+++++++++++++++
بيت بوشاهين
+++++++++++++++
ام شاهين و بنتها "احـــلام"... جالسين بالصالة و هم في حاله توتر .. و ام شاهين ماسكة يد بنتها وتهديها ...
دخل عليهم خالد .. وشاف حالتهم .. سلم عليهم و جلس معهم ...
خالد: ابويــه وينه؟
ام شاهين: في الديوانية ..
خالد: لحاله؟
احلام تناظر امها بخوف و باين عليها انها اتنافض
ام شاهين: معاه ريال .. وقال ما يبي احد يدخل عليه ...
خالد طالع اخته بنظرة خلتها تخاف ازود و تبكي ...
خالد: يمه منو اللي مع ابوي؟
ام شاهين: مدري .. بس اهو قال نودي له الفواله و بعدين ما يبي احد يروح له ..
خالد قام على طوله بيسير لابوه و يشوف من عنده ...
ام شاهين: يمه و اللي يخليك خلك ..
خالد: انتي خايفة من شو؟؟ ليه ما تبيني اروح له .. منو اللي عنده؟
ام شاهين: يمه ابوس يدك ماحد عنده .. خليك هني ...
خالد: يعني اكيد اهو ما غيره ..
ترك امه وما طاع يسمع لرمستها و راح صوب الديوانية ... و سمع رمسة ابوه وهو يقول : حسابك عند رب العالمين اللي ما يضيع حق عباده ..
يدخل خالد منفعل .. هائج الاعصاب .. مندفع ..
خالد: أيالخام .. تيي بريولك لهني .. ادري بك حقير وواطي لكن لهالدرجة توصل الجرأة و تجينا لهنا ...
ويتقدم له يبي يعطيه بوكس و لكن ابوه مسكة من كتوفه و يوده ...
بوشاهين: اذكر الله يا ولدي .. روح هالحين خليني اتفاهم مع الريال
خالد: هذا ريال .. يخسي اهو و اشكاله ما يسوي ريال ولا درهم واحد
بوشاهين بعصبيه على ولده: خالد .... قلت لك اطلع .. انا قايل لهم مابا حد يجيني هنا ..
خالد: يبــه شلون تسمح له يدخل هالبيت بريوله و يطلع منه و اهو صاحي .. و الله و روح الغالي ...
بوشاهين يقاطعه: انا ابوك .. و ابو الغالي ... و إذا تكلمت انا انت تسكت .. وهذا ضيف و يانا .. له فوالته و نسمع مطلبه .. ومادام انا موجود انا اللي اتصرف ...لا تعلي صوتك بوجودي .. و من بعد عيني و إذا اخذت مكانيه يحق لك تتكلم.. و هالحين اجلس و اسمع رمسته و بعدها قول رايك ولكن لا تحكم على حد و انت هب في حاله ...
يلس خالد جنب ابوه و هو متوتر .. و يحاول يتمالك اعصابه .. وو اللي يشوفه يشوف حمران النواظر و الشرار يطاير من عيونه ..
مروان كان ساكت و لما جلس خالد جلس اهو بعد في الكرسي المقابل لهم .. و لكنه مايروم يرفع عينه و ينظار بعيون بوشاهين و يشوف الحزن و الانكسار اللي اهو فيه و مدى احترامه له وصبره عليه ... ولا يروم يناظر بعيون اخوه خالد .. و الشرار يتطاير من عيونه و لا يقدر يلومه او يدافع عن نفسه ...
حس مروان بالاذلال قدام شيمة ابو المرحوم شاهين ..
نزل مروان على ركبتينه و بين يدينه كفنه ...
بوشاهين: شنو هذا ؟؟
مروان: هذا كفني .. وانا جاهز لاي ديه تطلبونها ...
وقاطعه : ما يعوض المال عن اصلح العيال ...
مروان: انا تحت امركم و اللي تريدونه مستعد اسويه
خالد: دم بدم يا مروان الكلب
بوشاهين بنبرة حادة عشان يسكت ولده: خالد ..
مروان: اذا كان تلويثك بدمي الفاسد بيطهر دم شاهين الطاهر انا ما عندي مانع .
بوشاهين: انا مو مستعد اخسر ولدي الثاني و السبب انت للمرة الثانية
خالد: يبه انت شتقول
مروان: خلاص عيل انا بسلم نفسي للشرطة وبقول لهم اني السبب اللي عاكسته و خليته ينحرف عن سيارته و تنتقل روحه للباري عز وجل
بوشاهين: انا ما بستفيد شي من حبسك
مروان: انا جاي و مستعد لاي شي تطلبونه .. بس عندي طلب و ادري اني ما استحقه لكنه كان امنيه قبل موت المرحوم
خالد:وش تبي مننا؟
مروان: ابي اطلب يد بنتكم احلام
خالد: تخسي الا انت
بوشاهين: يعني تبي تصح غلطك .. لا يا مروان .. شلون بتقدر بنتي تعيش مع شخص سبب لها في سوء سمعتها و فوق منها موت اخوها ..
مروان: انا آسف
خالد: كلمة آسف ما ترجع اللي راح ...
بوشاهين: على العموم البنت بتزوج من ولد عمها و راح تسافر معاه يكمل دراسته بالخارج .. و الله الغني من هالنسب ..
