¤؛° الجزء الثامن عشر °؛¤
في الجامعة ...
شمس و الجازي و البنات .. موزة وسمر جالسين في السكشن بعد ما انتهى الأختبار
شمس: يا ربي الله يستر كان وايد صعب
الجازي: اهو صعب لكن اسئلته مرت علينا لكنه بطريقة محورة
سمر: يعني بالله عليكم انا ما اعرف إلا لما يجيني سؤال مباشر .. ممكن اكون عارفة الجواب لكن صيغة السؤال ما فهمتها شلوووون تبيني اجاوب .. يا ويلي جان ما ارسب فيه
موزة: ههههههااااااي ... تستاهلين .. قايلة لج خلينا نذاكر امس قلتي لأ اخوي واعدني يوديني السينما وما ابي افوت هالفرصة
سمر: صجي .. اجل اخوي يتكرم علي ويعزمني لأول مرة على سينما و ما تبيني اروح
شمس: يا بنت الناس ما قلنا لج لا تروحين بس على الأقل ذاكري
سمر: ذاكرت صدقيني قبل بيوم .. وحفظته عدل .. لكن صيغة الاسئلة اهي خربطتني
الجازي: طيب يا شيخة يعني احنا اللي قطعنا روحنا من المذاكرة
موزة: اللي طاف طاف ... واذا فات الفوت ما ينفع الصوت ما بيدنا شي
شمس: ايوه يا ام الحكم
الجازي: هههههه خذوا الحكمة من افواه المجانين
موزة: لا يا شيخة حلفي بس ... اذا انا مجنونة انتو شو بالله
سمر: ههههههههههههه شلة مجانين
شمس: ههههههههههههه ... يالله قومو الكفتيريا الاختبارالزفت جوعني
سمر: روحوا انتو .. انا سايرة البيت الحين اخوي يمرني
موزة: اشوف سمور إلا راضي عليج اخوج .. جي شالسالفة؟؟
سمر: حبيبي اخوي .. بس هاليومين ماخذ اجازة وفاضي لي
شمس: هني يالج .. انا الدريول بيمر ياخذهم من مدارسهم و بيمرني
موزة: انا ابوي بيشلني اساعة وحدة
الجازي: وانا بعد بيشلني اساعة 2
سمر: ليش ما تيين معاي نوصلج بطريجنا
الجازي: ما يحتاج سيري انتي
سمر: هو ليش ؟؟ ما بناكلج انا واخوي ترى لا تخافين
الجازي: لا والله احراج ... كل مرة اروح معاكم
سمر: وين كل مرة .. كلها مرتين
موزة: ما عندج سالفة يالجازية روحي معاهم اوريدي انتي على طريجهم ونفس الشارع
شمس: هيه والله ما فيها شي .. على الأقل تسولفون و تونسون بعض
الجازي: انزين انا قايلة لأمي تقول لبوي يمرني لأن الدريول مرضان الحين اكيد قالت له ...
سمر: طاع هذي ... في اختراع اسمه تلفون .. اتصلي لها و قولي لها انج بتيين معاي و خالتي سعاد ما بتقول لج شي ..
اتصلت الجازي لأمها على الموبايل وماشالته و لا تلفون البيت ... وتلفون ابوها خربان وماتعرف رقم الشغل عشان تتصل فيه ...
الجازي: مادري ليه ما ترد عليّ
سمر: زين خلص انتي امشي معاي و للحين وقت على يية ابوج تكونين وصلتي البيت..
الجازي: اوكي ...مشينا عيل
سمر: مشينا ... بــاااااي جيلز
شمس و موزة: بـــــاي
ركبت الجازي مع سمر سيارة اخوها الفورد الجيب اليديدة وجلست ورا سمر .. وكان حاط موسيقى كلاسيكية في السيارة ومع المكيف الشغال كان جو مرّرة حلو ....
سمر: ياسر ما عندك شي غير هالشريط فيه ربشة شوية
ياسر: ماعندي غيره
سمر: افا جان قلت لي اعطيك من الاشرطة اللي عندي
ياسر: من حلاة ذوقج عاد الحين
سمر: لا عيل حلاة هالشريط ... والله فيني نودة )) <<تبي تنام يعني))
ياسر: انا عاجبني الجو جذي .. مب عاجبج اوقفج واخذي لج أي تكسي
سمر: واهوووووون عليك .. ماهكذا الظن بك وانا اختك
ياسر: شسويتي في الاختبار اليوم
سمر: لا تذكرني فيه زفت .. صعب مادري من وين يابو هالأسئلة
ياسر: اكيد صعب لأنج ما ذاكرتي زين انتي وويهج تحاتين الهياتة
رن موبايل الجازي على رنة آآه و نص .. واحترق ويهها كانت تظن انه سايلنت وطول و اهو يرن على ما طلعته من الشنطة و ردت عليه وكانت امها المتصلة ...
الجازي: هلا يمه ... ليه ما رديتي .. اها .. اوكي خلص قولي لأبوي لا يمرني انا راجعة مع رفيجتي سمور ... أي الحمد لله ... ان شاء الله .. يسلمج لي ... بــأي
سمور: هذي خالتي ؟
الجازي بصوت هادئ يادوب ينسمع: هيه و تسلم عليج
ياسر في خاطره ... شو هالصوت ... شو هالأدب ... ربي يحفظج من كل عين .. حتى من عيني يا نظر عيني ...
سمر: الله يسلمها ... وقف وقف ... روح ييب لي ايسكريم يوعانة
ياسر: تبين قومي يبي لروحج انا مانب رايح وما في باركات يمه
سمر: اممممم .. اوكي زين دقايق و برجع .. الجازي حبيتي ما بتأخر اوووووووكي
وطلعت بسرعة البرق من السيارة .. الجازي ما تدري شالسالفة فجأة لقت نفسها بالسيارة لحالها معاه ... بعد صمت بضعة دقائق .. نطق ياسر
ياسر: الشيخة شسويتي في الأمتحان ان شاء الله تمام
الجازي: ها .. نعم .. هيه كان زين بس صعب شوي
ياسر: الجازي ....
اضطربت و استغربت لا اراديا رفعت رأسها فورا بعد ان كانت تتكلم و اهي منزله راسها والتقت عيناها مع عينيه و بسرعة انزلتهما
ياسر: انا اسف ... بس انا بغيت اقول لج شي ...
الجازي: ........
ياسر: انا ... مادري شقول .. ويمكن الوضع غلط الحين .. لكن مافي طريقة ثانية عشان اقول لج .. انا بصراحة معجب فيج ... و اريدج على سنة الله و رسوله ...
الجازي علامات المفاجأة واللاتصديق كلها على وييها .. وهي اتوعد في سمر في داخلها ومو عارفة شلون ترد عليه .. ودها تبطل باب السيارة و تطلع منه ... لكن وين تروح ..
ياسر: انا قلت لسمر تقول لج لكنها ما عرفت ... و انا اليوم ياي بس عشان اقول هالشي .. اتمنى ما تعصبين من اللي سوته سمر ....... الجازي ... ما سمعت ردج
الجازي: واللي يبي على سنة الله ما يعرف يدخل البيوت من ابوابها او تغير الزمن و صارت من سياراتها ؟!!..
حس ياسر بشوية احراج : انا بغيتج تأذننين لي اول عشان ادخل قلبج .. واذا لقيت منج الموافقة بنفس اللحظة اخطبج من اهلج ..