بسم الله الرحمن الرحيم

السلام عليكم ورحمة الله وبركاته

هذا يا محفوظين السلامه ذاك اليوم
دخلت على يدتي المرحومه في زي هالايام
مولد الإمام الرضا عليه السلام
وهنيتها بالمولد وحبيت راسها وقعدت وياها شوي

يدتي:- هلا والله
أنا:- الهلا كله بيش أماه عساش بخير
يدتي:- الحمد لله رب العالمين
أنا:- أماه سمعت أمي تقول بتروحي الحج هالسنه

يدتي:- أيه والله عزمنا الحج هالسنه ويا ملا ......

أنا:- الله يوديش واييبش بالسلامه ان شاء الله وقلدناش الدعاء والزياره

يدتي:- علينا الدعاء وعلى الله الاجابه ان شاء الله
أنا:- تآمري على شي ولا شي

يدتي:- ما يامر عليك عدو ولا ظالم ولا واحد ما تحبه ان شاء الله

أنا:- متى بتروحوا ان شاء الله

يدتي:- ان شاء الله يقولوا الخميس الياي بنركب الباص والمقيطعي يقول أول شي بنروح مكه وتالي المدينه ويا شيخ ........

أنا:- على خير
يدتي:- صمايل ، عفر نسيت

أنا:- خير ويش نسيتي عفر
يدتي:- داكوه عند أمك سعنّه (دوخله) وعطيتها فلاف سعنّات ( دوخله) قول ليها ما تنساهم اسقوهم علشان يفلتوهم لينا في عين ام عمار ولا في القشوريه ولا في البحر زين

أنا:- أييييييييه زين با أسئلش عن السعنّه
يدتي:- قول إسئل حاضرين
أنا:- أول شي كيفه تسووا هالسعنّات
يدتي:- أول شي نسويهم من الخوص ونحط فيهم شوية رمل وشوية سماد علشان يكبروا بسرعه ، ومن ايي يوم العيد نرميهم في السد ولا في عين أم عمار ولا القشوريه ولا في البحر

أنا:- ايه أتذكر يوم أنا صغير نروح التوازي ونفلت السعنات حقنا هناك وأنا ما أدري لاويش

يدتي :- الله يرحم التوازي راحت
أنا:- الله يرحمها الحين ما فيه الا مواطير عليها
يدتي:- يالله كل شي رايح الا وجهه الكريم

أنا :- سبحانه

يدتي:- ايه ويوم العيد نروح ونفلتها علشان الحجاج يسلموا وتوصل اليهم سلامنا ويصير دربهم سلامه

أنا:- ويش تقولوا يوم اللي تفلتوا سعنّاتكم ( الدوخله )

يدتي :- نقول يا محفوظ السلامه ......

دوخلتي(اسعنّتي ) حجي بي
حجي بي حجي بي
لامن يجي حبيبي
حبيبي، حبيبي
حبيبي رايح مكة
مكة، مكة
أومكة المعمورة
المعمورة المعمورة
فيها السلاسل والذهب والنوره
النوره، النورة
حجيت بش ييمة
ييمة ييمة
راويتش قبر محمد
محمد محمد
صلوا عليه وآله وآله وآله
ياليتها لومية
مزروعة في البستان
يقشرها عبد الله
وياكلها سلمان
سلمان يابو جوخة
يمراطن العجمان
طلوا خواتي طلوا
شوفوا البحر طميان
شوفوا شراع أبيي
ابيض من القرطاس
شوفوا شراع العدو أسود من الطفو
عندي طويرٍ احمر
وأسكره بالسكر
وسكر على سكر
وغضارتين صيني
يارب تهديني
وأحج بيت الله
وأقرأ الفلافيني
يا ميقعةالمحلب
خليني بتدحلب
بدحلب الصواني
ياسلوقة العيد العيد
ودي أبيي بعيد أبعيد
أو حججية أوزورية
أو جيبيه بالسلامة
سلامة الغنامة

وتالي نفلتها في الماي

أنا:- الله ، الله حليوه

يدتي:- عيل الحين الواحد يروح الحج وايي وكنّه ما راح

أنا:- اي والله هداكوه ولد .......راح ويا اللعام وعوّد

يدتي:- الله يغربله يعني عودت حليمه لعادتها القديمه

أنا:- بعد ويش ، الله يهديه

يدتي:- زين يا ولدي با أوصيك على شي وأني في الحج تسوّيه
أنا:- تآمري أمر أماه

يدتي:- *)&^%$#$%^&*)&^%$#$%^&*<<<مشفّر للسالفه اليديده

أنا:- ان شاء الله

وبعدها سكتت يدتي عن الكلام المباح
بعدما شفّرت الكلام اللي راح

وان شاء الله ظروف العمل تصيرok
ونييب اليكم سوالف يدتي بسرعه

تحياتي