الجزء الثاني عشر

كانت مفاجأة مب على الحسبان بالمرة، محمد كان مستاااانس وايد لأنه رجع لبيته وأهله..
أم محمد وهي قاعدة يم ولدها:" ياحبيبي وأخيراااااا رجعت لي."
نجود:"هههههه الله عليج يايمه وانا مالي نصيب من الحب والحنان كله."
أم محمد:" من يقول تعاااالي ياعمري."
خلود:"ههههههه الظاهر اليوم الحب والكلمات الحلوووة ببلاش انا بعد وياكم خخ."
محمد واللي وحشته خلود ودلاعتها:"لالااااا لي بروحي انا ونجود بس، وحتى نجود بتنقلع الحين يعني لي بروحي."
نجود:"لاوالله ياسلاااام حاب يستفرد بروحة بالوالدة حريمتك."
وقعدوا يضحكون عليهم وظلوا يسولفون ويتحجون عن سفرتهم هناك. كانت سحر قاعدة فوق وللحين مانزلت. محتارة شلون تنزل وتقابل محمد الحين. ظلت تفكر وتفكر وأخيراً اتخذت قرارها وقررت تنزل. شوق كانت واقفة بعيد عنهم ماحبت تمنعهم من لحظات السعادة وياأخوهم وأختهم. كان محمد شخصية حلووة ومحبوبة من الكل ولفت نظرها أسلوبة ومرحة معاهم. بدور مانستها بس المفاجأة خلتها تنشغل ولأول مرة عنها. فقررت شوق انها ترد لغرفتها. وفوق الدرج كانت سحر نازلة وشوق بتركب والتقوا وجهاً لوجه وبروحهم..
سحر طالعتها بسخرية:" انتي مكانج موهني."
شوق استغربت كلامها، سحر واصلت مشيها ونزلت لتحت أما شوق فظلت تفكر وهي واقفة مكانها:" شفيها سحر تكلمني جذي؟ شسويت لها؟ انا ناقصة." وبسرعه مشت ودخلت غرفتها تريح نفسها.
وقفت سحر يم المكتبة من بعيد اطالع محمد شلون يسولف ويضحك ويمه العكازين اللي يتكأ عليهم. وهو يضحك ويمازح خلود وقف فجأة، وانتبه الكل للمكان اللي قاعد يطالع فيه. تقدمت بخطوات واثقة من نفسها وسلمت على محمد:" السلااااااااام عليكم، الحمدالله على السلامة."
محمد بإبتسامة ثقيلة:" الله يسلمج، شخبارج؟"
قعدت على الكنبة وظلت ساكته واطالعه بنظرات قهر وهو نفس الشعور، ماكانوا توقعون ان اللقاء بينهم يتم بهالبرود هذا. سحر ماكانت حابة القعدة فقررت انها تطلع .
سحروهي اطالع محمد بطرف عينها:"يمه انا بروح بيت ميثة تامريني شي؟"
أم فيصل:" ليش عيال خالتج توهم واصلين ماقعدتي شي."
سحر:" ماعليه يمه الأيام يايه."
أم فيصل:" زين حبيبتي روحي بس لاأتأخرين وااايد."
سحر وهي رايحة:" ان شاءالله من عيوني، ياالله مع السلامة ياجماعه."
سلموا عليها وطلعت، استغربوا تصرفها هذا حتى امها كانت مستغربة، ظلت مريم وسمر يطالعون بعض وشوي ويضحكون.
مريوم:" شفيها؟ ليش طلعت؟"
سمر:" مدري والله اللي شفتيه شفته، أحسها مب طبيعيه فيها شي."
مريوم:" وانا بعد أقول جذي."
سمر:" والله مااقول الا الله يتمم عليها بعقلها ويهديها."
مريوم:"ان شاءالله، الله يهدي الجميع."
سمر وهي تنادي نجود:" نجووودوو خيوو شيبتي لي من لندن؟"
وقبل لاتجاوبها نط محمد وقال:" وانتي هذا اللي يهمج."و هو يقلدها:" شيبتي لي من لندن."
نجود:"هههههههه لاتخافين ماخليت شي الا ويبته لج انتي وياهالخبلة اللي صوبي."وهي تأشر على خلود.
خلود:" والله ماني خبلة جان تقصدين اللي يمي يمكن." وكانت تقصد بدور.
بدور:"لااااا وش دخلني قالت لج انتي وااالله."
