اللهم صل على محمد وآل محمد
السلام عليكم ورحمة الله وبركاته

من زمان ما طلينا عليكم ، الله لا يشغلكم الا بطاعته
شوي مشغولين ويا هالعمال ما عليه اسمحوا لينا
المهم هذا يا محفوظين السلامه
ذاك اليوم مر عليي واحد من الصبيان وعطاني
( يدوبه ) وقال لي هذي من عند أبوه اليكم
ويقول لك سلّم على أبوك
ودخلت البيت وحامل اليدوبه وهيه ملفوفه بالليف
وشافتني حلوة اللبن
حلوة اللبن :- ويش اللي عندك
أنا :- هذي يدوبه من عند .......ويسلم عليكم
حلوة اللبن :- الله يسلمه ورحم الله والديه ، والله توها يدتك تقول نفسها في يدوبه فحال
أنا :- على نياتكم ترزقون
ورحت الى يدتي ، وعطيتها شوية يدب في مشكاب ويوم أكلت منها شوي
يدتي:- الله أيه هذي اليدوبات ولا ما يصير
أنا :- يعني عجبتش
يدتي:- ايه رحم الله واليه اللي يابها
أنا :- هذي من عند........
يدتي:- ايه الله يرحم والديه هذا يا .....يا ولد.....كان جار يدك في النخيل
أنا:- يعني يدي كان عنده نخيل ذيك الأيام
يدتي:- أيه وكان أحسن واحد يسوي كراره في الديره كلها ، بس ولاد الحرام ما خلوه في حاله
أنا:- ويش كان يسوي يدي
يدتي:- يسوي الكر اللي يركبوا به النخله
أنا :- زين أماه ووينه يسووا العكفات
يدتي:- يسووها عند الحدادين والنخلاوي هذي عدته
عكفه ويا كر ويشتغل في النخيل
أنا :- الله يرحم أيام النخيل
يدتي:- اي والله الله يرحم ايام النخيل ، والله ذكرتني مشتهيه سمّنه
أنا :- ولا يهمش بكره نروح الحَبَال ونصيد الش ان شاء الله سمّن ومدقيه
يدتي:- خلاص بس انته اللي تسويهم
أنا:- ما يهمش أماه
ورحت الى أمي وقلت اليها إن بكره با أروح الحَبَال عشان أصيد ليدتي سمن ومدقيه واللي يطلع في البر
وطلعت الفخ وبدلت الربله اللي فيه وعدلت الحنيّه
وجهزته الى يوم فاني
ومن الصبح طلعت ويا واحد من الصبيان ورحنا إشترينا لينا ستة (عناييش) ( عناقيش) (يعانيش) جمع يعنوش
( هذا كائن حفار يطلع اذا سقوا المزارع )
ورحنا البر ونصبنا فخوخنا بعد ما حطينا فيهم اليعانيش فيهم وانتظرنا ......وانتظرنا .......لين >>>>>طق
أنا فخي فيه سمّنه .......وفخ خويي فيه مدقي
ومره فانيه نصبناهم
أنا فخي فيه صقرقع ....وفخ خويي فيه سمّنه
وكررنا نصاب الفخ لامن قرب الظهر
وحصليتنا ذاك اليوم
سبع سمّنات وستة مدقيه وأربعة صقرقعات
وإحنا راجعين بعد بالفلاتيات صدنا لينا عشرة عصافير
وحمامتين نخيل
وتم تقسيم الغنيمه بيننا وأخذت أنا السمّن والحمامتين والباقي أخذهم خويي ورحت البيت بصيدي الثمين ودخلت على حلوة اللبن وعندي الغنيمه
وقمت ملشتهم ونظفتهم وعطيتهم حلوة اللبن
وطبختهم لينا
ورحت الى يدتي
أنا:- أماه الصيد زين اليوم
يدتي:- ويش صدتوا
أنا :- خير من الله
وبعد شوي يابتهم حلوة اللبن وياهم خبز عربي
وقعدنا ناكل فيهم حتى .........

>>>>أذن الظهر وقمنا للصلاة

وسكتنا عن الكلام المباح
وقمنا للصلاة والعباده
سلام