رباب كانت بغرفتها .. وصاكة عليها الباب .. مغطية وييها بالمخدة .. تبكي!!
حتى انها ما حست على امها انها دخلت عليها الغرفة ..
شما اول ما شافت بنتها هالها شكلها ..
شما: واا بويـة عليج .. شوفيج بنتي .. لشووو تبيجين جي؟
رباب احضنت امها .. تبجي و تبجي و الدمووع على الخدود ومو قادرة توقفها ..
شما: يمه شفيج قولي لي شصاير؟؟
رباب: يمه ضيعوا رفيجتي !!!
شما: شلون يمه
رباب: يمه والله حرام مالها ذنب .. ليش يسوون جي في بنات الناس..
شما: اي رفيجة هذي يمه ؟؟
رباب اتكلم بشكل متقطع ..
رباب: يمه مابي ..
شما: شنو ما تبين .. ما تبين تقولي لي؟؟ انا امج حبيبتي اذا ما فتحتي قلبج لي بترمسين لمنو؟
رباب: اخاف انتي بعد ما تفهميني و تقولين لي اتركيها
شما: تبين اقول لاختج مرايم ترمسين معاها؟
رباب: مابي احد يدري.. مابي ارمس مع حد ..
شما: يمه شربي ماي .. وهدي نفسج ..
شربت رباب ماي و مسحت دموعها .. و اعتدلت بجلستها ..
شما: قولي لي الحين شو مستوي؟
رباب: رفيجتي رجــاء ..
شما: بنت آمنة الساكن؟
رباب: ايوه ..
شما: شو فيها؟
رباب تتكلم بمرارة .. وحزن
رباب: انشروا صورها في النت .. و بطريقة فاضحة
شما: واابويه . منو اللي سوابها جي؟
رباب: وحدة حاقدة عليها .. اخذت صورتها و عطتها لربيعها
شما: شلون قدر يسوي جي بصورتها؟
رباب: البرامج يا يمه اللي يتلاعب فيها عديمين الضمير .. اللي ما يهمهم شرف حد ولا عندهم ذرة غيرة على اعراض الناس ..
شما: لا حول ولا قوة الا بالله ... و هذي شلون اخذت صورتها ؟؟ اكيد اهي اللي عطتها اياها ..
رباب: اهي اصلا ما تدانيها يا يمة .. هالبنت مسودية ويه و كلنا ما نحبها ..
شما: اجل وشلون .؟
رباب: مثل ما تعرفين ان رجاء من المتفوقين .. و كانت صورتها معلقة في لوحة الشرف في المدرسة .. وهذي البنت شافتها و اخذتها فرصة انها تنتقم منها ..
شما: شو دراج ان هذي البنت اهي اللي سوت هذا؟
رباب: اليوم رجاء ما اجت المدرسة .. سألت عنها جارتها .. وقالت لي انها ما تعتقد انها بتقدر تجي المدرسة بعد ..
- رباب تتكلم و تمسح دموعها بالمنديل –
رباب: تقول ان انتشرت صورها في الانترنت و صور فاضحة و مفبركة .. مع انها تنعرف انها تركيب وهب طبيعية.. و لكن الفضيحة كانت اكبر من ان حد يصدقها .. وهالبنت النذلة لكل وقاحة ياية تبي تحقهرني .. تقول لي رفيجتج و انزاحت من ضريجي .. و الدور ياي عليج يا بنت السالم إذا بيوم حاولتي توقفين بطريقي او تأذيني ..
شما: يعني جي راح مستقبل البنت خلاص
رباب: يمه والله مالها ذنب ..
شما: بس المفروض يا بنتي انج تبتعدين عنها .. الله يكفينا الشر هالبنت تسوي ب مثل ما سوت برفيجتج
رباب: يمه!!
شما: شو يمه بعد .. انا ادري انها ربيعتج و انها غالية عليج ..لكن الحين البنت سمعتها بالارض .. و البنت ما لها غير سمعتها .. و اهي ربيعتج و سمعتج من سمعتها .. و المفروض يا بنتيه انج تبتعدين عنها شوية على الاقل لحد ما تهدأ السالفة..
رباب كانت متوقعة ان هذا بيكون رد اهلها .. و هذا اللي خلاها هب في حالة و انها ما طاعت ترمس لحد..
رجاء صديقتها من اول ما دخلت المدرسة لحد الآن .. عمر صداقتهم فوق ال 9 سنوات ... انتقلوا مع بعض من مرحلة الطفولة الى مرحلة المراهقة .. كل وحدة كانت تعتبرالأمل بالنسبة للثانية .. و الدافع لمواصلة الحياة بابتسامة دائمة و تفاؤل مطلق ..
رجاء علمتني ان الإنسان من دون دون أمل مثل النبات بدون ماي..وبدون الابتسامة وردة بدون ريحة.. وبدون الحب غابة احترق شجرها.. علمتني ان الإنسان بدون إيمان وحش في قطيع ما يرحم ...
وهالقطيع مجرد حيوانات عماها حقدها و احرقت ماضيها البرئ .. وشوهت حاضرها العفيف .. ودمرت مستقبلها العظيم اللي كانت تحلم فيه طول عمرها المديد .. واللي تحول الى واقع مرير ..
رجـاء ما كانت ترتجي ان هذا بيصير لها .. يمــه اهي خسرت سمعتها وماكان لها يد في هالشي .. بس انا مابي اخسر ربيعة عمري ..
شما: انتي للحين صغيرة .. سمعي كلامي يا بنتــي و ابتعدي عنها .. كلام الناس ما يرحم و الناس بتقول الصاحب ساحب و .
رباب: يمه اهي اللي كانت تشجعني عالمذاكرة واني اوصل للي وصلت له و اتخلص من معاير فطيم لي بتفوقها علي ..
شما: انتي وصلتي للي انتي فيه لانج بغيتي هالشي ..
رباب: اهي كانت الدافع لي ..
شما واهي واقفة سايرة للباب بتطلع .......>>
شما: سمعي كلامي و البنت لا تتصلين فيها ولا تييج ولا تروحين لها .. سمعتيني يابنت السالم ..
رباب ما استحملت كلام امها و تمت تبكي .. حن قلب امها عليها و لكنها اتركتها و سكرت باب الغرفة وسارت عنها ...