¤؛° الجزء السـابع و الثلاثون °؛¤
^^^^^^^^^^^^^
بيت بو طلال
^^^^^^^^^^^^^
أم طلال جالسة مع أم عبدالرحمن بالصالـة....
أم عبدالرحمن: إن شاء الله ما يصير الا الخير يام طلال ..
أم طلال: بس مو كأنهم طولوا داخل ...
أم عبدالرحمن: خليهم يتكلمون براحتهم و يتفاهمون .. هذي حياتهم ماهي بلعبة وانا اوخيتج ..
أم طلال: أي بالله حياتهم .. خوفي نحن نظلمهم بهالزيجة يا وسمية ...
أم عبدالرحمن:بلاها هالرمسة واللي يخليج ..
أم طلال: انا مستغربة من بنيتي.. شلون ترفض محمد مع انه الكبير واكثر واحد مناسب لها .. حتى في الشبه ياوخيتي وايد واخذ من عبدالرحمن الله يرحمـه...
أم عبدالرحمن: اللي يريحها .. المهم انها اقتنعت بهالشي ...
أم طلال: صوت الباب .. اونهم كملوا رمسـة ...
تطل عليهم سمـاح .. طالعة من الميلس ...
أم طلال: ها يا بنيتي ؟؟ شو الاخبار ..
سمـاح: انا موافقة اتزوج علـي ...
ام عبدالرحمن: هذي الساعة المباركة يا بنتي .. تعالي في حضني ...
وتحضنها ام عبدالرحمن و سماح بكل برود تعاملها ... وتبتسم لها بحزن وبغير نفس ...
أم طلال: اتفقتوا على شي؟؟
سمـاح: اتفقنا على كل شي ...
أم عبدالرحمن: يعني شنو؟؟
سمـاح: ولدج في الميلس .. روحي له اهو يقول لج ..
أم طلال: وعليا عليه مخليته بروحه ...
سمـاح: سيروا قعدوا معاه .. انا تعبانة .. سايرة داري ارتاح لي شوي..
ام عبدالرحمن: اذنج معاج يا بنيتي...
أم طلال: تعالي ابيج شوي .. عن اذنج يا وسمية .. البيت بيتج ....
ام عبدالرحمن: الحال واحد اذنج معاج ....
ودخلت ام عبدالرحمن لولدها علي في الميلس ...
كان جالس منزل راسه .. وقابض يدينه مع بعضهم.. وعلامات غريبة ما تتفسر على ويهه ... اول ما شاف امه داخله عليه .. ابتسم لهــا..
ام عبدالرحمن: ها يا ولدي ابشر؟؟
علـي: كل شي صار مثل ما تبين .. والبنت واقفت ..
ام عبدالرحمن: وشلون واقفت؟؟ شنو قلتوا . و شو قالت لك؟
علـي: هذي حياتنا يا أميـه .. حتى لو كنتي امي .. موب شرط تعرفين كل شي بيني .. وبين .. زوجتـي ...!!!
ام عبدالرحمن: شو هالرمسة بعد ...
علـي: اللي تبينه صار اميه .. هذا بس اللي اقدر اقوله لج ...
ام عبدالرحمن: ومتى تملجون و
علـي: راح تكون ملكة و زواج مع بعض .. وخير البر عاجله شوفي اللي يناسبكم ...
ام عبدالرحمن: طيب تكلمتوا عن السكن و هالسوالف؟؟
علـي: راح نسكن في بيت خاص .. موب في بيت العايلة ..
ام عبدالرحمن: واا بويه .. ليش
علـي: اكيد صعبة انها ترجع تعيش عندنا في البيت يمه
ام عبدالرحمن: وانت شلون توافق تبعد عنا
علـي: اميه هذا اللي تبينه .. خلاص .. بعدين في البيت نتفاهم على كل شي ..
ام عبدالرحمن: طيب
أم طلال: ولدي يا علي ... بو طلال يباك ...
علـي: صار خالتي .. سوي لي درب ...
