سماح تكلم عبد الرحمن بالتلفون
++++++++++++++++++++
عبد الرحمن: وحشتيني سماحي
سماح: وانت اكثر .. ليه امس اتصل ماترد علي ..خبرني عنك شحالك وشو سويت ..
عبد الرحمن: يسرج الحال .. حبيبتي نتائج الفحوصات كلها زينة .. وفي امل كبير كبير ان شاء الله .. على فكرة انا امس سويت عملية بسيطة عشان كذا ما كلمتك ..
سماح وتحط يدها على قلبها: عملية وشو؟؟
عبد الرحمن: شي بسيط وايد .. والحمد لله نجحت .. وبعد بكرة انا عندكم بالعين .. لا تحاتين
سماح: يعني انت الحين كويس؟؟ ما بك شي؟
عبد الرحمن: كويس و كويس و كوووويس مرّّة ... انا مبسوط سماحي .. راح يكون عندنا درزن اعيال انتي بس قولي آمين ..
سماح:هههه آمين يا رب ...
عبد الرحمن: فرحانة؟؟
سماح: دامك فرحان اكيد فرحانة ...
عبد الرحمن: شخبار اميه؟؟ سلمي عليها وطمنيها علي .. ماروم اتصل لها بعدين ..
سماح: يوصل لا تحاتي .. امك والشهادة لله شايلتني على كفوف الراحة .. ما تخليني اسوي ولا شي ...
عبد الرحمن: خايفة عليج و .. وعلى الجنين ..
سماح: وام الجنين تنطر جيتك بأسرع وقت ... لان الجنين من دونك ما يسوى ..
عبد الرحمن: انا اعرف شكثر ربي راضي علي و امي تحبني .. لان ربي هداني فيج .. يا اغلى هدية بحياتي ..
سماح: وانت احلى حياة بهالوجود ...
عبد الرحمن: ياللاا ابسكر الحينه .. تصبحين على خير ...
سماح: وانت من اهله .. تغطى زين .. يقولون برد بالرياض ,,,
عبد الرحمن: وانتي بعد حبيبتي .. سماح
سماح: لبيه.؟؟
عبد الرحمن: لبيتي حاية ...ابيج اتديرين بالج على حالج ...
وسكت شوية وكمل
عبدالرحمن: حلليني
سماح تفاجأت ما توقعت تسمع منه هالشي.. واهو بغربة و بعيد عنها .. وكانت تبي تبجي .. خافت و قلبها عورها..
سماح: عن هالرمسة وربي زعل منك
ابتسم لها عبدالرحمن في خاطره و حاول يغير الجو
كملوا سوالفهم شوية و كل حد منهم سار ينام
***++***
عرس مروان
***++***
عرسه صار في فندق ومرة وحدة مسويها حفلة استقبال ...
الجو كان عجيب مع الرزفة الشباب كانوا مرتبشين .. جو وناسه من جد شي ...
شباب القهوة كلهم هنـاك ... "محمد" أسامة " علي" مبارك " والكل .....
دخلوا توايهوا وسلموا على مروان " المعرس" و جماعة العروس ...
محمد:مبروك مبروك .. حيا الله المعرس ..
مروان: يحييك .. الفاال لك
محمد يرفع ايده يدعي بحركة ضحكتهم: يارب يسمع منك .. انت بس ادعي لي في ليلتك المفترجة هذي
مروان:هههههههه لا توصي وانا خوك ...
مبارك: منك المال و منها العيال مروان ...
مروان: تسلم خوك وعقبالك .. مشكور على جيتك ..
مبارك: ولو .. لا تقول جي خوك.. اصلا لو ما عزمتني بعد كنت باييي ... عشان اصدق واشوف بعيني ههههههه
مروان:هههههههه
علي : مبروك مروان ...
مروان: ربي يبارك فيك .. هلا والله بأبو حسن ...
علي شاق الحلج مستانس لانه قال له ابو حسن
علي: هلا بيك ..
مروان: من يوم و ساير لا تنادوني إلا ابو اسحاق ...
اسامة مبطل عيونه: ابو شنو؟؟
مروان: ابو اسحااااااق ...
وضحكوا الجماعة و عدوها ... " ابو اسحاق " !!!!
سلموا على ابو و اخوان العروس وبعدها جلسوا يرتاحون قبل لا يرزفون معهم....
مبارك: اقول محمد انا هالريال اخو العروس كأني شايفه من قبل بس مدري وين ...
ابتسم محمد ابتسامة غريبة: يمكن شايفه في مكان ... اهو عيناوي بعد ...
