¤؛ ° الجزء الثلاثــون °؛ ¤
++++++++
عبدالرحمن وزوجته
++++++++
اخذت سماح شماغ عبدالرحمن وعلقته على الشماعة
عبدالرحمن تنهد تنهيده طويلة و تمدد على الشبرية ...
سماح: الله يبارك له ان شاء الله يستاهل بو جاسم
عبدالرحمن: هيه والله المسكين كان يحاتي بعد الوالدة انها ما توافق
سماح: صج حبيبي انك كنت بتخطبها
عبدالرحمن: امي اللي كانت تبي تخطبها لي و لكن النصيب انج حياتي نصيبي
سماح جلست على الشبرية بدلال تكلم زوجها
سماح: احلى نصيب ... ولا راح تندم اصلاً وين تلاقي وحدة شراتي
عبدالرحمن: فديتج الغلا .. أنا خايف انج انتي اللي تندمين ...
سماح: بلاها هالرمسة
سكت شوية و نزل راسه وقال لها : سمــاح..؟
سماح: لبيه ..
عبدالرحمن: لبيتي حاية ... انا ظلمتج معاي
ابتسمت له سماح ابتسامه كلها حنان وود: انا احبك وأودك.. وصدقني انا راضية فيك بالرغم من كل شي.. عبدالرحمن مابيك تحاتي انا مستانسة و مرتاحة معاك ولا أبيك تشغل بالك و اللي كاتبه الله علينا اهو اللي بيكون ما بيدنا شي وكل شي نصيب .. وان شاء الله مع العلاج وبعون الله الامور بتيسر ..
عبدالرحمن مسك يد سماح وباسها ...
عبدالرحمن: الله لا يحرمني منج ..
سماح: ولا منك حبيبي
عبدالرحمن: يامحلا كلمة حبيبي يوم انج تنطقيها
******************
الجازية و مرايم عالتلفون
******************
الجازي: والله مدري للحين ما قررت
مرايم: خلينا كلنا نستانس
الجازي: افكر اني بس احط الميك اب خفيف و اشيل العباية موب لازم ان اسوي شعري تسريحة راح البس شيلة مناسبة للون الفستان ...
مرايم: لأ تكفين الجازية نبي نروح الصالون رباعة
الجازية: بس انا اخذت لي فستان بسيط وماهوب فخم وايد
مرايم: معليه الجازية.. حبيبتي انتي.. وراس خالتي تكشخين معانا في العرس
الجازية: هممم .. زين معليه ..لعيونج
مرايم:تسلم عيونج .. فديييتج والله
الجازية: مرايم؟؟؟ بسألج
مريم: شوو؟
الجازية: شحال مبارك؟؟
مريم حست بغصة الجازية: الله له.. صرنا ما نشوفه وايد كل ما قربت ملكة شمس كل ما ابتعد عن جو البيت اكثر واكثر ..
الجازية: الله يكون في عونــه ... ويعوضه و يعطيه على قد نيته
مريم: ان شاءا لله . وانتي بعد غناتي ..
الجازية: أنا.. انه قربت خطبتي بعد
مريم: والله؟؟؟؟ صج الجازي .. على منووو.. ياسر ما غيره؟
الجازية: ايـوه .. يـاسر ما غيره
مريم: مقتنعة؟
الجازية: ياسر ريّال ومافيه شي ينعاب .. وفوق هذا كله يحبني و يريدني و متمسك فيني ...
مريم: ومبارك؟
الجازية: مبارك مافكر فيني غير شراة الأخت .. وانا احترمت شعوره .. ومثل ما انا مستحيل انساه متأكدة انه مستحيل ينسى شمس .. وراح احاول اخلي ياسر ينسينى احساسي بمبارك .. ومع العشرة ينولد حب جديد .وصدقيني ما يدوم الا الحب اللي بعد الزواج اللي ينبني على الاحترام و المحبة ...
مريم: الله يوفقج حبيبتي .. والله ان مبارك كاسر خاطري
الجازي: وانا اكثر عنج بعد .. قلبي مجروح مو عشاني .. لكني حاسة بجرح مبارك وبآلامه ..
مريم الدمعة بعينها و طاري اخوها و كسرته احبطوها.. كثر ما تعز شمس و فرحانة عشانها .. وكثر ما تحب الجازية وحاسه بمعاناتها ... كثر ماهي مستهمة على اخوها و حاسة فيه ...
الجازي تبي تطلعهم من هالجو الكئيب ...
الجازي: ابيج تكشخين في حفلة خطووبتي ازود من عرس شمسة بعد
مريم: ولو غناتي .. هذا شي اكيد .. واخت العروس عروس ثانية
الجازي: وربي انج اعز من الاخت
مريم بخجل: تسلمين الغلا .. وانتي بعد لازم تكشخين في خطوبتي
الجازي: هذا شي اكيييييد ... يووو مراايم شو مستوي؟؟
مريم: الله يسلمج انا بعد وراكم ثالثتكم ههههههه مشينا بالجملة
الجازي: صج؟؟؟ ومنوو هذا سعيد الحظ
مريم: محمد الماجد ..
