مرايم واهي سايرة لغرفتها .. نادت على البشكارة " مينا " من واهي فوق ..
مرايم: مينااا .. مينوو وينج ..
مينا: يس ميس ..
مريم: يبي لنا كاسين عصير ليمون فوق بغرفتي .. بسرعة
مينا: اوكي
وسارت مرايم لغرفتها في خطى متباطئة .. شو تقول .. وشو ترمس لها احين ..
دخلت وكانت الجازية عندها دفتر الخواطر حقة مرايم .. وأول ما شافته مرايم على طول راحت للجازي واخذته من عندها ..
الجازي: يه يه .. شفيج.. ماقريت منه شي
مريم: ها .. بس ماحب احد يشوف شخبطاتي و يتطنز عليهم ..
الجازي:هههههههه .. يعني ماكو شي غير ماتبين حد يشوفه؟؟؟؟
مريم اطالع بالجازي .. والجازية تطالعها بنظرات وكأنها تنغز لها لشي معين ..
الجازي: انا ماقريت شي .. بس في صفحة لفتت انتباهي ..
مرايم و الدموع شوي و بتطيح من عيونها ...
مريم: شاللي شفتيه؟؟؟؟
الجازي: ورقة .. ملصوقة .. بالدفتر .. وكأنها مطبوعة من النت ..
ياويل حالج يا مرايم .. شو هالفشلة وشو هالبلشة .. شو اقول انا الحين ..
نزلت مرايم راسها ..
الجازي: من عنده؟
وتجلس مريم جنبها ..
مريم: هيه ... دزها لي من بعد وفاة اخوه الله يرحمه ..
الجازي: وانتي رديتي عليه..
مريم: هيه .. بس وربي ماقلت له شي .. غير الله يصبركم و عظمت له الاجر ..
الجازي: وليش تحلفين .. الريم انا مصدقتج .. وبعدين انا واثقة فيج ..
وتبجي مرايم ..
الجازي: حبيبتي ليش تبجين انزين ..
مريم: تعبت .. كله بخوف .. ومحاتاة .. والشوق يا الجازي ..
الجازية: تحبينه ؟؟
مريم: مادري اذا هذا الحب او لا ..
الجازي: للحين ما تدرين .. زين قولي لي شلون ..
مريم: احب اسمع اسمه .. واحب أي حد اسمه على اسمه .. استانس اذا سمعت حد يرمس عنه .. او حد يمدح فيه .. انتظر اليوم اللي يدز لي فيه ايميل كأني شغالة تنتظر رسالة من اهلها اللي ماشافتهم دهر ..
الجازي: ههههههه سبحان الله التشبيه يناسبج ..
مريم: عنلاتج ..
الجازي: زين قولي بعد .. اهو يعني على طول يدز لج ايميلات؟؟
مريم: هيه .. على الاقل ميل واحد ياليوم ..
الجازي: وشو يكتب لج فيهم؟؟
مريم: اشياء عادية .. ايميلات من قروبات .. نكت .. غرائب .. بطاقات .. اشياء عادية .. لكن لانها منه احسها اغلى هدية ...
الجازي: ايووا ايواا يا عيني .. وشو بعد ..
مريم: عمل له ايميل خاص غير اللي يستخدمه ويعرفونه ربعه و اهله ..
الجازي: ميل خاص لج بس انتي يا سلاااام ..
مريم: ايوه .. عشان لو صار ماصار وحد شافه اكون انا مو انا واهو مو اهو .. وانا بعد سويت لي ايميل ثاني ماحد يعرف ..
الجازي: عنلااااتج .. ايوه اشوفج ما تدخلين اونلاين كثير .. اثاريج على ايميل الحبايب..
مريم: وربي ولا مرة كلمته على المسنجر ولا شي ..
الجازي: وليه تحلفين يا عمري مصدقتج .. الا ارمس بس .. حب الكتروني عيل .. هههههههههااااااااي
مريم: الكتروني لو كنت عرفته عن طريق النت .. لكن النت مجرد وسيلة ..
الجازي: امحق وسيلة
مريم: احسن وأأمن وسيلة ..
الجازي: هههههههههههه ربي يجعله من نصيبج و يقرب البعيد ان شاء الله ..
مريم: ايوه ادعي لي من قلب الجازية تكفين ..
