ام فواز: والله ياولدي لو انك تتزوج وتستقر كان ارتاح بالي..
فوازبعد مدة من الصمت تكلم بغموض: كلامك صحيح يايمه..
الجوهره انصدمت لما سمعت اللي قاله فواز..وام فواز اللي ماصدقت خبر: والله يافواز تتكلم جد يمه؟
فواز وهو منزل راسه: ايه يايمه انتي خيطي وانا البس..
ام فواز وهي فرحانه: هذي الساعه المباركه والله..بنقيلك احلى بنت بالسعوديه..
فواز قام وهو متضايق:خلاص انا بروح للغرفه اريح واذا صارت الساعه 5 صحوني.
الجوهره قامت ورا اخوها تستطلع واول ماصاروا بروحه هي واخوها:فواز انت من جدك تبي تتزوج..
فواز انسدح على السرير وحط ايدينه ورا راسه: ايه من جدي ..
الجوهره بصدمه: والعنــــــــــــود!
فواز بغير مبالاه: وشفيها ؟مش انتي اللي قلتيلي انساها..خلاص هذا انا نسيتها وبابتدي صفحه جديده..
الجوهره هزت كتوفها باستغراب وماتعرف ايش تقول بس هي فرحانه انه اخوها خلاص قرر يتجاوز العنود ويكمل حياته..طلعت من الغرفه من غير ماتقول شي..

***********************

بعد ساعه بالضبط كانت عيلة ابو فهد مجتمعه بالمطار لما فواز واهله وصلوا فالجوهره اول ماشافت هيفاء راحت تسلم عليها..
الجوهره:اهلييييين!
هيفاء: هاي حبي..شلونك؟
الجوهره:بخير الله يسلمك..انت كيفك؟
هيفاء وهي ترجع تقعد على الكرسي والجوهره معاها:الحمدالله!
الجوهره وهي متحمسه:قولي انكم معنا مسافرين للرياض..؟
هيفاء وهي تقمز لها: ايه معاكم بنفس الرحله والطياره بعد..
الجوهره:الله وناسه ..خلاص انا حاجزتك طول الرحله..
هيفاء وهي تضحك:ههههههههه..وانا لك..
فهد ماكان منتبه مع امه اللي طايحه فيه وصايا كان باله مع الجوهره وهو يراقبها بين فترة وفترة ويتامل جمالها ونعومة صوتها..
ام فهد وهي معصبه:فهد..فهد..
فهد وهو يرد انتباهه لامه:لبيه...والله يايمه معاك وفاهم عليك مايحتاج توصين..
ام فهد وهي تمسك نفسها عشان ماتبكي: وش اسوي بعد..
فهد وهو يبوس راس امه يودعها:يله يايمه اشوفك على خير..وطمنوني على خالتي..
ام فهد:وصل يايمه وانت خل بالك من نفسك.
التفتت فهد على هيفاء ياشر عليها..فهيفاء قامت من مكانها وهي تعتذر من الجوهره واتجهت لاخوها وضمته وهي تحس انها بتصيح: بشتاق لك يالخايس..
فهد وهو يرفع عيونه: الله يالصاروخ..الا بتستانسين على فرقاي..
هيفاء تضحك عليه:ههههههههههههه..
الجوهره كانت تناظر فهد وتتامله هذي اول مرة تشوفه عدل كان طويل وطبعا جسمه كان متناسق ووقفته كانت وقفة عسكرية نظراً لتاثره بدراسته العسكريه عكس فواز اخوها اللي مهما درس بهالجامعه ماراح تغير من وقفته اللي كلها سخرية وكبرياء..
في هاللحظة التفت فهد على الجوهره وطاحت عينه بعينها فحس بمشاعر غريبه تجتاحه والجوهرة من الحرج صار وجهها احمر ونزلت راسها بسرعه..
فهد انسحب وراح وسلم على ابوه ونطر فواز لغاية مايودع اهله عشان يرجعون مع بعض.
فواز وهو يضم امه ويحبها على راسها:خلي بالك من نفسك يافواز..وماوصيك بصلاتك..
فواز بابتسامه جانبيه:وشدعوه يايمه مايحتاج توصين..
التفت على الجوهره اللي كانت مره متاثره:الجوهره ماوصيك على الغاليه..
الجوهره وهي تمسح دمعه نزلت:لاتوصي حريص..
اتجهت لفواز وسلمت عليه بينما ام فواز: خلاص انت بس شد حيلك وخلص دراسه والعرس خله علي انا..
فواز ببرود:اللي تشوفينه يايمه...يالله مع السلامه..
وراح لمكان مافهد ينتظره وطلعوا مع بعض.