^^^^^^^^^^^^^
بيت الخالة سعـاد
^^^^^^^^^^^^^
سند بو الجازي يطق الباب على البنات في غرفة الجازية بس ماحد يسمعه من صوب الاغاني وربشة البنات.. "الجازية- مريم- سمر- موزة- شمس- فطيم ومجموعة بنات صديقاتهم واهلهم"
" الليلة عقد قــران الجازية على يـاسر"
سمر: جوجوو طاااااااااالعة قمر
مرايم: اكـو احد يطق البـاب مو؟
موزة: يمكن الملااااا وصل
الجازية: وااابويه عليكم .. هذا عيل اكيد ابويه ...
تدخل سعـاد أم الجازية وتبارك لبنتها وتبوسها.. وتخبرها ان خلاص الملا ملج عليهاا وصارت حرمـة يـاسر على سنة الله ورسوله والكل ينتظرهم يبارك لها..
تلبسوا الحريم و رتبت الجازية نفسها ...
كان بغاية الروعة و الجمال ... إذا بيوم ملكتها كذا عيل وشلون بيوم العرس ..
لابسة فستـان نيلي بدون كم ولكن الطرحة مغطتها من راسها لكرياسها ... والشك والخرز متركز فوق و في ذيل الفستان.. مكياجها وسط ماهوب ناعم ولاهوب ثقيل وايد .. ولكنها مناسبهاا وايد حلوة طالعة...
ابوها كان ينطرها عند باب غرفتها ..
يودها من يدهاا و امها من يدها الثانية,,,,
استقبلتها عمتها " أم ريلها" بزغرودة و الترحيب و التقبيل ...
المعرس كان في الميلس ... دخلوهاا عليه .. وكان واضح عليه انه مستحي وابتسامته خجولة ...
باركوا له ولها من بعد ما رفع طرحتها وباسهـا على جبينها.. وطلعوا عنهم اتركوهم لحالهم مع المصورة الفلبينية عشان تاخذ لهم صور تذكارية بهذي المناسبـة المقدسة ..
سمر: يبون ايلس معاكم..
ياسر يخزها بعينه عسب تتركهم لحالهم ...
سمر: احم .. اونها اميه تناديني ...اخليكم براحتكم ...
ياسر: مبروك ..
الجازية: الله يبارك لك ...
ياسر: ان شاء الله
المصورة: يااللاا . انت امسك يدها واجلس جنبها ..
ياسر نقز من صوتها: اعوذ بالله .. من متى هذي هني ...
الجازية ضحكت عليه: هههههههههههههه
ياسر: فديت هالضحكة والله .. لا صج هذي خرعتني
والمصورة تطالعة و رافعة حاجب ومنزلة الثاني منقهرة عليه ..
المصورة: انت شايف جني ..
ياسر ويطالع بالجازية: شايف ملاك نازل من السما ...
المصورة وتغمز له: أي بعد معرس .. ياللا نصور عشان تيلس لحالك معاها ...
ياسر: حاظر الشيخة ..
والجازية بالرغم من توترها .. الا انه ضحكهاا واهو شلون يتعامل ويقلد على الفلبينية...
المصورة: انت امسك يدها ...
ياسر مسك يد الجازية وقربها من قلبه وبعدين باسها: جذي..؟
الجازية تسحب يدهاا بسرعة .. وييها احترق .. ياربي هذا بيطفر فيني من اول يوم ...
المصورة: بس حط يدك على يدهاا .. اما انت واحد شيطان ..
ياسر:هههه وانتي شكو يا الشريرة ... انا وحرمتيه ننجاز ...
المصورة: يعني ما تبوني اصور .. بروح عنكم ودفعوا الفلوس بدون صور ..
ياسر: بعطيج دبل عليهم بعد .. بس فارقينا ...
الجازية: ياسر !!
ياسر: عيونه .. وقلبه .. ياا لبيــــه ... آمري
الجازية: خلها تكمل شغلها ...
ياسر: صار .. ياللاا كملي شغلج ...
المصورة: انا مو خدامة عندك انته تكلمني هيك ..
ياسر: الاخت لبنانية؟؟؟
المصورة: انت نفر وايد تتدلع ...