مريوم:" اهم شي وش الصوغة اللي يبتوها لنا انا عاد مايهمني ترى كل واحد يبي صوغته."
محمد:"ههههههه حتى انتي وياهم ياسلااام بس نسيت أقول لج صوغتج عند أخوج."
مريوم:"لا انا ابي صوغتي اللي من عندكم بعد."
بدور:" اوووووه مريوم صج طماعه مايكفيج اللي من اخوج بعد لايفة علينا هني."
سمر:"ههههههه لاانتي ولااهي خلونا انا وخلود نتقاسم الغنيمة وبعدين الباجي حقكم خخخخ."
خلود:" في هذا صدقتي."
شيخة واللي كانت طول الوقت اطالعهم وتضحك على سوالفهم:"هذا اللي فالحين فيه ماتتفقون الا على هالاشيا."
خلود:"لاااا والله نتفق على اشياء واااايد بس انتوا ماتدرون."
سمر:"اي طبعااا ماتدرون مثل مايقولون اتفق العرب على ان لايتفقوا خخخخ."
محمد:"ههههههههه حلووو."
أم محمد:" يالله يبنات خلو أخوكم يروح يريح نفسه، يالله يمه محمد قوم ريح نفسك."
محمد:"ايييي والله تعبان." وتوه بقوم الا يايه مسج من حمد( ياأخي وينك راز ويهك ويا الحريم دااااخل تعال بره اقعد ويا الرياييل.)
محمد طرش له مسج يقول فيه( اكيييييد محترّ خخخخ والله مب طالع القعدة اتينن هني، ويالله ضف ويهك موكفاية بالسفر.)
وبعد ثواني ياه مسج منه( اقوول مالت عليك وعلى اللي يعطيك ويه مرة ثانيه، روووح نام احسن لك)
محمد( اكيد بروح انام عيل اقعد اجابل جمالك)، وبعد ماخلص من المسجات..
خلود:" إحم إحم، الله لنا ناس باليوم عشرين مسج وحنا ولاشي."
محمد:"وووول عليج يالحسودة، هذا حمد يالخبلة يبيني أطلع بره اقعد معاهم"
أم محمد:"لاياحبيبي لاتتعب نفسك أكثر روح غرفتك وارقد لك شوي."
محمد:" وانا قلت له جذي بعد، يالله عن اذنكم." ومسك عكازينه ووقف على ريايله، كان يكسر الخاطر لكن محد فيهم بين له هالشي لأنه مايحب نظرات الشفقة من حد. ركب اللفت أسهل له طبعاً وراح لغرفته.

كانوا البنات مستانسين ويسولفون وضحكهم واااصل لآخر الدنيا. انتبهت مريوم لإختفاء شوق وقالت لبدور:" بدوووروو وين شوق؟"
بدور وهي حاطة يدها على حلجها:"اوووووووه نسيتها والله، وينها فيه؟"
شيخة:" يمكن فوق روحي شوفيها."
وقامت بدور بسرعه، ووصلت عند باب غرفتها ودقت الباب، شوق:" منوو؟"
بدور:"هذا انا."
شوق:" دخلي الباب مفتوح."
بدور:" واااااااااااالله آآآآآسفة ماكان قصدي أخليج."
شوق بإبتسامة:"لاااا عادي مافي داعي تعتذرين كان من لازم أخليكم تستانسون برجعة خالج."
بدور:"صدقيني من كثر ماتفاجأنا انشغلت عنج."
شوق:"شفيج اقووولج عاااااااااادي."
بدور:"الله شكثر فرحاااااانه لأنه خالي رجع بالسلامة، بس المسكين لازم يستخدم العكاز لفترة شوي طويلة."
شوق:"ليش؟"
بدور:"الله يسلمج تعرفين الكسور على ماالتحمت مرة ثانيه ، والشلل هذا كان يبي له فترة على مايروح، يعني أمممم مدري شوقوو ماعرف اشرح لج."
شوق:" السالفة كلها انه بيظل بالعكاز لين مايتوازن وقدر يمشي مثل اول ."
بدور:"صح لسانج ياقمر."
وسكتو شوي كل وحدة بالها مشغول بشي..
شوق:" شفيج ساكته؟"
بدور:"انتي اللي شفيج ساكته؟"
شوق:" بصراحة أفكر في هديل وعبدالله وحشوني وايد ومدري شخبارهم."
بدور:"لاتحاتينهم ان شاءالله مافيهم الا العافية."
