¤؛° الجزء الثالث و الثلاثون °؛¤
+++++++++++++++
بيت ناصر السالم
ثاني يوم عرس نادر و شمس
+++++++++++++++
الجد سالم وولده ناصر بومبارك ومعاهم أحمد في الميلس جالسين و يشربون الشاهي و يطالعون التلفزيون ...
الجد سالم: وربي مبارك وقف معاهم وقفة رجاال .. لو عندها اخو.. او فهد عنده ولد ما كان وقف معاه هالوقفة ..
ناصر: وانا بعد فرحت من الخاطر منه .. رفع راسي بين العربان ...
الجد سالم: وينه اهو اليوم ما شفته ...
ناصر: يمكن تعبان المسكين البارح تعب وايـــد .. حتى بآخر الزفة انا ما شفته يمكن رجع البيت قبلنا ..
أحمد جالس معهم و يسمعهم يرمسون عن مبارك .. ومنكسر خاطره على اخوه ..
اهو صج تعبان يا ابويه .. لكن قلبه اللي تعبان .. وربي كان باين عليه انه مذبوح من الداخل و ابتسامته اللي كان يبينها للناس وما فارقته .. تنعرف ان وراها جرح ينزف ...
ولا تحسبن ضحكي بينكم طربا .. قد يرقص الطير مذبوحا من الألما .. صح لسان قايل هالكلمات ...
+++++++++
مبارك
في غرفته
+++++++++
مبارك كان مستلقي على السرير ومغمض عيونه ...
رن تلفونه وكان جنبه ...
رد عليه بدون حتى ما يطالع الرقم .. لانه حاط نغمة مخصصة .. وكان علي رفيجه اهو المتصل ...
علي: مراحب مليون
مبارك: مراحب تلريون ...
علي: شحالك اليوم .. صرت احسن ؟؟؟
مبارك: الحمد لله .. شوية وجع راس .. بس حالتي احسن ..
علي: صوتك مخنوق .. وواطي !!
مبارك: لأن حاس اني تعبان .. ومب قادر ارفع صوتي .. بس اهون وايد عن امس .. وصار لي مدة جالس ما تكلمت ويبين لك صوتي مخنوق ...
علي: اكيد ؟؟ الحين اشوه؟
مبارك: اكيد .. تطمن الغلا .. انا بخير ...
علي: ربي يطمنك ... طيب انا اخليك ترتاح الحين ...
مبارك: صار ..
علي: مع السلامة .. في امان الله
مبارك: امان الكريم....
مبارك وقف مع شمس بين الناس وقفة الاخو واكثر.. ولكن اللي بالقلب بالقلب ... وجرح حبه للحينه ينزف ..
واهم يزفون نادر .. ومع قرب روحته لشمس في الصالة .. صاد مبارك اختنااق .. والتفت له علي.. واخذه ووداه المستشفى وقالو ان الضغط منخفض عنده.. بس الحمد لله عدت على خير ومع الراحة والأكل الزين يصير زين ان شاء الله ..
ماحد درى عن هالشي .. لان مبارك مايبي يعكر فرحة اهله .. وكان هالشي بينه وبين رفيجه علي وبـــس ...
++++++++++++++++++++
بيت فهد وسعد
++++++++++++++++++++
يدخل سعد ويلاقي فهد جالس بالصالة تحت ... ويتوايه مع اخوه و يبارك له ...
سعد: وين العروس ما جات للحين .؟؟
فهد:لا والله للحينه .. عرسان يدد .. يمكن للحينه راقدين ..
سعد:ربي يبارك لهم ..
فهد: شخبار ليليان .. و .. وولدك .. ؟
سعد: هههه تصدق مادري ليش اضحك اذا اذكر ان عندي ولد .. بس تدري شعور عجيب .. عمري ما حسيت بهالاحساس ..
فهد: شلون يعني .. أي احساس
سعد: لما حملته بيدي .. و ضميت سالم لصدري ..حسيت بأحساس حلو .. ابي ابجي .. ابي اطير به .. شعور حلو .. وبنفس الوقت خايف عليه.. حتى امه ما خليتها تيوده.. اخاف احد ياخذه مني .. واهو يطالعني ويضحك لي ... فدييته وفديت سنه الصغنون ..
فهد ابتسم لاخوه: لا واهو صاير يشبهك واايد .. مع ان عيونه زرق...