**************************

العنود اللي كانت قاعده على الماسنجر تكلم صديقتها رهف:
رهف(معشوقة فيصل): اوووف الجامعه باقي لها اسبوع..
العنود(علمني شلون انساك وانام): ونااااااااااااااسه..
معشوقة فيصل:اي وناسه انتي الثانيه..الا قولي قرف..
علمني شلون انساك وانام: انا ماعرف ليه انتي ماتحبينها على انك شاطره.
معشوقة فيصل: لاني زهقت ..يالله متى يجي اليوم اللي فيصل يتزوجني فيه وافتك من الجامعه.
علمني شلون انساك وانام:هههههههههه..واللي يسلمك اللي يسمعك ماكأن فيصل طالب منك تخلصين الجامعه بالاول.
معشوقة فيصل: ماهو هذا اللي قاهرني...
تمت العنود ساكته تفكر بصديقتها وبحظها ..رهف حبها فيصل من اول ماشافها وعلى طول راح وخطبها..
معشوقة فيصل:ياااااااااااااااااااااااهو..الو..الو..
علمني شلون انساك وانام: معاك
معشوقة فيصل: تعالي انت ماقلتيلي انتوا ليه رجعتوا الرياض كذا بدري؟
علمني شلون انساك وانام: زهقنا ورجعنا بدري..
معشوقة فيصل:هااااااااااااااااااا...فيه حد يصير لندن ويزهق منها؟
العنود: رهف بغيت اسالك سؤال.
رهف:اسااااااااااااااااااااالي؟
العنود بتردد: تخيلي انو انتي حبيتي واحد وهو قالك انو راح يخطبك..
رهف:امممممممم
العنود: فجأه لقيتيه يكلم وحده ثانيه..ايش راح تعملين؟
رهف: بصراااااااااااااحه راح ازعل..بس انتي ليه تسالين هالسؤال؟
العنود اختبصت فحاولت تدور على عذر تقدمه من غير ماتفضح نفسها: ولا شي بس لاني شايفه مقاله بمجله تتكلم عن مشكلة هالبنت..
رهف بتفكير:طيب هو ماحاول يبرر لها..
العنود بتوتر: لا البنت تقول انها ماعطته فرصه.
رهف: غلط..المفروض عطته فرصه وسمعت ايش بيكون تبريره ممكن يكون ماعمل شي.
العنود وهي تفكر بالم ماعمل شي بس انا شفته بعيني وهي ماسكه ايده: والله ماكتبوا شي..
رهف: اشفوك مررررره مهتمه بهالمقاله..
العنود خافت: لا بس لان آخر المقاله كاتبين سؤال(ايش راح يكون شعورك لو كنتي مكانها؟).
رهف:كااااااااان عطيته طرررررررررررراق..ههههههههه
العنود:الله يرجك هههههههههههههه
رهف:طيب عمري انا اللحين بطلع تامرين بشي..
العنود:مشكوره....
رهف:باااااااي
العنود:باااااااااااي
طلعت العنود من الماسنجر وقامت عشان تبدل ملابسها ولبست بيجاما ورديه عشان تنام بس النوم جافها..لان مخها كان يشتغل على جملة رهف(المفروض عطته فرصه عشان يبرر)قامت من السرير وتوجهت للبلكونه وقعدت على الكرسي الموجود برا وهي تراقب القمر ..هل معقوله اكون ظالمه فواز وانا ما عطيته فرصه يبرر لي اللي حصل..لا انا اللي سويته صح شلون ظالمته وانا بنفسي شفته بعيني يمسكها والدليل انه انصدم لما شافني..تنهدت بتعب وغمضت عيونها ونسيم الصيف يداعب خصلات شعرها..

