¤؛ ° الجزء الثاني و العشرون °؛ ¤
في بيت بو عبدالرحمن....
وسمية: كلووووووولويش ... بالمبارك يا ولدي منك المال و منها العيال ...
و طبعا الحريم << دموع الفرح ...
عبدالرحمن: الله يبارك فيج و يخليج لي يا يمــه .. مادري ليش الحريم كلهم جذي يفرحون يبجون يزعلون بعد يبجون .. ههههههههههه
سارة: ههه فديتها الغالية متونسة لك .. اخيرا بتزوج ولدها الكبير
عبدالرحمن: زين متى نملج .. ياللا انا مستعيل ..
سارة: هههههه الحين توها الموافقة صارت .. اصبر شوف طلباتهم و متى يمديها البنت تجهز نفسها ...
وسمية: هيه و احنا بعد عشان يمدينا .. لازم نسوي عرس لا صار و لا استوى ترمس عنه كل العربان ...
عبدالرحمن: ههههههه صج شسمها حرميته؟؟ .. << وكان واضح عليه الحيا لما قال حرمتيه
سارة: فدييييته خويه .. حرمتك اسمها سماح .. و اهي اسم على مسمى سبحان الخلاق ..
وسمية: هيه والله هالبنت ادخلت قليبي من شفتها... و الله يا سارة انتي هب سهلة عرفتي تختارين منو لخوج
سارة: طبعا خويه ريال و لا كل الرجاجيل ولازم ياخذ له حرمة سنعة ولا كل الحريم ... و هالبنت ربيعه ميثا اخت بوالهنوف ..طيبة و حلوة و خفيفة دم وعقل و من عايلة محترمة .. و ما شفت عليها شي.. والأهم انها تستاهلك وانه اختك ...
عبدالرحمن: الله كل هذا في حرميته ... يا فرح قلبك يا عبدالرحمن هههههههههههه
وسمية: الله يفرحني فيك و في عيالك ان شاء الله يالغالي ..
و وبدأت تجهيزات الملكة و اللي بعدها بسبوع بتصير حفلة الخطوبة ... الكل كان مرتبش ووصل خبر خطوبة عبدالرحمن إلى عايلة السالم ...
********************************
في بيت السالم ....
شما تكلم وسمية ام عبدالرحمن في التلفون ..
وسمية: عاد يا وخيتي لا تخلين انتي و البنات لازم تجون ..
شما: ان شاء الله يا وخيتي و الله يبلغج بعيالج كلهم ان شاء الله ..
وسمية: حتى مرايم لازم تجي ... مهما كان احنا اهل و حبايب حتى لو ما كان طلبنا عندكم .. و الزواج قسمه و نصيب ياوخيتي ...
شما:احنا ما رفضناكم يا عبدالرحمن و انتي تدرين بنات هالايام كله يفكرون بدراستهم كأنهم اهم اللي بيصرفون على بيوتهم بعد ما يتزوجون ...
وسمية: الله يرزقها بولد الحلال اللي يستاهلها ... و بنيتنا سماح فديتها ما اتخير عن مرايم ...
شما: تستاهلون و انه اعرفها هالبنت مؤدبة و من عيلة حشيم .... عالبركة ان شاء الله ...
و اكملت شما و وسمية سوالفهم اللي لا تخلوا من الحش و و القيل و القال عن فلان و فلانة << عوايد حريم ما اتغير مهما يصير !!...
و اغلقت شما السماعة و كانت مرايم نازلة من الدري و معاها رباب ...
مريم: مرحبا الساع خالتي
رباب: مراحب امي
شما: مرحبا مليوون عيالي ...
جلسوا في الصالة و شغلت رباب التلفزيون .. و مريم تسولف مع شما ...
شما: ام عبدالرحمن متصلة لي من شوي .
مريم بتفاجأ و استغراب: شنو؟ منو؟ ليش ؟؟
شما: تبي تعزمنا على ملكة ولدها ..
مريم: أي ولد؟
شما: عبدالرحمن بعد منو ...
مريم بفرح و تفاجؤ: صج والله ؟! مبروك مبروك يستاهل والله ... منو بياخذ؟
شما: بياخذ سماح بنت العالي ...
مريم: هيه عرفتهااااا ... بنية زينة .. هذي رفيجة ميثا اخت زوج سارة اخته الروح بالروح ...
شما:هيه قالت لي انها اختيار سارة بنتها ...و أكدت علي ان لازم نروح ...
مريم: هيه خالتي ما فيها شي روحي يستاهلون ...
شما: و قالت لي بعد انتي لزام تروحين و الحرمة مو زعلانة منج ... هههههههه و من كلامها زعلانة عليج انج خسرتي واحد مثل ولدها عشان الدراسة ....
مريم: ههههههه .. يستاهل احسن مني الله يوفقه ان شاء الله .. بس انه فشلة اروح ...
شما: ماحد يدري انه خطبج ... الشي صار بيناتنا .. واهم ما بيطلعون الحجي على ولدهم و احنا ما بنرمس على بنتنا ...
مريم: بس انا استحي اروح .. احسها مب عدلة ... او نروح الحفلة بس ..
شما: ما فيها شي يا بنتي ... نروح حالنا حال المعازيم ... نبارك لهم و نرجع ... و الملكة بتصير ف يبيت العروس ..
مريم: اوكي خالتي اللي تشوفينه ...
شما تكلم رباب ...
شما: يمه رباب وين بدور عنج؟؟
رباب مبوزة : راحت بيتهم تسوي التعديلات الاخيرة على غرفتها ...
شما تكلم مريم: شمس بعد معها ؟؟
مريم: هيه .. راحوا مع اعمامي يكملون اغراض البيت .. احتمال ينتقلون هالاسبوع ...