سعد: واحنا هم عندنا عيون عسليه وملونة وووو ..
فهد: انزين .. ومتى نويت تقول للأهل عنه .. ما يصير بعد ما يدرون عن حرمتك .. وعندك بعد ولد منها ...
سعد: انا قررت .. يمكن الليلة اسير واقول لابوي .. مادام ان عرس شمس طاف خلاص .. بس ابيك توقف معاي ..
فهد: الله يستر .. انا راح احاول اهدي ابوي .. اما العيوز انت اتكفل فيها ..
سعد: ربي يكون معاي ...
فهد: واهي شلون موقفها ..
سعد: اهي ماعندها مانع تواجه امي وابوي .. و تبي تروح تقول لهم وتقنعهم .. اونها ما تعرفهم وتعرف عوايدنا المينونة ..
فهد: هالمينونة يننتك وخلتك تحبها وتتزوجها ...
سعد: انت تعرف ضروف زواجي منها .. والبنت بصراحة ما تنعااب ..
فهد: خلينا الحينه من هالرمسة ووفرها للشيبة و العيوز..
دخلت شمس وعقت الغشوى ... ومعاها نادر وكان ماسكها من يدها ... بس لما شافت عمها و ابوها اسحبت يدها من يده ..
كانت حاطة مكياج ناعم و حلو وباين على وييها المنور انها عروس يديدة ...
سلمت على عمها و بارك لها .. وقربت من ابوها و حبته على راسه .. واهو ضمها بقوة لصدره .. وحتى ان دموعه كانن بيطيحون من عيونه ...
وقرب نادر من بوشمس وتوايه معاه ...
فهد: فديتج غناتي .. يا شمس هالبيت ... شحالج وحشتيني صباحية مباركة ..
شمس: وانت بعد وحشتني بعنف وبأشد انواع العنف ..
فهد: ههههه .. وش عنفه بعد .. هههههه شو هالرمسة
سعد: هذا اظاهر رمسة نــادر جي خوك ...
نادر: انا .. هذي يا عمي شسوي فيها بسرعة تتعلم الكلمات ..
سعد: والله انت اللي شكلك حبك عنيف ههههه
شمس: هيه والله عمي صاج
نادر: شو يعني بنت السالم .. ؟؟
فهد: شوو بعد ياولد الجواد .. هب عاجبتك رمسة بنتيــه .. جدامي جي ترمس معها...
نادر: السموحة عمي .. على راسي وعيني .. -وحب خشم ابوها- ...
سعد: كرمان عين تكرم مليون عين ...
فهد: هيه والله خوك ..
شمس: بسكم لا .. وين بدوورة؟؟
فهد: فوق روحي لها .. ذابحة روحها من البجي من امس ..
شمس: فديتها .. انا سايرة اشوفها ...
نادر: لا اتأخرين ..
سعد: شو هذي بعد لا اتأخرين ؟!!
فهد: شوف ياولد الجواد .. ترى نحن بناتنا هب متعودين حد يمنعهم عن اهلهم ...
سعد: كفاية وتحمد ربك ان عطيناك اياها .. شمس العايلة هذي ..
فهد: هيه والله .. وكلها شهر او شهرين و تاخذها معاك بوظبي ..
سعد: ويمكن بعد يعني احنا بناكلك تخاف تقعد معنا؟؟
نادر: لا بس اهي راح توحشني بعنف...
فهد: واا بويه عليك
سعد: هههههههههه
نادر: ههههههه
++++++++++++++++++++
في قهوة الشباب
++++++++++++++++++++
الشباب كلهم جالسين والقهوة ملياانة زباااااين ..
مع ان الحينه اجازة صحيح ..ولكن وراها امتحانات ويعني المفروض مذاكرة!!
من الشباب ابطالنا هناك اسامة ومحمد وعلي...
محمد: شباب مروان عازمكم على عرسه بعد بكرة في فندق الفنيسيا ..
علي: لا لا .. زين والله عالبركة ..
اسامة: الله يوفقه .. انا سمعت عنه اخبار طيبة ..
محمد: هـيه تغير بالمرة .. ربنا يهدينا و يهديه ...
علي: سبحان مغير الاحوال من حال الا حال .. صحيح ان الله يهدي من يشاء ..
محمد: وصاني اقولكم لازم تحظرون .. ووصاني أأكد على مبارك ..
