فواز ابتسم بسخرية واستهزاء واتجه ناحية حمد وهو ياشرله: وينـــــــك ياخي؟
العنود حست بصدمه من اسلوب فواز وتغيره ياترى ايش اللي غيره،دخلت البيت ورقت لغرفتها وهي تحسس مكان الطيحه وتفكر بالسبب اللي خل فواز يعاملها بهالطريقة ..وفجأه تذكرت..تذكرت مكالمته والسؤال اللي طرحه عليها واكتشافها انو فواز يحبها قعدت على السرير وهي تحس برغبة قويه في انها تروح وتكلمه وتحاول تستخرج منه الحقيقه لانها ماتقدر تبين حبها له خوف من انه يستغله ويحطمه من جديد وهالمره اذا تحطم ماظن انو راح تقدر تلمم جراحه من اول وجديد..عرفت ان الفرصة الوحيدة عشان تكلمه هي في الملكة،قامت من مكانها واخذت تلفونها وراحت تدور على دفتر الارقام بحثت عن رقم المصمم باسيل سودا ولما حصلته دقت عليه..ثواني الا السكرتيرة راده عليه..
السكرتيره: الو مرحبا مكتب المصمم باسيل سودا..
العنود بثقة: مرحبتين ممكن اكلم باسيل لو سمحتي..؟
السكرتيره:مين بئوله؟
العنود:قولي له العنود خالد..
حولتها السكرتيرة..ثواني الا المصمم راد عليها: ولك مرحبتين مدموزيل عنود..
العنود ابتسمت وهي عارفه خراطه:اهلين باسيل..
وبعد السؤال عن الاحوال دخلت في صلب الموضوع: اسمع يابسيل انا عندي حفلة كتب كتاب وابيك تسوي لي فستان بهالكم يوم ويفضل انو يوصل لي بعد بكره..
باسيل بصدمه بهالكم يوم مابيصير..!
العنود باصرار:لأ يصير..اكيد عندك مقاسي جاهز..
باسيل فكر: لحظه شوي..
وبعد ثواني:انتي انو فستان بدك ياه..ولا بدك من ذوقي؟
العنود بتفكير: خله من ذوقك بس يكون لونه اخضر قان.؟
باسيل:اها لئيتها ..من حضك انو عندي فستان من الكولكشن الجديد عملته لزبونه من السعوديه بس ماعاد رجعت تاخده..
العنود:كم سعره؟
بعد ماخبرها السعر وعبرت له عن عدم رضاها للسعر خفض لها فيه بصفة انها عملت عنده فستان من قبل..اتفقوا ان الفستان يوصلها بعد بكره الصبح..
سكرت منه وهي تدعي من كل قلبها يجي على قياسها لانها ضعفانه عن قبل..

************************************

هيفاء تنرفزت صارلها ربع ساعه وهي تنتظر العنود عند الباب وماطلعت لها
عطتها عشرين ميس كوووول ولا ردت عليها ..وش فيها جنت ماتعرف ان العرس الليله ولازم نكونون في الصاله لان الهنوف بتخلص من الكوفيره بعد شوي .
هيفاء طلعت زفير غضب:شانتي روحي شوفي عنود وين..!
شانتي هزت رأسها ونزلت من السياره :ان ساء الله (ان شاء الله)
دقايق ورجعت لها وشانتي وراها بنت متغشيه دخلوا السياره وهيفاء مستغربه من العنود انها متغشيه في حوش البيت.
هيفاء باستغراب:وش عندك متغشيه..؟
العنود وهي خايفه:فــــــــواز موجود في المجلس مابيه يشوفني.
هيفاء استعوبت بعدها تذكرت تأخرها:تعـــــــــالي انت وش عندك رنتني عند الباب ساعه وهذا منبهتك اني بمرك .
العنود تنهدت:اوووووف انت في وين وانا في وين..!