الجازي: منوو منو .. شايفتني اعرف كل العربان اونج .. منو هذا؟
مريم: ههههه .. تذكرين الحادث اللي صار .. ينذكر ما ينعاد .. لما كنا في البر ؟؟؟ علي ربيع اخوي مبارك ..
الجازي: هيه هيه .. هذا اللي كان بالسيارة مع أحمد اخوج؟؟
مريم: ايــوه
الجازي: اهو؟؟؟ يوو مرايم مو اخوه كان خاطبج من قبل واخذ سماح بنت العالي؟؟
مريم: صج اخوه خطبني قبل واخذ سماح العالي .. لكن ماهو علي اللي خطبني ..!! اقول لج اسمه محمد ...
الجازي:عيل منو هذا بعد؟؟
مريم: اخوهم .. محمد
الجازي: محمد .. محمد؟؟؟
مريم: ايوه محمد .. ليش تقولين اسمه جي
الجازي: انتي سمعتي و شفتي روحج وانتي تنطقين اسمه .. ياويل حالي يا مرايم .. شوو هالسالفة بعد؟؟؟؟
مريم: ماشي سالفة
الجازية: ما هقيتج تخشين عني ..
مريم: ما خش عنج شي .. انتي اول وحدة و الوحيدة اللي قلت لج عنه..
الجازي: شو يعني ما استوى شي رسمي ؟؟
مريم: لا للحينه .. اخته خبرتني وقلت لها اني وافقت و ان شاء الله عقب الامتحانات بيحيروني له
الجازي: يحيرونج له؟؟
مريم: هيه .. لانه للحين يدرس و هالسنة بس و بيتخرج .. وللحين ما اشتغل
الجازي: الريم!!
مريم: شووو؟
الجازي: يدرس ؟ وللحين ما اشتغل؟ وبيحيرج بس ما بيخطبج؟؟ واخو خطيبج الاولي؟
مريم وبتردد : هيــه !!
الجازي:انتي تعرفينه من قبل؟؟ هذا شي اكيد اذا ما كنتي تحبينه او على علاقة معاه بعد !!
مرايم منصدمة من كلام الجازي .. اللي عطتها اياها كاش في الويه
مريم: جازية؟؟!!
الجازي: شو في؟؟ تبيني اجاملج .. ما تعودتي تخبين علي شي ..
مريم: لأن ما صار شي عشان اقول لج ...
الجازي: شاللي يخليج توافقين على حد ما تعرفينه ؟؟ للحين مستقبله موب معروف؟؟
مرايم: له مستقبل .. ومتفوق في دراسته .. طيب و بن عايلة
الجازي: اولاد العوايل وايد .. شو يدرس هو؟؟
مريم: ادب انكليزي!!
الجازي بتفاجؤ: والله ؟؟ هذا بعد صدفة؟
مريم: أجل ووشوو؟؟
الجازي: يمكن كل شي جايز بعد ...
مريم: اتشكين فيني ؟؟ ما هقيتها منج ..
الجازي: انا سألتج وانتي موب طايعة ترمسين .. وانا مستحيل اشك فيح بشي شين .. لكن اذا ما تبين تقولي لي براحتج ..
مريم: انا مايبج تزعلين عليّ .. وربي ما عندي اعز منج ارمس له .. لكن مدري شقول .. لأني بجد مدري شلون كل هذا صار ..
الجازي: طيب خبرني شلون عرفتيه؟؟
مريم: البداية كانت من سنة تقريبا ..
الجازي: من سنة؟؟ شلون؟
مريم:كنا سايرين البحر.. بسيارة مبارك اليديدة اول ما عطاه ابوي اياها بيوم ميلاده .. وشفته واعتقد انه شافني .. لمحته اكثر من مرة بسبب الظروف اللي صابتنا الفترة اللي راحت.. كان يساعدني في دراستي لان الصدف .. أو القدر شاء الله نكون بنفس التخصص ..
الجازي: شلون كان يساعدج ؟
مريم: كان يلخص لي الدروس و يشرح لي الاشياء اللي ماهوب فاهمتها و يعطيني ملخصات للمقررات..
الجازي: بأي طريق؟؟ المسنجر؟ مو معقولة التلفون..!!!
مريم: الجازية انتي تفكيرج راح بعيد .. انا ولا مرة كلمته .. انا حتى صوته زين اذا ميزته .. ولا اعرف ايميله...
الجازي: اجل وشلوون؟؟ بتيننيني انتي !!
مريم:اخوي مبارك اهو اللي كان صلة الوصل ..
