-----------------------------------------------------------------------
طاف يومين على انتكاسة مبارك و كانت زياراتهم له قصيرة و التحسن في حالته كان بطيئ وما بيدهم شي غير الدعاء و الطلب من الله ان يشفيه..
-----------------------------------------------------------------------
*******
مستشفى توام
*******
علي مع مبارك و يسولف معاه ...
علي: اسمع يا مبارك .. انه عمري ما هقيتك ضعيف جي ..
مبارك تفاجأ من رمسة علي معاه و كان صارم و جاد ..
مبارك: هذا مرض يا علي .. مو بيدي
علي: مبارك عيني بعينك ..
مبارك كان يبعد نظراته عن علي .. مو عارف يكلمه و يحط عينيه بعينه ...
علي: انه ما ابي اضغط عليك عشان اتكلم ... انه من اول شاك فيك شي وهب خالي...
مبارك: آآه يا علي .. خلني في همي ..
علي: شنو هالهم اللي يطيحك هالطيحة .. مبارك انت حاس على روحك؟؟ انت كنت بتروح فيها
مبارك: كل واحد ما يروح إلا بيومه و انا اخوك ..
علي عصب: انت شفيك .. شو هالرمسة .. لهالدرجة هاينة عليك نفسك .. اذا انت تريد تفارق هالدنيا في غيرك يتعذبون لفرقاك .. انت بس شوف حالة اهلك شلون و اهم يشوفونك بهالحالة و كل مرة للأسوأ ..
مبارك دمعت علينه .. وانكتم صوته .. مو عارف يتكلم .. وادار وجهه بعيدا عن علي!
علي: تبجي؟؟ مبارك انه ما عمري شفك دموعك .. ومو مصدق ان الله ياب هاليوم اللي اشوفهم!! مبارك شصاير؟؟ بالله عليك تخبرني..!!
مبارك: ......
علي: السالفة فيها بنية؟؟
ونظر مبارك لعلي .. و علي فهم من نظرته له انه فعلا السالفة فيها وحدة و اهي السبب بكل اللي صــار..
علي: شاللي سوته عشان يصيدك كل هذا؟
مبارك: ما احب ارمس لحد عنها ...
علي: وانه أي احد؟؟؟
مبارك: .........
علي: براحتك يا خوي .. وقت اللي تريد تتكلم بتلاقيني .. في امان الله
مبارك: وين .. آسف .. ما ابيك تزعل
علي من صج زعل .. وابتسم له ابتسامة سريعه و استأذن عشان يروح ..
مبارك: ايلس ابيك ..
علي: مو زينة الرمسة الزايدة عشان صحتك ..
مبارك: ابي اسولف معاك .. محتاج اتكلم ..
علي: آمر و تدلل يالغالي .. كلي آذان صاغية..
مبارك ابتسم ابتسامة ساخرة و تنهد تنهيده خارجة من صميم القلب ...
مبار:دنيا غريبة .. و قدر ومكتوب لكن ماحد يدري باللي يخفيه الزمن..لما حسيت اني قربت افرح و اني من الفرحة قريب .. حسيت روحي ان في هالدنيا غريب .. و اني عن الحبيب مرّة بعيد .. انه في هالزمن مجرد جريح .. رمى همومه على الله و ذهبت مع الريح .. حسيت بحبها بطعم احلى ايامي .. و صرت اتخيلها بكل احلامي .. و قلبي نطق بأسمها قبل الساني .. ما استحملت انسى هواها .. ولا تخيلت حياتي بدونها ولا الدنيا بلاها .. و اكتشفت اني صرت مجنونها .. و لما حسيت اني بفقدها .. ما استحملت و حسيت روحي بتطلع من جسدي ..
علي مستغرب .. مبارك يحب و بهالطريقة . منهو هالانسانة اللي قدرت تسوي حالك جي يا مبارك .. من متى و حبها راسخ في قلبك و محفوور ..
مبارك:اكيد مستغرب من رمستي هذي ... رمستي هذي طالعه من القلب .. اول مرة اسمح لنفسي اني اتكلم عنها قدام حد .. وانت هب أي حد .. انت انه و انا انت .. لكن الحين خلاص ضاعت مني .. لكنها جرحتني جرح كبير قبل لا تتركني..
علي: منهي هالبنت .. انه اعرفها؟؟
مبارك: الله يوفقها وين ما تروح ...
علي احترم رغبة مبارك انه ما يبي يقول له .. شو كل هالحب يا مبارك .. كل هذا خاشة بقلبك!!
