السلام عليكم ورحمة الله وبركاته
بالصلاة على النبي وآل النبي صلى الله عليه وآله
اليوم ذكرت اليكم سالفة من عند يدتي المرحومه
هذا يا طويلين العمر ومحفوظين السلامه
دخلت على يدتي الله يرحمها ولقيتها قاعده وفي ايدها
ياهل صغيرون
أنا :- السلام عليكووووووووم
يدتي :- ( بصوت خفيف ) عليكوووووووووم السلام اششششششششش
خل الياهل ينام لا تقعده
أنا :- ان شاء الله أماه
وقمت أراقب اللي تسويه وقلت با أسألها بعد ما تطلع من الدار
وبعد شوي طلعت يدتي وعلى طول قلت اليها تعالي
باأسئلش
يدتي :- ان شاء الله بس با أروح --- الأدب - <<<تعرفوه ؟؟؟؟؟؟؟؟؟؟
ورحت البقاله وشريت اليها ( عرنجوز) وعرانص <<<تعرفوووهم ؟؟؟
ورجعت الا يدتي قاعده تحارسني
يدتي :- هاه وين رحت
أنا :- رحت الدكان
يدتي :- رحت الدكان ، أني قلت هذا أكيد يلعب عليي قال با أييش وطار ويا صدقانه
أنا :- لا أماه ، ودانا شريت الش عرنجوز وعرانص ......تفضلي أماه
وأخذتهم وحطتهم في مخباها
أنا:- أماه اليوم أنا جاهز بأوراقي
يدتي :- ويش تبغى تسأل عنه اليوم
أنا :- ويش أبغى أسئل ، أبغى أسألش عن اللي كنتي تقوليه للياهل في الحجره
يدتي :- اييييه ، هذا يا ..........يا ولد ........... زي ما تعرف عني أني ما الله رزقني بأولاد
وكل ما جاني ولد ربك اختاره
أنا :- أدري أماه ، الله يرحمهم ان شاء الله
يدتي :- بس الحمد لله الله رزقني ببنات الله يخليهم وولاد بناتي أرحم عليي من الزمن
أنا :- الله يسلمش ويعافيش أماه وتعيشي وتشوفي ولادهم وولاد ولادهم بعد
( وعاشت يدتي حتى شافت ولاد ولا بناتها والحمد لله )
يدتي :- الله يسلمكم ويخليكم لأبهاتكم وأميماتكم يالله
أنا :- الله يعافيش ان شاء الله ، والحين ابغى أعرف ويش كنتي تسوي ويا .......ولد..........
أو لول كيفه تنوموا اليهال
يدتي :- أني با أقول الك شويه منه وشويه مناك زين
أنا :- زين
يدتي :- لول اذا المره قربت ولادتها نقعد نسهر كل وقت على وحده وبعض الاوقات ننام كلنا وما نقعد الا المره بس يبغى اليها قطاع السر فنروح ننادي على أم ...... الله يرحمها وهي اللي تقطع السر
أنا:- يعني ما تروحوا الدختور
يدتي :- لا دختور ولا سبيتار ، حلاة الفوب رقعته منه وفيه ويش لينا بسبيتار تالي يقصوا بطنها ورقعها وياهم
بدل الأربعين تقعد المره سنتين وبعدها ما تطيب
أنا :- الله يعين ، وتالي أماه
يدتي :- وقبل ما تولد المره يجهزوا اليها أغراضها ، فيروحوا يشتروا اليها طاقة أبوعابد ويطرزوها اليها قماطات
ويشتروا اليها - منز- ويعدلوا كرفايتها وحاجات وايد يسووها
أنا :- يعني يجهزوها كأنها بتعرس
يدتي :- ايه كأنها بتعرس ، وبس تولد يسووا اليها خبيصه علشان تتقوى
أنا:- والريال
يدتي :- الريال يسووا اليهم عزيمه ...عاد هذا اللي عنده ولا الناس لول يا ولدي ما عنهم والخير بالموجود
أنا :- وتالي
يدتي :- وتالي تعرف بعد يجوا الناس يهنوا ويباركوا
أنا :- زين أماه ، وبا أسألش عن اللي قلتيه لـ.....ولد .........وهالنشيده اللي قلتيها
يدتي :- ان شاء الله يايتنك في الكلام ، لول اذا الياهل بينيموه يا خذوه ويقمطوه ويدخلوا وياه الحجره
وتقعد أمه تقول اله هالنشيده على قولتك :-
وليدي نام نومه هنيه *********نومة الغزلان في البريه
وليدي نام طيب الله نومه ****وعدو وليدي ما يتهنى في نومه
له الرزق مقسوم والغبن زام ****وليدي نام وله رب ما ينام
يحفظه موسى وعيسى ****ومحمد وعلي عليه السلام
وتقعد المره تردد هالشي الين ينام الياهل
أنا :- زين يمه واذا قعد الياهل بعد يقولوا اله شي
يدتي:- أكيد يقولوا اله شي
أنا :- ويش يقولوا اله
يدتي :- يقولوا اله هالنشيده على قولتك :-
صباحك صباحي
بالورد واللقاحي
صباحك صباحين
صباح الكحل في العين
صباح يطرد الفقر
صباح يوفي الدين
صباح قال يا يمه
قريت اليوم جزئين
أنا :- الله حلو اللي قلتين يمه اليوم وبس اييب الى ولد با أنومه زي كده
يدتي :- أيه الله يرزقك ان شاء الله وتتذكر وتنومه زي كده ، مو زي الحين يحطوا في بوزه هالسهايه
ويالله انخمد
أنا :- لا والله أماه ان شاء الله با أسوي زي اللي قلتي
يدتي :- ان شاء الله
أنا :- زين أماه واليهال اللي ما يناموا ويش تسووا اليهم ؟؟؟؟
يدتي :- ويش نسوي اليهم ..............
وطق طق طق ......طرق أحدهم الباب
وانقطع الكلام ....وجاء زوار الى يدتي
وسكتت يدتي عن الكلام المباح
عندما طلع الصباح
وانتظروا ويش يسووا الى اليهال اللي ما يناموا ؟؟؟؟؟؟
تحياتي
رد مع اقتباس
المفضلات