هيفاء بققت عينها:ياسلام وانا طوفه هبيطه حق اللي بيطق راسه.
العنود بضيق:اخلصي علينا خل نروح يلا.
هيفاء أمرت السايق:يلا أمش ..روح القاعه.

**************************************************

الهنوف وهي متوتره وتفرك ايدها بخوف وتكلم امها:يمــــــه البنات لين اللحين ماجوا..
امها وهي تناظر الساعه:صلي على النبي يالهنوف تو الناس الساعه لساتها ست ونص واكيد ان البنات اللحين جايين بالطريق..
الهنوف حاولت تتنفس بعمق على التوتر يخف عليها..شوي الا البنات داخلين عليها وهيفاء تزغرط بعبط: خمسه وخميسه ..عليكي من عين الحسود!
الهنوف التفتت عليها بنص عين..ولما شافت نظرتها شهقت: مشاااااااااااالله وش هالزين..قمر قمر..
الهنوف وهي تزقرها:هيوف خلي منك هالعباط ..عارفتك كذابه وين الزين وانا مانمت الليل ولساتني ماحطيت مكياج..
العنود وهي تضحك ورايحه تضمها:تجنننين لو ايش ماتسوين..
ولما شافتها بارده:يييييه ليش كذا بارده..كل هذا خوف؟
الهنوف والتوتر يرجع لها: هو خوف وبس الا قولي ررررعب..احس نفسي بموت من الخوف..
العنود قعدت جمبها: يابنت الحلال انتي صلي على النبي ومالك شر ان شالله..
الهنوف اذكرت الله وبعدها التفتت عليها بابتسامه:هاه خبريني عنك انتي والله اشوف الحب عمل عمايله فيك.
العنود وهي تطالعها وماتعرف ايش تقول: خلينا ساكتينّ
الهنوف وهي تقمز لها:يمه منك ياراعية السوالف..
هيفاء قطعت عليهم وهي تخوصر لهم: يله عاد ترا جوعانين نبي ناكل شي ونشحن طاقتنا عشان الليل..
الهنوف: لاتحاتين قلت حق الشغالة تنطر المطعم لاني طالبه فطاير عشانا..
وبعد ساعتين خلالها كلوا البنات ورقصوا وفرفشوا على الهنوف لغاية مابعدوا عنها التوتر والخوف ..بدا اللحين الوقت انهم يتعدلون فيه اول وحده تمكيجت هي العنود وهو نظراً انو شكل عيونه لوزي وسهل المكياج عليه وكل انواع المكياج يصلح لها وطلبت العنود انو يكون نوع مكياجها دخاني ممزوج من اللونين الاسود والاحمر..اما بالنسبه لهيفاء فاطلبت مكياج برونزي يتدرج فيه الالوان الترابيه والبنيه وطلع شكلها مره ناعم وحلو..اما بالنسبة للعروس فكانت حكايه ثانيه تحسون ان كل جمال الدنيا اجتمع بهالليله عشان يجملها ويحليها ويخليها تضوي بهالليله بالذات و سبحان من قال ان العروس يحرسها سبعون ملكاً بلليلة العرس..
وقفوا كلهم عند اخر درجات السلم واشرت هيفاء لدي جي بانها تبتدي بوضع الموسيقى المخصصه بدخول العروس .
وبدت تمشي العروس بخطوات متمهله وتركز عليها الليزربالوان رائعه وهيفاء كانت ترش عليها ورد الجوري أما العنود وخالة الهنوف يرفعون ذيل العروس عشان يخففون عليها ثقل الفستان ورؤس المعازيم اتجهت لناحية العروس منبهرين بطلتها المذهله وكان منهم يتهافت ويسمي عليها من العين وبعضهم يطرون على الفستان
وبعضهم يتساؤلون من البنات اللي مرافقين العروس ومنهم من يجاوب هذه العنود بنت خالد وهيفاء بنت سلمان.