علي: زين شنو اللي صار ؟؟
مبارك: بياخذها حد ثاني غيري .. واهي راضية و فرحانة..
علي: اذا تحبها تمنى لها الخير و السعادة دام اهي راضيه فيه ..
مبارك:هذا اللي اتمناه و ابيه .. لكن قلبي ماقدر اداويه .. اهي قالت ما تفكر غير بدراستها و الحين توافق عليه .. ليش؟؟ اذا كانت ما تبيني وما تحبني .. جان صدتي من البدايه و لا تخلي قلبي ايتعلق فيها يوم عن يوم ..
علي: يعني اهي عشمتك بموافقتها و انها بتكون لك؟؟
مبارك:اهي قالت تعتبرني مثل اخوها ...
علي: و الاخو يحل على اخته يا مبارك؟؟
مبارك بتفاجؤ: شقصدك؟
علي: معناتها انها من البداية رافضتك وما تبيك كزوج .. لكن هب معناتها ان عندها شي ضدك .. بالعكس اهي تحبك و تعزك .. لكن شراة الاخو ..
مبارك نزل راسه: ........
علي: خل ايمانك بالله اكبر .. لا تخلي حب انسانة فيه منها بالدنيا ملايين يهزك و يهدك ..
مبارك: ما في مثلها بالكون يا علي .. هالبنت ما يوصها الكلام .. وجهها مثل البدر التمام .. بسمتها تشفي الانام .. اخلاقها تزيدها حسن فوق حسنها ...إن وصفت حبي لها بالهيام .. صدقني كلامي عنها مو قد المقام .... بداخلي اتجاها كل الحب وفوق منه احترام ...
علي: مبارك .. اختك الشيخة مريم فيه مثلها اخت بالدنيا؟؟
مبارك مافهم له: اكيد ماكو شراتها الغلا..
علي: شفت .... الواحد اذا حب شخص .. يحس ان ماكو نفسه بالوجود .. و انه ماله مثيل بكل الكون .. و مادام انك حبيت وحدة وانت في اول حياتك .. صدقني راح تلاقي احسن عنها في المستقبل .. والدنيا قدامك .. قدامنا مستقبل نبنيه بعدها نفكر بهالاشياء الثانية .. حواء يا مبارك نزلت آدم من الجنة إلى الأرض .. من اعلى عليين إلى الأسفل.. ما بتخلي حرمة اتسبب في ضياعك .. عشان وحدة حبيتها و ما حبتك تهد حياتك و كل اللي يحبونك .. اهلك و اختك و ربعك.. على الأقل ارحم اللي ميتين في هوااك يا دونجوان عصرك.....
مبارك: هههههه .. حسبي الله على بليسك .. الحينه انه دونجوان .. عيل الكازانوفا مروان شو ..
علي: عنلاتك .. لازم تذكرني فيه .. والله انه هالخام معقدني في حياتي ..
مبارك: شحاله؟ للحين ما اعتدل حاله؟
علي: اذا حجت البقر على قرونها ههههه .. اهو ترى زارك كذا مرة و كله يسأل عنك ..
مبارك: الله يسلمه و يهديه .. تدري ان كلامي معاك ريحني ..
علي: عشوون عيل .. كلامي كله حكم بس انت طيعني و ما تضيع..
مبارك: هههههه .. - و تكلم مبارك بشكل جدي- ..
مبارك: الله لا يخليني منك .. صج هونتها علي .. الله يسعدها وين ما كانت .. استغفر الله ربي .. كنت بايع الدنيا وناخوك .. ولا هامني موتي من حياتي .. لكن صج الصديق وقت الضيق و خصوصا اذا كان الصاحب شراتك ..
علي: جي تحسب اقول لك هالرمسة عشانك .. انه ما اروم اعيش من دونك.. حياتي مرتبطة فيك الغلا .. شوف بنعرس انه و انت بيوم واحد و بناخذ خوات بعد شرااااايك هههههههههه
مبارك: هههههه .. اذا انت مستعيل روح اعرس عني عيل .. انه ما افكر بهالسواللف شو زواج ما زواج و وحب و خريط ..
علي: تعجبني .. هذي الرمسة السنعه .. انا ماشي الحين اخليك ترتاح .. مع السلامة
مبارك: الله يسلمك الغلا .. سلم عالشباب
علي: يوصــل .. في امان الله
مبارك: امان الكريم