++++++++++++++
في بيت سارة أم الهنوف
++++++++++++++
بو الهنوف: هلا والله بابو جاسم شحالك
محمد: بالهملي الحمد لله يسرك الحال
بوالهنوف: اختك بتفرح بجيتك عندنا .. بس انا ساير هالحين ... البيت بيتك طبعا
محمد: تسلم خذ راحتك
بوالهنوف: في امان الله
محمد: امان الكريم
وراح محمد وجلس بالصالة ينتظر اخته تجي
سارة: مرااااحب اخويه .. شحالك الغلا
محمد: بخير يعل لج الخير .. هلا بالغالية ام الغالية .. الا وينها هنوفي؟
سارة: هنوفك اخذتها عمتها معاها بيت يدها .. شو هالزياارة الحلوة هذي
محمد: ابد وحشتيني .. غريبة صار لج يومين ما مريتينا
سارة: وين يومين .. بس امس ما رحت بيت ابويه لان كنت معزومة عند رفيجتي متحولة في بيتها اليديد وامي كانت معاي بعد .....
محمد: اهااا .. اليوم في بعدج سنة غناتي
سارة: شو شو شو .. ياويل حالي على هالرمسة
محمد: ههههههههههههههه
سارة: اوني شاكة انك تبي شي؟؟؟ شو تبا من الآخر؟؟
محمد: مابا شي .. يعني انا ما ازورج الا اذا بغيت شي منج .. ويعني انتي ويج وشو ابي منج ؟؟ لكن تدرين انا احسن لي اسير اجابل ربعي .. وانا اقول يوم اجازة واختي واحشتني و بروح ازورها ...
سارة: هههههه ان ما ساعك البيت اشيلك بعيوني ..
محمد: تسلمين لكن بعد وشو .
سارة: امسحها بيويهي خلاص
محمد: زين سماح هالمرة
سارة: سماح مرت اخويــه؟ شو فيها ؟ ههههههههههههه
محمد: هههههه عنلاتج ...
سارة:أي جريب يجينا ولي العهد و تصير عم ...
محمد: هيه .. متى يا ربي اصير ابو بعد !!
سارة: هاهاهاهااااا
محمد: وليش حضرتك تضحكي كذا موب عاجبتك رمستي؟
سارة: لا اخويه عاجبتني ونص .. بس كأني عرفت الموضوع اللي خلاك تيجيني هنا
محمد: وش موضوعه يأم العريف
سارة: احم لو سمحت ام الهنووف هههههههه
محمد: اشوفك االا مستضرفة اليوم .. تنكتين لو تحاولين
سارة: لا احاول ههههه
محمد:هههه .. سارة
سارة: سم؟
محمد: قولي لبيه
سارة: لبيه .. خير؟
محمد: مرايم ...
سارة: شفيها؟
محمد:قرب تخرجي .. كلها شهرين و اخلص ..
سارة: يعني؟
محمد: ابي احيرها ..
سارة: زين صبر بعد هالشهرين .. واشغتل .. شلون تتقدم لبنت الناس وانت ما اشتغلت ولا كونت نفسك
محمد: سارة انا بس ابي احيرها .. زايد تفكيري فيها .. وكله خايف حد ياخذها مني ..
سارة: اهي هالايام مشغولة بخطبة بنت عمها .. اوعدك اني اكلمها
محمد: انا ابي اخبر امي قبل لا اخطب بنت الناس و ابيج تساعديني تقنعيها
سارة: انت موقفك هالحين ضعيف يا محمد انا اقول لو تصبر يكون افضل .. هانت وانا اختك
محمد: انا جيتك ومقرر اني راح افاتح امي بالموضوع وموب عشان اشاورج .. وابيج توقفين معاي
سارة: العجلة من الشيطان
محمد: وخير البر عاجله .. رحم الله والديج يام الهنوف الحين وقت الجد تتركيني
سارة: انا معك ياخوي .. بس ابيك تتريث
محمد واهو واقف: انا الليلة عزمت اكلمها .. في امان الله تامرين شي
سارة: سلامتك .. الله معك و انه بمرك الليلة
محمد: البيت بيتج ..
سارة: لا تزعل مني .. راح احاول اكون معك و اقنعها .. وانت تدري بعناد العيوز ازود عني ..
محمد: رايتج بيضا .. اترخص
سارة: في ودااعة الرحمن