أم العروس كانت حابسه دموعها وتسمي على بنتها بالرحمن وتستودعها الله .
العروس كانت في أوج توترها وعيونها مفتحتها على الاخر وملامح وجهها جامده ولما وصلت للكوشه وقفت مقابلها المعازيم كلهم وتوزع ابتسامه بسيطه لهم ثم أوقفتها المصوره عشان تلتقطلها عدة صور على الكوشه وسارعت هيفاء تهئ لها عشان تقعد وبعدها بدأت الطقاقات بالاغاني الراقصه واللي امتلأ ت بعدها المنصه بالبنات يرقصون رقصات مختلفه ومميزه.
هيفاء كانت تعطي الهنوف ابتسامات تشجيع أما العنود كانت تراقب تحضير القاعه بعنايه بالغه.
بعد ساعه من الدوران على الطاولات والسلام على المعازيم قعدوا البنات على طاوله قريبه من الكوشه في سوالف وضحك .
نوره(أخت سعود):وي فدييييييييييتها مرة أخوي طالعه قمر ياحظ أخوي فيها.
ريم (بنت عم الهنوف):بنات لا يفوتكم الهنوف تطالعنا بنص عين تبي تعرف حنا وش نحش فيها.
العنود ضحكت:بنات أمانه خل نسولف ونطالع فيها عشان تشك ان حنا نتكلم فيها.
البنات طالعوا في الهنوف وقعدوا يضحكون وهي تعطيهم نظرات تهديد
لكن أم سعود قاطعتها لما قربت وقعدت بجمبها عشان تأخذ لها المصوره صور.
بعد ماخلصت المصوره التفتت على البنات :في حد عاوز ياخذ صوره مع العروس.
البنات كلهم جاوبوا بصوت واحد :أي احنــــــــــــــــا..!
وكلهم تدفعوا عليها يأخذون صور.
لما جلست ريم جمب الهنوف التفتت لها بنظره غاضبه :وش كنت تحشون فيني..؟
ريم ابتسمت بغيض:كلام ماللك خص فيه ..الحين انت عروس لا تخربين صورتك قدام الناس.
المصوره نادت تأشر لهم:شوفوا الكاميرا ..!
التفتتوا عليها والهنوف تصنع ابتسامه بعدها جاء دور هيفاء والعنود اللي ماعطوا الهنوف فرصه تكلم معهم.
بعدها أشرت أم المعرس :المعرس وصــــــــل.
البنات والحريم في الصاله انتشروا يأخذون عبايتهم او طرحه تستر أجسامهم العاريه .
بعد خمس دقائق دخل المعرس مبتسم ابتسامة توتر ومحوط بوالد العروس وثلاث شبان كان من الواضح انهم أخوان الهنوف.
أما البنات اللي في الصاله كان يرمون بسهام عيونهم الملثمه نحو الشبان الوسيمين
والشباب اللي عيونهم تحاول تلقط أحلى بنت في القاعه .
هيفاء والعنود كانوا منبهرين بجمال الشباب لكن هيفاء لاحظت ان ريم مو على بعضها وعيونها متركزه على الوسطي .
العنود وهي تأمل العائله الملتمه على المنصه:أقول ريم ماشفت أخوان الهنوف من كنا صغارعلميني كل واحد باأسمه .
ريم وهي تطالعهم ملثمه أشرت بيدها:اللي على اليمين سلطان الكبير واللي في الوسط طلال (وفي عيونها لمعان غريب)أما اللي جنب المعرس فهذا عبدالعزيز أصغرهم.
بعد ماأشرت ريم لا حظها طلال وطاحت عينها بعينه وابتسم لها ابتسامه جريئه خلت وجهها يصير أحمر.
هيفاء لاحظت الحركه وضحكت:اووووف أووووووف أشوف في حب في الجو .. حتى على الكوشه في حركات.
العنود فهمت وش قصدها وطالعت الريم بنظره خبيثه أما ريم ضربت هيفاء بكف يدها:بنـــــــات عاد أحرجتوني..!