الجازي: يــاااااا رب ..
وتدق البشكارة الباب جايبة لهم العصير ..
الجازي: عصير ليمون عاد ..
مريم: هيه عشان تريحين اعصابج ..
الجازي: اعصابي هادية وراييقة ومبسوووووطة واايد عشانج ...
مريم: عساه دوم ان شاء الله ..
الجازي: ماقلتي لي .. شو كان يبي منج اخوج ..
مريم وتلعثمت: كان يسألني عنج ..
الجازية: عني .. ؟؟
مريم: ايوه ..
الجازية: شو كان يقول..؟؟
مريم: يسأل .. يقول ..
الجازية: أي؟؟
مريم: لو انه .. قال يبيج .. ويبي يحييرج .. توافقين؟؟
الجازية فاتحة فمها ومبطلة عيونها تبي تستوعب شاللي انقال .. اونها ما سمعت زين!! طول عمرها كانت تتمنى تسمع هالرمسة!! معقولة اهي سمعت زين لو شنو؟؟ طيب شلون..؟؟!!!
مريم: شفيج سكتي ؟؟
الجازية: اوني ما سمعت زين .. عيدي عسب استوعب!!
مريم: مبارك يبي يخطبج..
الجازي: من صجج؟
مريم: اهو اللي قال لي .. ويبي يسمع منج رد .. واحين ..
الجازية: وين اهو احين؟
مريم: بغرفته..
الجازية اسكتت شوي وواصلت: ابي اكلمه اذا ما عليج امر..
مريم: شراح تقولين له؟
الجازية: راح ابلغه ردي .. بس اول لازم ارمس معاه..
مريم: اللي تشوفينه .. تعالي نسير له ..
+=--=-++-=+++++++=-++-=--=+
<< بغرفه مبارك>>
+=--=-++-=+++++++=-++-=--=+
اول ما شاف مبارك الجازية تلخبط ..
مريم: الجازية ياية تبي تقول لك ردها بنفسها ..
مبارك: وشنو ردها؟
مريم: مادري .. اعرفه منها بنفسك.. انا اخليكم ..
الجازية: لا خلج .. عادي ..
مبارك مرتبك مو عارف شو مستوي .. وشو بترد عليه الجازية ..
الجازية: مريم تقول انك تبي تخطبني .. صحيح؟؟
مبارك: أي نعم .. واتمنى انج توافقين ..
الجازي: وتتوقع انا راح اوافق وإلا ارفض؟
مبارك: انا متأكد انج تحبيني .. وان شاء الله انا راح اقدر اسعدج مثل ما أنا متأكد راح تسعديني ..
الجازية: اذا انت متأكد اني احبك .. فأنا متأكدة انك للحين تحب شمس ..
مبارك: انا ابي اللي يحبني .. مو وحدة سبق حبيتها وانتهت من حياتي ..
الجازي: وانا بعد ابي اللي يحبني .. مو انسان حبيته ورفضني من حياته ..
مبارك: انا ما رفضتج..
الجازي: بس ما حبيتني شراة ما حبيتك ..
مبارك: الجازية!!
الجازي: انت تبي تنسى شمس .. عن طريقي ... ومافكرت تخطبني او تحيرني .. إلأ لما شفتني خلاص ..راح اضيع من يدك ..وراح تضيع فرصة انك تثبت لنفسك ولشمس انك اقوى منها .. وانك تقدر تنساها وتنسى حبها بأنك تاخذني .. وأنا بالذات ..
مبارك: شو هالرمسة .. انا ..
الجازي: هذي اهي الحقيقة للأسف .. ولو كان عندي ذرة شك انك تبيني من صج .. واختارني قلبك قبل عقلك وانانيتك .. كنت ما عادلت فيك أي احد ..
مبارك: انا اناني يابنت خالتي .. جزاج الله خير..
الجازي:و جزاك الله خير على عرضك ياولد خالتي..
مبارك: يعني افهم من كلامج انج ماتبيني ..
الجازي: ما تطلع مني كلمة مابيك .. لكنك ما تستاهلني .. للأسف يا مبارك..