علي: مبارك .. هممم .. غريبة .. بس ماهوب مشكلة انا اخبره و نروح له ولا يصير خاطره الا طيب ..
اسامة: وينه اهو .. من عرس نسيبته ما شفناه ..
علي: تدري امتحانات ويذاكر .. وماهوب نفسنا بالقهاوي ..
اسامة: يعني نحن اللي ما نذاكر .. بس اليوم خميس ومافيها شي الواحد يغير له جو ساعة ساعتين ...
علي: الرجال ناويها ..]بي يجيب معدل يحطم الدفعة كلها ...
محمد: هههههه الله يوفقه .. قم انت بعد سير معاه تعلم منه ...
علي: طاع هذا قاعد على جبدي انه اوني ...
محمد: لا خوك بس شكلك يكسر الخاطر ومبارك ماهوب معاك ...
علي: جي يعني .. معليه عنلاتك .. انا ساير اجابل كتبي احسن من مجابلكم ..
اسامة: الا يمزح معااك خوك ..
علي: عاد انا اللي باخذ على رمسته البايخة ...
محمد: لا باين ماخذت على رمستي كلش ..
علي:هههههه انا ساير .. تامرون شي ..
محمد: سلامتك .. الا متى عبدالرحمن بيجي من السفر طوّل مو؟
علي: لا ما طول .. المفروض بكرة بيجينا .. بس أجل رجعته بعد يومين .. وكلها يومين وهو هنا ..
محمد: يوصل بالسلامة .. انا قايل بتصل به ونسيت ..
علي: لو حد من ربعك .. ولو اسامة كنت ما نسيت ..
ويرفع محمد حاجب وينزل الثاني
علي: ههههههاي حققت غرضي و نرفزتك شراة ما نرزفتني
محمد: عنلااااااتك ...
++++++++++++++++++++
مريم و سارة عالتلفون
++++++++++++++++++++
سارة: طلعت تجنين .. ربي يعين اخوي اذا شافش وانتي بهالكشخة والله اخاف يطير عقله ...
مريم: سارونة عاد انا استحي من هالكلام ...
سارة: ليتج جنبي عشان احط عيني بعينج .. وربي انج فرحانة من الخاطر واتمنين هاليوم ...
مريم: يووو سارونة وربي ويهي احترق ..
سارة: يسلم لي هالويه .. يؤ قصدي يسلم لاخوي .. هههاااااي
مريم: انتي اتعمدين ترمسين معي جي.. سارونة صدقيني ماستحمل رمسة جي .. حتى ضميري يأنبني ....
سارة: وليش يأنبج انتي شنو مسوية ..
مريم: مادري ... بس ان اهلي ما يدرون بشي .. موب حلوة ..
سارة: عيل لو تدرين شنو قايل لي يبي شنو بتسوين؟؟
مريم: تقصدين محمد ؟؟ شنو يبي؟؟
سارة: محمد بعد منو غيره .. تدرين يا حلاة اسمه في السانج ...
مريم: بسج عااد ام الهنوف تكفين ..
سارة: هههه,,, طيب .. اهو قايل لي يبي ايميلج
مريم: وااا بويه .. شو يبي بأيميلي .. يبي يكلمني عالمسنجر ان شاء الله؟؟؟؟؟!!!!!
سارة: بل بل.. كلتيني بقشوري.. اهو يدري انج ما بترضين .. بس يقول انه ما راح يضيفج .. بس راح يدز لج رسائل حلوة.. وهذا شي بيكون بينا احنا الثلاثة وبس ...
مريم: مادري سارونة اخاف.. قلبي ما يطاوعني ...
سارة: قولي عقلج ما يطاوعج .. وإلا القلب هايم يا مرايم ..
مريم:هههه انتي احد مسلطج عليّ؟؟
سارة: لو يدري بوجسوم اني اغلس عليج جي ذبحني ...
مريم: فديته زين يسوي فيج
اوتعت مرايم على نفسها !! شو قالت الخبلة؟؟ فديته !! اونج رحتي فيها....!!
سارة: اتفدااااه.. بنت السااالم .. اتفدين اخووي وبعد تقولين زين يسوي فيني .. لكن معليه اوريج الا اقوله اوريج ...
مريم: قولي له .. ومراح اعطيج ايميلي وبتكونين انتي السبب هههه
سارة: واي منج
مريم: صرت اعرف لج الحين ههههههههههه
سارة: فديتج انا والله ...مابيدي شي .. عطيني ايميلج ياللاا ..