نوره دخلت في السالفه عرض بعد ماكانت ضايعه تتأمل سلطان:بنات بنات ..! وش السالفه..؟
هيفاء ابتسمت بسخريه:أكيد ماأنت معانا سارحه والله يستر وين سارحه..
ريم بققت عينها على هيفاء:لا مأنت صاحيه اليوم ..!
نرجع للعروس لما دخل عليها المعرس وقفت وكل جسمها يرتعش اللي كان شوي يسمعون دقات قلبها الصارخه لكن مع ذلك مارفعت رأسها ليما قرب منها سعود وجاء باس رأسها.
ولما شافت أبوها خف عليها التوتر والخوف أما اخوانها فكانوا يبتسمون لها بسخريه.
خذت عدة صور مع العائله والشباب عيونهم يمين وشمال ..من الحين يشتغلون خطابين.
وبدأت الاغاني تصدح في القاعه باغاني ربشه وأم العروس نادت الشباب عشان يرقصون اللي مارفضوا الطلب ولقوها من الله عشان يشوفون القريب والبعيد.
وبدوا الشباب الرقص والبنات اللي في العرس نسوا العروس والمعرس وقاموا يرسلون بعيونهم رسايل اعجاب.
طلال وهويرقص كانت عيونه تدور على ريم لما شافها تطالعه ابتسم وقمز لها ومن دون ماتحس ريم طاحت اللثمة من وجهها بدون قصد فحاولت انها ترفعها بس بعد ايش بعد ماشافها طلال وانعجب بجمالها ..
وبعد ماخلص الرقص قامت العروس عشان بتطلع مع زوجها لعشهم الزوجي او بالاحرى الى القفص الذهبي..والبنات يطالعونهم ويتمنون لهم السعادة والعنود كانت الوحيدة اللي ساكتة وتطالعها بحزن وهي ترحل معاه..ومن بعد ماطلعوا المعاريس عم الهدوء الصالة للحظات وبعدها ابتدت الحياة من اول وجديد .
كشفوا البنات عن العبايات والطرحات وأثناء ذلك كانت في بنت متوجها لطاولتهم وفي عيونها نظرات خبيثه ولما وصلت لطاولتهم غمضت عين ريم بأيدها.
ريم وهي ماسكه اليد اللي مغطيه عينها:من اللي مغطي عيني..؟
كانوا البنات يطالعونها بفضول لكنهم فضلوا أنهم مايتدخلون.
البنت ابتسمت بغموض:حزري فزري..؟
ريم حاولت تفك يد البنت:لا عاد جد عن السخافه ميييين.
البنت استغربت:افــــــــــا ما عرفتيني ياريم..؟
ريم تنرفزت:لأ ماعرفتك والحين فكي يدك لأنك خربت مكياجي..!
البنت سحبت يدها على جنبها وبينما ريم التفتت لها ولما شافت رفعت يدها غطت فمها بيدها من الدهشه.
ريم بصوت عالي:لولو لولو..ماأصدق.
لولوه ضحكت عليها وبعدها لموا البنات بعضهم وقاموا كل واحده تقط كلمه على الثانيه عباره عن الفرحه.
ريم التفتت للبنات متشققه:بنات هذه رفيقة الطفوله لولوه.
البنات هزوا رؤسهم بترحيب ووقفوا يسلمون عليها.
ريم التفتت للولوه وراحت تعرفها على البنات:لولوه هذه نوره أخت المعرس .
وأشرت على العنود:وهذه العنود بنت خالد تقرب للعروس.
وأخيرا التفتت ناحية هيفاء:وهذه هيفاء بنت سلمان كمان من قرايب العروس.
البنت لما سمعت الاسم انصدمت وقعدت تأمل هيفاء من فوق لين تحت بعدم تصديق وباأحتقار واضح اما هيفاء اللي ارتاعت لما شافت تعابير وجهها لدرجة ان البنات لاحظوا التغيير اللي طرأ عليها لما سمعت بالاسم.