شوق:" تدرين كسر خاطري عبدالله يوم اني طلعت من البيت ظل يركض ورى السيارة وهو يصيح."
بدور:" واعليه ياحليله مسكين، شوق عمري لاتقطعين زيارته هو وهديل حرام."
شوق:"أعرف بس أخاف من خالتي أم عبدالله تسوي شي والا.."
وقاطعتها:" وش بتسوي يعني ماتقدر، لاتنسين يدّي الحين هو ولي أمرج وهي مالها سلطة عليج."
إبتسمت لها وطالعتها، تذكرت كلام سحر بس ماحبت تقول لها حتى ماتسبب خلافات بين بعضهم، وهي ماتدري يمكن بيوم يكونون اصدقاء..!! وبعد فترة من الصمت:" بدوور وانتي وش اللي شاغل بالج؟"
بدور:"اييييييييه نسيت اقول لج ماشفتي شصار تحت فاتج ، سحر نزلت وسلمت على خالي توقعنا مثل العادة تقعد تدلع وبكلامها وحركاتها جدامه، وضحكاتها البايخة لكن هالمرة غييير سلمت عليه ببرود وطلعت راحت لرفيجتها."
شوق:" يمكن مشغول تفكيرها بشي؟"
بدور:"لالالا خالي من شافها تغيرت ألوانه حسيت له جذي، حتى هو سلامه لها كان عادي."
شوق:" والله مدري وش اقول لج انا ماعرفهم حتى أحكم بينهم."
بدور:" ماعلينا شرايج اتيين ويانا الموول باجر قررنا خلاص ان احنا نروح."
شوق:" لا مابي اروح."
بدور:" لييييييييييييييش؟؟؟"
شوق:" تدرين المصروف اللي عندي مايكفيني اروح اتسوق والا مشاوير الحين."
بدور:"افاااااااااااااا عليج يدّي وين راااح هااا؟"
شوق:" لالالا مابي اقول له وش بيقولون عني، بس ماصدقت انها يايه هني علشان تشرى وتاخذ فلوس!!"
بدور:" أكسر ويهه اللي يقول عنج جذي، يالله عاااد بلادلع."
شوق:" ارجوووج يابدور لاتجبريني على شي مابيه، وبعدين مب محتاجة شي يكيفيني اللي عندي."
بدور:" لاااااحوووول أول مرة اشوف بنت ماتحب تتسوق والا تشتري لها اشياء يديده."
شوق:"في أولويات ياحبيبتي ومدام انا مب محتاجة ماله داعي."
بدور:" بكيفج مابجبرج، بس على الأقل تعالي معانا رفهي عن نفسج اوكي؟"
شوق:" يصير خييير ياعمري انتي ."

^^^^^^^^^^^^^^^^^^^^^^^^
كانوا قاعدين بالبيت والملل وااااصل للآخر.. هدى كانت مقهورة من اللي صار وااايد.
هدى:" ايييييه ناس لهم العز وناس الفقر."
هديل:" حرام عليج حمدي ربج على النعمة اللي انتي فيها."
هدى:" اي نعمة اللي تقولين عنها، روحي شوفي الناس شلون عايشة مب احنا اللي وين مااطقينها عويه."
هديل:" استغفرالله اشكري ربج وبزيدج من نعمته."
هدى واللي ماتحاسب للكلام اللي تقوله بالمررررة:" الحمدلله والشكر شايفين شي..!!"
هديل:" حسبي الله عليج، انا بقوم لانكفر بسبتج."
هدى:" فكه احسن بعد."
طالعتها من طرف عينها وراحت غرفتها تقعد احسن لها من جابل هدى، وهي مارة عند غرفة شوق، تذكرتها وتذكرت أيامها اللي قضتها بهالبيت. وقفت يم باب الغرفة تذكرت آخر الأحداث اللي صارت يوم ابوها يضربها ويجرها لتحت، والا امها اللي رفستها يوم تطردها من البيت:" آآآآآآه ياشوق والله مشتاقة لشوفتج، محد أرتاح له الا انتي رحتي وخليتيني بروحي." وهي واقفة كان عبدالله قاعد من رقادة بعد الظهر واقف يطالعها:" هديل ليش واقفة هني؟؟ شوق ردت؟؟"
هديل إبتسمت له:" لاحبيبي مافي شي ، وشوق في بيتهم الحين."
عبدالله:" هي ليش طلعت؟! هذا بيتها..!!"