وطلعت من غرفته .. ومرايم اللي كان كل دورها انها توقف معاهم و تسمع رمستهم اللي قطعت قلبها طلعت وراها.. تقطع قلبها على بنت خالتها الوحيدة و صديقتها الغالية اللي بالرغم من حبها الكبير له ما تقدر تدوس على كرامتها اكثر وتقبل فيه.. لانك فعلا ياخوي يا مبارك ما تستاهلها .. وبنفس الوقت مبارك الضايع المشتت.. المكسور الخاطر .. يبي يجبر جرحه بأي طريقة .. ولكن للأسف كان يبي يجبره على حساب جرح قلب انسان ثاني ..
الجازية نازلة من على الدري بكل كبرياء .. وبصلابة مصطنعة .. ومرايم نازلة معاها توصلها للباب .. لانها خلاص بتسير بيتهم واتصلت للدريول يشلها ..وكاهو ينطرها عند الباب .. و ماتصلت لابوها حتى لا يشوفها بهالحالة ..
بالصالة كانت شما " أم احمد " جالسة ومعاها ضيفـة ...
سلموا البنات عليهم .. راحت الجازي لبيتهم وسارت مرايم عنهم...
شما: الله يخليج الغلا تو ما نور البيت ..
الضيفة: منور بأهله يأم احمد .. ربي يخليج ..
شما: ويخليج غناتي ..
الضيفة: انا بصراحة جايتكم البيت اليوم عشان اشكرج .. واشكر بنتج رباب ربي يخليها لكم ان شاء الله..
شما: تسلمين الله يخلي لج بنتج ان شاء الله ,, بس ما فهمت عليج تشكرينها على شنو ..
الضيفة بحزن: اكيد سمعتي عن اللي صار لبنتـيه رجاء ..
شما: هيه المسكينة .. ما تستاهل اللي حصل لها ..
الضيفة " آمنة الساكن ": الحمد لله على كل حال .. والله على كل ظالم .. وجماعة خير يسمونهم هكر الله بحفظم ساعدونا ان يمسكون الشرطة الجاني و يعاقبونه على جريمته اللي الله لا يسامحه عليها دنيا و لا آخرة...
شما: ايوه سمعت ربابة قالت لي .. الحمد لله ..
آمنــة: ابي اشكركم وايد .. لانكم سمحتوا لبنتكم توقف مع بنتيه في محتنها لحد ما تجاوزتها بفضل الله ..
شما: ما فهمت عليج .. هذي ربيعتها يا امنة واذا اوقفت معاها اهم شراة الخوات ..
آمنــة: مهما يكون سمعة البنت يا شما اتأثر بأي شي .. والله يستر على عباده بستره .. الحمد لله ان الشي ما انتشر وايد .. والله ستر علينا وسخّر لنا ناس طيبيين جزاهم الله خير ..
شما: الحمد لله ..
آمنــة: بنتي كانت نفسيتها بالأرض .. لحد ما قلت هالبنت اللي طلعت فيها من هالدنيا بتروح مني .. بس الحمد لله .. رباب واتصالاتها لهاا ايام الازمة ارفعت من معنوياتها .. وخلتها ترد للدراسة مرة ثانية .. وطلعتها من جو الاحباط اللي كانت عايشته ...
شما ارتبكت .. رباب كانت تتصل لها .. شلون وانا مانعتها .. حست بالاحراج بس حاولت انها ما تخلي آمنــة تنتبه لها ...
شما: الناس للناس يا آمنــة .. وربج ستار على عبيده .. الله يخليها لج ان شاء الله ...
آمنــة: ويخلي لج بنتج .. انا سايرة الحينه .. استئاذن ..
شما: تو الناس بدري ... جلسي اخذي فوالتج ..
آمنــة: مشكورة الغلا .. انا بس كنت جاية اشكركم .. يمكن هالشي عندج بسيط .. لكن عندي كثير ..
شما: حياج الله وتسلمين ...
آمنــة: ربي يسلمكم من الشر و الضر ودعوة المحتر ..
شما: احلى دعوة والله ..
آمنــة: تستاهلونها .. في امان الله
شما: امان الكريم..
شما.:.
يعني رباب كانت تكلم بنتها من غير علمي .. مع اني كنت مانعتها .. شلون ومن وين لها التلفون.. لكن اما صج فشلة .. صحيح بنتي عصتني .. لكنها جبرت بخاطر ام ثانية كان قلبها يحترق على بنتها ..