وماقدرت ترد عليه، قامت بسرعه وطلعت من الشقة وطبعااا عبدالعزيز كان قاعد بالصالة وشاف الحالة اللي طلعت فيها سحر.. كان حالها لاتحسد عليه بالمممرة ، بسرعه اتصلت بميثة وفي دقايق كانت عند باب البناية ، كانت ميثة ماتدري انه بسوون فيها جذي وهي بالأصل كانت متعااونة وياهم بس إنهم يحطمون كبريائها وغرورها وأنانيتها والذل اللي ذلتها إياه ايااام المدرسة..!!
ميثة وتسوي نفسها ماتدري بشي:" سحر حبيبتي شفيييج تصيحين جذي؟"
سحر وبصراخ:" ردييييييني البيييت."
ميثة:" زيييين بوديج بس شفيج؟"
سحر:" آآآآآآآآآآآآآآآخ، رديييييني البيت ردييييني."
ميثة موعارفة وش اللي صار بالشقة، خافت تتصل بعبدالعزيز وكالعادة يجعمها بجم كلمة ومايقول لها..!!
وصلت سحر البيت وقبل لاتنزل مسحت دمعوها وماتكلمت وياميثة ولاكلمه، ونزلت من السيارة وظهرها محني وكأن هموم الدنيا أنصبت على راسها..!! دخلت بسرعه وركبت لحجرتها قبل ماأحد يشوف حالتها.. دخلت ودفنت نفسها بسريرها تصيييح على اللي سواه فيها فهد..!! وبعد مامرت ربع ساعه تقريباً إنفتح باب الحجرة وكان فيصل ياي يسألها عن الكلام اللي قاله محمد.. بس إستغرب دموعها وشكلها اللي يرثى له:" سحر شفيييييج؟؟؟"
سحر:" مافيني شي خلني بروحي."
فيصل:" شنووو؟ ليش قاعدة تصيحين؟ أحد مضايقج بشي؟"
سحر:"لا بس خلني بروووحي."
فيصل:" سحر سمعيني أنا ياي أسمع إجابة على سؤال واحد."
سحر وبعصبية:" موووووقته يافيصل مووووقته."
فيصل وبحده:" سمعيييني صحيح إنج قلتي ماتبين محمد لأنه إنسان معاق وإنج نسيتيه..؟!"
طالعته بنظرات مليانه دهشة، ومامداها تجاوبه الا وأغمى عليها من الصدمات..!!
فيصل وبصووت عااالي:" سحــــر....!!"
فيصل كان يعتقد إنها طاحت نتيجة السؤال اللي سألها اياه وكان يعتقد إنها انصدمت لأنها ماتوقعت إن أحد يتهمها بهالإتهام..!!

وبالجانب الثاني من هالمسرحية اللي قاعد يلعب فيها فهد دور البطولة كان قاعد يضحك ويسولف وياعبدالعزيز عن الإنجاز العظيييييم اللي حققه..!!
عبدالعزيز:" والله إنك خبيث."
فهد:" عن الغلط ، هذي شطااارة حبيبي."
عبدالعزيز:" زين ماقلت لي وش بتسوي وياها الحين بعد ماراويتها البلوة اللي عندك تتوقعها تتصل والا اتيي لك؟"
فهد:" بتيي غصباااااا عن اللي يابها..!! واذا مااتصلت اليوم بتتصل باجر واذا موباجر بعد اسبوع والاحتى شهر أنا أعرف شلونها اييبها وأدفنها بالحيا..!!"
عبدالعزيز:"يمممه صرت أخااف منك."
ضحك ضحكة عاااااليه حس فيها عبدالعزيز ان خاايفة منه فعلااااااا وخاااايف عليه يحرق نفسه بنفسه بالنااار اللي قاعد يلعب فيها..!!
فهد:" شفيك اطالعني جذي شكلك مفهي."
عبدالعزيز:" لابس أقووول ماعندك من اللي خبري خبرك؟"
فهد:" افاااااااااا عليك عندي روح الثلاجة بتشوف هناك غرشة جديدة جايبها لي صويلح."
عبدالعزيز:" مفعولها مضبوووط والا خرطي."
فهد:" خرطي ويهك روح جبيها وانت تشوف."
عبدالعزيز:" اوووكيك يابطل."
كانت هذي بداية المؤامرة اللي خططها فهد لسحر، واللي راح ينهيها فيها..!!

شوق بين ألم وألم ، إتهام وحزن..ياترى وش تحمل الأيام الجاية لها؟ سمر راح تصدق وتقتنع بكلام سحر؟ والا ماراح تفتكر بالموضوع أساساً؟؟ فيصل وش راح يسوي لأخته ومحمد؟؟ سيف خطوبته بالبارت الياي، راح يمر كل شي على خير؟ نجود راح يتعدل فيصل بتصرفه معاها والاراح يسوووء للأسوء؟ أم فيصل ردة فعلها لما تشوف بنتها بهالحالة وردة فعل بيت أختها..!! وفهد لوين بوصل سحر وياااه؟ أحداث وأقدار في تطور مستمر..!!