هديل:" عبود حبيبي بيتها الحين بمكان ثاني موهني."
عبدالله:" زين ليش ماانروح لها؟"
هديل:"لاعبود امي ماترضى ماتبينا انروح ولاتبي تشوفها بعد."
عبدالله:" انا مااحب أمي لأنها طردتها من البيت حتى هدى ذاك اليوم طيحتها على الدرج."
هديل:"لاااا مايصير تقول جذي لازم تحبها، لأنها أمك وتحبك زين حبيبي."
عبدالله وغير مقتنع:" زين."
ونزل تحت لأمة اللي كانت قاعدة وياهدى بالصالة بعد ماخلصت من تنظيف وترتيب البيت..
أم عبدالله:" اففففففففففففففف والله شقى تعبت مااقدر أتحمل أكثر من جذي من وين أييب خدامة كنت براحة والحين شغل البيت كل علي."
هدى واللي تعودت الجذب:" يمة من عيوني اساعدج بس تعرفيني ماعرف اسوي شي."
أم عبدالله:" أعرفج يمه حنونه انتي قلبج طيب، بس هذيج اللي رازة الويه فوق ولاتساعدني."
عبدالله:" يمه يوعان."
أم عبدالله:" روح الثلاجة شوف لك شي أكله."
عبدالله وهو رايح المطبخ:" لوكانت شوق هني كانت سوت لي كيك."
أم عبدالله:" الله ياخذها لابارك الله فيها ولافي الساعة اللي ربت فيها."
هدى:"افففف باطة جبدي."
سكتت شوي وقعدت تفكر في بوعمر اللي للحين كان يزورهم، حتى بعد ماعرف باللي صار وان شوق أخذوها أهلها، ريال سكير مثل حال أبوهم بس غني وعنده فلوس، كان يبي الولد ومصر على الزواج.
هدى:" يمه بوعمر ليش للحين ايينا البيت؟"
أم عبدالله:" مدري ليش." وبس دقايق والاجرس الباب داق ونادت ولدها يروح يفتح الباب..
عبود:" مافي الاانا افتح الباب، خلي هذي تفتحه." وهو يأشر على هدى.
أم عبدالله:" يالله بلاطوالة لسان علي، بسرعه وتعال قوللي منو."
عبود وبسرعه رجع:" هذا بوعمر."
أم عبدالله:" زين يايه." وقامت لبست عباتها وراحت له:" حيا الله من زارنا."
بوعمر:" الله يحيج."
أم عبدالله:" خير يابوعمرآمر."
بوعمر:" مايآمر عليج عدو بس يايب لكم هالأغراض هذي."
أم عبدالله وتسوي نفسها مستحية ومتفشلة منه:" يووه يابوعمر ليش مكلف على نفسك وكل يوم يايب هالأغراض، ماله داعي الموجود مكفينا."
بوعمر:" لامايصير ياأم عبدالله، المرحوم كان عزيز علي وهذا واجبي اتجاهكم."
أم عبدالله:" مشكوووور وماتقصر عسى الله يجزيك الف خير."
بوعمر:" يالله عن أذنج تامريني شي؟"
ام عبدالله:" مايآمر عليك عدو، مشكور سلامتك."
بوعمر:" الله يسلمج، وهذا انا اقول لج اذا احتجتوا اي شي والا نقصكم شي قولوا لي لاتستحون، يالله مع السلامة."
ام عبدالله:" في امان الله." وهي صاكة الباب ومستاااانسة وشوي واتشقق..!!
دخلت بسرعه للصالة وهي حاملة الأغراض بيدها..
هدى:" واااااااو وش كثرها الأغراض يمه!!"
أم عبدالله:" ههههه هذا كله من بوعمر الله يخليه."
عبدالله:" يمه هذا يخوف، ماحبه."
هدى:" وأحد قال لك تعال حبه."
أم عبدالله:" صج فيه الخير ماقطعنا.."
هدى:" اييييه من مات ابوي وهو مافارق البيت، حتى من بعد ماراحت لبقرة!!"
عبدالله وبكل براءة:" أي بقرة؟؟"
هدى وبضحكة ساخرة:"ههههههههههههههههههههه بموووت من الضحك عبود حبيبي هي وحدة بقرة، اقول يمه انا اشوف بوعمر وايد ايينا لازم مانخسره ونستفيد منه."
ام عبدالله:" اييييه عارفة بس شوي شوي مب مرة وحدة تالي ينحاش منا."