شما: على خير ان شاء الله بيت مبروك ...
رباب: يمه انا كل يوم بعدين ابي اروح بيت عمي تعودت عليهم شلون حالي يصير بعدهم ...
شما: ان شاء الله يا بنتي .. الحين اهم في العين و بيتهم جريب شارعين بس بينا و بينهم هب نفس اول اهم في بو ظبي ونحن هني ...لكن صج لهم بيكون وحشة .. مالوا علينا البيت...
وهالوقت دخل عليهم اشخاص.. من هم؟... غريبة ...
بنات عمهم راشد زينة و سارة .. توايهو البنات مع بعضهم و كانت زيارة سعيدة غير متوقعة ...
مريم: هاا بناااات شو هالزيارة الحلووووة ...
زينة: ههههههه لا تخفون راح تشوفون من هالزيارات وايد ...
مريم: صج؟؟ شلووون؟
سارة: ابويه الحينه مع عمي ناصر و يدي في الميلس ...
شما: شو يا بنتي شو مستوي خبرينا..؟؟؟
سارة: ما راح نرجع بوظبي خلااااااص ...
زينة: بنكون في العين .. قريبين منكم ...
مريم: صج صج... أي شلون عاااد فهمينها ...
دخل عليهم عمهم راشد مع ناصر و بوفهد بعد ما عدلت شما حجابها ...
راشد: مرحباا الساع من احمد شلونج ...
شما: مرحبا مليون و لا يسدن في ذمتيه .. شالحك با بو سيف ..
راشد: بخير و نعمة الحمد لله ... شحالج بنتي مرايم و انتي رباب شلونج ...
رباب و مريم: الحمد لله عمي يسرك الحال ...
الجد سالم: ابشروا يا عيال .. عمكم راشد بينتقل للعين اهو وعياله.
مريم: صج عمي .. مبرووك .. و اشغالك و شركتك ...
راشد: قريب راح نفتح فرع يديد في العين و بيكون اهو المركز لنشاط الشركة ... و قررت اني استقر في العين جنب العايلة و لما عرفت ان اخوي فهد و سعد اشتروا بيت جريب سألت مقاول عن بيت جريب منكم و لقى لي بيت حلو بالشارع اللي جنب هنا .. فقلت ماراح اخبركم لحد ما اشتري البيت و اسويها مفاجأة لكم و للعيال ..
شما: قرية علينك يا بوفهد بلمة عيالك حواليك ...
الجد سالم: بوجه بيك يا بنتي ... الحمد لله اللي حب يريحني و يطمني عليكم قبل لا الله ياخذ امانته ..
ناصر يحب ابوه على راسه: لك طولة العمر يا بوفهد ان شاء الله ....
يدخل سيف و مبارك ...
سيف : مرحباا السااع
الجميع: مراحب مليووون
و هاليوم السعيد تجمعت عائلة السالم .. الابناء و الاحفاد في ظل الجد سالم و الجدة حصة ... كل اب و ام يعرفون كيف يكون الشعور حين يحس الوالدين بلمة او لادهم و قربهم من بعض و ان قلوبهم على بعضهم البعض .. فأبتسامة الابن بلسم لجروح الأم و نجاح الابن فخر و اعتزار لأبويه ...
كان عشاء رائع في حديقة المنزل الصغيرة ... اكل و شواء و قهقات تعبر عن الفرح و البهجة بهاللمة .. كان الحريم جالسين مع بعض بعيدين قليلا عن جلسة الرجال ... لكنهم يشاركونهم في الحديث و الضحك ايضا ..
الجد سالم: بويه سيف شنو تدرس بالجامعة ..
سيف: هندسة معمارية ..
الجد سالم: ما شاء الله يا ولديه .. ان شاء الله تعمر هالبلد انت و امثالك
زينة: هيه انه واعدني يصمم لي بيتي بشرط ما يكون له مثيل بالامارات كلها ..
سارة: هههه وانه بعد واعدني هب بس انتي ...
سيف: وانه قلت لكم بيت حرمتيييه ما بيكون له مثيل ... بعدها افكر فيكم .. ههههههههههه
زينة: هههه الله يسامحك ... مسكينة اللي بتاخذ بتطيح في جبدها ... و طلعت له لسانها << حركات يهال
سيف: اوريج .. من حلاة ريلج نحول يعني ... هههههههه وصيتي لج تاخذين واحد اسمه نحول عشان تصيرون زينة و نحول .. خخخخخخ
زينة: اتطنز حظرتك .. انا زينة ابوي ... و يا حظه اللي بياخذني ..
سيف: استحي على ويهج زين .. حشى مزهوقة على العرس ..
سارة: ههههههااااي احرقوا ويهها ..
زينة: جذي تفشلني لكن معليه اوريك اللي يرمس معك بعد ... بعدين بتقول لي تكفين سوو لي حلاو من ايدج شوف من يرد عليك ...
مبارك: هههههه زين تسوين فيه .. اقول زينة صج تعرفين تسوين حلاوو؟؟
زينة: هيه بتستهين فيني انت بعد ...
مريم: ما عليج منهم حبيبتي .. اصلا هالشباب احنا ما ناخذ على كلامهم ...
سارة: اقول مرايم وين فطيم قالت بتنزل و للحين ما يت ..
رباب: اكيد جالسة اتكشخ و تعدل في نفسها يعني نطروها لي باجر.. ههههههههههههههه
بدرو:هههههههه اسكتي لا تيي الحين تسمعج و تسوين لنا سالفة ...
شمس: كاهي اوصلت .. ياللا سكرو عالموضوع
فطيم: مرحباا الساع للجميع