مريم: سارونة وراس الهنوف امانة تقولين له مابي اضافة عالمسنجر كلش ..
سارة: صار حبيبتي لا تخافين ... تدرين اهو بعد الا يستحي فديته .. وربي يخاف عليج اكثر من نفسه..
مريم فرحانة.. تفرح من الخاطر اذا تسمع رمسة حلوة عنه و عن اخلاقه .. فديته.. اتفداه من الخاطر ولكن في خاطرها وبس ...
مريم: راح ادز لج مسج فيه الايميل وانتي كتبيه وعطيه اياه ...
سارة: صار .. الحينه اخليج .. بشوف بنوتي اقعدت من نومها ..
مريم:ربي يخليها لج .. بوسيها لي ..
سارة: تامرين .. الفال لج و اشوف عياالج انتي والغالي يالغالية ...
مريم: تسلمين الغلا...
سارة: مع السلامة
مريم: مع السلامة
++++++++++++++++++++
سارة تتصل لمحمد
ومحمد مع اسامة في السيارة
++++++++++++++++++++
محمد.. صج والله؟؟ فديتج .. وبعد .. يعني خلااص عندج؟؟ اوكي متى بتعطيني اياه .. اوكي انا كلها نص ساعة وياي البيت ... مشكوووورة حبيبتي ... باي
اسامة: شو مستوي .. مستوي فرحان اونك ...
محمد: سمعت خبر حلو عن حبيبتي ..
اسامة مبطل عيونه: وشو؟!!
محمد: وش فيك جي .. اللي يشوفك يقول الضفدع كامل ..
ويطقه اسامة على خفيف: عنلاتك ..
اسامة: انا سمعتك عدل لو شنو؟ انت قلت حبيبتك؟؟ شو هالحبيبة بعد؟ومن متى؟؟ ومنو متصلة؟؟
محمد: هيه .. حبيبة قلبي .. وشريكة حياتي
اسامة يتكلم باستهتار: لا لا .. رح بس رح .. اتطعبز عليّ..
محمد:ههههه وربي اتكلم من صجي ..
اسامة: لالا .. من صجك محمد؟؟؟؟؟؟
محمد: اللي يشوف ويهك يشوف بس علامات استفهام .. هههههه
اسامة: فهمني خوك مو تخليني جي ...
محمد: هذي وحدة بنت اجاويد .. وبنت عربان طيبين وحشيم نعرفهم وانت تعرفهم بعد ... دخلت قلبي من يوم شفتها.. قلت للأهل عنها .. وان شاء الله اول ما نكمل هالكورس وانتخرج راح يحيرونها لي ..
اسامة: عنلاتك زادً يالخااام .. توك ترمس؟؟ ولا تقول ؟؟ ومنهم هالعربان اللي انا اعرفهم؟؟
محمد: ناس .. الله يستر عليهم
اسامة: واا بويه عليك .. زين شنو اسمها؟؟
محمد: اسمها أم جــاسم...
اسامة ابتسم لمحمد يمزح معاه: ام جاسم .. اونك حتى تخبي اسمها عليّ .. لا يكون بس تغار عليها مني ... ههههههه والله حالة
محمد: عنلاااتك .. اخوها ما يدري عن شي للحين .. بس لانك غالي وكاتم اسراري قلت لازم اقول لك.
اسامة: انا من زمان شاك انك هب خالي ..
محمد: هيه ياخوك .. القلب هـايم .. آآه آآه
اسامة:يوووو يوو يوووو
محمد: وش فيك قلبت قطو؟؟
اسامة:هههههههااااااي يمكن بسبب حالتك .. عنلاتك ... وليش كنت مستهم هذيك الايام .. اكيد اهي بعد السبب مو؟؟
محمد: ايوه يا فاهمني .. تصدق اخوي عبدالرحمن كانو بيخطبونها له .. والحمد لله ربي ستر وماصار نصيب بينهم ..
اسامة: شو هالسالفة بعد .. اونها نصيبك انت يابوجسمان
محمد: بارك لي بارك لي ... هههههههه
اسامة: ابارك افاااا عليك .. مبروك يالمعرس مبروك
وتوايهوا اثنينهم واهم في السيارة وماتوا على نفسهم من الضحك
رد مع اقتباس
المفضلات