هدى:" صح لسانج ياأحلى أم بالدنيا."
كانت نوايا أم عبدالله شريرة لمصلحتهم طبعاً، كانت اتخطط ومستعدة للتنفيذ..!! وهدى كانت تابع لأمها وتخطيطاتها، وكل همهم لفلوس والمظاهر..!

^^^^^^^^^^^^^^^^^^^^^^^^
بعد ماطلعت من بيت خالتها أم محمد، أخذت السايق وراحت بيت ميثة، وقالت له يروح لأنها بتظل عندهم بالبيت، ورجع السايق للبيت.
ميثة:" هلاااا والله شخبارج؟؟؟"
سحر وهي رامية بنفسها على الكبنة بقهر:" وش تشوفين؟؟"
ميثة:" اف اف اف شفيج عسى ماشر؟"
سحر:" رجع محمد."
ميثة وبرووود:" ويعني وش صار مافيها شي."
سحر:" شلون تقولين مافيها، انتي تذكرين يوم اللي قلت لج ان سكر التلفون ابويهي..؟ من ذاك اليوم ماكلمته."
ميثة:" سحر حبيبتي انتي مكبرة حجم الموضوع أخذي السالفة عاااااااادي وش بسوي لج يعني؟ مايقدر يسوي شي، الا ماقلتي لي رجع يمشي والااا؟"
سحر:" بعكاكيز."
ميثة:" حللللللللفي!! ماقلت لج مامنه فايدة خلااااص."
سحر:" وانا شبي فيه الحين، بس انا افكر باللي ممكن يصير الحين بعد مارجع."
ميثة:" وش بصير؟ ماأعتقد ان فيه حد بيجبرج على انج تاخذين إنسان عنده إعاقة، ولاتنسين انتي دلوووعة أبوووج وأمج يعني مابيجبرونج على شي ماتبينه."
سحر:" عاااارفة."
ميثة:" ومدامج عارفة ليش مكدرة خاطرج، اقوول شرايج نطلع الحين نروح اي مووول والا الكورنيش؟"
سحر:" مالي خلق اطلع."
ميثة:" ولاحتى ويافهد؟"
سحر طالعتها بطرف عينها وإبتسمت:" كورنيش لا الموول مب مشكلة."
ميثة:" يالله جهزي نفسج ومشينا."
سحر:" اوكي لبسي على ماأعدل اليمك آب."
ميثة:" دقايق وانا تحت أمرج."
وبعد ثلث ساعة جهزوا، وأخذوا السايق وراحوا المول وهناك قالوا له يروح وبعدين بيتصلون فيه علشان ايي ياخذهم.
ميثة:" ااااااالله شوفي الجوو هني ونااااسة." كانت تتكلم وسحر بوادي ثاني غير اللي هي فيه:" سحر هيييييي شفيج اكلم روحي انا؟"
سحر:" لالا، بس بتصل بفهد بخليه ايي هني."
ميثة:" أمممم أشوف عبدالعزيز يمكن ايي وياه."
وكل وحدة فيهم اتصلت لحبيبها المزعوم، الشيطان كان قاعد يلعب عليهم شوي شوي. سكرت سحر التلفون وميثة بعدها تتكلم وتضحك وياحبيبي وياعمري.. وبعد عشر دقايق سكرت الخط. سحر:" شقال لج؟"
ميثة:"يقول بحاول انه ايي والأكيد ياي، وانتي؟"
سحر:" يقول جريب من المول بيي بسرعه."
ميثة:" اووووكي عيل خلينا اندور شوي على مايوصلون."
سحر:" يالله.."
وقعدوا يتمشون على مايوا لهم، فهد كان متكشخ وشكله ملفت كانوا البنات اللي بالمول بموتووون عليه!! سحر كانت مقهورة منهم لأنها ماتحب حد يطالعة والا يتلزق فيه..!!
فهد:" هلا حبيبتي شخبارج؟"
سحر:" بخير الحمدالله انت شخبارك؟"
فهد:" اذا حبيبتي بخير انا بخير."
استحت منه ونزلت راسها وهي تبتسم>>> الله على الحيا والدلع..!!
فهد:" ها ميثة شخبارج؟"
ميثة:" تووووه الناس صار لي ساعة واقفة."
فهد:" بعد شسوي، الا وين عبدالعزيز؟"
ميثة:" يقول يمكن ايي ويمكن لا بس الاكيد انه بيي."
فهد:" اييييه كاهو ياي."
