بسم الله الرحمن الرحيم
اللهم صل على محمد وآل محمد الطيبين الطاهرين
-----------
بداية هذي المشاركة إحترت وين أحطها بس قررت اني أسدحها في هالقسم
لأنها - وحسب رأيي - تخص ظاهرة عامه ولو أن
الكلام مكتوب باللهجة العاميّه
وللمشرفين الأعزاء الرأي بتركها هنا أو ترحيلها الى أي محل فاني
--------
معجزة أم أحمد ...مواعين تلمع
تقول أم أحمد وهي ضبعا من سنين لول :-
ذاك اليوم ما أدت لسلوم ذاك اليوم الا ويش أقول ويش أسولف لك يا غناتي ، أرايلي يوزوزوا عليي ، مسوا ذاك اليوم لوبه ويا يارتنا من عزيه الى عزيه ...ومن بيت لابيت ، عاد ذاك اليوم عودت البيت وسويت هاللقمة المالحه لهالولاد المجبوبين ويش أقول عنهم بعد ولادي ، وهم ما يسووا شي بس شغلتهم ياكلوا ويطلعوا من مغرب ولا اييوا الا فاني يوم ظهر النهار يوم فاني ، عاد ما أطول عليك يوم انبطنوا وقاموا ومشّوا اياديهم في ليدار ولا حمدوا ربهم بعد هالمجبوبين وطاروا لصبيانهم .
قمت أني بنحستي ومواعيني ورحت الأدب وطلعت ليي شوية ماي وقعدت في الحوي أغسل مواعينهم نحستهم ويوم خلصت قمت ووديتهم في الكبت مال المطبخ ، وما حسيت الا عافيتي انبهتت مره وحد عليي وأرايلي قامت توزوز وقعدت من طولي فوق مرقدي أهمزهم وما فاد وتذكرت الحوي ما خميته قلت في نفسي عاد أني تعبانه الحين ما ني منحستنه خامتنه با أنام ليي شويه وقمت شربت ليي تبلة ماي وانخمدت وخل الحوي وخمامه لباجر ....
وحيفها عيوني بتهيّد الا ما أسمع الا ذيك الشدخه في الحوي وشديييخخخخخ وشداااااخ وناس تردح تروح وتيي ....وأني من غير شي أرايلي من اللوبه ما هي حاملتني ...عاد ما أطول عليك تسندت على ليدار وشوي شوي شرفت من لدريشه على الحوي ويش شفت ....ستة صناوه عافسين الحوي عفاس ...ما شافوا شي يبوقوه قاموا يعفوا الحوي عفاس ما خلّوا مشكاب الا فلتوه ولا خلوا ملاس الى عووه ولا غضاره الا قشّطوها ولا حاجه هناك الا دعوسوها في لتراب ...وانا بس أدعي عليهم الله يسلط ابليس عليكم وتطيحوا في ناس ما ترحم يعلكم ما ليكم في الأرض مقعد ولا في السما مصعد ما تتفرصخوا من أياديهم جاه هالمغربيه
وحوايج الله مقضيه ....وسلّمت أمري لله
وتذكرت زين ذيك الليلة ما خميت الحوي ولاّ بعد شان وصخوه
صناوة ابليس في الارض
ما دريت الا واحدمنهم يبحلق في الدريشه وما تشوف يا ولدي الا أني تمرشقت في فيابي وقمت اريف زي عود المرّاني في الهواء وانحشت وانخشيت في الأدب ...لاويش واحد منهم بعد يمقل عيوني بكمشه ولا يضربني فوق راسي بملاس ولا ماعون لا ويش .....
قعدت شوي الا ذاك الحنين تفرضخنا منّه وراحوا هالملاعين
قمت شرفت مرّه فانيه على الحوي الا الحوي معفوس عفاس قلت ...طاح حظكم يالنحيسين ، عاد أني خفت أطلع الحوي وتالي يعودوا مرّه فانيه ويخلبوني اتقاشر على روحي لا ويش ، خلني أهيد انخمد وباشر أعدل اللي كسّروه ، وأني أفادي فايح على لماعين ، عاد غفت عيوني شوي الا لحلام من كل صوب تيي
وما قعدت ذاك اليوم الا ظهر النهار ...
الا صلوات على أبو الزهراء
وصلوات على أبو الغزوات علي ومن غيره علي
الحوي يلمع لماع ...ولماعين معدله تعديل
مغسلين وذاك الزين وأحسن من الزين
وأني من غير شعور قمت أصارخ ....معجز معجز صلوا على النبي وآل النبي وما شفت الا الركاض يركض واللي تستحمد ليي بالسلامه واللي تتمسح بملفعي واللي تمبى ماعون من مواعيني واللي تاخذ تراب من الحوي
ما ني في دنيا ذاك اليوم .....
وداني عاد با أوصي عليكم ولا أوصي عليكم بشرّ ، اللي يقرأ هالورقه يكتبها خمستعشر مرّه وهو متسبح في عين اللبانيه ، ويقسّمهم ...
خمس على شيّاب من برا الديره فقمان
وخمس على شيّاب من الديره كرفان
وخمس على شيّاب كريمين عيون
وان ما سويتوا هالشكل ترى ما بيصير ليكم زين
وبيصير ليكم مفلات ذاك اللي ما كتبها وعنده فلافة نخيل
ما صبح الصبح الا فلافتهم محترقين
موتنسوا زين
فمان الله
--------------
طبعاً هذي نموذج انتشر ولا يزال ينتشر في بعض الأماكن وعلى فترات
ويسيء للمذهب بشكل مباشر
فأهل البيت رحمة لنا وليسوا نقمة علينا
والآن أصبحت ترسل بالجوال والإيميل
والأساليب الجديده من التقنيه
- يمكن الموضوع مكرر في الفكره ما أدري ؟
الله يعافينا مما ابتلى به الجهّال
سلام
رد مع اقتباس
المشاركة الأصلية كتبت بواسطة نور الهدى
رد: مواعين أم أحمد .....بركه
المفضلات