ريم طالعت لولوه بأستغراب:تعرفون بعض من قبل..!
لولوه جفلت وهزت رأسها بتأكيد:لا ماحصلي الشرف بس مشبهه عليها (وبعيونها لمحة كره)
ريم ابتسمت تهدئ الجو:انزين اقعدي معانا من زمان عن سوالفك .
لولوه هزت رأسها:مره ثانيه أن شاء الله انا مضطره اروح الوالده تنتطرني برى.
وراحت ومشيتها تخللها الدلع والاغراء المزدوج والبنات يناظرونها بتقيم .
وهيفاء الصدمه شلتها من تصرف البنت الغريب والمشكله مش عارفه ايش السبب لأنها متأكده انها ماقابلتها من قبل .
ريم ابتسمت لهيفاء باأعتذار عن تصرفها :هيفاء حبيبتي لاتاخذين بخاطرك ..لولوه طيبه بس الخجل هو اللي خلاها تسوي كذا.
العنود ردت عليها من غير اقتناع:بس وش معنى هيفاء اللي تصرفت معها هالتصرف..؟
ريم هزت كتفها:والله ماأعرف وش أقول لكم..
هيفاء نزلت رأسها بتفكير عميق:ماصار شي ياريم.


بعدها طال السهر والعرس دام الى ساعات الصباح الباكر.

*****************************************

في اليوم الثاني كانت الساعه اربع العصروفي بيت ابو فهد كانت هيفاء في غرفتها الغارقه بالظلام بسابع نومه من تأثير سهرة البارحه عليها ورجولها كانت ذبحتها أمس من الكعب العالي لدرجة أنها رجعت أمس للبيت حافيه شاله صندلها بأيدها والبنات يضحكون عليها.
رن جوال هيفاء بألحاح..
"الاماكن كلهـــــــــا مشتاقه لك
والعيون اللي انرسم فيها خيالك
والحنين اللي سرى بروحي وجالك
مهو بس انا حبيبي.."
"كل شئ حولي يذكرني بشئ
حتى صوتي وضحكتي لك فيها شئ
لوتغيب الدنيا عمرك ماتغيب
شوفي حالي آآآآآآآه من
تطري علي"
هيفاء تأففت لما سمعت الرنه تكرر.. في خاطرها تضرب الجوال في عرض
الطوفه لكنها جرجرت عمرها من السريربعين مفتوحه وبعين مسكره وخبطت برجولها عمود السريرصارخت من الالم ودعت في قلبها على المتصل مايعرف هذا ان امس عندنا عرس والناس نايمين.
لما شافت الساعه لقتها الساعه اربع توعت بكسل.. شكلي أنا اللي ماأدري عن الدنيا ..ضحكت على عمرها لاحظت ان الجوال لساته يرن شكل المتصل مصرلما
شافت الاسم على الشاشه رفرفرت بعينها من الصدمه لكن حروف الاسم اللي قدامها كانت واضحه.

"تؤام روحي"
يتصل بك

هيفاء ردت بقلق من هالمكالمه الغير المتوقعه:الــــــــــــــــو..
نواف بصوت رجولي:الـــــــــــــو..مـــــــرحبا.
هيفاء وهي تحس بالخجل:يامرحبتين ومسهلا.
نواف بصوت واثق:وش أخبارك هيفاء..؟
هيفاء وهي تلعب بأظافرها بتوتر:الحمدالله بخير ..أنت وش أخبارك..؟
نواف وهو يفكر بالجواب:ماشي الحال ..أشوف من لقى أحبابه نسى اصحابه.. وش فيك هيفاء ماقمت تكلميني مثل أول.
هيفاء بغير مبالاه:بالعكس أنا ماتغيرت بس لما شفتك سافرت وانشغلت بالشركه ماحبيت ألهيك عن أشغالك.