مروان: والله اني بغيت بنتكم من الخاطر .. و يشهد علي الله انها بنت حشيم و ماشفت عليها شي وهذا اللي خلاني اتعلق فيها و غير عن كل البنات الاحقها بنية الزواج .. لكنها كانت تصدني .. ما ختين ابرر لها ملاحقتي لها .. و المرحوم فاجأنا بجية بوقت مو مناسب
خالد: متى كنت تبيه يجي اجل .. تبيه يجي بعد ما تكسر يد اخته .. والا بعد ما تعمل عمايلك فيها .. والا بعد ما تلتم عليكم كل العربان ...
قاطعه مروان: اذا كنت انا واطي اعتقد انك تعرف اختك انها تموت ولا تطاوعني
خالد: يالنذل..يا....
بوشاهين: خالد خل يكمل رمسته
مروان: انا مستصغر نفسي ومهما رمست ... آنا اسف ...
ويتكلم مروان و الدموع على خديه منهار .. حتى ان خالد كاد قلبه ان يرق له .. ولكن قلب خالد صار كالحجر على مروان .. ومهما انهمرت دموعه ما بيقدر يخلي خالد يسامحه ..
خالد بالرغم من صغر سنه ولكنه واعي ... بس عصبيته اللي تلغي تفكيره في اغلب الاوقات ..كان يعتبر شاهين صديق و اخو و يقوم مقام الابو ... وهذي صدمة ما استحملها الكبيرو وشلون حال الصغير ...
مروان: انا راضي بحكمكم علي
بوشاهين: حكمنا انك تطلع من هالبيت واعتقد انك اخذت فوالتك
مروان: حلفت عليك بأغلى ما عندك انك تاخذ حقك مني ... والله اني اتعذب
بوشاهين: اغلى ما عندي كنت سبب بفقدي له .. لا حول ولا قوة الا بالله ... انا وكلت امري لله سبحانه .. وإن كان لي حق عندك ربي ما بيضيعه ... توكل على الله
مروان: هذا آخر كلام عندك ؟
بوشاهين هذا آخر كلام
مروان: انت محللني من دم المرحوم شاهين؟
خالد: يبــه!!
بوشاهين:اذا كان الله وهو الخالق يتوب على عبيده .. وشلون وانا عبد من عباده ...
مروان: يعني انا مسموح؟
بوشاهين: انا مافي قلبي شي غير حزن و جرح ما يلتئم .. وإن تاب عليك سبحانه.. فأنا موكل امري لله .. وما خلقت الدنيا إلا لبلاء النبلاء ... ويمكن هذا امتحان من رب العالمين ...
مروان:بوشاهين ... انا مبري الذمة؟
بوشاهين:قلبي مو مطاوعني اقولها يا ولد الناس ... لكن اذا حسيت ان ربك تاب عليك و انك فعلاً ندمت على ما سويت .. بتكون محلل من دم الغالي الله يرحمه...
مروان قام و باس بوشاهين على راسه ...
خالد ماقدر يستحمل و طلع من الميلس .. ومن برا البيت كله
++++++++++++++
في بيت بوفهد
++++++++++++++
سعد كان جالس بالصالة و مشغل التلفنزيون .. لكن باله كان مشغول وواضح انه مش منتبه يطالع شنو ... لان كان يطالع فلم كرتون!!
ما انتبه الابدخلة اخوه فهد عليه ...
فهد: مرااااحب شحالك
سعد: مراحب مليون .. بخير الحمد لله
فهد: شو هذا اونك رديت بزر اخويه
سعد: افاا ليش شو صاير ؟
فهد: يالس تطالع رسوم متحركة .. !!
سعد: انا .. هيه وانا افرر بالقنوات مالقيت غيره .. خخخ التلفزيون فاضي ماكو شي يشجع حد يطالعه..
سعد سكت شوية .. كان يتأمل في اللوحة المعلقة على الحائط ... هذي اللوحة العائلية اللي سووها البنات واللي نفسها موجودة في بيت السالم تذكروها؟؟
انتبه فهد وين يطالع اخوه و ابتسم له ...
فهد: شفيك ياخوي ..
سعد:ماشي .. بس موضوع شاغل بالي ...
فهد:في الشغل؟
سعد: يعني .. لا تشغل بالك .. قلّي شصار عن موضوع شمس؟
فهد: بعد امتحانات منتصف الفصل بتصير الملكة
سعد: عالبركة ان شاء الله .. بس ليش ما يصبرون لحد ما تنهي هالسنة على خير اخاف تتأثر دراستها..
فهد: قلت لهم بس ماطاعوا .. مستعجلين و بيني وبينك موحلوة نطول اكثر ...
سعد: مبروك يابو بدر تستااهل .. بقوم اباك لشموسة ...
فهد: ليش انت بعد ما تدور لك بنت حلال و تستقر وانا خوك ...
سعد ارتبك ..
سعد: لسه بدري ياخوي .. اول احل مشكلتي و بعدين يحلها حلال ..
فهد: وش دخل مشكلتك بزواجك؟
سعد: ماشي ياخوي لا تشغل بالك؟
فهد: انت للحين تفكر فيها من صجك؟؟!!
سعد: انا مسافر المانيا بعد يومين ..
فهد: رايح لها؟؟!!!!
سعد: انت موب فاهم شي ... بعد ما ارجع راح اخبرك بكل شي ..
فهد: وليش ما تفهمني ياولد السالم وتخبرني الحين
سعد: ما ينفع .. اول اتأكد و بعدها يصير خير ...