الله يعطيك العافية

وتسلم يمينك اخي ابو باسم على الطرح

بقول شي يمكن يكون غائب عن المعظم من الناس وكان صراحه غائب عني ولكن زوجي هو من لفت انتباهي لهذا الامر

الاول ما شاء الله عليهم البنت ما تكمل سبع سنين الا الحجاب والملابس والستر مفروض عليها وما يطلع منها شي ويعاملونها مثل الكبيرة ويفهمون البنت من السبع سنوات انها كبرت ولازم تكون حذرة وتلتزم بحجابها وبسترها ويبدؤون يعلمونهم القرآن والصلاة

لكن الحين في ايامنا نعلم بناتنا ان كل شي عادي والبنت توصل الى 10 سنوات وتكون مكلفه والام والاب والاهل كلهم يعاملونها انها لازلت صغيرة وما يشددون عليها من ناحية الستر او حتى تعليمهم امور دينهم لكن ينصب همهم على تعليمهم امور دنيتهم مثلا يودونهم معاهد لتعلم القراءة ويقول الطفل يتعلم في صغره اسرع وبيكون افضل اليه متناسين الامور الدينية

في البداية كنت اقول لزوجي البنت للحين صغيرة لا تشدد عليها , ودائما يردد علي ان علميها من الصغر وفهميها ان الحجاب واجب عشان ما توصل سن التكليف الا وهي فاهمه عشان لا انتي تتعبي معاها ولا هي توصل سن التكليف وتكون للحين مو ملتزمة فأنتين مسئوله عنها في هذه الفترة , وطبعا في هالامور ما اجادله واسوي كل الي يأمر فيه

والي لاحظته انه فعلا الحمد لله بنتي الحين 9 سنوات ولله الحمد ملتزمة بعباية الي هي عباية الراس بعد مو الكتف , واذا تروح بيت ابوي ما تشيل حجابها لان بيكونون اولاد اخويي موجودين هناك وحتى لو ما كانوا موجودين تعلمت انها ما تشيل الحجاب لان متوقع في اي وقت يجي اولاد خالها

وبنت اخوي رغم انها وصلت 15 سنة الا انها للحين مو ملتزمة بحجابها في بيت ابويي لين تجي اولاد عمها رايحين جايين وهي ولا همها ولد عمها هو الي ينزل راسه ويطلع من المكان الي هي فيه يتجنب انه ما يكشفها وهي ولا همها

لان البنت تعلمت ان كل شي عادي وما الزمت بحجاب الا بعد ما وصلت سن التكليف وفوق كل هذا ما كان في تشدد عليها من هالناحية دائما المقولة الي على السانهم توها صغيرة البنية

تساهلنا وتساهل الاهل في مسئلة الحجاب هي الي وصلت البنات الى هالدرجه طبعا مع العوامل الثانية


عذرا للاطاله