الجازي: لا لا!! يعني مبارك يدري انج تميلين له او اهو يميل لج؟
مريم: يؤؤؤيؤ .. مبارك ما يدري بشي.. وماكو شي عشان يدري به ... مبارك اهو اللي اقترح علي لأول مرة لما كان يشوفني محتاسة مع كتبي وماني عارفة شي ..قال لي ان له صاحب يدرس نفس تخصصي و دافور و يقدر يساعدني اذا احتجت شي .. وكذا بس
الجازي: يعني استغفلتي اخوج يا مرايم .. !! كان يكتب لج اشياء طبعا زود بعيدة عن الدراسة و اخوج يا غافلين لكم الله .. !!
مريم وحزت في نفسها: انا عمري ما استغفلت مبارك ولا خنت ثقة اهلي فيني ..وانا ماني صغيرة او مراهقة ادور عالكلام المعسول واجري وراه .. انا فاهمة قصدج .. تبين تقولين ان اهو اغواني بكلامه .. وكان يكتب كتابة حب و غرام في كتب الدراسة .. لكن وربي هذا ما صار .. غير مرة وحدة بس ..
الجازي: وهالمرة الوحدة شنو كتب لج فيها ..؟؟
مريم بجرأة مصطنعة : انا اللي كتبت له و اهو اللي رد علي !!
الجازي: انتي؟؟ كيف؟
مريم: وقت اللي اخوه خطبني .. كنت ابي ارد عالجماعة .. بس كنت بالأول ابي اعرف رده هو شو من هالخطبة .. وكتب لي وقال لي انه يبيني ... بس انه ما يقدر هالحين لانه يدرس و يبي يكوّن شخصه .. يبي يكون محمد اللي يستاهل مرايم .. وهذي كانت رمسته لي .. وهالحين راح يوفي بوعده ..
الجازي: قصة غريبة!! وحب غريب!!
مريم: اول ما شفته عجبني شكله و تقاسيم وجهه .. ماهو لانه وسيم .. واهو ترى فعلاً وسيم وحتى شكله احلى مني بعد.. بس لأني شفت في ملامحه و شخصيته تشابه كبير من شخصية اخوي مبارك المرحة.. والرجولة .. اذاا تشوفين ويهه .. تشوفين ابتسامة ما تفارق ويهه .. كأنها ابتسامة طفل برئ حلو تنسيج اللي حواليج .. واذا شفتي عينه .. تشوفين طيبـة مالها آخر .. وكله على بعضه تلاقينه رجال بشخصية رزينة ..
الجازي: يا عيني كل هذا فيه؟؟
مريم: واكثر .. لما شفت اسلوبه الكتابي السلس انبهرت فيه .. كلمات بالرغم من سهولتها و لكن تناغمها مع بعضها وطريقة شرحه .. اسلووب رائع بكل معنى الكلمة .. وحتى خطـه فنان ..
الجازي: الحب يخلي الواحد يشوف أي شي يسويه الحبيب فنان..
مريم: صدقيني سر محبتي له اجهله .. بس احس بشعور ما اجمله .. وحبي له حلم جميل ما اطوله .. سألت نفسي مليون من الاسئلة .. وش مكانته عندي وشو منزله.. واكتشفت اني احبه وانه عمري ومستقبله ..
الجازي: صرتي تقولين شعر بنت السالم ...
مريم: هذا كلام طالع من القلب يالجازي ..
الجازية: قولي بعد .. عيشتيني في هالجو الحلو ...
مريم: حسي فيني يالجازي و بلهفتي .. وبتفكيري بأهلي و بلوعتي .. اتمنى قربه و هذا منيتي .. لكن خوفي اهو علتّي .. و المجهول اهو حيرتي .. ابي السعادة و الفرح بدنيتي .. ولكن خوفي من آخرتي و حسرتي ...
الجازي: انتي ما تسوين شي تغضب الله يالريم ..
مريم: ادري.. لكن عاداتنا .. تقاليدنا .. تخليني اشك بأن الشرع يرضى او مايرضى .. اخاف اغضب ربي من دون ماقصد .. اخاف على سمعتي وانه ادري اني ما سويت شي.. لكن الخوف اللي ينزرع بقلوبنا ..و سمعة العايلة ...
الجازي: محمد من عايلة حشيم .. ولو انه شك للحظة بأخلاقج عمره ما فكر فيج .. ولا فكر ياخذج ويتمسك فيج وبوعده لج ..
مريم: انا صج حبيته و تمنيته .. لكن اهلي في المقام الأول ..
الجازي: الله يتمم عليج بالخير ان شاء الله
مريم: ادعي لي .. والله اني خايفة
الجازية: شقايل خايفة من شووو خلاص المفروض هالحين تكوني مستانسة من الخاطر ..
مريم: ماني مصدقة السعادة اللي انا فيها .. مو معقولة ان كل شي صار جي بسرعة ..
الجازية: وين بسرعة ..الحينه صار لكم سنة وخطبتكم ما بتصير اليوم او بكرة
مريم: مادري .. ادعي لي جازية
الجازية: الله يوفقج حبيبتي و يتمم عليج و يبارك لج ..
مريم: ويوفقج انتي بعد ..