مبارك: يمكن بعد ...
اسامة: وانا هم مشبه عليه بحد .. بس ماني بعارفه ..
علي: اذكر .. مادري كأني شفته بالقهوة .. كأن !!مادري ...
محمد: واذا شفتوه شو فيها ...
مبارك: اهو قال لي انهم صاروا معاه بالعمرة ...
محمد: ايوه نعم صحيح...
علي: لا من جد الوجه موب غريب
محمد: شو فيكم .. ما غريب الا الشيطان ...
مبارك: أي أي أي تذكرت
محمد: لاماهوب صحيح
مبارك: على طول حكمت انه ماهوب صحيح .. شو دراك وش تذكرت انا ...
محمد: مدري ..
علي: قول شو تذكرت
مبارك: تذكر الهوشة الكبيرة اللي صارت بالقهوة ...
اسامة: أي هوشة؟؟
مبارك: الهوشة .. لما مروان تشابك مع رجال كان مغازل اخته مادري شنو ... وكان يتهددد فيه ..
علي: ايووووه .. الحينه تذكرت ... صحيح .. وانا اقول كأني شفته بس هالحينه يضحك ويوم نشوفه كان معصب والوانه كلها متغيرة ..
اسامة يطالع في محمد: شو تعليقك بوجاسم ...
محمد:ههههههههه
واكتفى بهالضحكة بدون اجابة ...
علي: ياللاا عاااااد قول لنا السالفة
محمد: ماشي سالفة ,, الحينه احنا في عرس الريال و نيلس انتكلم عليه وعلى عروسته واهلها ماهي بعدلة علينا ...
علي: زين قوم قوم معي .. نطلع علمني السالفة و نرجع ...
محمد: ايلس انت لا تفضحنا ...
مبارك: نبي نعرف فاجأتنا... كل ابونا شوقتنا ..
محمد: ولا شي يا طويلين العمر .. اللي قلتوه صحيح .. واللي قاله مروان هم صحيح ..
اسامة: شلون يعني ؟؟
محمد: لما مروان راح العمرة .. شاف هالريال االطيب اخو عروسته .. وكان رايح العمرة اهو و اهله و جماعته .. ومن بينهم اخته " العروس" ...شافها وعرف انها اماراتية من رمستها و لباسها وجي .. حرمة حشيم محترمة ..عرف اهلها وتعرف عليهم .. وسبحان القدر ان هالبنت تطلع اهي نفسها البنت اللي كان يبي يضحك عليها.. عجبته فيها حشمتها و ماشاء الله على قولته جميلة الاخلاق و الخُلق ...
علي: وشلون موقف اخوها.؟؟
محمد: اول ما شافه ما عرفه .. لان مروان تغير .. حتى ملامح وجهه تغيرت و النور الايماني يشع منه .. التقوا في الحرم النبوي .. وتعرف عليه.. واستسمح منه ... والسالفة هذي صارت من زمان فهدأت النفوس .. ولان البنت كانت صغيرة وبرئية وماتدري عن هالسوالف واهو بس كلمها بالتلفون ولانها ما تعرف شي اكشفوها من اول مكالمة..
صارت علاقتهم مع بعض اقوى وترابعوا طول فترة وجودهم في العمرة ... ولما رجعوا البلاد ما انقطعت علاقتهم مع بعض و حب يصلح غلطته وبنفس الوقت يتزوج حرمة ومن عايلة محترمة .. وخطبها و الليلة عرسه هههههه
مبارك: والله هالقصة فن ...دخلت مزاجي ...
علي: اقول شباب .. قوموا نرزف من الزين ..
وقام واهو حامل العصا و يرقص " يرزف" مع الجماعة ...
و الشباب سوو نفسه ...
انبسطوا من هالقصة .. ومن هالعرس كله ...
وتزوج مروان على بركة الله ...........
++++++++++++++++++++++
===========
بيت بو عبدالرحمن
===========
++++++++++++++++++++++
أم عبدالرحمن وبو عبدالرحمن وماجد وسماح جالسين بالصالة يطالعون التلفزيون " الاخبار"..
بو عبدالرحمن: الله يجيرنا ... لا حول ولا قوة الا بالله .. شو هذا ...
ام عبدالرحمن وحاطة يدها على قلبها: وا ابويه .. ياويل حالي .. وربي يصبر اهلهم ...
ماجد: ليش جذي والله حرام .. يعني اهم شنو يستفيدون من هالتفجيرات هذي ..
سماح: من متى هالتفجيرات بدأت؟؟
بو عبدالرحمن:التفجيرات بالرياض من الفجر..