نواف بفخر:هذه والله البنت السنعه ياليت كل البنات مثلك.
هيفاء بخبث:ليش انت جربت بنت غيري ..؟
نواف جفل وارتبك:هاه لاأبد بس اللي أعرفه دايما ان البنت ماتحب شئ يشغل رجلها عنها.
هيفاء وهي متملله:صحيح بس اذا كان هذا شئ ضروري ليش تزعجه بالاتصالات والتشره عالفاضي.
نواف وافقها بسرعه:صح صح معك حق.
هيفاء سكتت تنتظر منه تفسير سبب مكالمته لها المفاجئه.
نواف كمل بصوت غير واضح:هيفاء متى أخر مره شفت فيها عمتي..؟
هيفاء استغربت في البدايه مكلمها عشان يسألها هالسؤال وهي تحاول تذكر:أول امس.
نواف بغموض:وتركي.
هيفاء لما ذكر تركي رجع الدم يغلي بعروقها لكنها فضلت ماتذكر له اللقاء اللي صار بينها وبين تركي.
هيفاء وهي تمثل الجهل:امممممممم ماذكر من زمان ماشفته.
نواف وكأنه لقى الجواب اللي يرضيه:اجل أكيد عمتي قالت لك بالخبر السعيد.
هيفاء بسخريه:قصدك الملكه..!
نواف وبصوت يحمل ابتسامه:أي أنت وش رأيك..؟
هيفاء رفعت حاجب مستغربه:انا وش رأيي ..انا رأي يانواف ماتغير انت وش اللي غير رأيك وخلاك تستعجل العرس.
كمل نواف بحنان مزيف:والله الصراحه..انا ياهيفاء لما شفت حماس عمتي بان هالعرس يتم بسرعه.. ماقدرت اوقف بينها وبين فرحتها.
هيفاء فكرت بحزن لما تذكرت خالتها:معك حق في اللي سويته ..لأني شفته بعيوني.
نواف كمل بغيض معتمر بقلبه:ولا لو بعد شفت فرحة تركي ماكان صدقت ..وكأن هم أنزاح من قلبه لما سمع الخبر.
هيفاء قطبت جبيينها:مافهمت وش قصدك..؟
نواف ببراءه مصطنعه:تركي ياهيفاء في البدايه كان رافض اني أخذك لكنه بعدين لقاها فرصه عشان افكه من لسان عمتي لاخذا واحده أجنبيه.
هيفاء رددت وراه بدون تصديق: ياأخذ واحده اجنبيه..!
نواف وهو يمثل الدهشه:معقــــوله ماتدرين .. تركي صارله سنه على علاقه مع واحده سعوديه في لندن أبوها من أكبر رجال الاعمال وله صفقات كثيره مع شركتنا وفي المده الاخيره صارت علاقتهم جديه لكنه ماقدر يصارح عمتي لين يخلص من عرسي ويفاتحها بالموضوع ..طبعا بعد ماتكون عمتي راضيه أنه واحد من عيالها خذا واحده من أهلها.
هيفاء والصدمه خذت مأخذها منها .. عقلها اشتغل في اشياء كثيره في هالدقيقه الواحده مو قادره تستوعب اللي تسمعه .
هيفاء بغير اقتناع:معقولـــــــــــــــه..!
نواف ردد وراها بمكر:أي معقوله وش فيك ماأنت مصدقه.
هيفاء تداركت عمرها: لاأول مره اسمع ان تركي له نيه يتزوج.
نواف باأنتصار:ماعلينا من تركي الحين..بتطلعين اليوم مكان..؟
هيفاء واصلت باكتئاب:لا ماراح اطلع اليوم مكان.
نواف بحماس:خووووش لاني بنيتي اليوم أزوركم عشان نرتب أمورالملكه.