++++++++++++++++++++++++
في بيت بوعبدالرحمن
++++++++++++++++++++++++

محمد يصاارخ يدور امه موب لاقيها ...
محمد: يمــــــــــــــه .. اماية .. يا امي .. يا مماتي ..
ام عبدالرحمن( وسمية): مماتي؟؟ وش مماتك بعد . الناس تقول حياااتي لكن وش هالعيال اللي غير الناس .. علامك تصااااارخ جي صدعت راسي ..
محمد: هلا امــيه ... و قبّل يدينها ...
وسمية: عسى الصراط ممشاك ووالكوثر مسقاك والفردوس الاعلى سكناك ورؤية الرحمن غاية مرضاك يا محمد ياولد حشاي ...
محمد: شو هالدعوة الحلوة اللي تفتح لي ابواب الخير
وسمية: الله يرضى عليك يا ولديـه دنيا و آخرة
محمد: الله يخليج لي ..
وسمية: ليش كنت تصاارخ جي ؟؟
محمد: كنت ادور عليج .. وسألت هالبشكارة البقرة تقول ما تدري عنج
وسمية: كنت بالمطبخ .. شو كنت تبي؟
محمد: فاضية انتي اميه الحين؟
وسمية: هيه خلاص ما وراي شي ..
محمد: يمه انا ابيج موضوع
وكانت ملامح محمد جادة .. وكله ثقة و حزم ..
وسمية: خير يا ولديه شو مستوي ؟
محمد: اجلسي انتي بالاول ..
جلست ام عبدالرحمن اهي وولدها بالصالة ...
وسمية:وهذي جلسة .. خير؟
محمد: ما اجت سارة اليوم
وسمية: لا للحين ما اشوفها هلّت ... ليش وش فيها اختك صابها شي؟
محمد: لا اهي بخير ماعليها شر
وسمية: شر؟ و بنتها و ريلها ؟؟
محمد: يمه ماكو شي .. انا بس جذي كنت اسأل عليها
وسمية: زين طمنتني ..
محمد: يمه انا ابيج لشي يخصني انا
وسمية: وش فيك يا ولدي؟
محمد: يمه انا ابي اخطب
وسمية: صج ما عندك سالفة
محمد: انا ارمس من جد
وسمية: انت للحين ما تخرجت
محمد: ما عليه بس احيرها
وسمية: على ما ادور لك بنت تستاهلك يصير خير
محمد: بس انا في وحدة ابيها و جاهزة
وسمية وكأنها عرفت منو اللي يقصدها: و تعرف بنات من ورانا بعد ..
محمد: يمـه .. انتي تعرفيني زين . وان انا مو من هالنوع
وسمية: اجل وش هالبنت اللي تبيني احيرها لك وضوت راسك و انت للحين ما كملت دراستك ...
محمد كلام امه ماهوب مريحه و اهي مو ماعطته فرصة يتكلم براحة او يعبر عن اللي بخاطره ..
محمد: البنت من عايلة حشيم و بنت ناس .. وانتي بنفسج تمدحين فيها
وسمية: محمد من الآخر من هي ؟
محمد: مريم بنت ناصر السالم
وسمية مع انها كانت شاكة من خبرتها سارة عنها لكنها ما تدري انه هو يباها جي .. و بعد تفاجأة من طريقة رمسته الجريئة ..
وسمية: انت تدري ان هي اللي خطبناها لاخوك؟
محمد: هيه ادري
وسمية: و بعد تباها .. وانت تدري انها رفضتنا من قبل؟
محمد: يمه ما رفضت نسبنا ..
وسمية: كان لك يد بأنها رفضت اخوك؟
محمد تفاجأ .. وكأن حد صب عليه ماي بارد ... ما عرف شيقول صج انه تفاجأ من رمسة امه ..
محمد: يمه!!
وسمية: جاوب على سؤالي
محمد ظل فترة ساكت و يطالع في امه .. وامه كانت تطالعه و عينه في عينه .. وملامحها كانت جاده ومعصبة .. محمد نزل راسه و تركها و طلع بسرعة و امه تناديه لكنه ما طاع يسمعها و خلاها وطلع عنها ... ام عبدالرحمن (وسمية) ما تدري شصادها .. حست بقسوتها على ولدها .. جلست على الكرسي و اهي خاشة راسها بين كفوفها و تبجي من قلب ... بس ليش ما رد علي .. راح و تركني .. يعني صج هو وهي؟؟ ..

دخلت سارة البيت بسرعة و اهي شاله الهنوف على كتفها ... تشوف شو فيها امها .. خصوصا لانها شافت محمد طالع من البيت و راكب سيارته واهو هب في حالة .. لمّت وسمية بنتها واهي تبجي...
هل عليهم بوعبدالرحمن و عبدالرحمن .. كانوا راجعين من صلاة العشا مع بعض .. و هالهم شكل امهم و اهي تبكي و معاها سارة ...
عبدالرحمن:خير اميــه شو مستوي؟
بوعبدالرحمن: وابويه عليج ليش تبجين جي ام عبدالرحمن .. سارو شو فيها امج؟
سارة اتركتهم وبعدت عنهم شوية لانها ما تدري بشو تخبرهم .. لانها ما تدري باللي صار بين امها و اخوها بالضبط ...
تتصل بمحمد و تلفونه يرن بس ما يرد عليها .. واخر شي قفل تلفونه خير شر ...
لحقها عبدالرحمن يبي يستفسر منها عن وش اللي صاير ...
عبدالرحمن: سارة شفيها امي شصااير؟
سارة: مادري بس شكلها تهاوشت ويا محمد..!
عبدالرحمن: محمد! .. مستحيل .. هو دوم يطفر بها وبعدها يراضيها ما يستحمل زعلها و غيضها منه .. لكنه يزعلها جي و يخليها تبجي وفي هالحالة عمرها ماصارت!!!
سارة: والحين صارت
عبدالرحمن: ام الهنوف حلفتج بالله تقولين لي شو مستوي
سارة: والله مدري شقول لك ياخوي .. انا مادري شنو اللي قالوه و شاللي صار بيناتهم
عبدالرحمن: بس انا حاس انج تدرين بالموضوع