********************

في الطياره كان الكل نايم ماعدا ثنتين قاعدين يتسامرون..
هيفاء: والله مو هينه صدق انك قويه..لو انا ماظن اقدر اقول للدكتوره كذا.
الجوهره: لا حبيبتي انا حقي آخذه بايدي اجل تنقص من درجاتي وانا اجوبتي كلها صح..لألألأ مايصحش كدا..
هيفاء وهي تضحك:ههههههه..الله يقطع بليسك خلاص ان بغيت مساعده بالجامعه راح اقولك..
الجوهره وهي تطق على صدرها:افا والله عليك انت تامرين امر..
هيفاء وهي ميته من الضحك على حركاتها:هههههههههه..
قطعت عليهم المضيفه وهي تطلب منهم يقصرون صوتهم شوي فتفشلوا البنات وتموا ساكتين فترة بس ماقدروا..
هيفاء: الجوهره بغيت اسالك سؤال بس مستحيه؟
الجوهره:اسالي.
هيفاء :انتي مخطوبه؟
الجوهره بابتسامه:ياريت..
هيفاء وهي تدفها من كتفها: ههههههه..لهالدرجه مستعجله عالعرس..
الجوهره وهي تمزح: ايه بموووووووووت اذا ماعرست..
هيفاء: يالله عقبالك..
الجوهره وهي قاصده: بس مو اللحين ..
هيفاء باستغراب:ليه.؟
الجوهره :لان فواز موصينا ندور له على عروس.
هيفاء انصدمت بس مابينت هالشي على ملامحها: اها..ومن بتاخذون له؟
الجوهره بتفكير: والله مادري بس امي اظاهر براسها وحده..
هيفاء بجديه: وفواز هو اللي طلب انكم تخطبون له؟
الجوهره: ايه ..وبعد طلب هالشي اليوم قبل لانسافر..
هيفاء كانت بتقول شي بس المضيفه قطعت عليهم مره ثانيه تطلب منهم الهدوء لان النسوان اللي بجمبهم منزعجين منهم ومايقدرون ينامون..التفتوا الجوهره وهيفاء على النسوان ولقوهم يناظرونهم بنظرات ناريه فانحرجوا فقامت كل وحد وتلحفت وغمضت عينها الجوهره بعد فترة قصيرة راحت بنومه بينما هيفاء تفكر باللي قالته الجوهره من شوي..معقوله فواز بيخطب مسكينه يالعنود..

