¤؛ ° الجزء التاسع و العشرون ° ؛ ¤
متعودين البنات ان الدريول هو اللي يشلهم من المدرسة
اول شي ياخذ رباب من مدرستها الاعدادية و بعدها يمرون ييشلون فطيم من مدرستها الثانوية ...
اول ما دخلت فطيم السيارة سلمت على رباب ولكن رباب ما ردت عليها ...
فطيم: ليش الشيخة رباب ما تردين السلام ؟
رباب: ها .. ما سمعتج سلمتي
فطيم: اونج ما حسيتي علي وانا راكبة السيارة بعد ..
رباب كانت مستهمة .. و صاخـــة
فطيم: ربابوو شفيج ؟؟
رباب و فيها الصيحة .. خانقتها العبرة مب عارفة اتكلم ...
رباب: ماشي ..
فطيم: شفيج .. ليش شكلج جي .. احد ضايقج بالمدرسة ؟؟ قصرتي بشي و المعلمة هاوشتج؟
رباب: قلت لج ماشي .. واللي يخليج فطيم سكتي عني ...
فطيم نفذت طلب رباب و الزمت الصمت .. كانت حاسها ان اختها فيها شي مكدرها ومب طبيعية ..
وصلوا البيت و نزلت رباب و اهي كله ساكتة .. فطيم كانت مستغربة .. لانها مو من عادة اختها الهدوؤ!! مستحيل رباب تظل دقيقتي ورا بعض واهي ساكتة ...
فطيم استرقت نظرة عابرة على بيت جيرانهم .. خــاب املها اهو هب في البيت لان سيارته موب موجودة .. تنهدت تنهيدة واهي سايرة .. كانت اتمنى تشوفــه .. ما تدري ليه هالشاب مع انها يغيضها وما تطيقه لكنها تحب تشوفه و تلقتي فيه ..
دخلوا البيت و كل وحدة منهم راحت غرفتها ..
++++++
في بيت السالم على الغدى
++++++
كل العايلة متجمعين .. ماعدا مبارك اللي صار ما يشاركهم ولا على وجبة .. بسبب حجة الدراسة و الجامعة اللي يتأخر وفيها للعصر .. واللي ما يعرفونه انه صار يمل .. و يتضايق و ينجرح قلبه كل ما انذكرت سيرة خطبة شمس على نادر الجواد ..!!
الجدة حصة: ها ام احمد جان رحتي الخياطة شفتي اذا ستوت دراعتي والا للحينه؟
شمـا:اتصلت لها عموه ... قالت ان شاء الله العصر بتكون جاهزة و نروح نسوي بروفا عليها ..
الجدة حصة: شو هذي بروفا بعد ..
فطيم: يديدة يعني تشوفها عليج اذا مضبوطة والا يبي لها تعديل شي ماشيات ..
الجدة حصة: ايووه .. زين امييه فطيم ابيج تيين معاي تشوفينها وإذا ما عجبتج خلاص اتلاحق على نفسي و اسوي لي غيرها ماشي وقت ..
مرايم: شو العيووز .. هب هينــة بعد .. و شمعنى فطيم تاخذينها معاج يعني .. يعني انا ما عندي ذوق؟؟
الجدة حصة: هب جي امــيه .. انتي الذوق كله غناتي .. بس فطيم اتباع المودا و هالسووالف ...
مرايم: بدون تبريرات خلاص يدووه ...
فطيم: فديتها يدتي .. ليش تغارين مريومة يدتي و كيفها ..
نـاصر: الحين شو شدنا منها بعد الشيخة فطيم ..
مريم: اونج فرحاانة يديدة من خطبة شمس
الجدة حصة: اكييد .. هذي الساعة المباركة يوم اللي اشوف عيال عيال متزوجين و في بيت ريالهم .. و بتشوفين يامرايم شراح اسوي بيوم عرسج .. خل ايي بس هاليوم
مرايم ابسمت ليدتها اونها مستحية .. و لكن في قلبها تقول متى ايي هاليوم و يكون اللي في بالي ...
رباب: الحمد لله ...
الجد سالم: وين ابويه .. ما كلتي شي ..
رباب: الحمد لله يدي شبعت .. ماكلة في المدرسة حلاو قبل ايي ..
وقامت رباب .. و بهدوء ...........!!!!
ناصر: شفيها بنتج؟؟ اونها هب صاحية صاخة اليوم ومالها صوت .!
الجدة حصة: هيه والله الملقوفة هب عادتها جي..
مريم: ولا علقت على فطيم .. ولا رمست بولا كلمة ..
شما: يمـه فطيم شو فيها اختج؟
فطيم: مدري اميه .. احنا من لما في السيارة كان شكلها موب طبيعي .. وو تصدقون ما رمست ولا قالت شي بالسيارة حتى سلمت عليها ما سمعتني ولا ردت علي ..
أحمد: زين جان سأليتها شنو فيها .. يمكن متهاوشة في المدرسة او شي؟ لكن وين انتي ما يهمج الا نفسج
فطيم: والله عاد انا سألتها بس ماطاعت ترمس ..
أحمد: اشك ..
فطيم: كيفك ما تهمني شكيت ما شكيت ..
ناصر: اتنو كله اتناجرون لا تحشمون حد لا على وجبة ولا شي ..
أحمد: السموحة ابويـــه ..
ناصر: شما سيري لبنتج شوفي شو فيها ..
شما: ان شاء الله ..