السلام عليكم ورحمة الله وبركاته
اللهم صل على محمد وآل محمد الطيبين الطاهرين

في البداية اقدم أسفي لكثرة انشغالي
في الشهر السابق
ولم أكتب أي شيء خلال الفترة السابقة
------

هذا يا محفوظين السلامة ذاك اليوم ياي من بيت خالتي
بعدما وديت ليهم صالونة مسويتنها الوالده
واشتهت لأختها - الله يرحمها - وحطت اليها
في غضارة شويه
وأنا راجع من بيت خالتي شفت صديقي وهوه على باب بيتهم
أنا:- هاه أبوجاسم ويش تسوي
محمد:- دحنا قاعدين الصبيان راحوا الحبال عني
أنا:- خلاص يالخوي ، تروح وياي عين أم عمار
محمد :- والله فكره ، با أمر عليك عند بيتكم
وبس أرمي حيره على دريشتكم يعني أنا
أنا:- خلاص ولا تنسى تييب وياك الميوه
محمد :- النص بالنص
وحطيت ريولي على قولتهم
ووصلت البيت وعلى طول رحت الى يدتي

أنا:- أماه بنروح نتسبح في عين أم عمار
يدتي:- انتفتوا لروحكم مو تغرقوا
أنا:- ولا ما نعرف نتسبح ، ولا يهمش أماه
يدتي:- لا تنسى تييب ليي( *$%^&*)
أنا :- ما عليه ما نسيت ودانا با أخذ كيس عشان أييب لش وااااااايد
يدتي :- وادي با أطلّع قوطيتي الماو
وسمعت صوت الحجره على الدريشه
أنا :- يالله مع السلامه با أروح الحين
وذهبت الى المطبخ وأخذت ميوه للروحه

وخرجت الى صاحبي ومشينا الى العين ويكفيكم واحنا رايحين ما خلينا لا برتقاله ولا تفاحه ولا شي
الا أكلناه ...وما بقت عندنا الا فنديتين حق بعد السباحه
ووصلنا وشفنا العين صافيه وما أحد وصل من اللي يسبحوا هناك
وقمنا نيمع الطين اللي وصتني فيه يدتي وحطينا في الكيس علشان نتقاسمه بعدين
وقمنا نصيد في الحراسين في العين وقعدنا ما فيه الا طبه رواسي وطبه قلّه وطبه من فوق النخله
وشوي الا يايين ناس يتسبحوا
وشويه شويه وانترست العين من الناس
فيه ناس عاد فنانين في السباحه
وفيه واحد الى الحين اتذكره يركب من فوق نخله جنب العين ويطب من فوقها
وذيك الأيام الواحد مو بس يتعجب من هالشي الا يرتفع حواجبه مفلات مساحة السياره

ويوم تعبنا قمنا من العين ولبسنا ورجعنا وفي الطريق شفنا في طريقنا نخله غره وفيها خَلاَل وقمنا ويمعنا بعد شوي
ووصلنا لبيتنا وتقسمنا كل شي
ودخلت البيت
أنا :- سلام عليكم
يدتي:- عليكم السلام ، يا هلا بالحامل والمحمول
أنا:- هلا بأمي يا هلا بها الله يعطيش العافيه لا تستعيلي على رزقش هذاهوه في الكيس وياه شي فاني بعد

يدتي:- ويش هوه بعد وياه
أنا ( وقد فتحت الكيس وأعطيتها منه):- ويش رايش
يعجبش هذا
يدتي:- ايه ، بت .....( نادت على حلوة اللبن)
وجائت أمي
حلوة اللبن :- خير آمري أماه
يدتي:- شوفي ولدش ويش ياب
وأعطيت الوالده شويه من الطين وشويه من الخَلاَل

حلوة اللبن :- ايه يا محلا الخلال، عطاك الله العافيه وسهل الله الك دربك يااااارب

يدتي:- بت .....سوي لينا قلادة خلال اليوم
حلوة اللبن :- خلاص ولا يهمش بعد شويه أسويها
أنا :- عليكم بالعافيه
أنا الحين با أروح أنام بكره ورايي قعده من الصبح
حلوة اللبن :- ويش وراها هالقعده من الصبح

أنا هذا سر وبكره بتعرفوا

وانتون تصبحوا على خير وبعدين بتعرفوا

فمان الله