ام عبدالرحمن: يمه سماح اتصلي لي بعبدالرحمن ابي اطمن عليه ونعرف شو هالسالفة ..
سماح: البارح متصل و الحمد لله بخير ونعمة و يسلم عليكم و عليج انتي بالذات خالتي ..
بو عبدالرحمن: معليه يا بنيتي .. اتصلي لها عشان اتطمن و نطمن نحن بعد ..
وقامت سماح تجيب التلفون: ان شاء الله خالتي ..
ويدق جرس الباب ... ويروح ماجد يفتحه ...
بو عبدالرحمن: ها مــايد منو ياي؟؟
ماجد: يبـه واحد يباك ... بس ما عرفه ...
وقفت ام عبدالرحمن: قوم شوف منو ..
بو عبدالرحمن: طيب .. شو فيج جي حاطة يدج على قلبج واتنافضين ...
ام عبدالرحمن: مدري حست قلبي منقبض وكأن حد ماسكة بيده و يعصره .. قوم بسرعة شوف منو ...
وراح ابو عبدالرحمن يشوف من ...
ام عبدالرحمن: يمه سماح مسكي يدي .. ماني بقادرة اوقف على اريولي قعديني ...
سماح: خير خالتي شفيج ؟؟؟؟
وجلستها على الكرسي ... وعينها تراقب الباب وتنطر جية ريلها ...
دخل عليها بو عبدالرحمن واهو شايل تسفيرته بيده و قابض عليها ...منزل راسه وعيونه حُمر .... وماجد وراه واقف .. متصلب مكانه ...
سماح اطالعه: خير عمي .. شو مستوي ؟؟؟؟
بو عبدالرحمن: البقى براسكم ...
سماح: شو؟؟ في منوو ؟؟؟ عمي شووو مستوي
ماجد يروح ويركض يبجي تحت ريل امه ....
وسماح بدأت الدموع تطيح من عيونها ...
ام عبدالرحمن وخانقتها العبرة: ولدي .. بو عبدالرحمن ولدي شصااير عليه؟؟؟؟
بو عبدالرحمن: ولدج عطاج عمره يا ام عبدالرحمن .. عبدالرحمن رااح مع اللي راحوا ... حسبي الله ونعم الوكيل ..
ام عبدالرحمن: لالالالالالالا ولدي لا ..
سماح وتصارخ وماهي مصدقة نفس المجنونة: عمي شتقول .. عبدالرحمن لآ .. عبدالرحمن البارحة متصل لي .. يقول اهو بخير و بكرة بيوصل البلاد ... عمي .. اكيد مخربطين بالعنوان ..انا بتصل له الحينه واقول لك الخير هذا كله جذب ..
بو عبدالرحمن يبكي و الدموع تنزف في قلبه قبل عينه ...
وماجد لام امه و يبجي وامه اغمي عليها وتلاحقوها بالماي ...
سماح تتصل لعبدالرحمن لكن تلفونه مغلق ....
سماح: عمي عبدالرحمن للحينه نايم و قافل تلفونه ...
بو عبدالرحمن يلم سماح لحضنه... ويمسح على راسها ..
سماح: لا تمسح على راسي ... عبدالرحمن مابه شي .. لا عبدالرحمن بخير اقول لكم ...لا مستحيل ..
وتطيح غشيانة اهي بعد ...
اتصلت البشكارة للاسعاف بسرعة لما شافت حالتهم جي ...
يدخل علي ومعاه محمد جايين من العرس و ضحكاتهم واصلة لآخر الشارع ... ولما شافوا حالة البيت انقلب حالهم ... ماجد ارتمى في حضن اخوانه ...
ماجد: عبدالرحمن .. عبدالرحمن ..
محمد وقلبه منقبض... : شو مستوي .. شو فيه عبدالرحمن؟؟
علي: تكلم .. اميه ليش تبجين جي .. ابووويه .. حرمة اخوويه شو فيها ؟؟ تعبانة؟؟؟
محمد: ابويه ليش تبكي جي ...
بو عبدالرحمن: عبدالرحمن اقتلوه .. عبدالرحمن مات .. إانا لله و إنا اله راجعون و حسبنا الله ونعم الوكيل فيهم ...
"عبدالرحمن مات" "عبدالرحمن مات" "عبدالرحمن مات" "عبدالرحمن مات"
صدد يتكرر على مسامعهم ..
يعني انطفت شمعة عمر شاب في مقتبل عمره وفي عمر الزهور .. لم يفرح بعد بحياته ولن يتسنى له رؤية اولاده ... !!