محمد يطالع في سارة اخته مندهش هب عارف شالسالفة؟؟ الريم و السالم .. يعني هي نفسها .......؟؟؟
محمد: أم الهنوف منو هذي ال ...
سارة: تقصد اللي دازة لي المسج؟
محمد: هيه
سارة: وانت شكو ... >> تبي تحرق اعصابه
محمد: لا بس الاسم ,,, سويرة و راس الهنوف من هي؟
سارة: اترك راس بنتي عنك ولا تدخلها في السالفة ...
محمد: ليش شو هي السالفة؟
سارة: ماشي سالفة .. جي في سالفة و نا مدري؟
محمد: انتي تلعبين بأعصابي تراج ..
سارة: ليه انا وش سويت؟؟
محمد: اوهوو سارة .. تبين تقولين لي و إلا امشي ؟
سارة: اذا تبي تمشي براحتك ياخوي مابي اعطلك...
محمد اطالعها متنرفز و يخزها بعينه عسب اتكلم ..
سارة: هذي مريم بنت السالم
محمد فج عيونه يطالع فيها!! ما خبره ان مرايم صاحبة سارة او بينهم علاقة او معرفة؟!!
محمد:و ليــــه تدز لج مسجات .. من متى انتو ربع؟؟
سارة: من عرس اخوي عبدالرحمن ...
محمد: هيه شلون
سارة: شنو اللي شلون؟
محمد: سمعي الحين بتقولين لي السالفة عدل بالتفصيل ولا بتلعبين بأعصابي لو شلون؟؟؟
سارة:هههههههههههههههههههههههه ياحليلك و انت معصب .. خلص بقول لك
محمد: ياللااا قولي
سارة:شفتها في عرس عبدالرحمن ... كانت حاضرة العرس و جالسة جنب بنت عمها ... هذي اللي بياخذها نادر الجواد وهو من عايلة العالي اهل سماح ....
محمد: هيه سمعت انه بياخذ بنت عم مبارك .. زين وبعدين
سارة: اخت نادر وميثا اخت بو الهنوف كانوا جالسين معهم و انا رحت اسلم عليهم و جلسنا نسولف و تعرفت عليها وعلى بنت عمها ...
محمد: هيه مالي شغل ببنت عممها و بعدين؟؟
سارة: عنلاتك ..
قاطعها محمد: سكتي و كملي السالفة
سارة: يعني اسكت لو اكمل؟؟
محمد: وبعدين معااج اهون عليج تسوين بي جي؟
سارة: يوو اخويه .. خلاص خلاص بكمل ... بس تعرفت عليها و بصراحة البنت تنحب و تدخل القلب بسرعة واخذت رقمها و رقم بنت عمها عشان محد يشك بشي .. و من يومها كله ندز لبعض مسجات و نسأل عن اخبار بعض ..
محمد فرح و قام و حب اخته على خدها ....
سارة: عنلاتك .. على الاقل حبني على راسي ...
محمد: ما حب إلا الشيبة و العيوز بس على الراس .. وما يعجبج طقي راسج بالطوف ..
سارة: يعني هذا جزاتي اني ابي اتعرف عليها عشانك ..
محمد: تسلمين غناتي أم الهنوف الله يخليج لي ذخر ..
سارة: زين عطني تلفوني الحين
محمد: لا ابي اشوف المسجات اللي طرشتهم لج و اقراهم اول ..
سارة: لا والله يييب الجوال اشوف .. قول تبي تشوف رقم البنت يا جليل الحيا
محمد: افاا وايد غلطتي عليّ .. يعني الحين انا تصدقين علي اسوي جي ..
سارة: يمكن يوزك بليس بعد ما ندري
محمد: ساروو عنلاتج يالخام ... يعني حتى لو اخذت رقم جوالها يعني تهقين راح ادق عليها؟؟ و إلا اهي راح ترد علي ؟؟
سارة: همممم .. زين آسفه خلص مب قصدي .. بس بعد ييبه عيب تشوف المسجات؟؟
محمد: اهم فيهم شي عيب؟
سارة: لأ
محمد: خلص عيل لا تعقدينها ..