ميثة:" عن اذنكم بروح له."
سحر:" اذنج معاج."
وظلت سحر وفهد بروحهم يتمشون بالمول، ماكان يهمها أي حد غير وجودها ويافهد. وبعدها تعبت وقالت له انها تبي تقعد وتشرب لها شي. وقعدوا بأحد الكوفي شوب اللي هناك.
فهد:" عمري شفيج؟ أحسج مو على بعضج؟"
سحر:"لاااا عادي مافيني شي."
فهد:" لاااا إحساسي يقول عكس جذي."
سحر:" وش بكون فيني يعني؟"
فهد:" والله مدري انتي أدرى، اشوفج ماتقولين لي اللي بقلبج شكلي ماأهمج ولاتحبيني."
سحر:" ليييييش؟"
فهد:" يعني لوتحبيني ويهمج أمري جان قلتي لي وش فيج يمكن أساعدج."
سحر:"وش تبي تعرف؟"
فهد:" اللي شاغل بالج عني."
سكتت وظلت اطالع علبة العصير اللي بيدها، رفعت راسها وظلت إطالعها بعينها اللي اتجنن الشباب..!! وقالت:" ولد خالتي محمد رجع من السفر."
فهد:" حمدالله على سلامته، متى الوصول؟"
سحر اطالعه بإستغراب:" شنوووو شفيك انت اقول لك محمد تقول لي حمدالله على سلامته."
فهد:" وش تبيني اقول لج يعني." كان يسوي نفسه مقهور ويغااار من محمد.
سحر:" شفيييييييك شكلك زعلت؟"
فهد وهو يطالع بالطرف الثاني:" لااا سلامتج ماني زعلان."
سحر واللي ماحبت اتضايقة وحبت إنها تراضيه:" حبيبي شفيك."
طالعها ومارد عليها، وردت قالت لها:" عمري، حبيبي.."
إبتسم غصباً عنه، مب علشان انه رضى عليها ومب زعلان، على غبائها وبلاهتها ولأنه قاعد يلعب عليها:" حبيبتي تعرفين أغاااااااااار عليج ومابيج اتيبين طاري ولد عمج وانامعاج مرة ثانيه."
سحر:" حااااضر ياحياتي بس لاتكدر خاطرك."
فهد بعد مامسك إيدها:" مب زعلان ولاني مكدر خاطري."
سحر:" تحبني؟"
فهد:" أموووووووووت فيج."
وتوها بترد عليه، والا تشوف سيف ولد عمها قاعد يتمشى وياربعه، من شافته ارتبكت وانعفس حالها.. فهد:" شفيج خايفة ومرتبكة؟"
سحر:" سيف."
فهد بإستغراب:" اي سيف؟"
سحر:" ولد خالتي أخومحمد." وأشرت له المكان اللي قاعد يمشي فيه ووصفته علشان يعرفة.
طالعها ببرود:" ويعني؟ ماشافج عااااادي."
سحر:" شنوو عادي ان شافني وياك بيعفس الدنيا كفاية مايدانيني ولاأدانيه."
بإستغراب:" ليش بالله مايدانيج وش فيه زود؟"
سحر:" مدري مدري بس ان اذا شافني معاك بسوي لي فضيحة، انا بروح الحين اوكي بتصل بميثة وبرد البيت، والليلة اكلمك يالله باي."
فهد واللي ماكان مهتم اذا شافها ولد خالتها والا لا:" اووكي باي."
وبس ثواني من تباعدت عنه الا سيف بويهها، خافت إنه شافها وهي قايمة من يم فهد وارتبكت زووود، طالعها بنظرات الإحتقار وسألها:" شسوين هني؟"
حاولت إنها ماتبين خوفها وارتباكها وبنفس الطريقة اللي يكلمها فيها:" موشغلك."
انقهر من ردها وقال:" وشنو اللي مو شغلي بنت خالتي وبروحها بالمول لازم اسألها مو حنا نخاف على أهلنا فاهمتني."
سحر:"اولا وش شايفني ؟ وثانياً مو بروحي يايه، وثالثاً مو شغلك وش اسوي هني، عن اذنك."
سيف:" اذنج معاج يا..... بنت الخالة." قالها بطريقة خلتها تنقهرمنه واااايد، مو كفاية محمد يطلع لها هذا!! مشت عنه بسرعه ودقت على ميثة والتقت معاها وقرروا يردون البيت لايشوفهم سيف ويغربلها بعد.