*********************

انتهى الليل وظلامه وابتدا النهار وظيائه وكانت الساعه 8 الصبح لما قامت العنود ولاول مره من مدة تحس بنشاط اتجهت للحمام وخذت شاور سريع وبعدها اتجهت للدولاب تدور على شي تلبسه فطلعت تنوره قصيره توصل للركبه لونها اخضر مع بودي ابيض مورد من غير اكمام توجهت للتسريحه تحط شوية ميك اب وبعدها نزلت تحت وحصلت امها قاعده اتقهوه ومحمد قدامها قاعد يلعب بلاي ستيشون.
ام حمد اول ماشافت بنتها : حلاتين وش هالزين كله..
العنود باتسامه: الزين عندك يايمه..
ام حمد: ايه هذا السنع من ردينا من لندن وانتي ماتلبسين الا المبهذل..اللحين رديتي مثل اول..
العنود وهي تضحك:ههههههه..خلاص ولا يهمك كل يوم بكشخ..
ام حمد: انزين قومي يمه كلي لك لقمه الفطور بالمطبخ..وخذي معك هالمخبل اللي اول ماقام حتى ماغسل وجهه جا وشغل هالكمبيوتر.
العنود وهي تقوم انشالله..اتجهت لمحمد وهي توخصر له:يله محمد قم خل نروح نتفطر..
محمد وهو مركز مع اللعبه:ماااااااانيب...
العنود بخبث: يعني منت بقايم؟
محمد وهو سافهها: لا
العنود:طييييييييييب..راحت العنود واتجهت للتلفزيون بتطفيه ومحمد لما عرف حركتها قام من مكانه وهو يصرخ:خلالالالالالاص بقوم بقوم اوووووووووف...
ام حمد قعدت تضحك على اشكالهم والعنود تتقدم محمد للمطبخ.
الا تلفون البيت يرن ردت عليه ام حمد:السلام عليكم.؟
ام فهد: وعليكم السلام..شلونك يالغاليه؟
ام حمد:مرحبا والله..انا الحمدالله بخير انتي شخبارك؟
ام فهد بصوت حزين:كويسه والحمدالله ..انا كلمت يام حمد بس عشان ابلغك انو احنا بالرياض واللحين واصلين البيت..
ام حمد بخوف: خير يام فهد فيه شي..
ام فهد بتعب: خير انشالله بس اختي لطيفه تعبانه شوي..
ام حمد:سلامتها الغاليه وش فيها؟
ام فهد:والله ماني عارفه بس انا بمرها بعد الغدا انشالله..
ام حمد:على خير انشالله ..خلاص انا بروح معاك..
ام فهد:اجل انتي مريني عشان نروح سوا..
ام حمد: انشالله..يالله مع السلامه..
ام فهد: بوداعة الرحمن..
سكرت ام فهد من ام حمد وهي مره تعبانه من الرحله وكان باين عليها هالشي فهيفاء حزنها شكل امها:يمه واللي يسلمك تقومين ترتاحين لك شويه..
ام فهد:ماقدر يايمه ماقدر..مايجيني نوم..
هيفاء باقناع:معليه يايمه بس انتي قومي وانسدحي ترتاحين شوي وانا راح اوقظك لما تجي عمتي..
ام فهد وهي مره تعبانه قامت ورقت لغرفتها وبالفعل اول مانسدحت على طول غمضت عينها ونامت..
اما بالنسبه لهيفاء اللي ماكلها الخوف تبي تروح لخالتها اللحين قبل بكره خالتها لطيفه تحبها مووووت ممكن لانها عاشت وحيده من غير ماتتزوج وماعندها اولاد حبت هيفاء زي بنتها وعشان كذا بعد ماتوفى خالها ابو تركي هي اللي تولت تربيتهم وعدتهم مثل اولادها.
خذت تلفونها ودقت على العنود ثواني الا العنود راده: هلا والله باهل لندن!
هيفاء بمراره:اي لندن الا قولي الرياض..
العنود باستغراب:انتو بالرياض.؟
هيفاء:ايه تونا قبل شوي واصلين.
العنود وهي تمثل الغضب:صدق انك خاينه..ليه ماقلتيلي؟
هيفاء وهي متنرفزه:ايش اقولك انتي الثانيه انا حصلت وقت عشان ادق عليك..
العنود حست ان في شي: هيفاء شفيك كذا عصبتي..ترا امزح؟
هيفاء بحزن: خايفه يالعنود..
العنود: شفيك ياهيفاء ترا مره خوفتيني..؟
هيفاء:خالتي لطيفه تعبانه يالعنود وانا بصراحه خايفه عليها..
العنود بصدمه: خالتك لطيفه! المسكينه ايش فيها؟
هيفاء:جلطه بالقلب..
العنود بحزن لانها عارفه غلاتها عند هيفاء: مسكينه..طيب امي عرفت؟
هيفاء وهي تتنهد:ايه الوالده كلمتها وقالت لها..راح تجينا بعد الغدا عشان تروح مع امي..
العنود:خلاص انا بروح معاكم..
هيفاء:اوكي ناطرتك..
العنود: باي..
*********************
في شي راح يصير بالمستشفى بس ايش راح يكون؟
......
والعنود هل بتهتم اذا عرفت ان فواز بيخطب؟