سارة: يعني انت شنو بتستفيد اذا قريتهم
محمد: شعور ما تفهمينه .. و راح اكون شاكر لج طول عمري ..
سارة: عيني عليك ياخوي .. تراك غرقان .. بس ابي اعرف شلون تحبها جي ومن متى؟؟
محمد: الله يسبب الاسباب .. و القدر ماحد يدري به .. كل انسان خلقه الله خلق روح ثانية تشاركه و تميل له ... و انا حاس ان هالانسانة هي اللي الله كاتبها لي..
سارة: ان شاء الله تكون من نصيبك يا خوي ... و ان شاء الله بعد العيوز ما تعارض..
محمد:وليه امي تعارض؟
سارة: لأني كلمتها عن مرايم وقالت انها رفضتنا مرة و ما تبي ننرفض مرة ثانية ووقت اللي تقول تبي تخطب راح تدور لك احسن بنت في الامارات كلها!!
محمد: سارة انا اقولها لكم من الحين .. ما راح اخذ وحدة غير بنت السالم ..
سارة: لكل حادث حديث .. و لسه بدري ما تدري بالمستقبل شو مخبي لك .. ومرايم بنت حبوبة و الوالدة بتليين اذا انت اصريت عليها لكن هب الحين عاد عقب ما اتخرج وتكون جاهز هالمسؤؤلية.. وان شاء الله ما اتطير من ايدك اذا اهي مكتوبة لك ..
محمد: ان شاء الله بتكون لي .. ولي انا مو لغيري ...
سارة: ان شاء الله
محمد: سارونة حاولي تكلمينها عني .. و شوفي رايها فيني ..
سارة: معليه صبر انته شوي ... على الاقل اذا اهي وافقت بنضمن ان بتيسر الأمور .. لان هي اللي قالت ما ودها تاخذ عبدالرحمن و الشور بيدها و اهلها ما بيغصبونها ..
محمد: سويرة ابيكم تنسون ان عبدالرحمن كان يبي يخطبها .. اصلا هو يدري اني ابيها وما عنده مانع ..
اخذ جوال اخته سارة و طار به فوق لغرفته ...
كان متمدد عالسرير و يقرأ مسجاتها مرة و اثنين و ثلاث لحد ما حفظهم ... و دز كل مسج مطرشته مرايم لسارة لتلفونه و حطهم في حافظة خاصة و سماها ... -أم جــاسم- ...!!!!
++++++++++++++
في قهوة الشباب
++++++++++++++
محمد: ههههههه والله و لك وحشة
مبارك: تسلم والله ,, إلا القهوة خالية اليوم ماكو احد من الشباب
علي: اسكت بس لا تلاقي مروان طاب علينا ..
إلا يسمعون صوت ويل و سيارة موقفة عند القهور .. و كان اسامة وياي لهم يركض بسرعة ... و الكل اعتدل في جلسته ..
محمد: هلا اسامة خير شفيك
اسامة: هذا صاحبنا شاهين ... حاشه حادث جايد و حالته خطيرة مرّة ..
علي: يا ساتر .. شلون صار .. سرعة؟؟
اسامه: شكله جذي .. مع ان شاهين ما يحب السرعة ... انا كنت مودي الوالدة المستشفى و رجعتي إلا زحمه سير عسب يقولون في حادث جايد و كذا سيارة راحت فيها .. والي متسبب بالحادث انقلبت سيارته و حالته خطيرة ... انت لو شفت سيارته تقول مستحيل اللي داخلها للحين عايش .. ابوه و اخوه كانو هناك وااقفيين و حالتهم حالة ...
مبارك: لازم نروح نطمأن عليه .. الريال شهم و يستاهل
محمد: الله ينجيه ان شاء الله