ياسر: اونج قلبتي هندية هههههااااااااي
الجازية: انا سايرة اجابل المعازيم ..
ياسر: لا لا بس تكفين خلج ... (ويكلم المصورة) .. كملي شغلج الشيخة خلااص اللي تبين اسويه ...
المصورة: رياييل ما ايييون الا بالعيون الهمرة ..
ياسر يتكلم بالعدال: الهمرة يالحمارة ..
والجازية تضحك عليه ههههههههههههههههههههههه
ياسر: من شان عين تكرم مليون عين..
ويكملون تصوير ...
^^^^^^^^^^^^^
في قهوة الشباب المعتادة
^^^^^^^^^^^^^
مبارك: ومتى نويت تملج
علي: الاسبوع الجاي ان شاء الله
مبارك: يعني اهي رفضت اخوك ؟؟
علي:هيه
مبارك:ومحمد شو كانت ردة فعلة؟
علي: استغرب .. تضايق .. تفاجأ و بنفس الوقت ارتاح نفسيا .. لكنه مقاطعني ..
مبارك: ليش؟؟؟
علي: زعلان علي .. لان راح اخذ حرمة اخويا .. وارملة .. واكبر عني ..
مبارك: معاه حق .. وربي حتى انا زعلان على حالك
علي: هذا نصيبي . وماكو اعتراض على امر الله
مبارك :اتمنى ما يجي يوم وتندم
علي: اذا فات الفوت ما ينفع الصوت .. واذا فرضنا ندمت بعدين .. خلاص كل شي بيكون انتهى ...
مروان: السلام عليكم شبـاب
الجميع: وعليكم السلااام
مبارك: عاش من شافك
مروان: عاشت اياامك
علي: هاا وينك من زماان ما شفناك بالقهوة .. والحينه عطلة
مروان: عطلة عندكم يا أهل المدارس والجامعات .. انا اشتغل ليل ونهار .. ووراي بيت و عايلة ..
مبارك: الله واكبر يالزمن .. صج دنيا غريبة ..
مروان: المهم انتو شحاكلم وشعلومكم ؟؟
علي: الحمد لله بخير ونعمة ...
مبارك: مو علي راح يتزوج ..
مروان:لالا صج والله .. زين زين مبروك .. بس مو توك ماكونت نفسك للحين .. لا يكون عن حب بعد..
علي: انا وين والحب وين ..
مروان: عيل ليش مستعيل جي .. اونك ما كملت دراستك حتى
علي: بعد الظروف صارت جي ..
مروان:ومن بنته بتاخذ وانا خوك ..
علي: بنت العالي ..
مروان:مو هذي نفس العايلة اخوك اخذ منها.. الله يرحمه
علي: هيه
مبارك: هي البنت نفسها
مروان: لا لا .. شلون جي .. !!!
علي: النصيب وانا خوك ..
مروان:على العموم على بركة الله ومنك المال ومنها العيال ...
مبارك: على طاري العيال .. شو ما جاك شي؟؟
مروان تغير وجهه:للحين ربك ما كتب ..
علي: الله يعطيك من ماله و بنونه ..
مروان: تسلم عطاك العاطي ...
يرن جوال مبارك .. ويستئأذن و يقوم يتكلم بالتلفون ..
مروان: شو عنده صاحبك ويا هالتلفونات بعد ..
علي: انت ما تييوز .. صج كل من يرى الناس بعين طبعه ...
مروان:افا وانا خوك ..
مبارك: انا ساير اييب الاهل ...
علي: الفال لك ان شاء الله
مبارك: تسلم خوك .. تامرون شي ..
مروان:سلامتك ...
علي: ادري تبي تعرف من وين اييبهم ..
مروان: انا ما سألتك ..
علي: تنعرف من عينك تبي تعرف .. فضولي من يوم يومك ههههاهاها
مروان:هههههههههه
علي: الليلة كانت ملكة بنت خالته ...
مروان:هذي اللي يحبها؟؟
علي متفاجأ: لأ .. هذي اللي تحبه .. اللي كانت تحبه !!!