هيفاء لما سمعت كلامه جاوبت بعنف:لا الله يخليك نواف خلها في يوم ثاني لأن اليوم بيجوني بنات يزورني.
نواف تفهم: ماشي يوم ثاني..تأمرين على شئ حبيبتي ..؟
هيفاء ردت بزهق:لاتسلم .
نواف رد باستسلام: مع السلامه.
هيفاء بحزن: الله يسلمك.
سكرنواف من هيفاء وهو يحس بانتصار لانه انجز مهمته باتقان..الحين قطع الخيط الاخيراللي يوصل هيفاء بتركي.

***************************************

تركي نزل من الدرج وهو يسحب شنطة سفر وراه ومعنوياته في اسفل حد لما وصل الصاله شاف عمته تطالع الاخبار على القناه الاولى بتركيز والمسباح بيدها.
تركي طالعها بحنان:مرحبا عمتي.
لطيفه التفتت وابتسمت له بلطف:مرحبا ولدي تعال اقعد جمبي وفهمني وش يقولون.
تركي ضحك بخفه عليها وتقدم وقعد جمبها:يمـــــــــا مالاحظت شئ..؟
لطيفه التفتت لها تفكر:وشو يمــــــــــا..؟
تركي التفتت لناحية شنطة السفر ولطيفه لاحقت نظراته :لايكون بتسافر.
تركي هز رأسه بيأس:أي يما بسافر الحين.
لطيفه تلمست وجهه بحنان:ليه الحين واخوك بيعرس..؟
تركي نزل رأسه عشان الحقيقه المؤلمه ماتبان بعيونه:وش اسوي ياعمتي عندي مشاكل في الشغل وماحد يقدر يحلها غيري.
لطيفه تأملت وجهه تحاول تلقط منه جواب:واخوك ماأنت بحاضر عرسه..عيب يايما مايصير.
تركي ووجهه جامد فيه الدم:بحاول يايما بس ماأوعدك.
لطيفه طالعته منصدمه من حالته اللي مايحسد عليها موعارفه ايش السبب التغير المفاجئ .
تركي ابتسم يلطف الجو:مع السلامه يما.
لطيفه والدموع ترقرق بعينها كأنها حاسه ان هذا الوداع الاخير:مع السلامه ياولدي والله الله بعمرك ولاحد يقطعني كلمني أول بأول.
تركي وبعيونه حزن غريب:ان شاء الله ..
ضمها وباسها على رأسها ومشى باتجاه الباب ناوي يروح ولا يرجع الا بعد مايشفي الوقت جروحه ..تمنى ان المثل اللي يقول"الزمن كفيل بالجروح" يطبق عليه لانه بأمس الحاجه له في هاللحظات.
لطيفه نطقت بصوت غير مسموع:أستودعتك الله .
تركي لما وصل السياره اسند رأسه للكرسي وهو يحس بسكين تنغرز في قلبه
لانه ماقدر ينقذ حبه والانسانه الوحيده اللي تقدر تسعده..آآآآآآآه ياهيفاء حتى حروف أسمك أعشقها لانها جزء منك ..في خاطرتركي يسمع صوتها لانه بيسكت شوق قلبه لها في الاسابيع الجايه لاستنجدت بها الروح والفؤاد.
رفع تركي سماعة تلفونه وقلبه ينبض بعنف وخفوقه يردد باسم واحد "هيفــــــــــــاء".
ضغطت اصابعه الرقم اللي حفظه عن ظهر قلب ورن التلفون لدقايق حس تركي فيها مثل الدهر.
وصله في الخط الثاني صوت هيفاء مثل ردة الروح:الــــــــــــــــو,
في هاللحظه حس تركي ان مستعد يسمع صوتها طول العمر..من الفرحه انه سمع صوتها نسى انها مخطوبه لنواف نسى انها تحبه ..نسى كل شئ باستثناء انه يحبها.
هيفاء باصرار:الــــــــــــو,, الــــــــــو,, الـــــــــــو.